Lukas 6
6
Matutra tut laɗo ngah mono habayangɗa ata Yahudi
(Mat. 12:1-8; Mrk. 2:23-28)
1Ɗaage ɗiha laɗo ngah mono habayangɗa ata Yahudi, Yesus napallakawe bat oma gandum oledi ana hakodo halole-Na. Ana hakodo halole-Na ɗapata gandum maɗa kohe waidi limmaɗa, maɗa yaadi. 2Raɗa ata walta kalibbo Farisi ɗahanewe, “Ahha mi mam layiy uk-parehada yitta napaheri ta laɗo ngah mono habayangda ata Yahudi?”
3Balehanai Yesus, “Walem kal bahhaꞌmawe tut harayinai raja Daud. Nyi mono raɗa olena ɓaɗa kalabba? 4Nyi natama ta Ummanai Mori nangalai kababa ɓehamaaraka tabarai Alla, mana yaadi. Mono nayii ʄaladi kababa raɗa olena. Ɓaɗoukage uk-parehada yitta, imam ɗahe kayaadi raɗa kababa.”
5Malinagei Yesus, “Ana-Na Kaɗaꞌ Ata kawahage ta laɗo ngah mono habayangɗa ata Yahudi! Mono kapohtawe agawe harayi ulla waleka ai harayi ulla ta laɗo neɗo.”
Yesus nahataggahai ata kamate gaɓɓa limmana
(Mat. 12:9-14; Mrk. 3:1-6)
6Ta ɗiha wu laɗo ngah mono habayang hekaɗa ata Yahudi, Yesus nakako hanuwana ata ta umma hadau kangote ata Yahudi.#6.6 Umma hadau kangote ata Yahudi, yoɗa hadau bahhaɗage Jurata Lii-Kira Kamema, hadau kangote, hadau lii-hanuwa lii-ha akka mono hadau pohta palakara. Neɗo ta hadau, ɗaan ata kamate gaɓɓa limmana. 7Raɗa gurr agama ata Yahudi mono ata walta kalibbo Farisi ɗamayegana lara tannam kapik kolen jalanai Yesus. Nyiɗawe maɗa hamatara hingun ɓana hataggahaka ata ta laɗo ngah mono habayangɗa ata Yahudi. 8Tanyiɗuwei Yesus natadawe pahangaɗaɗa. Nyiwe malinage tabarana ata kamate gaɓɓa limmana, “Mai dede ta aro!” Naɗa ata nakaɗe, mana kako dede ta aro. 9Maɓeggei Yesus nakanukai raɗa ata kaɗaana neɗo, “Ɗoukge uk-parehada ata Yahudi, agana harayida ta laɗo ngah mono habayangda? Rayige kadahha waleka rayige kajapata? Hatoulka ata waleka hamohe-damona ata?” 10Yesus natoro kahhai tangngaɗa ata kaɗaana neɗo, malinage tabarana naɗa ata, “Haʄolan limmamu.” Mana haʄolan limmana, hawingna taggaha limmana.
11Tabolo gurr agama ata Yahudi mono raɗa ata walta kalibbo Farisi ɗabaan takka, mahalegeɗage ɓaɗa woroge tutge agawe rakkana harayiɗa tabaranai Yesus.
Yesus napedei kabul ɗuɗa ana pahalewa-Na
(Mat. 10:1-4; Mrk. 3:13-19)
12Ɗaage hadaka, Yesus napane ta bat letena, mana habayangna. Yoɗa neꞌna mana habayangna tabarai Alla kaɗiha gaꞌna. 13Kole ɓana magakahage, Yesus nakamaikadi tangngaɗa kaɗoku-Ni, ta jongaɗa napedeyi kabul ɗuɗa ana pahalewa-Na, raɗa yiɗɗaꞌna: 14Simon (pahangara ʄalai Petrus), Andreas anguwunai Simon, Yakobus monoi Yohanis, Filipus monoi Bertolomeus, 15Matius monoi Tomas, Yakobus anai Alfeus, monoi Simon (“ata Zelot”),#6.15 Zelot wuwe ngara partai walta ata Yahudi. Ngara hekage Zelot, Patriot, karun ge dede ɗau walta kahareha Roma. 16Yudas anai Yakobus monoi Yudas Iskariot murge kamalajani Yesus.
Yesus nahanuwana mono nahataggaha buta ata
(Mat. 4:23-25)
17Maɓegge Yesus naburr walta letena marangadi ana pahalewa-Na, maɗa ngah mono ɗadede ta hadau kamidara. Neɗo ɗaadi ata buta kaɗoukɓe-Ni mono buta ata kawalta tangngana hadau ta tana Yudea, kota Yerusalem, mono butayi walta kota Tirus mono kota Sidon ka ta nir ban na. 18Yiɗɗa ɗamai tannam karangei Yesus, mono kana hataggahayi walta kalawaraɗa. Raɗa ata hatamana wad japata ɗamai ʄala mono hataggaha ʄalayi. 19Tangngaɗa ata run-ge naroni Yesus, oroge ɗaage kawaha kahuuna walta tau-Na mono nahataggaha kahhayi tangngaɗa.
Ata kanyuru mono ata ai kanyuru
(Mat. 5:1-12)
20Yesus natoroyi ata kaɗoku-Ni mono linage,
“Maringkana mi ata milla,
oroge Alla ɓa nyiꞌna Rajami.
21Maringkana mi ata kalabba ɓatauge.
Mi enga ɓoktam.
Maringkana mi ata kahoo,
oroge nimla enga malham!
22Maringkana mi habut ate, ai hahiba, ai hatau hiina mono halanglira oroge mi ɓam ɗokuni Ana-Na Kaɗaɗ Ata! 23Nutna raɗa weɗa-waikaɗa tauɗa ʄalage ɓaɗa pahaɗai raɗa lede-liinai Alla ulge. Ɓana ɗaꞌkawe tabaram ɓatauge, engaɗahom lagahara mono nego ege ate, oroge madakkawe upam paha inyakaɓe ta sorga.
24Tabolo lilokom mi kapote ɓatauge,
oroge mi paɗaɓege tangngage kadahha!
25Tabolo lilokom mi kaɓokta ɓatauge,
oroge nimla enga kalabbam!
Lilokom mi ata kamalha ɓatauge,
oroge nimla enga mayilla atem mono enga hoomi!
26Lilokom mi, ɓaɗa ɗaikawu tangngaɗa ata, oroge ɓatauɗa ʄalage weɗa-waikaɗa ɓaɗa ɗaikayi lede-lii kapalleka ulge.”
Manawarakin muhum
(Mat. 5:38-48, 7:12a)
27“Tanyiɗuwe tabarami karange-Wa ɓatauge, Nauwa lugɗamigeː manawarakin muhumu, mono rayige kadahha tabarana ata kabutug ate. 28Karaiwe tabarai Alla tannam kana rayige kadahha tabarana ata kahauragu. Mono habayang ʄalani tutna ata kajapata tabaramu. 29Ɓaɗaaka kapakkokaguge gaɓɓa papimu, haturuꞌge gaɓɓawal papimu. Nyi ɓaɗaaka karamaguge kalabbe madakkamu yii ʄalanage kalabbe ta ngihimu. 30Ɓaɗaaka haraiɗa ɓa agayi kaɗaana tabaramu, yiiɗaꞌnad. Nyi ɓaɗaaka karamagudi ɗaumu, ilam karai haggai. 31Pahaɗai ata heka katauna hakab atem tannam kaɗa pahaɗaguge tabaramu.
32Ɓam manawarana ata, ɓa duka ɗahena ata kamanawaragimi, agawe ha utum? Walaꞌma ha utum! Ata doku-jala ɗamanawara ʄaladi ata kamanawarad yiɗɗa! 33Ɓam rayikage kadahha tabaraɗa ata karayige kadahha tabarami, agawe ha utum? Walaꞌma ha utum! Ata doku-jala ɗarayi tauɗa ʄalage! 34Mono ɓam yiitudka amaha ɓa duka ɗahena ata katoma pahagadi, agawe ha utum? Walaꞌma ha utum! Ata doku-jala ɗayiitud ʄala amaha tabara ata doku-jala waɗeka, oroge ɓa enga kole haggaɗahod kamerana butana! 35Ɓaɗoukɗage wale tauɗaꞌmage! Manawaran muhumi mono rayige kadahha tabaraɗa. Yiitud ɗahom, mono ilam mannekage ɓam kole haggadi. Ɓam rayi tauɗaꞌge, enga madakkage ha utumi mono enga ɗaꞌ ananagimiy Alla Kahadda Madehta. Orogei Alla nadahha ate tabaraɗa ata aika tadawe waiwu kalinani, mono tabaraɗa ata kajapata. 36Mi hatingo ɗahoge manawaram, oroge Amam ta sorga Na manawara.”
Ilam geha hajalai ata heka, tabolo nareih dahhaɗahowe ɓada geha ʄarra walta doku-jala ɗauda
(Matius 7:1-5)
37Ilam hajalay ata heka, tannam ila nahajalamiy Alla. Ilam houkkana ata heka, tannam ila nahoukgimiy Alla. Hawalin ata heka, tannamuy Alla kana hawalgimi. 38Yiikin ata heka, tannamuy Alla kana yiigim tabarami. Mi enga hibamige hayii kamajaɓola haɓe ha ukra kabanna tutumi. Oroge ukra hawaim tabara ata heka, nyiʄalawe ukra hawainai Alla tabarami.”
39Maɓeggei Yesus naloluyi tabaraɗa lii-hatuʄa kalinana, “Wale naɗaɗiꞌmawe ata moro ɓana ha mad ole ata morona, enga nyiwe ɓaɗa moun kahha ta goɓana. 40Walaꞌma lakawa hakola kareih walta gurrna. Tabolo naɗa lakawa kabanna hakolana, nyi enga namerani gurrna.
41-42Ahha mam etanage jalana oleɓaimu kahoꞌkina katauna karabka ta matana, ma nna jalam kamadakka katauna yay bolo ta matam, walem etaꞌmayi? Aganaꞌkawe ɓam takwe tabara oleɓaimu, ‘Mai, kaglaiguni naꞌ karabka ta matamu,’ ma naɗa yay bolo ta matam aim etamoyi? Taa... ata kakoɓo atena! Laiton naɗa yay bolo ta matam tannam kana hirayi matam, mono kam pikna ɓam lainan karabka ta matana oleɓaimu.’ ”
Ngih atena naɗa wu ata ɗaꞌwe ɓada etanage ledege harayina
(Mat. 7:16-20, 12:33-35)
43Pu yay kadauka enga walna wuuꞌmana aika dahha. Tauɗa ʄalage pu yay aika kadauka enga walna wuuꞌmana kadahha. 44Naꞌ bu yay da tadayi walta wuuna. Tara warri enga walna wuuꞌmana wuu kapullota,#6.44 Lar ta Lii Jaj Kaberu wu ara.linaɗawe. mono rabta kaman tarana enga walna wuꞌmana wuu anggur. 45Ata kadahha napahuudi pahangaɗana kadahha, oroge atena ɓana bann ge kadahha. Ata kajapata napahuuge kajapata, oroge atena ɓana bann ge kajapata. Oroge agawe hatak walta ɓaana nyiwe kahuuna walta kalaak atena.”
Ata kaɗoukge harehanai Yesus nyi katahna aroge mayilla mono oja
(Mat. 7:24-27)
46Ahha mi mam kamaika-Ga, ‘Mori, Mori,’ tanyiɗuwe walem rayiꞌmadi agawe hatakki-Gu tabaramu? 47Iyaɗahingkayi ata kamai tabara-Gu mono rangewe hatakki-Gu, lohho karayige ta mourhaɗa. Nauwa engag takmige tabarami iyaɗaho dau hatuʄagudi. 48Nyiyo natuʄayi ata kahadede ummana, nahakoja hakidge yal, mono nahadedewe ummana ta pan watu. Ɓana halai wekana, wee laiwe napanege ummana, nna ummana walna geɗoꞌmawe, oroge ɓahadedewe ta pan watu. 49Tabolo ata karangeɓegage hatakki-Gu mono aika rayige, natuʄayi wu ata kahadede ummana aika ta pan watna. Ɓana panege laiwe, nabukkawe nna ummana, mono wale anaꞌmanage manyegarage!”
Currently Selected:
Lukas 6: lmy
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2024 (Active), Wycliffe Bible Translators, Inc. All rights reserved.