ལུ་ཀཱ། 1
1
ལེའུ་དང་པོ།
འབྲི་དགོས་པའི་རྒྱུ་མཚན།
1-2སྐུ་ངོ་ཐེ་ཨོ་ཕི་ལུ་ཁྱེད་ལེ་ཞུ་རྒྱུ། མི་མང་པོ་ཞིག་གིས་འུའི་སྐྱེན་ལེ་ཅི་གྲུབ་པའི་སྐོར་གྱི་ལོ་རྒྱུས་དེ་བྲིས་པི་དིག ཡང་མིག་གིས་མཐོང་མཁན་བཀའི་ཞབས་ཕྱི་པ་ཀྱ་ཀྱིས་ཉེད་ཀྱ་ལེ་ཅི་གཏད་དི་ཅོག་འདྲ། 3-4ངས་ཟང་ཐོག་མ་ནས་ཅི་བྱུང་བའི་དོན་དེ་ཡེ་རེ་ལེ་རྩད་གཅོད་དགའ་མོ་བྱས་ཏེ། སྐུ་ངོ་ཁྱེད་ཀྱིས་ཧ་གོ་རྒྱུ་ཆེད་དུ། ལོ་རྒྱུས་དེ་ཀྱ་གོ་རིམ་བཞིན་དུ་ཡིག་ཐོག་ལེ་འབྲི་རྒྱུ་ཐག་གཅོད་བྱས་པི་ཡིན།
ཁྲུས་གསོལ་བགྱིད་མཁན་ཡོ་ཧ་ནན་འཁྲུང་རྒྱུ་ཡིན་དི་ལུང་བསྟན་པ།
5ཡ་ཧུ་དཱ་ལུང་པའི་རྒྱལ་པོ་ཧེ་རོ་དཱེ་ཟེར་མཁན་ཁོའི་དུས་ལེ། མིང་ལེ་ཟེ་ཀ་རི་ཡཱ་ཟེར་མཁན་ཡ་ཧུ་དཱ་པའི་མཆོད་པ་འབུལ་མཁན་མི་ཞིག་འོད་དིག ཁོ་རང་ནི་མཆོད་པ་འབུལ་མཁན་ཨ་བི་ཡཱ་ཟེར་མཁན་གྱི་ཁོངས་གཏོགས་ཀྱི་མི་ཞིག་ཡིན་དི་མ་ཟད། ཁོ་རང་ལེ་ཟང་བུད་མེད་ཞིག་འོད་དིག མོའི་མིང་ལེ་ཨེ་ལི་ས་བེད་ཟིན་འོད་དིག མོ་རང་ནི་ཡ་ཧུ་དཱ་པའི་མཆོད་པ་འབུལ་མཁན་མེས་མེས་ཨཱ་རོན་ཟེར་མཁན་གྱི་རྒྱུད་པ་ནས་ཡིན་དིག 6ཡང་དཀོན་མཆོག་གི་མིག་སྔར་ལེ་ཟང་ནང་ཚང་དེ་གཉིས་པོ་ནི་མི་རྣམ་པར་དག་པོ་ཞིག་ཡིན་ཕེན། ཁོང་གཉིས་ཀྱིས་དཀོན་མཆོག་གི་བཀའ་དིང་ཆོས་ཁྲིམས་ཡེ་རེ་དགའ་མོ་བྱས་ཏེ་བསྲུངས་ཕེན། ཁོང་གཉིས་ལེ་སྐྱོན་འཛུགས་རྒྱུ་གཅིག་ཟང་མེད་དིག 7ཡིན་ནའང་། ཁོང་རང་གཉིས་ལེ་ཕྲུ་གུ་གཅིག་ཟང་མ་བྱུང་སྟེ་ཁ་རྒས་པི་དིག ཅི་ལེ་ཟེར་ནི། ཨེ་ལི་ས་བེད་མོ་རང་ནི་རབས་ཆད་ཡིན་དིག 8-10དེ་ནས་ཉིན་མ་ཞིག་སྡེ་ཚན་གྱི་གོ་རིམ་ཅོག་འདྲ། དཀོན་མཆོག་གི་མདུན་དུ་མཆོད་གཡོག་བགྱིད་རྒྱུ་ཆེད་དུ་ལས་འགན་གྱི་སྐོར་ལེ་རྒྱན་བརྒྱབ་ཕེན། ཟེ་ཀ་རི་ཡཱ་ཁོའི་མིང་ཐོན་པི་དིག དེ་ནས་ཟེ་ཀ་རི་ཡཱ་ཁོས་མཆོད་པ་འབུལ་མཁན་གྱི་ལུགས་སྲོལ་ཅོག་འདྲ། མཆོད་ཁང་ནང་མའི་ནང་ལེ་བསང་གཏོང་དུ་བུད་དིག ཡང་མི་མང་ཀྱ་ཟང་མཆོད་ཁང་གི་སྒོའི་ཕྱི་ནང་མེད་ནས་གསོལ་བ་སྨོན་ལམ་འདེབས་གྱོ་འོད་དིག 11-12དེའི་དུས་ལེ། དཀོན་མཆོག་གིས་བརྫངས་པའི་ཕོ་ཉ་ཞིག་སྤོས་སྤར་སའི་མཆོད་ཁྲིའི་གཡས་ཕྱོགས་ལེ་ཀྲོང་ངེར་བཞུགས་འོད་དི་ཟེ་ཀ་རི་ཡཱ་ཁོས་མཐོང་ལོང་མེད། ཁོ་རང་འཇུ་གུ་འཁྱར་རི་དིག 13ཡིན་ནའང་། ཕོ་ཉ་ཁོས་ཟེ་ཀ་རི་ཡཱ། ཁྱོད་རང་འཁྱར་སྣང་བགྱིད་དགོས་མེད་དིག ཅི་ལེ་ཟེར་ནི། ཁྱོད་ཀྱིས་གསོལ་བ་སྨོན་ལམ་བཏབ་པི་དེ་ནི། དཀོན་མཆོག་གིས་གསན་གནང་ཕེན། ད་ཁྱོད་ཀྱི་བུད་མེད་ཨེ་ལི་ས་བེད་ལེ་བི་ས་ཞིག་སྐྱེ་ཀྱི་དིག བི་སའི་མིང་ལེ་ཡོ་ཧ་ནན་ཟིན་ཐོགས་ཤིག 14ཁྱེད་གཉིས་ལེ་བི་ས་སྐྱེས་ཏེ་དགའ་སྤྲོ་ཆེན་པོ་འོང་རྒྱུ་ཡིན་དི་མ་ཟད། མི་མང་པོ་ཞིག་གིས་ཟང་བི་ས་སྐྱེས་པི་དེ་ལེ་དགའ་སྤྲོ་བགྱིད་ཀྱི་དིག 15ཅི་ལེ་ཟེར་ནི། དཀོན་མཆོག་གི་མིག་སྔར་ལེ་བི་ས་དེ་ནི་གལ་ཆེན་པོ་ཞིག་ལེ་རྩིས་གནང་གྱི་དིག ཡང་བི་ས་དེས་རྒུན་ཆང་དིང་ཨ་རག་གི་ལག་ལེན་བགྱིད་ཀྱི་མ་དིག ཁོ་རང་ཨ་མའི་ཁོག་ནང་ལེ་འོད་རྒྱ་ནས་ཕེན། ཁོ་ལེ་དམ་པའི་ཐུགས་ཉིད་ཀྱིས་ཁྱབ་ཀྱི་དིག 16ཡང་ཁོས་ཡི་སི་ར་ཨེལ་པའི་རིགས་རྒྱུད་མང་པོ་ཞིག་རང་གི་ཇོ་བོ་དཀོན་མཆོག་གི་ཕྱོགས་ལེ་སེམས་ཁུག་ཏུ་འཇུག་གྱི་དིག 17ཡང་བི་ས་དེས་ཨ་ཀྱི་ཡེ་རེའི་སེམས་ཕྲུ་གུའི་ཕྱོགས་ལེ་ཁུག་ཏུ་འཇུག་གི་མ་ཟད། དཀོན་མཆོག་གི་བཀའ་ལེ་མི་ཉན་མཁན་དེ་ཀྱ་ལེ། བློ་ཤེས་རབ་འོད་ཡོད་བཟོས་ཏེ། ཇོ་བོ་དཀོན་མཆོག་ལེ་འཚམ་པའི་མི་ཡེ་རེ་གྲ་སྒྲིག་བགྱིད་རྒྱུ་ཆེད་དུ། བི་ས་དེ་ལུང་སྟོན་མཁན་ཨེ་ལི་ཡཱ་དིང་ཅོག་འདྲ། དམ་པའི་ཐུགས་ཉིད་ཀྱི་ནུས་མཐུ་བརྒྱུད་ནས་ཇོ་བོ་མ་ཕེབས་པའི་སྔོན་ལེ་འོང་གྱི་དིག་སྨྲས་པི་དིག 18དེ་ནས་ཟེ་ཀ་རི་ཡཱ་ཁོས་ཕོ་ཉ་ཁོང་ལེ། ང་རང་ན་སོ་རྒས་པོ་བྱུང་པི་མ་ཟད་། ངའི་བུད་མེད་ཟང་ན་སོ་རྒས་མོ་ཡིན་དིག ང་ལེ་བི་ས་ཅི་གི་བྱས་ཏེ་སྐྱེ་སྲིད་རྒྱུ་ཟིན་དྲིས་པི་དིག 19དེ་ནས་ཕོ་ཉ་ཁོས་ཟེ་ཀ་རི་ཡཱ་ལེ། ང་ནི་དཀོན་མཆོག་གི་དྲུང་དུ་སྡོད་མཁན་ཕོ་ཉ་གེབ་རི་ཨེལ་ཟེར་མཁན་དེ་ཡིན། དཀོན་མཆོག་གིས་ང་ལེ་གཏམ་བཟང་པོ་འདི་སྐྱེལ་དུ་བརྫངས་བྱུང་ཟིན་སྨྲས་པི་དིག 20ད་ཉོན་དང་། ངས་སྨྲས་པའི་དོན་འདི་མ་འགྲུབ་བར་དུ། ཁྱོད་རང་ལྐུགས་པ་བྱུང་སྟེ། ལབ་ཟེར་ནུས་ཀྱི་མ་དིག ཅི་ལེ་ཟེར་ནི། ཁྱོད་ཀྱིས་ངས་སྨྲས་པི་ལབ་དེ་ལེ་ཡིད་ཆེས་མ་བྱས་པི་དིག 21ཡང་དེ་རྒྱ་མི་ཡེ་རེས་ཟང་སྒོའི་ཕྱི་ལེ་ཟེ་ཀ་རི་ཡཱ་ལེ་སྒུག་བསྡད་འོད་དི་མ་ཟད། ཁོ་རང་མཆོད་ཁང་ནང་ལེ་ཡུན་རིང་པོ་འགོར་ཕེན། མི་ཡེ་རེས་དོན་དེ་ལེ་ཡ་མཚན་སྐྱེས་པི་དིག 22དེ་ནས་རྗེས་ལེ་ཁོ་རང་མཆོད་ཁང་ནང་ནས་ཕྱི་ལེ་ཐོན་འོང་རྒྱ། ཁོ་རང་ལྐུགས་པ་བྱུང་འོད་ཕེན། ཁོས་ལྐུགས་བརྡ་བྱས་ཏེ་ལབ་ཟེར་རི་མཐོང་སྟེ། མི་ཡེ་རེས་ཁོས་མཆོད་ཁང་ནང་ལེ་ཞལ་གཟིགས་ཤིག་མཐོང་པི་ཡིན་དི་མི་ཀྱ་ཀྱིས་ཧ་གོ་པི་དིག ཡང་ཟེ་ཀ་རི་ཡཱ་ཁོས་ཟང་མི་ཀྱ་ལེ་ལྐུགས་བརྡ་བྱས་ཏེ་སྡོད་དགོས་བྱུང་པི་དིག 23དེ་ནས་ཟེ་ཀ་རི་ཡཱ་ཁོས་མཆོད་པ་འབུལ་རྒྱུ་ལས་འགན་དེ་བསྒྲུབས་ནུས་པི་རྗེས་ལེ་རང་གི་ཁྱིམ་ལེ་ལོག་བུད་དི་དིག 24དེའི་རྗེས་ལེ་ཁོའི་བུད་མེད་ཨེ་ལི་ས་བེད་ལེ་ཕྲུ་གུ་ཆགས་ཕེན། མོ་རང་ཟླ་བ་ལྔ་ཚོད་ཁྱིམ་གྱི་ཕྱི་ལེ་མ་ཐོན་ཏེ་བསྡད་དི་དིག 25དེ་ནས་མོས་ཇོ་བོ་དཀོན་མཆོག་གིས་ང་ལེ་གཟིགས་སྐྱོང་གནང་སྟེ། ངའི་མི་རིགས་ཀྱི་མདུན་དུ་ང་ལེ་འོད་ཡོད་སྣ་ངོ་ཚ་དེ་མེད་དི་བཟོས་གནང་བྱུང་སྨྲས་པི་དིག
སྐྱབས་མགོན་ཡེ་ཤུ་འཁྲུང་རྒྱུ་ཡིན་དི་ལུང་བསྟན་པ།
26-27དེ་ནས་ཨེ་ལི་ས་བེད་ལེ་ཕྲུ་གུ་ཆགས་ཏེ་ཟླ་བ་དྲུག་ཚོད་ཡིན་རྒྱ། དཀོན་མཆོག་གིས་ཕོ་ཉ་གེབ་རི་ཨེལ་ཁོང་རང་ག་ལིལ་ལུང་པའི་ནང་ལེ་འོད་ཡོད་ནཱ་ཙ་རེལ་ཟེར་རི་ཡུལ་ལེ་སྡོད་མཁན། མིང་ལེ་མིར་ཡམ་ཟེར་མཁན་ན་ཆུང་མོ་འོད་ས་ལེ་བརྫངས་གནང་པི་དིག བུ་མོ་དེ་ནི། རྒྱལ་པོ་དཱ་བིད་ཀྱི་རྒྱུད་པ་ནས་ཡིན་མཁན་མིང་ལེ་ཡོ་སེབ་ཟེར་མཁན་ཁོ་ལེ་སློང་ཆང་བཏང་ཚར་རི་དིག#1.26-27 ཡེ་ཤུ་མ་འཁྲུང་བའི་ལོ་བདུན་བརྒྱ་སྔོན་ལེ། དཀོན་མཆོག་གི་ལུང་སྟོན་པ་ཡེ་ཤ་ཡཱ་ཁོས། སྐྱབས་མགོན་དེ་ནི། བུ་མོ་ཤ་གསར་ཞིག་ནས་འཁྲུང་གྱི་དིག་ཟིན་ལུང་བསྟན་གནང་འོད་དིག ཚིགས་བཅད་དི་ནི་ཡེ་ཤ་ཡཱས་བྲིས་པའི་མདོ་ལེའུ་ 7 ཨང་ 14 ནང་ལེ་གཟིགས་རོགས། 28-29དེ་ནས་ཕོ་ཉ་དེས་བུ་མོ་དེ་འོད་ས་ལེ་འོངས་ཏེ། དཀོན་མཆོག་གི་ཐུགས་རྗེ་ཐོབ་པའི་བུ་མོའོ། ཁྱོད་བདེ་བ་ཆེའོ། ཇོ་བོ་ཁྱོད་དིང་སྐྱེན་ལེ་འོད་དིག་ཟིན་སྨྲས་པི་དིག དེ་ནས་མིར་ཡམ་སེམས་ཚབ་འཇུ་གུ་བྱུང་སྟེ། གཏམ་འདི་ཅི་ཡིན་ནི་བསམས་པི་དིག 30དེ་ནས་ཕོ་ཉ་དེས་མོ་ལེ། མིར་ཡམ། ཁྱོད་རང་འཁྱར་སྣང་མ་བགྱིད། ཁྱོད་ལེ་དཀོན་མཆོག་གི་ཐུགས་རྗེ་གཟིགས་སྐྱོང་ཐོབ་འོད་དིག 31ཉོན་དང་། ཁྱོད་ལེ་ཕྲུ་གུ་ཆགས་ཏེ་བི་ས་ཞིག་སྐྱེ་ཀྱི་དིག བི་ས་དེའི་མིང་ལེ་ཡེ་ཤུ་ཟིན་ཐོགས་ཤིག 32ཁོང་ལེ་སྐྱེས་ཆེན་དམ་པ་དིང་། བླ་ན་མེད་པའི་དཀོན་མཆོག་གི་སྲས་ཟིན་འབོད་ཀྱི་དིག དཀོན་མཆོག་གིས་ཁོང་ལེ། རང་གི་མི་རབས་མང་པོའི་སྔོན་གྱི་མེས་མེས་རྒྱལ་པོ་དཱ་བིད་ཀྱི་བཞུགས་ཁྲི་དེ་གནང་རྒྱུ་ཡིན་དི་མ་ཟད། 33ཡུན་རིང་ནས་ཡུན་རིང་ཡ་ཀོབ་ཀྱི་རིགས་རྒྱུད་ལེ་དབང་འཛིན་གནང་སྟེ། ཁོང་གི་རྒྱལ་ཁབ་དེ་ཟང་རྫོགས་མཐའ་མེད་མེད་འོང་གྱི་དིག་ཟིན་སྨྲས་པི་དིག 34དེ་ནས་མིར་ཡམ་གྱིས་ཕོ་ཉ་ལེ། ང་ནི་ད་ལྟ་བར་དུ་སྐྱེས་པ་སུ་གཅིག་གི་སྐྱེན་ལེ་ལུས་འབྲེལ་བགྱིད་མྱོང་མེད། ང་ལེ་དོན་འདི་ཅི་གི་བྱས་ཏེ་འོང་སྲིད་རྒྱུ་ཟིན་དྲིས་ཕེན། 35ཕོ་ཉས་མོ་ལེ། ཁྱོད་ལེ་དམ་པའི་ཐུགས་ཉིད་འབབ་ཏེ། བླ་ན་མེད་པའི་དཀོན་མཆོག་གི་ནུས་མཐུ་ཁྱོད་ལེ་ཁྱབ་ཀྱི་དིག འོ་དེ་ལེ་བརྟེན་ཏེ། ཁྱོད་རང་ལེ་སྐྱེས་པའི་བི་ས་དེ་ནི། དམ་པ་ཞིག་འོང་རྒྱུ་ཡིན་དི་མ་ཟད། ཁོང་ལེ་དཀོན་མཆོག་གི་སྲས་ཟིན་འབོད་ཀྱི་དིག 36ཉོན་དང་། ཁྱོད་ཀྱི་སྲུ་མོ་ཨེ་ལི་ས་བེད་མོ་རང་ནི། ན་སོ་རྒས་མོ་ཡིན་དི་མ་ཟད། རབས་ཆད་ཡིན་ནའང་། ད་ལྟ་མོ་ལེ་ཕྲུ་གུ་ཆགས་ཏེ་ཟླ་བ་དྲུག་ཚོད་སླེབས་འོད་དིག 37ཅི་ལེ་ཟེར་ནི། དཀོན་མཆོག་ལེ་འགྲུབ་མི་ནུས་པའི་ལས་གཅིག་ཟང་མེད་དིག་ཟིན་སྨྲས་པི་དིག 38དེ་ནས་མིར་ཡམ་གྱིས་ང་ནི་ཇོ་བོའི་གཡོག་མོ་ཡིན། ཁྱེད་ཀྱིས་བཀའ་གསུངས་པི་ཅོག་འདྲ་འགྲུབ་པར་ཤོག་ཟིན་སྨྲས་པའི་རྗེས་ལེ། ཕོ་ཉ་དེ་ཕ་ལེ་བུད་དི་དིག
མིར་ཡམ་གྱིས་སྲུ་མོ་ཨེ་ལི་ས་བེད་ལེ་ཐུག་ཏུ་འགྲོ་བ།
39-40དེ་ནས་ཉིན་མ་ཁ་ཤས་ཀྱི་རྗེས་ལེ་མིར་ཡམ། ཡ་ཧུ་དཱའི་ལུང་པའི་རི་ལེ་འོད་ཡོད་གྲོང་གསེབ་ལེ་སྡོད་མཁན་ཟེ་ཀ་རི་ཡཱའི་ཁྱིམ་ལེ་མགྱོགས་པོ་བུད་དི་དིག དེ་ནས་མོ་རང་ཁྱིམ་གྱི་ནང་ལེ་སླེབས་ལོང་མེད། མོས་སྲུ་མོ་ཨེ་ལི་ས་བེད། བཀྲ་ཤིས་བདེ་ལེགས་སྨྲས་པི་དིག 41དེ་ནས་སྲུ་མོ་མོས་མིར་ཡམ་གྱི་འཚམས་འདྲི་དེའི་སྐད་དེ་ཐོས་ལོང་མེད། སྲུ་མོའི་ཁོག་ལེ་འོད་ཡོད་ཕྲུ་གུ་དེ་ཟང་འཕག་ཕེན། སྲུ་མོ་ཨེ་ལི་ས་བེད་མོ་རང་ལེ་ཟང་དམ་པའི་ཐུགས་ཉིད་ཁྱབ་པི་དིག 42དེ་ནས་སྲུ་མོ་མོས་དགའ་རི་དིང་སྐད་ཆེན་པོས་ངང་ནས། བུ་མའ་ཡེ་རེའི་ནང་ནས་ཁྱེད་ལེ་བྱིན་རླབས་ཆེའོ། ཁྱེད་ལེ་ཆགས་པའི་ཕྲུ་གུ་དེ་ལེ་ཟང་བྱིན་གྱིས་རླབས་པར་ཤོག 43ངའི་ཇོ་བོའི་ཡུམ། ངའི་འགྲམ་ལེ་ཕེབས་གནང་བའི་བཀའ་དྲིན་འདི་ང་ལེ་ཅི་གི་བྱས་ཏེ་འཐོབ་སྲིད་རྒྱུ། 44གཟིགས་དང་། ཁྱེད་ཀྱིས་འཚམས་འདྲིའི་སྐད་འདི་ཐོས་ལོང་མེད། ངའི་ཁོག་ལེ་འོད་ཡོད་ཕྲུ་གུ་འདི་ཟང་དགའ་རི་བྱུང་སྟེ་འཕག་བྱུང་། 45ཇོ་བོ་དཀོན་མཆོགདཀོན་མཆོག་གིས་ ཁྱེད་ལེ་ཅི་གསུངས་པི་དེ་འགྲུབ་རྒྱུ་ཡིན་དི་དེ་ལེ་ཡིད་ཆེས་མཁན་བུ་མོ་ཁྱེད་རང་བདེ་བ་ཆེའོ་ཟིན་སྨྲས་པི་དིག
མིར་ཡམ་གྱི་བསྟོད་གླུ་ཕུལ་བ།
46དེ་ནས་མིར་ཡམ་གྱིས། །
ངའི་སེམས་ནས་ཇོ་བོ་ལེ་བསྟོད། །
47ངའི་སྐྱོབ་མཁན་དཀོན་མཆོག་ལེ། །
ངའི་སེམས་ཉིད་དགའ་སྤྲོ་སྐྱེ། །
48ཁོང་གིས་དམན་ཆུང་གཡོག་མོ་ལེ་གཟིགས། །
ད་ནས་མི་རབས་ཀུན་གྱིས། །
ང་ལེ་བྱིན་རླབས་ཆེའོ་ཟེར། །
49ཀུན་དབང་ཁོང་གིས་ང་ལེ། །
ངོ་མཚར་གྱིས་ལས་རྣམས་མཛད། །
ཁོང་གི་མཚན་ནི་དམ་པ་ཡིན་ནོ། །
50ཁོང་ལེ་བརྩི་བཀུར་ཞུས་མཁན་མི་རབས་ཀུན་ལེ། །
ཁོང་གི་ཐུགས་རྗེ་དེ་དུས་མཐའ་མེད་གནས་པར་འགྱུར། །
51ཁོང་གི་ཕྱག་གིས་མཛད་ཆེན་བསྒྲུབས། །
ང་རྒྱལ་ཅན་ཀྱ་གཏོར་བར་མཛད། །
52དབང་ཅན་ཀྱ་ཁྲི་ནས་ཕབ་པར་མཛད། །
དམའ་བ་ཀྱ་མཐོ་ས་ལེ་བཏེགས་པར་མཛད། །
53ལྟོགས་པར་བཟང་པོས་ཚིམས་པར་མཛད། །
ཕྱུག་པོ་ཀྱ་ལག་སྟོང་ལེ་བུད་གནང་བར་མཛད། །
54-55མེས་མེས་ཨབ་ར་ཧམ་ལེ་གསུངས་པི་ཅོག་འདྲ། །
ཞབས་ཕྱི་ཡི་སི་ར་ཨེལ་པ་ལེ། །
ཁོང་གིས་རོགས་པ་གནང་། །
ཨབ་ར་ཧམ་དིང་དེའི་རྒྱུད་པ་ལེ། །
དུས་རྒྱུན་དུ་ཐུགས་རྗེས་གཟིགས། །
ཟིན་བསྟོད་གླུ་ཕུལ་ལི་དིག 56དེ་ནས་མིར་ཡམ་ཟླ་བ་གསུམ་ཚོད་སྲུ་མོ་ཨེ་ལི་ས་བེད་དིང་སྐྱེན་ལེ་བསྡད་དེ་རྗེས་ལེ། མོ་རང་ཁྱིམ་ལེ་ལོག་བུད་དི་དིག
ཁྲུས་གསོལ་བགྱིད་མཁན་ཡོ་ཧ་ནན་འཁྲུངས་པ།
57དེ་ནས་ཨེ་ལི་ས་བེད་ཟླ་བ་ཚང་སྟེ་བི་ས་ཞིག་སྐྱེས་པི་མ་ཟད། 58ཇོ་བོ་དཀོན་མཆོག་གིས་ཨེ་ལི་ས་བེད་ལེ་ཐུགས་རྗེ་གཟིགས་སྐྱོང་ཆེན་པོ་གནང་པི་དེ་ལེ། ཁྱིམ་མཚེས་དིང་གཉེན་འཁོར་ཀྱ་ཀྱིས་ཟང་ཐོས་ཏེ། མོ་རང་དིང་སྐྱེན་ལེ་དགའ་རི་དིང་དགའ་སྤྲོ་བགྱིད་འོད་དིག 59-60དེ་ནས་ཞག་མ་བརྒྱད་པ་ལེ་ཕྲུ་གུའི་ཕོ་མཚན་གྱི་རྩེ་ལྤགས་གཅོད་རྒྱུ་ཆོ་ག་དེ་ལེ། ཁྱིམ་མཚེས་དིང་གཉེན་འཁོར་པ་ཡེ་རེ་འོངས་པི་མ་ཟད། ཕྲུ་གུའི་མིང་ལེ་ཟང་ཨ་ཀྱིའི་མིང་ཅོག་འདྲ་ཟེ་ཀ་རི་ཡཱ་ཟིན་འདོགས་དགོས་བསམས་པི་དིག ཡིན་ནའང་། བི་སའི་ཨ་མས་ཨ་ཀྱི་མིང་ཅོག་འདྲ་འདོགས་རྒྱུ་མན། བི་སའི་མིང་ལེ་ཡོ་ཧ་ནན་ཟིན་འདོགས་དགོས་འོད་དིག་སྨྲས་པི་དིག 61དེ་ནས་གཉེན་འཁོར་པ་ཀྱ་ཀྱིས་མོ་ལེ། ཁྱོད་ཀྱི་རིགས་རྒྱུད་ནང་ལེ་མིང་དེ་ཅོག་འདྲ་ཞིག་སུ་གཅིག་ཟང་མེད་དིག་སྨྲས་པི་དིག 62ཡང་ཁོང་ཀྱ་ཀྱིས་བི་སའི་མིང་ལེ་ཅི་འདོགས་ཀྱི་དོ་ཟིན་ཨ་ཀྱི་ལེ་ལག་བརྡ་བྱས་ཏེ་དྲིས་ཕེན། 63ཨ་ཀྱིས་ཤིང་ལེབ་ཞིག་འཁྱེར་ལེད་དང་སྨྲས་པི་དིག དེ་ནས་ཤིང་ལེབ་དེའི་ལྟག་ག་ལེ་ཨ་ཀྱི་ཁོས་བི་སའི་མིང་ལེ་ཡོ་ཧ་ནན་ཡིན་དིག་ཟིན་བྲིས་ཕེན། ཁོང་ཡེ་རེ་ཧ་ལས་ཆེན་པོ་བྱུང་པི་དིག 64དེ་ལོང་མེད་ལེ་དཀོན་མཆོག་གིས་ཟེ་ཀ་རི་ཡཱ་ཁོ་རང་ལྐུགས་བཀྲོལ་གནང་སྟེ། ཁོ་ལབ་ཟེར་རྒྱུ་འོད་ཡོད་བྱུང་པི་མ་ཟད། ཁོས་དཀོན་མཆོག་ལེ་བསྟོད་པ་ཕུལ་ལི་དིག 65དེ་ནས་ཁྱིམ་མཚེས་ཡེ་རེའི་སེམས་ནང་ལེ་ཚ་ཟིང་ཟིང་དིང་ཡ་མཚན་ཆེན་པོ་བྱུང་ཕེན། གནས་ཚུལ་དེ་ཡ་ཧུ་དཱ་ལུང་པའི་རི་ལེ་ཆགས་འོད་ཡོད་གྲོང་གསེབ་ཡེ་རེ་ལེ་ཁྱབ་པི་དིག 66ཡང་གནས་ཚུལ་དེ་ཐོས་མཁན་ཀྱ་ཀྱིས་ཟང་དོན་དེ་ཡིད་ལེ་བོར་ཏེ། བི་ས་དེ་ཅི་གི་རྩ་ཆེན་པོ་འོད་ཡོད་ཞིག་སླེབས་འོང་ཟིན་འོད་དིག ཅི་ལེ་ཟེར་ནི། ཇོ་བོ་དཀོན་མཆོག་གི་ནུས་མཐུ་དེ་ནི་བི་ས་དེའི་སྐྱེན་ལེ་འོད་དིག
ཟེ་ཀ་རི་ཡཱའི་ལུང་བསྟན་པ།
67དུས་དེ་རྒྱ་བི་སའི་ཨ་ཀྱི་ཟེ་ཀ་རི་ཡཱ་ལེ་དམ་པའི་ཐུགས་ཉིད་ཁྱབ་ཕེན་ལུང་བསྟན་ཏེ།
68ཡི་སི་ར་ཨེལ་གྱི་ཇོ་བོ་དཀོན་མཆོག་ལེ། །
འུ་ཀྱ་ཀྱིས་བསྟོད་གླུ་ཕུལ་ཞིག །
ཁོང་འདི་རུ་ཕེབས་གནང་སྟེ། །
རང་གི་མི་རིགས་སྐྱབས་གནང་། །
69ཞབས་ཕྱི་དཱ་བིད་ཀྱི་བུ་རྒྱུད་ནས། །
ནུས་མཐུ་ཅན་སྐྱོབ་མཁན་ཁོང་རང་། །
འུ་ཀྱ་ཀྱི་ཆེད་དུ་གནང་པི་དིག །#1.69 གེ་རིག་གི་ཟེར་ལུགས་ནང་ལེ། སྐྱོབ་མཁན་ཟིན་མ་བྲིས་འོད་དིག ཐར་པའི་རྭ་ཀྱོག་དེ་ཡར་བཏེགས་ཟིན་བྲིས་འོད་དིག དེའི་དོན་དག་དེ་ནི། ནུས་མཐུ་ཅན་ཡིན་དི་དཔེ་ཞིག་ཡིན་དིག
70གནའ་སྔར་མོའི་དུས་ལུང་སྟོན་དམ་པ།
དེ་ཀྱ་ཀྱིས་ངག་ནས་གསུངས་པི་ཅོག་འདྲ། །
71སྡང་སེམས་དགྲ་བོ་ནས་འུ་ཀྱ་སྐྱོབ་ཀྱི་དིག །
72-73འུ་ཀྱ་ཀྱི་མེས་མེས་ལེ་སྙིང་རྗེ་མཛད་དི་དིང་། །
མེས་མེས་ཨབ་ར་ཧམ་ལེ་བོར་རི་ཞལ་བཞེས་དེ། །
ཁོང་གིས་བརྗེད་མ་གནང་སྟེ་དྲན་གནང་པི་མ་ཟད། །
74-75འུ་ཀྱ་དགྲ་བོའི་ལག་ནས་སྐྱོབ་གནང་རྒྱུ་ཆེད་དུ། །
ཁོང་གི་དྲུང་དུ་ཚེ་གང་འཇིགས་པ་མེད་དི་དམ་པ་དིང་། །
དྲང་བདེན་ངང་ནས་ཁོང་ལེ་བསྙེན་བཀུར་ཞུ་འོད་དིག །
76ཁྱོད་ནི་བླ་ན་མེད་པའི་དཀོན་མཆོག་གི་ལུང་སྟོན་པ་ཡིན་དིག་ཟིན། །
སྐྱེ་ཕོ་མོ་ཀུན་གྱིས་ཁ་ནས་ཐོན་ཏེ་ཁྱབ་པར་འགྱུར། །
ངའི་བི་ས་ཁྱོད་ནི་ཇོ་བོའི་སྔོན་ལེ་འགྲོ་དགོས་པི་དིང་། །
ཁྱོད་ཀྱིས་ཁོང་གི་ཕེབས་ལམ་དེ་གྲ་སྒྲིག་བགྱིད་ཀྱི་དིག །
77མི་རིགས་ཀུན་གྱི་སྡིག་པ་བསལ་ལི་ཐར་བའི་དོན་ལེ། །
ཁྱོད་ཀྱིས་ཁོང་གི་མི་རིགས་ལེ་ལམ་བཟང་པོ་ངོ་སྤྲོད་བགྱིད་ཀྱི་དིག །
78ཁོང་ནི་སྙིང་རྗེ་ཅན་གྱི་དཀོན་མཆོག་དེ་ནི་ཡིན་དིག །
ཁོང་ནི་གནམ་ནས་ཞོགས་པའི་ཉི་མའི་འོད་ཟེར་ཅོག་འདྲ། །
འུ་ཀྱ་ཀྱི་དགུང་ལེ་འཕྲོ་འོང་རྒྱུ་ཆེད་དུ་ཡིན་དི་མ་ཟད། །
79གཏི་མུག་དིང་འཆི་མུན་པས་གནོན་འོད་ཡོད་ཀུན་ཀྱ། །
ཞི་བདེའི་ལམ་དེ་ལེ་འཁྲིད་རྒྱུ་ཆེད་དུ་འོད་ཟེར་དེ་འཕྲོད་ཀྱི་དིག །
ཟིན་ལུང་བསྟན་པི་དིག 80དེ་ནས་བི་ས་ཡོ་ཧ་ནན་ཁོ་རང་ནི། ཉིན་རེ་ནས་ཉིན་རེ་འཚར་ལོང་བྱུང་པི་མ་ཟད། སེམས་སྟོབས་ཆེན་པོ་འོད་ཡོད་མི་ཞིག་བྱུང་སྟེ། ཡི་སི་ར་ཨེལ་པ་ཀྱ་ལེ། ཁོ་རང་མངོན་སུམ་དུ་མ་སྟོན་བར་དུ། ཁོ་མི་མེད་ལུང་སྟོང་ལེ་བསྡད་དི་དིག །
Currently Selected:
ལུ་ཀཱ། 1: DLPO
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023 Wycliffe Bible Translators, Inc. All rights reserved.