Lc 10
10
Gaa'me setenta y dos jo'ne Jesús lamaĝa's
1Ca'li yem da'me dojo', ñe'me Jaliaĝanec nach'e ena'am uoja'aegaua setenta y dos jo'ne liquiyaqa, qama'le en dojolqa'tape da'me ye'uauaĝate' joñe'me, ye'uauaĝa'talo gaa'me noyaqa nataq'aen 'nachaqa'tolqa jo'ne jetaque yec'atalo joñe'me. 2'Yaĝatema jogaa'me: “Eja 'uo da'me jalcote da'me naqataĝanaĝac, qalaĝaja ja lama'y gaa'me onataĝanaĝayaqa. Qo'che' ami 'noota qom auejelai joñe'me loĝot da'me dojo' naqataĝanaĝac qaedi yauoja'aegaua onataĝanaĝayaqa qaedi datoĝo'n. 3Jamoyi, auayachiñe jo' da'me aueñiya'ama gaa'me 'naĝanaĝatel c'oqotel jo'ne quetauelo gaa'me diquiya'ape da'me ami jamaĝauelo. 4Ena'te auachiyi jaga'me anaicauai, uotaĝa ga'me aualiqui, uotaĝa ga'me adapela'chidi'. Nataq'aen ena'te yaloĝoja anechachetañe qaedi gamachaqaega auep'iyeñi ga'me adadiqui.
5“Qom 'uo ga'me 'nachaqa' jo'ne ayoue, 'uaeñe da'me auep'iyeñi, aueñeetojo': «'Noota qom Dios 'lemaĝac ami uetauelo.» 6Qama'le qom gaa'me jiyaĝa'u uetauelo da'me 'nemaĝac, qama'le da'me auepaquitapega male yepaquichigui, qalaĝaja qom ja naq'aeta, da'me ami qaya'te adejamaĝataĝaqui. 7Nach'ega ga'me 'nachaqa' 'noota qom oviya'a, aniyomiguiyi nataq'aen aualiqui ga'me jo'ne ami yanema gaa'me, qa'a ñe'me onataĝanaĝaic chimaqachiñe ta'le 'uo da'me nejetenaguec. Ena'te oquitayelo gaa'me 'nachaqa'te.
8“Nale auovidiya'a ga'me noic jo'ne maqachaĝa ami yaconegueta, aualiqui ga'me jo'ne ami yanema, 9anec'alaĝachidegue ga'me leuaĝaiquipi jo'ne uetedaue ga'me, nataq'aen aueñiyaac jo': «Joda'me lejaliaĝa ñe'me Dios joote ami nadi'talo.» 10Qalaĝaja qom auovidiya'a ga'me noic jo'ne ja ami 'te yaconegueta, oquiya'ae naa'me ladico, aueñiyaac jo': 11«¡Chayovida'a ga'me enaĝayaĝa jo'ne chiyoqoda'ña jenjo' at'achaqachidi', jo'ne qapaleque naa'me qadapia'te, nayi qanechiyoĝodiñe naa'me qadapia'te ena'am da'me ami ñautenaĝalo! Qalaĝaja 'noota qom auayachiñe da'me dojo' queda'me lejaliaĝa ñe'me Dios joote ami nadi'talo.» 12Ami ja'aĝatema qom yovita jo' qom'te ga'me nolo' jo'ne p'ategue qom Dios ya'uo da'me lec'atenaĝanaĝac, qama'le da'me ne'uaĝanaguec jenjo' noic yataqachiñe napacalegue da'me Sodoma ne'uaĝanaguec.
13“¡Degueja qom'te da'me adachoĝodec, am Corazín! ¡Degueja qom'te da'me adachoĝodec, am Betsaida! Qa'a qom di'me Tiro nataq'aen di'me Sidón ta'le qoyaloĝonalo joca'li gaa'me 'nonataqa jo'ne p'ajodaye, jo'ne nayi auañiyalo, joote ta'le natetela'ajalo, qama'le cha'li yaidiñe gaa'me leuo jo'ne jiyac layoqote, laloĝoqui q'aen da'me male 'viyelaĝadetot ñe'me Dios, nataq'aen necouadiye ga'me jalo. 14Qalaĝaja ga'me nolo' jo'ne laloqo' qoyen da'me Dios lec'atenaĝanaĝac da'me male 'uo da'me ane'uaĝanaguequi yataqachiñe 'uo da'me adachoĝodequi qomle ja ena'am ga'me Tiro nataq'aen Sidón laje'.
15“Qama'le am, Capernaúm, ¿Auepetapega joona da'me am qoyedaĝataje'ma di'me piyem? ¡Ja naq'aeta, auovida'ña qomle ga'me loiquiaqa' ga'me laqauaeñi jo'ne qaya'ñgui!
16“Joñe'me jo'ne ami naquiaĝanalo, mach'e jayem naquiaĝana; joñe'me jo'ne ami 'yota'tape, mach'e jayem 'yotatac. Nataq'aen ñe'me jo'ne jayem 'yotatac, mach'e 'yotatac ñe'me jo'ne jayem namaĝaquena.”
Da'me 'liyelaĝajoĝo'j gaa'me Jesús lamaĝa's jo'ne setenta y dos
17Jogaa'me namaĝa's jo'ne setenta y dos yataqachiñe made'tapolqa ca'li 'viyela', nataq'aen enapega't:
—¡Jaliaĝanec! ¡Chayovida'alo gaa'me payagodipi qo'mi yoqo'chalo nale ñenaĝataĝaye da'me adenaĝat!
18Jesús 'yategueta jogaa'me:
—Eja, qa'a jauana ñe'me payac jo'ne Satanás da'me 'naqañe ena'am ga'me qajoĝonaĝa lauaq da'me chiyaqaje'ma di'me piyem. 19Ami janema da'me adañoqotaĝanaĝaqui qaedi aualequitapegueta jogaa'me nanayaqapi nataq'aen gaa'me noĝopi'go, nataq'aen qaedi anomachi ena'uaque daa'me 'lañaĝaco ñe'me nauteua jo'ne Satanás, qama'le qaya'te gamachaqaega ja no'en jo'ne ami 'yeteque qaedi ya'uo adachoĝodequi. 20Qalaĝaja ena'te ami ane'yaĝañetac da'me jogaa'me nepaqa'li ami yoqo'chalo, dite da'me jogaa'me adenaqachidi' jo'ne joote qoyedidiñe da'me daja' piyem.
Nach'eñe ñe'me Nec'oĝot yateton ñe'me Net'a
(Mt 11.25-27; 13.16-17)
21Qanach'ega ua'a ca'li, ñe'me Dios Lepaqal najaqachigui q'aen ñe'me Jesús da'me lamaic, qama'le enaac: “Am 'ñonaĝachigui, Taĝadena', Jaliaĝanec di'me p'ajeguem piyem nataq'aen jena'me aleua, qa'a aualoĝonalo dojo' jogaa'me ja t'añi'y gaa'me uo'oe jo'ne auoĝochi'ñejopa gaa'me yatenaĝanaĝayaqa nataq'aen tadenataĝa'n. Eja, Taĝadena', qa'a naq'aeta da'me jo'ne auepaquetapega.
22“Ñe'me Taĝadena' jayem yanema ena'uaque gaa'me jo'ne uo'oe. Qaya'te yayaten jach'e ñe'me Nec'oĝot, dite ñe'me Taĝadena' jayem yateton. Nataq'aen qaya'te yayaten jach'e jogamaĝa Net'a, dite jayem mach'e C'oĝot jateton, nataq'aen ena'uaque jogaa'me jo'ne jetaque jatetonaĝaneque ñe'me Taĝadena'.”
23Yitaĝa nejelegalo gaa'me lapaĝaguenataqa, qama'le nach'egauate' da'me dojapegue'to: “Made'tapolqa gaa'me jo'ne yauata ga'me jo'ne auañiya nayi; 24qa'a ami ja'aĝatema queda'me qayoĝode' joca'li gaa'me Dios 'laqataĝanaĝanaqa nataq'aen jaliaĝanaqa jo'ne jetaque yauata da'me dojo' jo'ne ami auec'achiñetac, qalaĝaja ja yauata; jetaque domachita ga'me jo'ne nayi auomachiiya, qalaĝaja ja domachita.”
Qodaloqotenaĝañgui ñe'me Samaria le'ec jo'ne onaĝaicaloec
25'Uo ñe'me jiyaĝaua jo'ne paĝaguenataĝanaĝaic daa'me Dios lamaĝajoĝonaĝaco, yec'ata ñe'me Jesús qaedi yapiyenec ga'me lenataĝanaĝac, qama'le enaac:
—Paĝaguenataĝanaĝaic, ¿jach'e ga'me ja'uo qaedi jaqanateta da'me 'noyaĝac jo'ne ja 'naidena'a?
26Jesús 'yateguet:
—¿Jach'e ga'me qoyedidiñe joca'li daa'me Dios lamaĝajoĝonaĝaco? ¿Jach'e ga'me auayaten nale auec'ate'n jogaa'me?
27Ñe'me paĝaguenataĝanaĝaic daa'me Dios lamaĝajoĝonaĝaco 'yateguet:
—Eet'oi: «Adoqopita ñe'me Adejaliaĝanec jo'ne Anedios, auemata na'me adauel, auemata na'me adepaqal, auemata da'me at'añaĝac nataq'aen auematalegue da'me adelnataĝac.» Nataq'aen: «Adoqopita ga'me adaqaya nach'e naq'aeta nale anoqopitela't.»
28Jesús enaac:
—Yataqachiñe 'noota da'me at'ataĝac. Qom aua'uo da'me dojo', auaqanateta da'me at'oyaĝac jo'ne ja 'naidena'a qom'te.
29Qalaĝaja ñe'me paĝaguenataĝanaĝaic daa'me Dios lamaĝajoĝonaĝaco jetaque yayatetelegue da'me lenataĝanaĝac, qama'le yachimaĝata ñe'me Jesús:
—Qama'le, ¿jach'e jogamaĝa yataqachiñe yaqaya?
30Chane'eja Jesús 'yateguet joñe'me:
—'Uo ñe'me jiyaĝaua jo'ne quetapegue' ga'me naq'aec jo'ne yelo'tegue di'me Jerusalén taya'ague di'me Jericó. Qama'le uo'oe gaa'me cachaĝayaqa jo'ne nauateguet ca'li ye'uaĝa'n chayovida'alo gaa'me leuo qoyaconalo; ye'uaĝa'n yem qama'le eque', yamta'le yeleu da'me queda'e. 31Ua'edi 'uo ñe'me tamenaĝaiqui lo'o nach'ega ga'me naq'aec ta'ya; qalaĝaja ca'li yauana equejop qama'le leuotalegue. 32Nach'e ena'am ñe'me necochoqo't ga'me tamenaĝaiqui yovita ca'li ga'me ua'a, ca'li yauana ch'e equejop qama'le leuotalegue. 33Qalaĝaja 'uo ñe'me Samaria le'ec jo'ne nach'ega ga'me naq'aec da'me ta'ya, ca'li yauana qama'le nomeguet da'me lichoĝodenataĝanaĝac. 34Yec'ata joca'li ga'me, natadeneque ga'me cheuegaĝadaic jo'ne olivo jala li'i nataq'aen uva li'i gaa'me yedidiñe, qama'le yauo'oe la'a. Yem qama'le yanalegue ga'me mach'e lalo, yeda'a ga'me omataĝaiqui qama'le netela joga'me. 35Ga'me nolo' laqaya, ñe'me Samaria le'ec navidijeguem gaa'me dojole naicaual jo'ne denario, qama'le yanema ñe'me loĝot ga'me omataĝaiqui, nataq'aen dojapegue': «Adetela jenjo' jiyaĝaua, nataq'aen qom yaguegue da'me lajo'viyaĝac ga'me auanem, qama'le jayem am jejeten qomle 'ñiyelaq.»
36“Chane'eja, ¿jach'e jogamaĝa naajo' tres auepetapega da'me en laqaya ñe'me jiyaĝaua jo'ne nauateguet ca'li gaa'me cachaĝayaqa qaedi decachitot?”
37Ñe'me paĝaguenataĝanaĝaic daa'me Dios lamaĝajoĝonaĝaco 'yateguet:
—Ñe'me jo'ne yichoĝoden joñe'me.
Jesús 'yateguet joñe'me:
—Chane'eja oc nayi qama'le naq'aeta da'me aua'uo.
Jesús yec'ata di'me 'lachaqa' jañe'me Marta nataq'aen María
38Jesús que'tague ga'me ladic qama'le yovita ga'me noic jo'ne na'ña jañe'me yauo jo'ne lenaĝat Marta, qama'le Marta 'nomataĝanegue. 39Marta 'uo jañe'me la'nole jo'ne lenaĝat María, nach'aga cha'li na'ña ga'me peta'ña ñe'me Jesús qaedi naquiaĝana yema ga'me 'laqatac ñe'me. 40Qalaĝaja Marta, jo'ne yema'alo gaa'me qayoĝode' 'me 'lonataqa, yec'ata ñe'me Jesús qama'le dojapegue':
—Jaliaĝanec, ¿auen machiñe jo' queda'me jana'me ya'nole jayem yejamaĝaguet yema jena'me 'yonatac? ¡Auenapega qaedi jayem lecochiya!
41Qalaĝaja Jesús 'yateguet:
—Marta, yataqachiñe 'uo da'me adema'eguet nataq'aen auayachetapiye't qa'a jouaĝat gaa'me qayoĝode' 'me uo'oe; 42qalaĝaja jalgata ga'me 'uo jo'ne yataqachiñe qoyouen. María yelotelegue da'me lae jo'ne yataqata p'ajaye, qama'le qaya'te gamachaqaega ta'le deuodaĝanec.
Currently Selected:
Lc 10: TSN
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Nuevo Testament Toba del Oeste © 2010 Sociedad Bíblica Argentina