San Mateo 2
2
De yu nu rsyaꞌ mod nu ricy bel baa gua güii dey Jesuuz
1Jesuuz gul mi tub gyedz nu ri lo yu ni Judea nu la Beleeng. Gul mi tiem nu Herodes nac yu rey. Orzeꞌ bri la be mbecy nu bruu gashtal zeꞌ nu driib doo, briy Jerusaleeng. De yu zeꞌ nac dey mbecy nu rsyaꞌ de mod nu ricy bel baa. 2Orzeꞌ bdugyiꞌ dey:
―¿Ca lugaar gul rey ni de mbecy Israeel? Gun gashtal zeꞌ nu driib doo bzaac de̱ bel baa nu briic muesht nu bi gul yu. Ndeꞌ nu yap de̱ nu griib zily de̱ yu ―na dey.
3Na ornu güeñ rey Herodes ndeꞌ, orzeꞌ tonaꞌ la guc deet nañ lardooy. Nunu ni ziꞌl guc deet nañ lardoo deꞌ zir de mbecy gyedz Jerusaleeng ornu güeñ yu de coz zeꞌ. 4Orzeꞌ Herodes bredz yu de uz zub lo, nunu bredz yu de yu nu rlyuu leey nu bzeeñ Moisees nu gyatublaazh dey. Orzeꞌ bdugyiꞌy lo dey ben ca lugaar gal Mesías, biñ nu ca lo cuen nu cyid nu co mbañ de mbecy. 5Orzeꞌ de yu zeꞌ nay:
―Gal mi tub gyedz nu ri lo yu ni Judea nu la Beleeng, gun ni pcaa tub yu nu mnii por cuen ni Ñgyoozh ornu pcaay:
6Ru Beleeng, tub gyedz nu ri lo yu ni Judea,
ru walab tub gyedz nu ich zir zu
par deꞌ zir de gyedz ily nu yuꞌ lo de yu ni Judea,
gun zeꞌ nu ri ru gruu zac tub biñ nu gyub ic.
Mi zeꞌ gyub ic mi de mbecy ne̱, de mbecy Israeel.
Ni pcaa de yu nu mnii por cuen ni Ñgyoozh ―na dey.
7Orzeꞌ Herodes dze ga bredz yu de yu nu rsyaꞌ mod nu ricy bel baa. Gazeꞌ nu bdugyiꞌy lo dey la gaal tiem nu bruu zac bel baa zeꞌ. 8Orzeꞌ bzuu nez yu dey zay Beleeng. Orzeꞌ nay:
―Gua der gal zeꞌ. Nap yub der mdoo zeꞌ. Ornu gyap ru yu zeꞌ, orzeꞌ yeedaꞌ der laabaꞌ par ii gun orzeꞌ gyoor rishlo̱. Gun niꞌ ya̱ cha̱ griib zilya̱ yu ―na Herodes.
9Na ornu byaꞌ lo nu bee dey riidz nu rey Herodes, orzeꞌ de yu nu rsyaꞌ mod nu ricy bel baa zeꞌ bruu dey loy zay. Na ornu bi zaab za dey zay, orzeꞌ bruu zacaꞌ bel baa nu bi bzaac dey anzir par zeꞌ nu driib doo zeꞌ. Za ma gashtal zeꞌ nu mbish mdoo zeꞌ. Zeꞌ guca ma. 10Ornu bzaac dey bel baa zeꞌ, orzeꞌ tonaꞌ la bet lagy yu. 11Orzeꞌ ornu guꞌ dey nañ yuꞌ, orzeꞌ bzaac dey mdoo zeꞌ nu ñaam Li. Orzeꞌ gusu tib dey nunu briib zily dey mdoo zeꞌ. Gazeꞌ nu tub ga la dey pshaal yu ruꞌ cajo̱o̱ niy. Orzeꞌ briic dey or ganim. Briic dey tub lo yaal nap nu dzi ñgyup sac ganim. Nunu briic dey tub lo gaꞌ bid nu zguul tiꞌ nu la mirra ganim. 12Orzeꞌ despuees mnii Ñgyoozh lat pcaal dey nu cueꞌ cush cyay ded yu lo Herodes. Orzeꞌ reñaꞌ nez bish cya dey yay par ledz yu.
See nuy Li za nu ngach dey mdoo par Egipto
13Despuees ornu bi ya de yu nu rsyaꞌ mod nu ricy bel baa zeꞌ, orzeꞌ bruu zac tub anc ni Ñgyoozh Shuaan den lat pcaal See. Orzeꞌ nay rab yuy:
―Wesh te. Gush mdoo ii nu ñaam. Orzeꞌ na gua dze der gashtal lo de yu ni Egipto. Zeꞌ cyiiñ ru gashtal ornu ya̱ ne̱e̱ lor, gun Herodes yub yu mdoo ii par nu cut yuy ―nay.
14Orzeꞌ See lueg la wesh tey, nunu gush yu mdoo zeꞌ, nunu pteey ñaa mdoo zeꞌ. Orzeꞌ gush nez yu zay laab nañ rel zeꞌ, za nuy mdoo zeꞌ nu ñaam par Egipto. 15Zeꞌ pcyiiñ dey gashtal gut la Herodes. Ni guuc ñi par nu byuꞌ niñ gal nu mnii Ñgyoozh Shuaan den lat de riidz nu pcaa tub yu nu mnii por cuen nim ornu nam: “Ya̱ bredza̱ iꞌña̱ par nu gruum Egipto”, nam. Ni pcaa yu nu mnii por cuen ni Ñgyoozh.
Herodes pcaay mbecy nu cut yu de yu nguzh miꞌ
16Na ornu gud lagy Herodes nu de yu nu rsyaꞌ mod nu ricy bel baa zeꞌ nu bguu dey yu, orzeꞌ tonaꞌ la guzi lagy yu. Orzeꞌ bicy yu mandaar nu cut mbecy de yu nguzh miꞌ nu yuꞌ ñaꞌn cyup par gash. Cut dey de yu nguzh nu yuꞌ Beleeng gal nu de yu nguzh nu yuꞌ dub yub la gaab ga ruꞌñ. Ni mod bicy yu gun gush yu tiem nu bruu zac bel baa gal nu mnii de yu nu rsyaꞌ mod nu ricy ma zeꞌ. 17Ni mod guc ñi par nu byuꞌ niñ gal nu pcaa Jeremías, tub yu nu mnii por cuen ni Ñgyoozh ornu pcaay:
18Lat gyedz nu la Ramá zaab tiꞌ mbecy.
Tonaꞌ la ruun dey.
Tonaꞌ la ricy dey sentiir.
De yu nu ruun zeꞌ, ndeꞌ nez Raquel.
Ruun dey nu nac iꞌñ yu.
Tees walagy dey nu cuic mbecy consuel niy
gun dela de iꞌñ dey bi gut yu.
Ni pcaa Jeremías.
19Despuees ornu gut Herodes, orzeꞌ tub anc ni Ñgyoozh Shuaan den bruu zacaꞌy lat pcaal See lat nu rcyiiñ yu Egipto. 20Orzeꞌ nay rab yuy:
―Wesh te. Gun gyar nu yu nguzh zeꞌ nu ñaam. Yaa par lo de yu ni Israeel, gun na bi gut yu nu rlagy cut yu nguzh zeꞌ ―nay.
21Orzeꞌ See wesh tey ya nuy yu nguzh zeꞌ nu ñaam Li. Yay par lo de yu ni Israeel. 22Tees ornu güeñ yu nu Arquelao byeeñ yu lo uz yu Herodes nu riib ic yu Judea, orzeꞌ gudzib yu ñgyay lugaar zeꞌ. Orzeꞌ laabaꞌ lat pcaal yu mnii Ñgyoozh loy lac mod gyicy yu. Orzeꞌ guay tub lugaar ni Galilea. 23Na ornu briy zeꞌ, guay pcyiiñ yu tub gyedz nu la Nazaret. Ni guc de ndeꞌ par nu byuꞌ niñ gal nu mnii tub yu nu mnii por cuen ni Ñgyoozh ornu mniiy nu mbecy niiy nu Jesuuz nac mi tub mbecy Nazaret.
Currently Selected:
San Mateo 2: zpz
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2004, Wycliffe Bible Translators, Inc. All rights reserved.