Lc 17
17
Ay is may ta chi jak' ayc'ay junokxa mactxel
(Mt 18.6-7,21-22; Mc 9.42)
1Max yal Jesús bay eb is cuywom axca ti': Yowalil chi jay juntzan tzet yetal chi on yetax el co nabal, palta ok'bal wal c'ul eb chi ak'on etax el nabal eb yet animail. 2Ta ay mac ijan chi etnen el nabal junok uninto, yel mi watx' chi pixlay oc t'unan junok ch'en yet molino yin is nuk' jun tu',*fn* cax chi k'oklay aytok yul a' mar, yet watx' manchak yetnej el is nabal jun uninto tu'. 3Yuj tu xin, ilekc'al e ba.
Ta ay junok e yet animail chi oc is mul ayex, che tenchanej yin is yobtakil tu'. Ta chi na ba c'ul, che yak' mimanc'ulal yin. 4Caxc'al chi oc is mul ayex ukelok chi ec' c'u, ta chi ul k'an mimanc'ulal yukelal ayex, Majxa wun junelxa, ta ẍi, yowalil che yak' mimanc'ulal, ẍi Jesús.
Ay tzet chi je' juj ta chi jaoc Dios yin co c'ul
5Max yal eb chekbej Cham Jajawil bay axca ti':
—Colwajan jetok yet watx' caw wal chi jaoc Dios yin co c'ul, ẍi eb. 6Axa yalon Cham bay eb tu' axca ti':
—Ta yel che yaoc Dios yin e c'ul, caxc'al jab ch'an che yut e yaon oc yin e c'ul, axca junok bak' mostaza, ok je' e yalon bay junok mimek te' ti' tol chi yocajtek ba yetokc'al xe', cax chi yawon aytok ba yul a' mar, cax ok yiken bay ok e yala'.
A tzet moj yunen mac chi ak'wi serbil
7K'inalok ay junok on ay junok co moso chon ak'on serbil. K'inalok ayic' mulnaj ayon, ma xin iloj calnel ayic'ok, axa yet chi jay paxok: Ocan, ayan chotanok, lowan, ¿xin ta con chi bay? 8Palta chi mi jala': Cha balaj k'ab a camiẍ, cax cha watx'nen tzet ok in lo', cax cha batxon eltek tzet ok in lo' tu'. Okto lajwok tu' cax ok ach lowok, tekan con chi bay. 9¿Xin ta chi jal pax yuj diosalil bay jun co moso tu', yuj max yikej yunen tzet max jal tu'? Tekan c'amak. 10Axca ton junok mosejal tu', cayex ton tu' ayex ti'. A yet mayal xew e yiken masanil tzet chi cheklay e yikej yuj Dios, moj wal che yal axca ti': Ayon ti', caxc'al yak'omal on serbil Dios, caw wal c'am jelapnok jabok, yujtol asan tzet co cuenta juneni, a' max junej, moj wal quex chi, ẍi Jesús bay eb.
Ay lajonwan winak max elcan lepra yin yuj Jesús
11A yet lananc'al toj Jesús yul beal Jerusalén, max eq'uel Cham bay is mojon Samaria yetok Galilea. 12A yet max apni bay jun aldea, ay lajonwan winak ayic' yul be. Ya'ay eb yuj lepra, xan maj jayoc eb c'atan Cham. 13Max aj yaw eb yin ipejal axca ti':
—Mamin Jesús, c'am mi chi ok' a c'ul jin, ẍi eb.
14A yet max yilon Jesús yin eb nak, max yalon axca ti':
—Asek, tx'oxek e ba bay eb sacerdote, ẍi bay eb nak.
Lanan wal bey eb toji, max el yilya' eb lajonwanil yin. 15Ay jun xol eb max yila' tol max el yilya' tu' yin, max meltzoj yin aymanil. Max yalon is watx' k'anej bay Dios yin ipejal. 16Max jayoc bay yakantak Jesús, axa yay jajnaj tu' sat tx'otx', max yalon yuj diosal bay Cham. A nak max meltzoj tu', aj Samaria nak. 17Axa yalon Cham bay eb ayic' bay tu' axca ti':
—¿Tom man lajonwanok eb max elcan ilya' yin? A pax balonwanxa eb tu', ¿baytal-laj ay eb? 18Ti asan wal ch'an jun nak tx'ok conobal ti' max meltzoj ul yalon yuj diosalil bay Dios, ẍi Jesús bay eb.
19Max lajwi tu', max yalon bay nak axca ti':
—Ajan wanok, paxan. Ti mayal elcan ilya' en yujtol max aoc a c'ul yin Dios, ẍi bay nak.
A tzet ok uj yet ok oc Dios Yajawil
(Mt 24.23-28,36-41)
20Ay juntzan eb fariseo max k'anlen bay Jesús axca ti':
—¿Bak'in ok jay tiempo yet ok oc Dios co Yajawilok? ẍi eb bay.
—A yet ok oc Dios yin Yajawil, c'am chi je' jilon oc yin. 21Maj je' jalon axca ti': Tix ayic' cayti', ma tix ayic' bay tu', man con chiok, yujtol a yin janimail chi yak' Dios yajawilal, ẍi Jesús bay eb.
22Max lajwi tu', max yalon Cham bay eb is cuywom axca ti':
—Ay wal jun tiempoal ok jayok, cax ok e yalon axca ti': Matawal chi jay jun chekbiltek yuj Dios xol eb jet animail junelxa, caxc'al junok c'u, quex chi, ok e yaloni. Palta man ok in jayok. 23Ay eb ok alon ayex axca ti': Tix cayti', ma, tix ayic' bay tu', ẍi eb, ok tz'ak yalon eb. Quex toj ta wali. Quex tzakloj ta yintak eb. 24Yujtol axca wal yet chi aj jopnaj junok rayo caw miman txequel, caytu' ok yun in jay yet jun c'ual, ayin Chekbilintek yuj Dios xol eb jet animail ti'. 25Palta a tinani', yowalil ok wab yail sic'libil. Ok in intaknelay el yuj eb anima yet jun tiempoal ti'. 26Axa yet ok in jay paxok, axca wal tzet max uj yul tiempoal Noé, cay wal tu' tzet ok uj yet ok in jayok. 27Yujtol a eb anima yet jun tiempoal tu', max low eb, max yuq'uen a' eb. Ay laj eb tol max oc yetbi. Ay eb max yatok cutz'in alibejal. Tok chi na eb ta ay tzet ok jay yiban eb. Cac'al tu' max yun eb, masantac'al yet max jay c'ual yoctok Noé yul te arca. Axa max jay jun owal aej mukwajwom, cax max cam eb masanil. 28Ac'ala' c'apax yul tiempoal cham Lot. Tok ay c'apax tzet chi na eb anima. Max low c'apax eb, c'al yuq'uen a' eb, max manji eb, max txonji eb, max awalwi eb, max watx'nen eb yatut. 29Palta a yet max el Lot bay conob Sodoma tu', axa yayol k'ak'ej yetok azufre ayoc k'ak'al, xan max cam anima masanil yuj. 30Axca wal tzet max uj yet jun tiempoal tu', caytu' ok uj yet jun c'ual yet ok in jay ayin Chekbilintek yuj Dios xol eb jet animail ti'.
31A yet jun c'ual tu', a mac ayajtok yiban pananil yatut,*fn* caxc'al ay is tzetak yetal aycan yul na tu', manchakxa aytek ul yioni. Yetok eb aytok bay is mulnajil, manchakxa toj eb bay yatut. 32Naektek tzet onnak xal yistzil Lot. 33A eb c'am chi yochej chi cami, chi bekil eb jun k'inalej tol ayc'al yin tojbalk'inal. A pax eb chi bekc'ulok cam wuj xin, a ton eb tu' ok ion k'inalej tol ayc'al yin tojbalk'inal.
34Chi wal ayex, k'inalok ay cawanok mactxel chi way sat is tx'at yet jun ak'bal tu', jun ok ilaytok, jun ok canok. 35-36K'inalok ay cawanok ix lanan cawni, jun ok ilaytok, jun ok canok,*fn* ẍi Jesús bay eb is cuywom tu'.
37A yet max yaben eb juntzan tu', max k'anlen eb bay axca ti':
—Mamin, ¿baytal ok uj axca tu'? ẍi eb.
—Tzanc'al bay telancan junok mimanilej camnakxa, a tu' chi waj ba no ostoc, ẍi Jesús bay eb.
Currently Selected:
Lc 17: ATBYK89
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Kanjobal (Q’anjob’al) © Sociedad Bíblica de Guatemala 1989