GÉNESIS 2
2
1Chashnami, jahua pachatapash, cai pachatapash, chaicunapi tucui ima tiyachumbash rurashpa tucuchirca. 2Taita Diosca, tucuita rurashpa tucuchishpami, canchis punllapica samarca. 3Chai canchis punllatami, Taita Diosca bendiciashpa Paipajlla cachun shicanyachirca. Tucuita rurashpa callarichishcamanda, chai punllapi samashpami, chashna shicanyachirca.
Runataca, Edén huertapimi churashca
4Jahua pachata, cai pachata rurai callarishcacunaca cashnami: Mandaj Taita Diosmi, cai pachatapash, jahua pachatapash churarca. 5Pambapi tucui ima yurapash, tucui ima jihuapash, cai pachapica nara viñarcachu. Mandaj Taita Diosca, cai pachapica nara tamiachishcachu carca. Alpapi imata rurangapapash, pipash nara tiyarcachu. 6Shina cajpipash, alpa ucumanda yacu samai vichai llujshishpami, tucui cai pachapica jicharijurca. 7Shinamandami, Mandaj Taita Diosca, runataca ñutu alpamanda rurarca. Chai runapaj singapi fucushpami, causaita charij samaita curca. Chaimandapachami runaca, causaita callarirca.
8Mandaj Taita Diosca, Edén shuti huertata indi llujshimujman rurashpami, Pai rurashca runataca chaipi churarca. 9Mandaj Taita Diosca, chai alpapica, juyailla fucunajuj tucui quirucunatami viñachirca. Shinallata, chai huerta chaupipica, causaita caraj quirutapash, alita, na alita, yachai ushana quirucunatapashmi viñachirca.
10Edenmandaca, ashtaca yacu llujshishpa huertapi jicharishpami, chaimanda, chuscupi chaupirishpa rijun. 11Rijuj shuj yacuca, Pisón shutimi carca. Chai rijuj yacuca, curi tiyaj, Havila shuti llactatami muyushpa rijun. 12Chai llactapica, alipacha curipash, mishquilla ashnajun bedelio yacupash, ónice rumicunapashmi tiyarca.
13Ishcaipi chaupirishpa rijuj yacuca, Gihón shutimi. Chai yacumi, Cus shuti tucuilla llactata muyujun. 14Quimsapi chaupirishpa rijuj yacuca, Tigris shutimi. Chai yacuca, Asiria llactatami, indi llujshimujman rijun. Chuscupi chaupirishpa rijuj yacuca, Éufrates shutimi.
15Mandaj Taita Diosca, Edén huertapi tucuita rurashpa, aliguta ricushpa causachunmi, runataca chaipi churarca. 16Mandaj Taita Diosca, runataca cashna nishpami mandarca: “Huertapi tiyaj tucui quirucunapi fucushcataca micui ushanguimi. 17Ashtahuangarin, alita, na alita yachai ushanata caraj quirumandaca napacha micunachu cangui. Chai quirumanda micushpaca huañunguipachami” nircami.
18Chai jipami, Mandaj Taita Diosca cashna nirca: “Jarica, pailla causanaca na alichu. Paita yanapashpa aliguta causachun, shuj cumbata rurasha” nircami. 19Shina nishpami, Mandaj Taita Diosca, alpamanda rurashca, sachacunapi causaj animalcunata, jahuata rij alasyu animalcunata, Adán ricushpa shutita churachun apamurca. Causaj tucui animalcunaca, Adán shutichijpimi, chai shutihuan saquirirca. 20Chashnami Adanga, tucui animalcunata, jahuata rij alasyu animalcunata, pambapi causaj tucui animalcunatapash shutichirca. Ashtahuangarin, Adanda cumbashpa, paita aliguta yanapajca, na tiyarcachu. 21Shinamandami, Mandaj Taita Diosca, Adanmanga ninan puñuita cachamurca. Pai ninanda puñujujpimi, shuj costillata llujchishpa, chai aichataca cutinllata vicharca. 22Jarimanda llujchishca costillacunamandami, Mandaj Taita Diosca, shuj huarmita rurashpa, jariman apamurca. 23Chaimandami Adanga, cashna nirca:
“Cunangarimbash, paica ñuca tullumanda rurashca, ñuca tullullatami. Ñuca aichamanda rurashca, ñuca aichallatami. Paica, jarimanda llujchishca cashpami, Huarmi shutita charinga”. nircami.
24Chaimandami jarica, paipaj taitata, paipaj mamata saquishpa, paipaj huarmihuan tandanajushpa, shujlla aicha tucushpa causanga.
25Adanbash, paipaj huarmipash, ishcandi lluchullacunami carca. Chashna cashpapash, na pingai tucunajurcachu.
Currently Selected:
GÉNESIS 2: QVI16
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.