मर्कस् 16
16
1ओहाङःसैको ओउः धोओ दीन् पुत्आक्तीको मरीयम् माग्दालामा याकुब्कोः आमा मरीयम्मा सलोमेमा ओउः सुम्चाक् मोमःचोःलम्इ पेतो सय्ङ्ओ म्हाङ् ल्यानःसा साती लेःआकानी। 2साती लेःआक्तीको ओउः धोओ दीन्कोः स्याङ्ह्लो आइतेबार् दीन्कोः न्याम् थोङ्खयःओ बेलाहाङः ओउः सुम्चाक् च्योक्ती आल्ती न्याम् दाह्ओहाङः येसुकोः तेस्ताङ् वाङ्आकाय्। 3ओहाङः आल्ती वाह्तोक्हाङः “लौ ओउः तेस्घाङ्कोः बोमःती गम्ओ बाङ्पाय् सुइ तुलुती तेस् ओङ्ह्चाःतय्ही” त दाय्ह्ती नोःकाय्आकाय्। ओउः बाङ्पाय् आन लीःतो खेःतो 4ओहाङःसैको तेस्ताङ् दाह्ती वाङ्तोक्हाङः ओउः बाङ्पाय् तुलुती तेस्घाङ् फोल्ओलेः च्यवःआकानी। 5एत च्यवःती ओउः मोमःचोःलम् घाङ्हाङः पोक्ती यात्चाक् भाम्ओ क्रमःनाय् लावओ लाव्मयः मान्तालो लेखा ङोय्सै च्युङःती मुओ च्यवःती ओउःमयः आन ग्रीनःआकाय्। 6“लौ ताः ग्रीनःइली। ओउः ङ्हासै क्ल्याय्ओ सीङःहाङः सात्ओ नासरेत् गाव्कोः येसुकायः बोङःतेःनीतो ओउःपाय् इहाङःलेः मुल उह्ती च्योक्ओ लेःआः बा। लौ ओउःकायः एनःती गम्ओ थाव्पाय् द्याह् सोह् मुनाः त योनु दै” त दाय्ह्ती ओउः मान्ता तोती 7“लौ द्याह् पाय्ह्न। ‘येसुपाय् गालीलताङ् नीङ्सै ङ्हालेः स्यालःती आल्नाः। ओउःइ अनम्ह् तोओलो लेखा ओहाङः ओउःकायः क्रुस्सा दोःतेःनै’ त दाय्ह्ओ पत्रुस्कायःमा ओउःकोः साथीलम्कायःमा छ्यानःती तोनु” त दाय्ह्ती ओउः भाम्ओ नाय् लावओ मान्ताइ तोआथास। 8ओउःत सायःआक्तीको ओउः सुम्चाक् मोमःचोःलम् तेस्घाङ्सै ग्ल्युङ्ह्ती ल्हुङ् क्रम्तीमा रैतीमा क्रव्आकाय्। ओउःमयः ओउःच्युक् रैती झ्यान्ते मेस्लोहाङः स्याव्ओ कुरापाय् अरु सुकायः छ्यानःनीली।
9ओहाङःसैको आइतेबार् दीन्हाङः येसु सीआक्तीको उह्ती च्योक्ती ङ्हापाय् मरीयम् माग्दालाकःताङ् थाती वाङ्आ। ओउः मरीयम्कायः येसुइ अनम्ह्काल सात् लान्कायः ल्हेस्ती वाय्ओ खेःतो। 10ओहाङःसै ओउःकःताङ् थाआक्तीको मरीयम्पाय् ओउः अरु क्रेस्ती र्याःओ येसुकुस् वाह्ओमयःकःताङ् आल्ती ओउः कुरा छ्यानःआथास। 11“लौ येसुपाय् उह्ती च्योक्तो मुओ त ङाइ मेस्खा च्यवःआलाङः बा” त दाय्ह्ती तोउतो एत तोओपाय् अरुलम्इ ङ्हाम्नीली। 12ओहाङःसैको लोन्तेसै नीस्चाक् येसुकुस् वाह्ओमयः गाव्ताङ् आल्तोक्हाङः येसुपाय् थे रुप् स्याव्ती थाओ च्यवःआकाचु 13एत च्यवःआक्तीको ओउःनीस्इ पाय्ह्ती “येसुकायः च्यवःआलाङःचु” त दाय्ह्तीमा छ्यानःचुतो ओउःनीस्कायःमा अरुलम्इ ङ्हाम्थाचल।
14फेरी लोन्तेसै येसु ओउः एघारजन लयः छ्युङ्ह्ओमयःकःताङ् आम्ह् जेःओ बेलाहाङः थाआ। थातोक्हाङः ओउःमयः ङ्हाम्मालो चाक्ओ ल्हुङ् स्याव्ती झ्यान्ते ओउःइ जान्आथास। 15“लौ द्याह्पाय् सबै ल्हाव्ह्दैबाङ्हाङः थोयःती ङाकोः पेओ समचार् सबै मान्तालम्कायः थोल्ह्ती तोनु दा। 16सुसुखेइ इ कुरा ङ्हाम्ती बाप्तीस्मा त्याक्नानी ओउः मान्तालेः दल्तो स्याव्नै सुसुखेइ ङ्हाम्नीली ओउः मान्तालेः लोने न्युम्ह्नानी। 17-18ङाकोः कुरा ङ्हाम्ओ मान्तालम् पेतो जाङ्ह्सा खाय्नानी। ङाकोः मय्ङ् पेह्ती लान्लम्कायः ल्हेस्मानानी नया भासालम् नोःमानै रु चुम्ओमा बीस् तुङ्ओ त खेःया ओउःमयः सीमाइली। जीक्ओ मान्ताकायः क्रुत्इ दीन्ह्आक्तीको स्याक्ताक्मानानी” त दाय्ह्ती येसुइ थातोक्हाङःपाय् ओउः एघारजनकायः तोआकान्।
19एतलेः येसुइ तोआकान् ओहाङःसैको लोने प्रभु येसुकायः लाङ्काताङ् लनःओ खेःतो ओहाङः परमेस्वर्कोः गुल्ह्दाङ् स्याव्ती परमेस्वर्कोः ङोय्सै च्युङःतीलेः मुआ। 20ओहाङःसैको ओउःकुस् वाह्ओमयःपाय् ल्हाव्ह्दैबाङ्कोः चार्दोवाताङ् थोयःती येसुकोः कुरा थोल्ह्ती तोआकानी। तोतोक्हाङः “इ कुरा दोङ्सीःओ कुरा लेःआः” त छ्यानःसाकायः परमेस्वर्इ ताङ्ह्ओ ग्याङ्ह्राय् जाङ्ह्ताक्आथास।
Currently Selected:
मर्कस् 16: CDM93
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 1993 Wycliffe Bible Translators Inc., All Rights Reserved.