Matius 2
2
Korikatan diri Tulun i Moilo Mongintutun di Korombituon
1Kinosusuvon nopo di Yisus nga silo Bandar Boitlim si Vonuvo Yudia. Om ontok nopo diri nga kivaro iso raja siri Yudia, iIrudis ngaranjo. Nga kivaro kama sontoun lobi mantad diri kinosusuvan di Yisus#2:1 Antangai Matius 2:16 om rikotno dii iri piipiro tulun i moilo mongintutun di korombituon silo Bandar Yorusalim mantad silo kosilauon. Om songkoduat-duato diolo di tongotulun nong, 2“Inombo naku i tanak do nosusu i sumiliu do Raja do momorinta di tongotulun Joudi do insan tadau? Do soi ikoipo kosilauon om naantanganja iso korombituon minimvulai, tanda do nosusu Isido, om mongoi ikoi daa sumamba Disido,” kadiri tongotulun mantad kosilauon.
3Nga kivaro tulun popoilo di Raja Irudis diri tinangar diolo. Om korongou nopo dii i raja diri, om turus dii do osurau i ginavojo om i tongotulun siri Bandar Yorusalim nga irad dino. 4Om loovono dii di Raja Irudis kasangkat kotua di tulun Joudi, irino i tongokotua do imam om iri monunuduk do Undang-undang Ugama do Joudi, do mokiilo isido diolo nong sinombo kinosusuvon di Koristus, i pinili do Kinoringan sumiliu do Raja. 5Nga kadiolo, “Si Bandar Boitlim si Vonuvo Yudia kinosusuvon di Koristus,” ka, “do kivaro tinangar di Kinoringan tinulis di nabi, i popolombus di tinangaran do Kinoringan di pogulu, do irad diti,
6‘ “Oou dikovu tulun siti Bandar do Boitlim siti Vonuvo Yudia,
bandar muju nopo nga agajo ngaran siti pialatan bandar vokon siti Yudia.
Do mantad bandar muju imvulajon
do iso moloingon i monguasa dikovu,
i bansa Israil tulunKu,”
kadi Kinoringan,’ kadi nabi,”
kadi tongoimam di raja.#Antangai Mika 5:2.
7Om mantad diri mosok-losok dii i Raja Irudis do mongoloou di tulun i moilo mongintutun di korombituon, do mongoduat diolo nong sombia nokovulai i korombituon i komoion diolo. 8Om korongou nopo dii isido diri tinangar diolo, om suuojo nogi dii iolo mongoi silo Bandar Boitlim do, “Ongoi kouno pogi om iumon mujuno marong i Tanak. Om osomungan muju nopo, om gumuli kouno siti do popoilo dogo, supaya ioku nogi nga koongoi sumamba Disido,” ka.
9-10Korongou nopo dii iolo diri tinangar di raja om pakaayaino dii diolo. Om kaantangai dii kavagu diolo i korombituon di naantangan laid diolo siri kosilauon. Om aandaian marong dii iolo sombia do naantangan diolo di korombituon. Om manau-panau iri korombituon siri gulu diolo gosobi do nakapantok di nijonon di Tanak, om indada nogi dii i korombituon. 11Korikot nopo dii iolo siri valai, asuno dii iolo, om naantangan dii iri Tanak duvo di Moria iinojo. Om singkotudno dii iolo do sumamba di Yisus. Om ukabaino dii diolo i pinoijanan di arata do pataakon toomod Disido, irino amas, komonian om muur di taangod. 12Om ontok nopo di sodop diri om pitangarno dii i Kinoringan saralom do tinipi diolo do, “Ada kou gumuli siri diIrudis,” ka. Om korongou nopo dii iolo di tinangaran do Kinoringan om vaja dii iolo di ralan sondiang do muli siri vonuvo diolo.
Inovit i Yisus Tumuun Soi Masir
13Kapanau nopo dii i tongotulun di moilo mongintutun di korombituon, om nokoipino i Jusip do kivaro iso moloikat do Tuhan do monuu do ka, “Tungagno, om ovitono ilo Tanak om iinoJo tumuun soi Vonuvo Masir, om mindada koupo soi gosob do poiloonKu ika kavagu do obuliko muli, do mogium iIrudis dilo Tanak do patajon,” ka.
14Om tungagno dii i Jusip om ovitono dii i Tanak duvo diinoJo tumuun di otuvongpo do mongoi soi Vonuvo Masir irad di tinangar di moloikat. 15Om indadano dii iolo soi Vonuvo Masir gosobi do napatai i Raja Irudis. Iri nopo kinaangaian diolo soi Masir dii nga porikot di tinangaran do Tuhan i pinolombus di nabi pogulu do irad diti, “ ‘LoovonKu i TanakKu mantad soi Vonuvo Masir,’ kadi Tuhan,” kadi nabi. #Antangai Usia 11:1.
Minonuu i Raja Irudis do Mamatai di Tongotangaanak
16Ontok di koilaai di Raja Irudis do tinoro isido di tulun i moilo mongintutun di korombituon, araatan dii marong isido. Om ponuu dii isido do tulunjo mongoi mamatai di tongotangaanak kusai noopo i gosob di umur duvono toun silo Bandar Boitlim om tongokampung misoliputjo. Minonuu isido mamatai do tongotangaanak kusai gosob umur duvono toun do minaja isido di niabar di tulun i moilo mongintutun di korombituon do, “Kivaro duvono toun kama mantad di kinosilaan diri korombituon pogulu,” ka.
17Iri nopo i kinapatajan di tongotangaanak si Bandar Boitlim dii nga porikot diri tangar di kinomoi di nabi Yoromia, i popolombus di tinangaran do Kinoringan pogulu, do irad diti,
18“Kivaro dolou#2:18 dolou: bongut di tongotongondu mogiad norongou soi Bandar Rama.
Irino i Rakil do moginupus om mogiad marong
gosob do au moo toluodon#2:18 toluodon: insasamadon ko kosisian
do noliangan di tongotanakjo,”
ka.#Antangai Yoromia 31:15.
Ginumuli oi Jusip, i Savo om Tanak soi Vonuvo Israil
19Nga kapatai nopo dii i Raja Irudis om nokoipi i Jusip do kivaro iso moloikat do Tuhan ontok diolo soipo Vonuvo Masir do monuu do ka, 20“Tungagno pogi om ovitono ilo Tanak om iinoJo do muli kavagu soi Vonuvo Israil do napataino dii iri raja i sipamatai daa dino Tanak,” kadi moloikat. 21Om tinumungagno dii i Jusip om ovitono dii i Tanak duvo diinoJo do gumuli kavagu soi Vonuvo Israil.
22Nga karangaai nopo dii disido do iArkolius, tanak di Raja Irudis, nokosuvoli do raja momorinta siri Vonuvo Yudia, om rumosi dii iolo do rumikot silo Yudia. Nga poipijono vagu isido do au moo i Kinoringan do gumuli silo Yudia. Jadi potilombusai dii diolo mongoi silo Vonuvo Golilia. 23Korikot nopo dii iolo silo om indadano dii iolo siri bandar roitan do Nasarit. Iri nopo kinorikatan diolo siri Bandar Nasarit dii nga porikot di tinangaran di kinomoi di tongonabi pogulu do irad diti, “Tulun Nasarit pongoroitan diolo di Yisus,” ka.
Currently Selected:
Matius 2: LabukPKV
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 1995, Wycliffe Bible Translators, Inc. All rights reserved.