متّی 5
5
پہاڑی وعظ
1یِسُوع بھِیڑ کُوں ݙیکھ کرائیں پہاڑی تے ٻَہہ تھِیا اَتے اُوندے شاگِرد اُوندے کولھ آ ڳئے 2اَتے او ایہ اَہدے ہوئیں تعلیم ݙیوَݨ لڳا۔
چَنڳی حیاتی گزارݨ دے اصول
(رَلدا مِلدا حوالہ: لُوقا 6:20-23)
3”چَنڳیں ہِن او لوک جیرھے رُوح اِچ غریب ہِن کیوں جو اَسمان دی بادشاہی اُنھائیں دی ہے۔
4چَنڳیں ہِن او لوک جیرھے ݙُکھی ہِن کیوں جو اُنہیں کُوں ترسلّا ݙِتا ویسی۔
5چَنڳیں ہِن او لوک جیرھے عاجزی نال رَہندِن کیوں جو او زمین دے مالک بݨائے ویسِن۔
6چَنڳیں ہِن او لوک جیرھے خُدا دی مرضی پوری کرَݨ دی سِک رکھیندِن کیوں جو او پُرباش کیتے ویسِن۔
7چَنڳیں ہِن او لوک جیرھے ٻنہیں تے رَحم کریندِن کیوں جو اُنہیں تے وی رَحم کیتا ویسی۔
8چَنڳیں ہِن او لوک جنہیں دے دِل پاک ہِن، کیوں جو او خُدا کُوں ݙیکھسِن۔
9چَنڳیں ہِن او لوک جیرھے صُلح کرویندِن کیوں جو او خُدا دے پُتر اَکھویسِن۔
10چَنڳیں ہِن او لوک جیرھے خُدا دی مرضی پوری کرَݨ دی وجہ کنُوں سَتائے ویندِن کیوں جو اَسمان دی بادشاہی اُنھائیں دی ہے۔
11تُساں چَنڳیں ہوسو جݙّاں میݙی وجہ کنُوں لوک تُہاکُوں بےعزت کرَݨ اَتے ݙُکھ ݙیوَݨ اَتے تُہاݙے بارے ہر قِسم دیاں بُریاں اَتے کُوڑیاں ڳالھیں کرَݨ۔ 12خُشی کراہے اَتے جُھمراں مَراہے کیوں جو اَسمان دی بادشاہی اِچ تُہاݙے کیتے ٻَہُوں وَݙّا اجر ہے اِیں کیتے جو تُہاݙے کنُوں پہلے نبیئیں کُوں وی اِیویں ستایا ڳیا ہا۔“
لُوݨ اَتے سوجھلے دی مثال
(رَلدا مِلدا حوالہ: مرقس 9:50؛ لُوقا 14:34-35)
13وَل یِسُوع آکھیا،”تُساں زمین دے لوکیں کیتے لُوݨ وانگوں ہِوے پَر جے لُوݨ دا سلُوݨ مُک وَنڄے تاں وَلا اُونکُوں کیویں سلُوݨا کیتا ویسی؟ او کہیں کَم دا نَئیِں رَہندا سِوائے اِیندے جو ٻاہر بُھکا ݙِتا وَنڄے اَتے لوکیں دے پیریں تَلے لتاڑیا وَنڄے۔ 14تُساں دُنیاں دے لوکیں کُوں خُدا دا رَستہ ݙکھاوَن کیتے سوجھلا ہِوے۔ جیرھا شہر پہاڑ اُتے وَسدے او لُک نَئیِں سڳدا۔ 15اَتے کُوئی ݙِیوا بال کرائیں اُونکُوں کَڄیندا نَئیِں بلکہ اُونکُوں ݙیواٹ اُتے رکھیندے تاں جو او گھر اِچ سارئیں کُوں سوجھلا ݙیوے۔ 16اِیویں تُہاݙی حیاتی وی لوکیں دے اَڳوں سوجھلے وانگوں نظرے وَل او تُہاݙے نیک کَمیں کُوں ݙیکھ کرائیں تُہاݙے اَسمانی باپ دی حمدوثنا کریسِن۔“
تورات اَتے نبیئیں دے صحیفے
17”ایہ نہ سمجھو جو مَیں تورات یا نبیئیں دے صحیفے منسُوخ کرَݨ آیاں، مَیں منسُوخ کرَݨ نَئیِں بلکہ اِنہیں دی حقیقی تعلیم ݙیوَݨ اَتے سمجھاوَݨ آیاں۔ 18مَیں تُہاکُوں سچّ اَہداں جے تَئیِں اَسمان اَتے زمین فنا نہ تھی وَنڄے اُوں ویلے تَئیِں تورات اِچوں ہِک زیر زَبر وی نہ مِٹسی جے تَئیِں نبیئیں دی راہِیں آکھیاں ڳئیاں ساریاں ڳالھیں پوریاں نہ تھی وَنڄن۔ 19جیرھا اِنہیں نِکے کنُوں نِکے حُکمیں اِچوں ہِک کُوں وی تروڑیسی اَتے لوکیں کُوں وی اِیویں کرَݨ دی تعلیم ݙیسی او اَسمان دی بادشاہی اِچ جِھکے درجے دا ہوسی پَر جیرھا اِنہیں تے عمل کریسی اَتے لوکیں کُوں اِنہیں دی تعلیم ݙیسی او اَسمان دی بادشاہی اِچ اُچے درجے دا ہوسی۔ 20کیوں جو مَیں تُہاکُوں اَہداں جے تَئیِں تُساں خُدا دی مرضی پوری کرَݨ اِچ شرع دے عالمیں اَتے فرِیسیئیں کنُوں اَڳوں نہ وَدھسو، او تَئیِں اَسمان دی بادشاہی اِچ کݙاہیں نَئیِں وَنڄ سڳدے۔“
کاوڑ نہ کرَݨ بارے تعلیم
21”تُساں شرعی حُکم سُݨی وَدو،
’قتل نہ کراہے اَتے جیرھا قتل کریسی اُونکُوں مَحشر دے ݙینہہ سزا مِلسی۔‘
22پَر مَیں تُہاکُوں اَہداں جیرھا وی اپݨے بِھرا اُتے کَوڑیسی او عدالت کُوں جوابدہ ہوسی اَتے جیرھا اپݨے بِھرا کُوں پاگل آکھسی، او وَݙّی مذہبی عدالت کُوں جوابدہ ہوسی اَتے جیرھا کُوئی اُونکُوں احمق آکھسی او دوزخ دی بھاہ اِچ سَٹیا ویسی۔ 23جݙّاں تُوں قُربانی آلے تھلّے اُتے اپݨی کُوئی نذر نیاز پیش کریندے ویلے تَیکُوں یاد آوے جو تیݙے بِھرا کُوں تَیں کنُوں کُوئی گِلہ ہے، 24تاں تُوں اپݨی نذر نیاز کُوں قُربانی آلے تھلّے اُتے چھوڑ کرائیں اپݨے بِھرا کولھ لڳا وَنڄ اَتے پہلے اُوندے نال مَنیوا کر وَل آ کرائیں اپݨی نذر نیاز پیش کریں۔
25عدالت اِچ پیش تھِیوَن کنُوں پہلے اپݨے مُدعی نال مَنیوا کر گھِن اِیں نہ تِھیوے جو او تَیکُوں مُنصف دے حوالے کرے اَتے مُنصف تَیکُوں سپاہئیں دے حوالے کر ݙیوے اَتے تُوں جیل اِچ ڈَھکیڄ وَنڄیں۔ 26مَیں تَیکُوں سچّ اَہداں جݙّاں تَئیِں تُوں جُرمانے دی ہِک ہِک پائی نہ ݙیسیں او تَئیِں قید اِچوں نہ چُھٹسیں۔“
زِناہ بارے شرعی حُکم اَتے یِسُوع دی تعلیم
27”تُساں شرعی حُکم سُݨی وَدو جو آکھیا ڳیا ہا،
’زِناہ نہ کراہے۔‘
28پَر مَیں تُہاکُوں اَہداں جو جیرھا گندی نیت نال کہیں تریمت کُوں ݙیہدے او اپݨے دِل اِچ اُوندے نال زِناہ کر گھِندے۔ 29اَتے جے تیݙی سڄّی اَکھ تَیکُوں گُناہ کرَݨ کیتے اُبھارے تاں تُوں اُونکُوں کڈھ سَٹ کیوں جو تیݙے کیتے اِیہو چَنڳاں ہے جو تیݙے لِنڳیں اِچوں ہِک لِنڳ نہ رَہوے اَتے تیݙا سارا جسم دوزخ اِچ نہ سَٹیا وَنڄے۔ 30اَتے جے تیݙا سڄّا ہَتھ تَیکُوں گُناہ کرَݨ کیتے اُبھارے تاں تُوں اُونکُوں کَپ سَٹ کیوں جو تیݙے کیتے اِیہو چَنڳاں ہے جو تیݙا ہِک لِنڳ کَپیج وَنڄے اَتے تیݙا سارا جسم دوزخ دی بھاہ اِچ نہ سَڑے۔“
طلاق دے بارے تعلیم
(رَلدا مِلدا حوالہ: متّی 19:9؛ مرقس 10:11-12؛ لُوقا 16:18)
31”ایہ وی آکھیا ڳیا ہا،
’جیرھا اپݨی ذال کُوں چھوڑے او اُونکُوں طلاق لِکھ ݙیوے۔‘
32پَر مَیں تُہاکُوں اَہداں جو جیرھا اپݨی ذال کُوں زِناہ دے سِوا کہیں ٻئی وجہ کنُوں چھوڑیندے او اُوں کنُوں زِناہ کرویندے اَتے جیرھا اُوں چھُٹی رَن نال پَرنیڄے او وی زِناہ کریندے۔“
قَسم چاوَݨ بارے تعلیم
33”تُساں ڄاݨدو جو تُہاݙے کنُوں پہلے لوکیں کُوں آکھیا ڳیا ہا،
’کُوڑیاں قَسماں نہ چَوائے بلکہ جو قَسماں کُجھ کرَݨ کیتے چاتیاں ڳئین او خُداوند دے ناں اِچ پوریاں کراہے۔‘
34پَر ہُݨ مَیں تُہاکُوں اَہداں جو اصلوں قَسم نہ چَوائے نہ اَسمان دی جیرھا خُدا دا تخت ہے۔ 35اَتے نہ زمین دی جیرھی اُوندے پیر رکھݨ دی چوکی ہے اَتے نہ شہر یروشلم دی قَسم چَوائے کیوں جو او بزُرگ بادشاہ داؤد نبی دا شہر ہے۔ 36اَتے نہ اپݨے سِر دی کیوں جو تیݙے وَس اِچ کَینی جو تُوں ہِک وال وی چِٹا یا کالا کر سڳیں۔ 37تُساں بَس ہاں آکھو یا نہ، کیوں جو اِیں کنُوں علاوہ جیرھی ڳالھ ہے او بُرے#5:37 بُرے ایہ لفظ شیطان یا اِبلیس کیتے استعمال تھئے مزید ݙیکھو، متّی 5: 39؛ 13: 38 وَلّوں ہے۔“
اِنتقام نہ گھِنݨ بارے تعلیم
(رَلدا مِلدا حوالہ: لُوقا 6:29-30)
38”تُساں شرعی حُکم سُݨی وَدو،
’اَکھ دے بدلے اَکھ اَتے ݙَند دے بدلے ݙَند۔‘
39پَر مَیں تُہاکُوں اَہداں جو بُرے دا مُقابلہ نہ کراہے اَتے جیرھا تیݙی سڄّی ڳَلھ تے چماٹ مارے تاں ݙُوجھی ڳَلھ وی اُوں دو پھیر ݙے۔ 40اَتے جے کُوئی تیݙا چوغہ گھِنݨ کیتے مُقدمہ کرَݨ چاہوے تاں اپݨا چولا وی اُونکُوں گھِنݨ ݙے۔ 41جے کُوئی تَیکُوں وِنگار اِچ ہِک مِیل تَئیِں گھِن وَنڄن چاہوے تاں تُوں اُوندے نال ݙُو مِیل تَئیِں لڳا وَنڄ۔ 42جیرھا تیݙے کنُوں کُوئی شئے مَنگے اُونکُوں ݙے ݙیویں اَتے جیرھا تَیں کنُوں لَہݨہ چاہندے اُونکُوں اِنکار نہ کریں۔“
دُشمنیں نال مُحبّت رَکھݨ بارے یِسُوع دی تعلیم
(رَلدا مِلدا حوالہ: لُوقا 6:6-27، 32-36)
43”تُساں سُݨی وَدو جو آکھیا ڳیا ہا،
’اپݨے ہمسائے نال مُحبّت کراہے اَتے اپݨے دُشمنیں نال دُشمنی۔‘
44پَر مَیں تُہاکُوں اَہداں جو اپݨے دُشمنیں نال مُحبّت کرو اَتے جیرھے تُہاکُوں ݙُکھ ݙیندِن، اُنہیں کیتے خیر دی دُعا منگو۔ 45وَل تُساں اپݨے اَسمانی باپ دے پُتر اَکھویسو کیوں جو او نیک اَتے بُرے ݙُوہائیں اُتے اپݨا سِجھ چمکیندے۔ اَتے او مینہ کُوں سارئیں اُتے وَسیندے بھانویں او نیک ہووِن یا گُناہگار۔ 46جے تُساں صرف اُنہیں نال ای مُحبّت کریسو جیرھے تُہاݙے نال مُحبّت کریندِن تاں تُہاکُوں کیا اجر مِلسی؟ کیا مصُول گھِنݨ آلے اِیویں نَئیِں کریندے؟ 47اَتے جے تُوں صرف اپݨے بِھراویں کیتے ای سلامتی چاہندیں تاں ایہ کیرھی وَݙّی ڳالھ ہے؟ غیر قوماں وی جیرھیاں خُدا کُوں نَئیِں منیدیاں اِیویں کریندِن۔ 48جیویں تُہاݙا اَسمانی باپ کامل ہے تُساں وی اُوندے وانگوں کامل بݨو۔“
Currently Selected:
متّی 5: سرائیکی
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY