ZLI VIRZI 14
14
Abram mulum bugawla ar buy madiɗa mesene naŋhay
1Angi vi nah na, Amrafel buy madiɗa ngi Sineˀar, Aryok buy madiɗa ngi Elazar, kedor-Lawomer buy madiɗa ngi Elam waɗ Tidal buy madiɗa ngi Goyime, 2a gam vurum ati Bera buy madiɗa ngi Sodom, Birsa buy madiɗa ngi Gomor, Sineyab buy madiɗa ngi Adma, Simeber buy madiɗa ngi Seboyim, waɗ buy madiɗa ngi Bela, mbiɗeˀvra buy ngi Soˀar. 3Buy muzlum hanayna, a kusom a ˀayzaw ngi Sidim, a zilaka wurenna mubuliy mutuwak. 4A gam vi kuruˀ ngaˀ cuw ar li hina hirnga a mbuŋ buy Kedor-Laˀomer, amma angi vi mukuruˀ nga makir naŋ na, a slam himaˀ ava. 5Angi vi mukuruˀ nga mufaɗ naŋ kwana, Kedor-Laˀomer ati buy mekelemey taŋ mubummoˀ na, a kiɗaka mizli Refayihey a Astarot-Karnayim, yo Zuzihey a Ham, Emihey ar li micay ngi Kiriyatayim, 6Horihey kwana, buy tayna a kiɗaka taŋ zle a muwã taŋ a Seˀir, a sipaka taŋ hã sesẽŋ a El-Paraŋ, gweˀ avu wuzlaɓuh mikirɗak kirɗak. 7Dar a mbuɗoko bal ti En-Mispat, mbiɗeˀvra Kades. A ngizlaka prok ngi Amalekey gar, waɗ Amorihey micifam a Hasasoŋ-Tamar. 8Akẽh na, buy madiɗa ngi Sodom a girjohoko ati buy madiɗa ngi Gomor, ngi Adma, Sevoyim waɗ ngi Bela, mbiɗeˀvra Soˀar, taŋ gar taŋ a ndaham ngi gi vurum ar sozo ngi Sidim, 9ati Kedor-Laˀomer buy madiɗa ngi Elam, Tidal buy madiɗa ngi Goyim, Amrafel buy ngi Sineyar, Aryok buy ngi Elazar. A gi le buy mufaɗa ngi kiɗa vu ati buy zlum. 10Vigiɗ ngi tebeɗ gudroŋ ada haɗi ar sozo ngi Sidim vuna. Buy ngi Sodom ati ngi Gomoro, a kilam, ara ndilam ar taŋ, mizli mindirama, a kilam nga muwã. 11Bugawlahay a tiɓaka zlili ngi Sodom ati Gomoroyo gar waɗ gwat ngi zumoy taŋ muwam taŋ vu gar, a cohom. 12A jaka Lot, jamba ngi Abram micifi a Sodom tuwa, a cohom taŋ ati zlili naŋhaya gar. 13Yo mbur a loho le pal, a so fa labara naŋ da Abram mbur Hebere. Abrama, hay naŋ gweˀ avu widis madiɗa ngi Mamre. Mamre i mbur Amori, i sukum ngi Eskol ati Aner. Taŋ makir taŋ a jumomˀay le ati Abrama. 14Ti Abram micina, a jaka jamba naŋ le ar vurum na, a hil mizli naŋhay misirkam le ti vurumo, mizli miyaka taŋ a hay naŋ, mizli skat skat makir ti kuruˀ nga dangafaɗa. A sipaka mesene taŋhaya hã sesẽŋ a Daŋ. 15Abram a ngica mizli naŋhaya taˀtaˀ mbeˀ mbeˀe, ara gucoko taŋ ngi duvuɗo guc. A kiɗa buyoyo a ɓula taŋ hã sesẽŋ a Hoba, kini tir vay muŋ ngi Damas. 16A tuɓo gwataya le gar, a tuɓo jamba naŋ Lot ati zlili naŋhay ma, waɗ ngwasay ati mizli mekelemeye. 17Ti Abram mulum bugawla a hirnga Kedor-Laˀomer ati buy ngi seˀehey na, buy ngi Sodom a so ji di hirnga ar sozo ngi Sawe, mbiɗeˀvra sozo ngi buyoy. 18Melkisedek buy ngi Saleme, a so ti gwat ngi zum ati mbaazla. I masay a mbuŋ Bumbulvuŋ Mimadiɗa. 19Dar a ɗuwula mi da Abrama: «I ɗuwuluw mi ti slimiɗ ngi Buymisemuŋ Mimadiɗa, miga muŋ ati hirwuyo. 20Sise da Buymisemuŋ Mimadiɗa, muvuluw mesene ɗikey asi haŋ ɗik na!» Abram a vulaŋ mukuruˀ ngi gwatay, naŋ mutuɓo taŋ gar ar vurumo. 21Buy ngi Sodom a ɓa Abrama na: «Puliy mizli ɓula, ndir ti zlili da ka.» 22Abram a mbiɗaŋ di: «Y'ani i hudum ti slimiɗ ngi Bumbulvuŋ, Buymisemuŋ Mimadiɗa, miga muŋ ati hirwuy. 23Hadam, y'anta zuɓ ko mi, a wuzla gwat ɗikeye ta, ko gugumay gizileh, ko zeweɗ ngi tarak tekeɗe, y'anta zuɓ ta. Vur ka masa ɓi: ‹I ga zlili le da Abrama.› 24Y'anta pul gwat ko neˀ da ya ta, sey gwat gawla ɗuwoy muzumam tewle, ati migir ngi mizli ngisi yahay, Aner, Eskol waɗ Mamre na, taŋ a hilam ti haŋ taŋ.»
Currently Selected:
ZLI VIRZI 14: BEGDC
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible en Langue Guiziga © L’Alliance Biblique du Cameroun, 2011.