ZLI VIRZI 12
12
Buymisemuŋ miɓa Abram, ɓa a pula hirwuy naŋ
1Akẽh na, Bumbulvuŋ a ɓa Abrama: «Bi, pula hirwuy ɗik, muy ɗikey ati hay ngi bunuko. Aru nga hirwuy, ya masa buguw di. 2I sa tiri tika dideˀ ngi sukwi madiɗaŋ, i sa ɗuwuluw mi, yo i sa ga ɓa slimiɗ ɗik a zil haɗa. Mizli a sa lumam ɗuwula tisi ka. 3I sa ɗuwula mi da mizli maɗuwulukuw mi. Amma i sa nisa mizli masa nisukuw. Sukwi ngi mizli ngisi ruwuyoy gar, a sa lumam ɗuwula mi tisi ka.» 4Abram a cuh ka Bumbulvuŋ miɓaŋ di tuwa, Lot aru aseˀe. Abram mupula Haraŋ na, naɓa naŋ ti vi kukur tarnaˀ nga zlum. 5A zuɓa ngwas naŋ Saray waɗ jamba naŋ Lot. A ram ti zlili taŋhay gar waɗ mizli taŋ mihiɗikaka taŋ a Haraŋ. A bam, a ram kini nga Kanaˀan.
Abram angi hirwuy Kanaˀan waɗ a Ezipte
A ra ndilam a Kanaˀan, 6Abram a tuwuɗa hirwuyo gar, hã sesẽŋ ar li mazilaka Sikem, avu kuli widis ngi hirwuy Mamre. Naɓa Kanaˀanay a pam le a diga. 7Bumbulvuŋ a bugo vu da Abrama, a ɓaŋ: «I sa vula hirwuy hana da dideˀ ɗikey.» Abram a ɗiyi li gi mikuli da Buymisemuŋ mubugaŋ vu tuwa. 8A cuh ti kẽh, aru kini nga sarmuwã tisi pas ngi miprik ngi walahay Betel. A ɗiya guɗuk naŋ a diga, ar wala ngi Betel tisi pas ngi pastaˀ waɗ Aya tisi pas ngi miprik. A ɗiyi li gi mikuli da Bumbulvuŋ a diga ma, a tumbuloŋ, a zilaŋ ti slimiɗ naŋ Bumbulvuŋ. 9Dar Abram a kiraha guɗuko nga mbuŋ nga mbuŋ, aru kini nga Negev. 10Ti di nah na, may a gi angi hirwuy nah, Abram a ru, nga Ezipte, ɓa a zuko neˀ a diga, asi may a bul vu le asi ruwuyo. 11Ti taŋ migweˀ ngi ndila Ezipte na, a ɓa ngwas naŋ Saraya: «Cin ɗi, i si na le ki ngwas mukuyu gwatta.» 12Da Eziptehey a sa purukuw le na, a sa ɓam: «Ki ngwas ɗu, a sa kiɗikiy ya vagay, a sa pulukuw ka ti siifa. 13Ambuh, ɓi na: ki sukum ɗu, ɓa a gikiy mezleŋ asi ka, yo ɓa i ndir ti siifa mbele ka.» 14Ti Abram mindil a Ezipte na, Eziptehey a puraka na, ngwasa naŋ kuyu gwatta. 15Mizli madiɗa ngi buy madiɗa ngi Eziptehey, mupuraka na, ara duduɓaka ɓi nah avu buy madiɗa ngi Ezipte, a zuɓakaŋ ngwasa ngi hay naŋ. 16A gaka mezle da Abram asi ngwas a vulakaŋ tumuŋhoy, ˀaway waɗ slahay, zungu mizile ati mongosohoy, beke mizile ati mongosohoy waɗ zlogomohoy. 17Amma Bumbulvuŋ a kuta buy madiɗa ngi Ezipte ati hay naŋ ti bonoy madiɗa wal wal, asi Saray ngwas ngi Abrama. 18Buy madiɗa ngi Ezipte a zila Abrama, a ɓaŋ: «Ki gi i gwat mi hana ka? I ngwas ɗik ngbaŋ na, ki ɓiy di ta vur mike? 19Ki ɓiy i sukum ɗik, i zuɓa ngi ngwas na, vur mike? Wurenna, ngwas ɗike n'ani, tiɓaŋ, cuhu!» 20Buy madiɗa ngi Ezipte a ɓa mizli naŋhaya ɗaˀ, ɓa a ɓulakaŋ ati ngwas naŋ waɗ gwat naŋhay gar.
Currently Selected:
ZLI VIRZI 12: BEGDC
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible en Langue Guiziga © L’Alliance Biblique du Cameroun, 2011.