Rutu 3
3
Rutu ma Poasi kero haitaku ana rihi hana tori hitariana u'uni'a
1Tai hairatoa Naomi keni hunona Rutu 'eka arahu 'uri'ene tarea, <<Keni nau, 'e rete hana na ka ahu'ohia rihi ni mamaroha rete hana mane 'eka rio su'amu a'i. 2Poasi nia hi kenini to'iha naia 'o to'ito'i ha'ani kira, Inaia te mane 'e takihana ami aihu. Me'etani 'ene 'eka rao to'i ana torihitaria ana hi u'una pari ana rihi kira ka toritori a'i. 3Naru rete 'o, ma si'ihio ana waiwai esiini rete ma 'oko hokosia maku retete 'o. Naina 'oko siho tori hana rihi kira ka toritori hitaria 'u'uni'a a'i, tairihi 'osi tau ma 'e raea 'o 'oni taina, rara 'eka hana siko ma 'eka ko'u siko. 4Aana horo'a 'eka eeno hauhu'a ma oko raea rihitaihai nia 'e eeno aa'i. Naina ma oko raa a'ea maku 'e ru aa'i mania ae'ae'na ma oko eeno hu'a ha'ania. 'Eka rao iria tari 'o 'are uta hana taua>>.
5<<Rete na ka rao tau su'ana rikimana 'are 'uta 'o iria,>> Rutu 'eka orisia. 6Naina 'e ra tori hana rihi kira ka toritori hitaria 'u'uni'a a'i. Ma 'e taua rikimana 'are hunona 'e iria hana 'eka taua.
7Ana horo'a nia Poasi 'e hana ma 'e ko'u siko ma raena 'e tohoni rete rika'a no'o, naina ma 'e ra eeno hu'a no'o ana susu'u'a wau nia hana'aniana hi kereni 'e rau a'i. Rutu 'e kawara'a nia, ma 'e 'ae'ohia 'ae'aena ma 'e eeno su'ana ahuana. 8Raona tou'ani poni mane 'ene 'eka tau raea 'are 'e 'apiana ma 'e po'ota'i ma 'e 'amira'i ana keni 'e eeno su'ana ahuana.
9<<Ii'o iitai 'ai'ene?>> Mane 'eka haisoe 'una.
<<Inau Rutu kenini to'iha 'o, 'oko aarokasia nunusu'ana maku 'o haahi nau, tonaana i'o na'oni mane ni usuma'aniha.>>
10<<Iawe 'eka nanama'ani 'o, keni nau,>> mane 'eka orisia 'urina. <<Mani reteha 'ai'ene 'e paina taroriua mani 'are nia 'o ha'ata'ania aku si: 'oma oro su'ana hi mane nanau no'o, 'ihaita kira tariare'a ma kira maira'a. 11Ma no'o 'ai'ene keni nau, 'osi tau ma 'o ma'u. Na ka rao tauhamu rikimana 'are nia 'o haisoe ha'i. Ma rikimana ta'a raona hanua 'ene kira ka raea i'o keni totoraha 'o 'e rete rika'a. 12Ana mara'imoriha inau na'oni maneni usuma'aniha, tairihi na'oni maneni usuma'aniha ritaro nau 'e 'oni kane. 13'Oko 'oni tai'ene me'etani 'ene ma rarisi 'are mara na'oni maneni usuma'aniha ka haiponi 'o, ma 'e rete, raita'ania 'eka haiponi 'o. Tairihi 'are mara 'e kama usuma'ani 'o, 'urihana Iawe 'e mauri mara'imori, inau tana na taua. Oko ma'asu kau tai'ene masia rarisi>>.
14Naina 'e eeno suana ahuana tarea rarisi, tairihi 'e ta'era'i raona roko horo'a te noni 'esi rio raea maana te noni kane; Naina mane ka arahu 'uri'ene, <<'Osi tau ma kira raea keni 'e hura ana rihi kira ka toritori hitaria 'u'uni 'are a'i.>>
15Ma mane 'ene ka arahu 'uri'ene ru'u, <<'Oko torea mai haku mani makuni ahu rape ma 'oko rahaa ta'ania.>> Ma 'e rahaa ta'ania, ma mane 'ene 'e akasia ono hahanan 'u'uni pari hana raona makuni ahu rape ma 'e suru'ia hana pairorona. Naina mane 'ene 'e oriai tarea hanua wau.
16Horo'a Rutu 'e ori mai tarea keni hunona, Naomi 'eka haisoe 'uri'ene, <<rikimana 'are 'e rau 'uta no'o keni nau?>>
Naina 'eka ha'anoroa hunona su'ana rikimana 'are nia mane 'e taua hana, 17ma kane ru'u, <<Mane 'e watea haku ono hahanan 'u'uni pari ha'ania wara 'uri'ene, <'Osi tau ma 'o ori rakata'i ha'ania ka'eka'emu hora'aa tarea hunomu.> >>
18Naina Naomi 'eka arahu 'uri'ene, <<haimasi, keni nau, rara 'oko tautaria 'are 'uta 'eka rao rau. Mane 'ene 'esi mamaro rara 'eka ruka retea siri'ina 'ene.>>
Currently Selected:
Rutu 3: ALU
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2024, Islands Bible Ministries. All rights reserved.