الإنجيل زي ما كتبه مَتَّى 10
10
يسوع يرسل الإطنعشر تلميد
1بعدين عيط يسوع على تلاميده الإطنعشر، و عطاهم سلطان على الأرواح النجسة عشان يطردوها و يشفوا كل مرض وعلة. 2وهدي أسماء الرسل الإطنعشر : سمعان و معروف بإسم بطرس، وَ أخوه أندراوس، ويعقوب ولد زبدي، ويوحنا وأخوه؛ 3وفيليبس، وبرثلماوس؛ و توما، ومَتَّى إلا يشتغل في الضرايب، ويعقوب بن حلفى، وتداوس 4و سمعان الْقَانَويُّ - ( إلا كان يدعم أستقلال اليهود من سلطة الرومان)؛ و يهودا الإسخريوطي إلا خان يسوع.
5و هدولين الإطنعشر تلميد إلا رسلهم يسوع و وصاهم و قال ليهم: «لا تسافروا إلى الشعوب إلا مو يهودية، ولا تدخلوا أي مدينة سامرية. 6لكن الأولى إنكم تروحوا للخرفان الضالّة في بيت إسرائيل. 7و أنتون رايحين، بشرّوا و قولوا: ملكوت السماوات قرّب. 8أشفوا المرضى، وإحيوا الميّتين، وطهروا البرصان، وحرروا الناس من الجنانوه. بالمجّان أخدتوا، فبالمجّان أعطوا! 9لا تحملوا وياكم في شنطكم لا دهب ولا فضّة ولا نحاس، 10ولا تاخدوا للطريق لا شنطة ولا ثوب ولا فسخة ثانية ولا نعال ولا عصا: لأن إلا يشتغل يستحق أن ينعطى أكله.
11و كل ما دخلتوا مدينة أو قرية، فدوروا فيها عن شخص يستاهل، و اقعدوا هناك في بيته إلين ما تمشوا. 12و لما تدخلوا بيت، سلموا على أهل البيت. 13فإدا كانوا رعاة البيت صحيح يستاهلوا، فبينزل عليهم سلامكم. و إدا ما كانوا يستاهلوا، بيرجع سلامكم ليكم. 14و إدا أحد منهم ما قبلكم ولا يمبى يسمع كلامكم سواء في بيت أو مدينة، فإطلعوا من هناك، ونفضوا الغُبار عن رجولكم. 15بأمانة أقول ليكم: بتصيّر حالة منطقة سدوم و عمورة في يوم الدينونة لما الله يدين العالم أخف من حالة هالمدينة.
16هدانا أرسلكم زي الخرفان بين الديابة، خليكم حكيمين زي الحيات ومسالمين زي الحمام. 17أنتبهوا من الناس! لأنهم بسلّموكم إلى المَحاكِم، وبيجلدوكم في معابدهم؛ 18وبيجرجروكم عشان تتكلّموا قدام الحُكّام والملوك بسببي: فبكون كلامكم شهادة ليي عند اليهود و بقية الشعوب. 19و لما يسلموكم، لا تخافوا و لا تفكّروا كيف بتتكلموا أو وش بتقولوا. لأنكم في ديك الساعة بينعطى ليكم إلا تحتاجوا تقولوه. 20لأنكم مو أنتون إلا بتتكلموا، لكن روح أبوكم السماوي هو إلا بيتكلم فيكم. 21وبيسلم الأخو أخوه للموت، والأبو ولده. وبيتمرد الأولاد على وامهم وابوهم، وبيقتلوهم! 22و بتكونوا مكروهين عند الناس كلها بسبب أسمي. و لكن إلا يثبت إلى النهاية، هو إلا بينجوا. 23فإدا أضطهدوكم في أي مدينة، فإهربوا لغيرها. بأمانة أقول ليكم: ما بتخلصوا من مدن إسرائيل قبل ما يرجع إبن الإنسان.
24التلميد مهو أحسن وأعلى في مرتبته من الأستاد، ولا العبد أحسن من سيده. 25يكفي التلميد أنه يصير زي أستاده، و العبد زي سيده! و إدا كانوا قايلين من زمان عن رب البيت «بَعْلَزَبُولَ»، فويش بيقولوا عن أهل بيته؟ 26لا تخافوا منهم: لأن ما في شي محجوب ما بينّكَشف، و ما في شي مخفي بيظل مخفي! 27إلا أقوله ليكم في الظَلّمة، قولوه في النور، واللي تسمعوه بالهَمس، نادوا به على السطوح. 28لا تخافوا من إلي يقتلوا الجسد، و هم عاجزين أنهم يقتلوا النَفس، لكن الاولى أنكم تخافوا من إلي يقدر أنه يهلك النَفس و الجسد في نار جهنم. 29مو العصفورين ينباعوا بقرش واحد؟ ومع هدا ما يطيح الواحد منهم على الأرض بدون علم أبوكم السماوي. 30وأما أنتون كل شعره في روسكم معدودة. 31فأبد لا تخافوا! أنتون أحسن من عصافير واجد.
32إلا يعترف فيي قدام الناس، بعترف أنا بعد به قدام أبويي إلا في السماوات. 33و كل من ينكرني قدام الناس، بنكره بعد أنا قدام أبويي إلا في السماوات.
34لا تفكّروا إني جيت عشان أثبت سلام على الأرض. ما جيت عشان أنشر السّلام، لكن جيت بالسيّف. 35فأنا جيت عشان أخلي الرجال على خلاف ويا أبوه، والبنيه ويا أمها، و مرت الولد ويا عمتها - أم زوجها. 36و چدي يصيروا أهل بيت الإنسان أعداءه. 37إلا يحب أبوه و أمه أكثر مني، ما يستاهلني. و ألا يحب ولده أو بنته أكثر مني، ما يستاهلني. 38و ألا ما يحمل صليبه و يتبعني، ما يستاهلني. 39واللي يتمسك بحياته، يخسرها؛ واللي يخسر حياته عشاني، بيربحها. 40إلا يقبلكم يقبلني؛ و إلا يقبلني، يقبل إلا أرسلني. 41إلا يرحب بنبي لأنه نبي، فهو يحصل جزا نبي؛ و ألا يرحب برجّال زين لأنه زين، فهو يحصل جزاء واحد بار. 42و أي واحد سقى من هدولين الجهال الصغار حتى لو كاس ماي بارد، بس لأنه من تلاميدي، بأمانة أقول ليكم: إن جزاه ما بيضيع أبدا».
Currently Selected:
الإنجيل زي ما كتبه مَتَّى 10: QNAV
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Qatifi New Arabic Version © 2024 Strategic Resource Group