Mark 4
4
Sema Arig Maypangkep Na Mengipoyaw
(Matthew 13:1-9; Luke 8:4-8)
1Idi sa-kin akow, kimowan mowan si Jesus a mantorod kilig niwa baybay. Chakel i tothoon emo-ngol Jesus, isonga iyankeb-ong si Jesus cha bangken gwared baybay a timokkong iy maramen imonong ira ma tothood ma kilig na baybay. 2Et chakel i naintoron Jesus cha si-kara babaen na ari-arig. Sa-kin ma arig, kigwan to i 3“Iki-ngeli yo! Idi sa-kin akow, gwariy sa-kin toon kimowan a mengipoyaw na bothil cha payow. 4Idi towan ipoyaw iriy bothil, iya-kas i echom cha chalan et kiyakan na titit. 5Iya-kas ngoy echom cha kabatho-bathoan a kolang i pithek to, et simimit a chakos tep nat echalem i pithek to. 6Nem idi kimayang i akow, iya-josan et iyakpit tep nat iyandamot. 7Iya-kas pay ngoy echom cha kaskasbithan, nem ekibadeg i sebit chiwa tanem et sinisi tho, isonga eg dimawes. 8Nem sema iren echom a bothil, iya-kas ired ma mapteng a pithek, et simimit a bimadeg a iyandawes. Iyandawes i echom na santetdon polo; sema echom, san-a-nem a polo; tan sema ngon echom, sandadasos.” 9Et kigwan men Jesus i “Si-kayon manki-ki-ngel, nemnem jon pasiyay inki-ngelan jo.”
Sema Banag Na Arig Na Mengipoyaw
(Matthew 13:10-23; Luke 8:9-15)
10Nonta bimetik ma iriy too, sema iren sawal na chegwen disipolos tan sema iren echom, inbagaan ches Jesus no nengoy banag niwa ari-arig. 11Et kigwan Jesus i “Si-kayoy inpalobos Afo Chiyos a mengamta na eg aamtaan nontan maypangkep na pantorayan to, nem sema ngo iren echom a too, ari-arig bengat i maytorod si-kara 12tep say
‘Angken chiyan mathaa,
eg cha peschian,
tan angken chiyan iki-ngeli,
eg cha egwathan.
Tep no egwathan cha wa,
on-oli ched Afo Chiyos
say pekawanan to ira,
nem eg cha piyan.’ ” #4:12 Isaiah 6:9-10
13Et kigwan Jesus i “Apay nga eg jo egwathan iya arig? No setan ma, nengo wiy pesing jon mengegwat na echom a ari-arig? 14Sema banag niya arig, sejay. Sema iren bothil a iyaypoyaw, si-kathoy esel Afo Chiyos. 15Sema iren iya-kas cha chalan, si-kara ira ma toon manki-ngel na esel Afo Chiyos, nem apaman a iki-ngelan cha wa, onkowan alin chakos si Satanas et a-kalen tod nemnem cha ma inki-ngelan cha. 16Inges ngon man ira ma bothil a iya-kas cha kabatho-bathoan. Tep si-kara ira ma toon mematin chakos na esel Afo Chiyos no iki-ngelan cha wa, et on-imdeng ira, 17nem eg ondamot iwa esel cha nemnem cha tan memati ira bengat na sankaatihan. Et no onmothok iriy diga-digat ono mepedigat ira kagol na esel Afo Chiyos a piyati ra, bebnekan chen chakos i pamati ra. 18Sema iren bothil a iya-kas cha kaskasbithan, si-kara ira ma toon manki-ngel na esel Afo Chiyos, 19nem dingdingen cha kagol na chana-chanag cha tan sema kamkam chen onbaknang tan kamkam cha na kompormi. Isonga, sema esel a inki-ngelan cha wa, mesisi et eg ma mandawes. 2027 Nem sema ngo iren bothil a iya-kas cha mapteng a pithek, si-kara ma toon manki-ngel na esel Afo Chiyos a egwathan cha et gwariy panbanagan niwa esel cha biyag cha. Sema iren too, inges iren ma malemes a tanem. Mandawes i echom na santetdon polo; sema echom, san-a-nem a polo; tan sema echom, sandadasos.”
Sema Arig Maypangkep Na Intohan
(Luke 8:16-18)
21Kigwan pay Jesus i “No epoyan joy intohan, tangeban jo aya ono idoong jod katiri? Enchi met! Ipa-tok jo kitdid kayang. 22Inges to ngoy in-ari-arig ko tep emiin a nat iyaybiybiy niman, maybiybiy no sa-ki din akow, tan emiin ngon nat aamtaan niman, maypaamta no sa-ki din akow. 23Si-kayon manki-ki-ngel, nemnem jon pasiyay inki-ngelan jo.”
24Et intoloy men Jesus a engowan i “Nemnem jon pasiyay kowan kona tep no pesing jo tan, egwathan jon pasiya, et si Afo Chiyos, a-choman to pay i igwathan jo. 25Tep sema toon mahaawat a pasiya na inki-ngelan to, ma-choman iwa egwathan to, nem sema eg mahaawat a pasiya, angken sema otik a egwathan to, mepokaw.”
Sema Ari-arig Maypangkep Na Pantorayan Afo Chiyos
(Matthew 13:31-32; Luke 13:18-19)
26Kigwan mowan Jesus i “Sema pantorayan Afo Chiyos, may-inges chiwa toon naengipoyaw na bothil cha payow to. 27Najimo-kow na kalebian et nabimangon na dadabi iy mansisimit i bothil et manba-ba-deg. Nem eg to amtiy nainpasing ton nabima-deg. 28Tep sema bothil, nabima-deg bengat. Nasimimit et napimospos et naedawesan. 29No onbalag ma, enien niwa engipoyaw tep onmothok miy timpo na pan-ani.”
30Et kigwan Jesus i “Nengo wiy kay-ingesan na pantorayan Afo Chiyos? Nengo emoy kay-arigan to? 31Inges toy mostard a kaotihan a bothil cha emiin a bothil cha dobong no maytanem. 32Nem no onbadeg ma tan ma-tengan, si-kathoy kahejangan cha emiin a tanem. #4:32 Sema mostard cha ili na Hodjos, ba-ba-degan iy say sema iren naiyaytanem chiya Pilipinas. Mebedin a naiyabot toy esolok a tedon mitro. Naiyanpanga na babenay et naengi-magan na titit na ogong chen naiyansiroman cha.”
33Chakel i ari-arig a nakigwan Jesus nonta towan itoroy esel Afo Chiyos ired tothoo. Intoroan to ira ma tothoo na kebedinan chen egwathan. 34Idi timbal to ira, naengiarig na olay. Nem no si Jesus tan disipolos ton si-kara bengat, nain-iksplikar ton emiin cha si-kara.
Intalnen Jesus I Mapkes A Chahem Tan Ekayang A Chalojon
(Matthew 8:23-27; Luke 8:22-25)
35Nonta ma-chem na seman a akow, kigwan Jesus cha disipolos to i “Onba-sil kiyed ma piig na baybay.” 36Et inpayas cha ma chakel a too, et iyandogan ired ma bangken timokkongan Jesus. Gwara pay iriy echom a bangken ekiolop. 37Idi man-aahad i bangked ma baybay, biglen pimekes i chahem tan kesopsopjat i chalojon cha sekep na bangka et chanchanin melned. 38Nem si Jesus enan, gwared ma oget na bangken manjo-jo-gwek chiwa iyadpenan a tokkongan. Et bingon iren ma disipolos ton kigwan cha i “Maistoro, eg mo ikaskaso no metiy kiya?”
39Et bimangon mes Jesus a binilin toy chahem i “Salcheng ka!” et kigwan to ngod chalojon i “Eket ka!” Et biglen simalcheng i chahem tan timalnay chalojon. 40Et kigwan to wed disipolos to i “Niyana ketahot kayo? Nagwara ayay pamati yod si-kak?” 41Et timahot a pasiya ira ma disipolos ton iyankinowan ira i “Siya emo ja too? Apay nga angken chahem tan chalojon, napiyati ra?”
Currently Selected:
Mark 4: KAR
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023 Wycliffe Bible Translators, Inc. All rights reserved.