SAN MATEO 5
5
Urcu jahuapi Jesús yachachishcamanta
(Lc 6.20-23)
1Achca gentecuna paita c'aticucta ricushpami, Jesusca urcu jahuaman rishpa tiyarirca. Chaipi tiyacucpimi, paipac yachacuccunaca paipacman cuchuyarca. 2Chaipimi Jesusca cashna nishpa yachachi callarirca:
3“Juchayuc cashcamanta Taita Diospac ñaupapi yangalla cashcata yuyaccuna, ¡cushicuichic! Jahua pacha Taita Dios mandacucca cancunapacmi.
4Llaquilla cashcamanta huacacuccuna, ¡cushicuichic! Taita Diosmi cancunataca cushichinga.
5Mana p'iñaric shunguta chariccuna, ¡cushicuichic! Cancunami Taita Dios cusha nishca llactataca japinguichic.
6Yarcaihuan yacunayaihuan cac shina, allita ruhuashpa causanata munaccuna, ¡cushicuichic! Taita Diosmi chai munashcata pactachichunca, mana nicta carac shina cunga.
7Shuccunata llaquiccuna, ¡cushicuichic! Cancunatapish Taita Diosca llaquingami.
8Taita Dios yuyailla causanata munashpa, chuya shungu canata munaccuna, ¡cushicuichic! Cancunami Taita Diostaca ricunguichic.
9P'iñanacushcata allichiccuna, ¡cushicuichic! Cancunatami Taita Diosca: ‘Ñuca huahuacunami canguichic’ ninga.
10Allita ruhuashpa causacushcamanta llaquita apaccuna, ¡cushicuichic! Jahua pacha Taita Dios mandacucca cancunapacmi.
11Ñucata c'aticushcamanta maipipish p'iñashpa, imatapish llullashpa c'amishpa llaquichicpipish, ¡cushicuichic! 12Cancunata chashna llaquichicpipish, ¡cushicuichiclla! Taita Diosca jahua pachapimi, cancuna japina cashcata yallita cunga. Chashnallatacmi ñaupa punzhapica, Diosmanta ñaupa huillaccunatapish llaquichircacuna.
“Cancunaca cachi shinapish, luz shinapish canguichic” nishcamanta
(Mr 9.50; Lc 14.34-35)
13Cancunaca cai pachapi causaccunapacca, cachi shinami canguichic. Shina cashpapish cachi gamuyashpaca, ¿ima allitac cangayari? Canzhaman t'allishpa gentecuna saruchun shitanallami alli.
14Cancunaca cai pachapi causaccunapacca, luz shinami canguichic. Urcu jahuapi huasichishca huasicunaca, mana pacalla canchu. 15Shinallatac luzta japichishpapish, cajón ucupi churangapacca mana japichinchu, ashtahuanpish ucupi caccunata achicyachichunmi, pata jahuapi churan. 16Shinallatac cancunapish, cai pachapi causaccunapac ñaupapica, luz achicyachic shina allita ruhuashpa causaichic. Cancuna chashna ruhuacta ricushpami, jahua pachapi tiyac cancunapac Taita Diostaca ‘allimari cangui’ ningacuna.
Mandashcacuna jahua yachachishcamanta
(Lc 12.57-59)
17Ñucataca ‘Moisés mandashcacunata, shinallatac Diosmanta ñaupa huillaccuna huillashcacunata anchuchingapacmi shamushca’ nishpaca, ama yuyaichicchu, ashtahuanpish mandashcacunataca pactachingapacmi shamurcani. 18Cai pachapish, jahua pachapish tucuringacamanca, mandashcacunamantaca shuc rimaillapish, shuc puntollapish mana chingaringachu, tucui pactacungallami. Chaica chashnatacmi canga. 19Chaimanta maijanpish cai mandashcacunamanta uchilla mandashcata mana cazushpa, gentecunaman chashna yachachicca, jahua pacha Taita Dios mandacucpica ashtahuan yanga nishca canga. Maijanpish cai mandashcacunata cazushpa shuccunamanpish yachachicca, jahua pacha Taita Dios mandacucpica alli nishcami canga. 20Chashna cashcamantami cashna nini: Mandashcacunata yachachiccunatapish, fariseocunatapish*f** atishpa ashtahuan allita mana ruhuashpaca, jahua pacha Taita Dios mandacucmanca jaicapi mana yaicunguichicchu.
Pitapish mana p'iñanamanta
(Lc 12.57-59)
21Cancunapac ñaupa taitacunaman ‘Ama huañuchinguichu. Maijanpish huañuchictaca, juezpacman apashpa llaquichishcami canga’ nishcatami uyashcanguichic. 22Ashtahuanpish ñucacarin cashnami nini: Maijanpish p'iñactaca, juezpacman apashpa llaquichishcami canga. Maijanpish muspa nictaca, mandaccunapura tandanacushcapacman apashpa, llaquichishcami canga. Maijanpish maipish cachun rimactaca, ucu pacha ninaman shitana nishcami canga.
23Chaimanta can Taita Diosman cuna cashcata altarpi churagricushpa, maijanhuan imapi p'iñanacushca cashcata chaipi yuyarishpaca, 24Diosman cuna cashcata altar ñaupapi saquishpa, paihuan p'iñanacushcatarac allichimugringui. Chai q'uipaca, can Diosman cuna cashcata cunguillami. 25Shinallatac maijan canta imamanta juezpacman c'ayachigricpica, manarac juezpacman chayashpa, canta c'ayachic-huan alli tucungui. Mana cashpaca juezman cucpi, juezca soldadocunaman cushpa cantaca carcelpi churangami. 26Chaimantaca tucui cullquita cungacaman mana llucshinguichu. Chaica chashnatacmi canga.
Cazarashca jahua mana shuchuan huacllirinacuna cashcamanta
27Shinallatac ñaupaca: ‘Cazarashca jahua shuc-huan ama huaclliringui’ nishcatami uyashcanguichic. 28Ashtahuanpish ñucaca cashnami nini: Maijanpish shuc huarmita ricushpa munashpaca, paipac shungupica ña huacllirinacushca shinallatacmi.
29Chashna cashcamanta cambac alli lado ñahui juchapi urmachisha nicpica, surcushpa shitangui. Can quiquinllatac ucu pacha ninaman shitashca canapac randica, chulla ñahuillata chingachinami canmanca ashtahuan alli canga. 30Shinallatac cambac alli lado maqui juchapi urmachisha nicpica, p'itishpa shitangui. Can quiquinllatac ucu pacha ninapi shitashca canapac randica, cambac chulla maquillata chingachinami ashtahuan alli canga.
Cazarashcacuna mana raquirina cashcamanta
(Mt 19.9; Mr 10.11-12; Lc 16.18)
31Shinallatac ñaupaca: ‘Maijanpish cazarashca cashpa, paipac huarmimanta raquirisha nicca, firmata cushpa raquirichunlla’ nishcatami uyashcanguichic. 32Ashtahuanpish ñucaca cashnami nini: Maijan c'aripish paipac huarmi manapish shuchuan cacta yachashpa raquiricpica, chai huarmica paimantami shuc-huan huacllirinacushpa juchallin. Shinallatac maijanpish chai raquirishca huarmihuan cazarashpaca, juchallinmi.
Diospac shutita mana yangalla rimana cashcamanta
33Shinallatac cancunapac ñaupa taitacunamanca: ‘Diospac shutipi imata ari nishpaca, pactachingui’ nishcatami uyashcanguichic. 34Ashtahuanpish ñucaca cashnami nini: Diospac shutipica shinachari jahua pacha Taita Dios mandashpa tiyarinamantapish, 35shinachari paipac chaqui saruna cai allpamantapish, shinachari Jerusalén Jatun Mandacpac pueblomantapish, 36shinachari quiquinllamantapish, pai Diospac shutipica ama rimaichicchu. Ashtahuanpish cancunaca cancunapac shuc acchallatapish yuractaca yanaman, yanataca yuracman mana tigrachi pudinguichicchu. 37Imatapish ari nina cacpica, ari nichic. Mana nina cacpica, mana nichic. Manapish cashcata nina yuyaicunaca, diablomantami shamun.
Maijan imata quichucpipish, macacpipish saquinalla cashcamanta
(Lc 6.27-36)
38Shinallatac ñaupaca: ‘Maijanpish ñahuita surcuctaca, paitapish ñahuita surcunami. Shinallatac quiruta surcuctapish, paitapish quiruta surcunami’ nishcatami uyashcanguichic. 39Ashtahuanpish ñucaca cashnami nini: Maijanpish canta ima millaita ruhuachunca, ama p'iñarichu, ashtahuanpish maijan canta alli lado jazhapi huactacpica, lluqui lado jazhapipish huactachun saquinguilla. 40Shinallatac maijanpish camisata quichusha nishpa c'ayachicpica, ashtahuan valishca jahualla churanatapish cushpa cachanguilla. 41Canta maijan imatapish ashacaman apashpa richun nicpica, shuc chashnahuan apashpa ringuilla. 42Maijan canman imata mañacpica, cunguilla. Maijanpish imata mañacpica, ama misarishpa mañachinguichiclla.
P'iñaccunata c'uyana cashcamanta
43Shinallatac ñaupaca: ‘Canta c'uyactaca c'uyangui, p'iñactaca p'iñangui’ nishcatami uyashcanguichic. 44Ashtahuanpish ñucaca cashnami nini: Cancunata p'iñaccunata c'uyaichic, shinallatac cancunata llaquichiccunamanta Taita Diosman mañaichic. 45Chashna cashpami, cancunaca jahua pachapi cac Taita Diospac huahuacuna canguichic. Paica allicunaman, mana allicunaman, shinallatac paita cazuccunaman, mana cazuccunamanpish intitapish, tamiatapish cachanllami. 46Cancuna maijan c'uyaccunallata c'uyashpaca, ¿ima allitatac Taita Diosmantaca japinguichicyari? Chashnacarin Roma*f** llactaman impuestota japiccunapish ruhuancunallami. 47Shinallatac cancunapuralla alabadunacushpaca, ima allita mana ruhuanguichicchu. Taita Diosta mana ricsiccunapish chashnaca ruhuancunallami. 48Jahua pachapi tiyac cancunapac Taita Dios ima shinami allitac can, chashnallatac cancunapish allitac caichic.
Currently Selected:
SAN MATEO 5: QXR96
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Quichua Cañar Nuevo Testamento © United Bible Societies in Ecuador, 1996.