GENESIS 4
4
1Ma tha Adam ka ofu bia kwaina na ni Eve; ma kini eri ka iana, ka tharea tha Kena, ka una eri, Nau ku rikia naa wane eri ne ita mai atha Jihova. 2Ma ruana ka tharea thasina wane eri, tha Efolo neri. Ma tha Efolo ṉa wane ni fono toi la kalia sifi; tha Kena molo, wane ni ’ili lana theegano. 3Ma lalae mai, buriana tei fa boṉi, tha Kena ka ṉalia mai tei fo ana foee ’ai i theegano, ana do ni foa la ifatha Jihova. 4Ma tha Efolo ka ṉalia lau bomai tei do totonao ana aini sifi nia ki, ma tei do gwagwarurutaa faisia. Ma tha Jihova ka ala fafia tha Efolo ma do ni foa la nia: 5Me a’i si ala fafia tha Kena ma do ni foa la nia. Ma tha Kena ka rakeiri faamau, me lio kwasula. 6Ma tha Jihova ka soree isatha Kena, Uria ta noko rakeiri? ma uria ta noko lio kwasula una eri? 7Mado so abula lea, keki ala fafi oe, mado? mada sa abula lamu e a’i si lea, do ifana abula taa la ka teo bana i maana olofolo. Ma do eri kai thathami oe, ma oki inoto iana. 8Ma tha Kena ka ṉata bia thasina na tha Efolo: ma lalae mai, si maṉa na keko ni masuu, tha Kena e tae firua bia thasina na tha Efolo, ka thauṉia ka mae bonaa. 9Ma tha Jihova ka soree isatha Kena, Thasimu tha Efolo e ni ifei? Ma nia ka una eri, Nau ku dora lau baku ania: ni nau ṉa wane ni fono toi la kalia thasiku, mado? 10Ma nia ka sorea, Si ta no ilia neri? liṉana ṉata lana ’abuna thasimu ka ’ai thataku faisia theegano. 11Ma si maṉa eri kera alua taa la ka to fafi oe faisia theegano, ne ifinia fokona na ba fasi kai ṉalia ’abuna thasimu faisia abamu; 12Ita asi maṉa eri ka lae alaa, si maṉa oki ’ilia theegano, theegano eri ka a’i si falea sukwaia nia ifamu; ni oe ṉa wane ni thaka ka toto bana ma wane liliu i fanua na i iano. 13Ma tha Kena ka una eri satha Jihova, Kwae la nau nei e baita ka tatha asi do kwai susuu ania. 14Rikia fasi, afa boṉi nei o tari nau faisia maana fanua na i iano; ma nau kwai to thaufuni faisia maamu; ma ni nau ṉa wane ni thaka ka toto bana ma wane liliu i fanua na i iano; ma lalae mai, ni tei bana na ka fulatooku ka thauṉi nau ana. 15Ma tha Jihova ka soree isana, Mania ni tei bana na ka thauṉia tha Kena, keki duua ifana ana fiu fa duu la. Ma tha Jihova ka alua fafuilalaa fafia tha Kena, ada ta wane ka fulatoona, ka thauṉia.
16Ma tha Kena ka lae kau faisia inaofatha Jihova, ka to bana i fanua i Nodo ibali tae lana thato i thara ana Itena. 17Ma tha Kena ka ofu bia kwaina; ma kini eri ka iana, ka tharea tha Inoka: ma tha Kena ka thauwai nia ta toaa susu, ka alaṉia ana Inoka, sulia thatana kaluwane nia. 18Ma tha Inoka ka kwalafia tha Irada: ma tha Irada ka kwalafia tha Mehujaele: ma tha Mehujaele ka kwalafia tha Methusaele: ma tha Methusaele ka kwalafia tha Lemeke. 19Ma tha Lemeke ka tolea ro kini: thatana kini nao ni Eda, ma thatana kini buri ni Sila. 20Ma ni Eda ka tharea tha Jebala: ma wane eri na maka totonao ana toa na keka to bada i la biui‐maku ki, ma keka tharea katele. 21Ma thatana thasina na tha Jubala: wane eri na maka totonao ana toa eki sui bana na keka ufia tale agaa, ma okeni keka felasia ana kukuuda. 22Ma ni Sila lau boo e tharea tha Tubalakena, na wane ni kwaifamanatai isana toa eki sui bana na keka thauwai nia si do ki asi thalo aadilaa ma si thalo: ma waiwaena tha Tubalakena na ni Nema. 23Ma tha Lemeke ka una eri isana ro kini nia ki, sani Eda ma ni Sila, Roṉoa fasi bae laku; kamaroa ro kini tha Lemeke, fafuroṉoa fasi ṉata laku: uria ni nau ku thauṉia naa wane ne thaumaala iaku, na ṉa wane bii baita ne thaufifi iaku. 24Tha Kena keki duu ifana ana fiu fa duu la; e mamana tha Lemeke ana keki duu ifana ana fiu tafulu fa duu la ma fiu fa duu la.
25Ma tha Adam ka ofu lau bia kwaina; ma kini eri ka tharea kaluwane nia, ka alaṉia thatana atha Sete: Uria na tha God (bae lana kini eri neri) e alua lau ta kwalafaa ifaku na kai tae fulii atha Efolo, wane eri na tha Kena e thauṉia na ba. 26Ma tha Sete lau boo e kwalafia kaluwane nia; ma nia ka alaṉia thatana atha Inosi: asi maṉa nia, imole ki keka thafalii ’ai thatana tha Jihova.
Currently Selected:
GENESIS 4: MLU1949
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
British and Foreign Bible Society 1949, 1951