मत्ती 9
9
यीशु यक अदरंगे बीमारी मेह्णु ठीक करण
मरकुस 2:1-12; लूका 5:17-26
1तोउं यीशु दुबारी नाव पुठ चढ़ कइ पार अपु शेहर, कफरनहुम आ। 2त कुछ मेह्णु यक अदरंगे बीमार मेह्णु डानी पुठ कर कइ तसे भेएड़ अण्हते। त यीशु तेन्के विश्वास हेर कइ तेस बीमार मेह्णु जे बोलु, “ए कोईया, हिम्मत रख! तें पाप माफ भोई गे।” 3पर कुछ धर्मशास्त्री अपफ सोचुण लगे कि ई बोल कइ त ए परमेश्वरे बेज्जती करण लगो असा। 4तेन्के मने पता यीशु लग गा त बोलु, “तुस अपु अपु मन अन्तर बुरा विचार किस कते? 5बोले! सुख्तु की असु, ईं बोलुण ना कि ‘तें पाप माफ भोई गे’, या ईं बोलुण कि ‘खड़ भो त हंटिण दे’? 6पर अउं तुं अगर साबित कता कि इस धरती पुठ में मतलब मनखे कुआ पाप माफ करणे पूरा हक असा।” तोउं तेन अदरंगे बीमार मेह्णु जे बोलु, “खड़ भो, अपु डानी टा त अपु गी जे गा।” 7त से तिखेईंए सुसुर खड़ भोई कइ अपु गी जे घेई गा। 8ईं हेर कइ मेह्णु डर गे त परमेश्वरे गुणगान करण लगे कि परमेश्वरे तेन्के बुच यक ईं ताकतवर मेह्णु लंघो असा।
मामला नेण बाड़ा मत्ती यीशु चेला बणुण
मरकुस 2:13-17; लूका 5:27-32
9तढ़िया अगर मामला नेणे बाड़ी के दफतर अन्तर यीशु यक मेह्णु काआ, जेस नओं मत्ती#9:9 इठि ई कताबे लेखक मत्ती अपु बारे बताण लगो असा। थिउ। यीशु तेस जे बोलु, “में पता आई।” त से खड़ भोई कइ तसे पता पता गा।
10पता तसे गी रौठि खाणे टेम सुआ मामला नेणे बाड़े त पापी मेह्णु एई कइ यीशु त तसे चेली जुए रौठि खाण लग गे।#लूका 15:1,2 11ईं हेर कइ फरीसी यीशु चेली जे बोलु, “तुं गुरु मामला नेणे बाड़ी त पापी मेह्णु जोई किस खांता पीन्ता?” 12ईं शुण कइ यीशु तेन्हि जे बोलु, “चंगे भलि वैदी के जरूरत न भुन्ति, पर बीमारी भुन्ति। 13त अब तुस पेहले धरमे कताब अन्तर लिखो तेस बोके मतलब समझे, जेठि परमेश्वर बोता कि
‘अउं दाह करणे बेलि खुश भुन्ता, भकत चढ़ाणे बेलि ना।’#होशै 6:6; मत्ती 12:7
किस कि जे अपु अपफ धर्मी समझते अउं तेन्हि ना, बल्कि पापी मेह्णु मन बदलाणे बारे बोलुण जे अओ असा।”
ब्रत रखणे बारे सवाल
मरकुस 2:18-22; लूका 5:33-39
14तोउं चुसुणे बाड़ा यूहन्ने चेली यीशु भेएड़ एई कइ बोलु, “ए गुरु! अस त फरीसी मेह्णु अत ब्रत कते, पर तें चेले किस कदी ब्रत न कते?” 15यीशु तेन्हि जे बोलु, “जपल तकर नोउआं लाड़ा म्हाराई जोई असा, से की कदी ब्रत रख बटते ना? पर से दन बि एन्ता जपल नोउआं लाड़ा तेन्हि केआं केहरी छते। तेस टेम से ब्रत कते।
16नोउए झिणि के टलि पुराणे झिणि जोई कोई न लान्ते, किस कि नोई टलि पुराणे झिणि सुआ चीर छती। 17होर, कोई बि मेह्णु नोउआं अराख पुराणे खलोठु अन्तर न छते, किस कि नोउआं अराख पुराणे खलोठु चीर छता, त अराख सोब झड़ घेन्ता। तोउं त मेह्णु नोउआं अराख नोउए खलोठु अन्तर छते, ताकि दुहे अराख त खलोठु सुसुर रेहेल।”
यीशु मरो कुई दुबारी जीआण त बीमार जिल्हाणु ठीक करण
मरकुस 5:21-43; लूका 8:40-56
18यीशु तेन्हि जे ईं बोलुण लगो थिआ कि अराधनालये यक मुखिया एई कइ तसे खुर बिने त बोलु, “ए गुरु! में कुई अभेईंए मरो असी। पर छने, तुस हंट कइ अपु हथ तसे मगिर पुठ रखे त से दुबारी जी घेन्ति।” 19यीशु खड़ी कइ अपु चेली जुए तसे पता घेण लगा। 20-21त शुणे! तपल यक जिल्हाणु आई, जेस बाराह साल केआं अखियई बीमारी थी। से सोचतीथ कि “अगर अउं यीशु झिणे पलो ईं छुई छउं त ठीक भोई घेन्ति।” त तेन मठे पतुआं एई कइ तसे झिणे पलो छुई छड़ा। 22यीशु खिरक कइ तसे धे हेरु त बोलु, “कुईए! हिम्मत रख, तें विश्वासे तु ठीक किओ असी।” तोउं से जिल्हाणु तिखेईंए ठीक भोई गई।
23पता जपल यीशु तेस अराधनालये मुखिया गी पुजा त हेरु कि तठि बेईंछ बजाणे बाड़ी के त रोलो-गाश करणे बाड़ी के सुआ हुसुड़ा थिआ। 24तोउं तेन बोलु, “ओ भुए! होता कुई मरो नेईं। से त उंघो असी।” ईं शुण कइ से सोब तसे फूल बणाण लगे। 25पर जपल हुसुड़ा तठिआ घेई गा त तेन अन्तर घेई कइ कुई हथ टाता त से जी गई। 26तोउं इस बोकी चर्चा पूरे देश अन्तर हू भोई गोउ।
यीशु दुई अन्हे मेह्णु सारे करण
27जपल यीशु तठिआ घेण लगा त पतुआं दुई अन्हे मेह्णु तस जे हक देन्ते देन्ते आए, “ए राजा दाऊदे कोईया, ए राजा दाऊदे कोईया! छने असी पुठ दाह कर!” 28जपल से गी पुजा त से अन्हे तसे भेएड़ आए। यीशु तेन्हि जे बोलु, “तुसी सच्चे बि विश्वास असा ना कि अउं तुसी सारेरी सकता?” तेन्हि तेस जे बोलु, “आं प्रभु!” 29तोउं तेन तेन्के टीर हथ लाई कइ बोलु, “जीं तुं विश्वास असा, तिहांणि तुसी जोई भो लौतु।” 30त तिखेईंए तेन्के टीर सारी गे। यीशु तेन्हि जे खबरदार कर कइ बोलु, “सुसुर बिशे, एस बोकी केसे पता न लौता लगो।” 31पर तठिआ घेई कइ पूरे देश अन्तर तेन्हि एस बोकी हू कइ छड़ु।
यीशु यक गुंगा बणाणे बाड़ी दुष्ट आत्मा नशाणि
32जपल से तठिआ घेण लगो थिए, त मेह्णु यक गुंगा यीशु भेएड़ अण्हा, जेस अन्तर दुष्ट आत्मा थी। 33यीशु बोलुण पुठ जपल दुष्ट आत्मा बाहर निस गई त से मेह्णु बोलुण लग गा। तोउं सुआ मेह्णु हैरान भोई कइ बोलुण लगे, “पूरे इस्राएल देश अन्तर ईं भुण कदी न काउ।” 34पर फरीसी बोलु, “ए त दुष्ट आत्माई के राजे बेलि दुष्ट आत्माई नशाणता।”#मत्ती 10:25; 12:24; मरकुस 3:22; लूका 11:15
फसल ज्यादा, पर कमुणे बाड़े घट
35यीशु सोबी ग्रां ग्रां त शेहरी शेहरी हंट कइ तेन्के अराधनालय अन्तर शिचालता त परमेश्वरे राज्य बारे खुश खबरी प्रचार कता रेहा। त से हर किस्मी बीमारी त कमजोरी केआं मेह्णु बि ठीक कता रिहा।#मत्ती 4:23; मरकुस 1:39 36तेन जपल हुसुड़ा हेरा त तस मेह्णु पुठ दाह एई, किस कि से मेह्णु परेशान त भटको थिए, जीं से ढडुड़ भुन्ते जेन्के कोई पुहाल नेईं।#मरकुस 6:34 37त तेन अपु चेली जे बोलु, “फसली बग त सुआ असे, पर कमुणे बाड़े थोड़े ईं असे। 38त बगे मालिक जे छनेअरे करे कि बग लुणुण जे कमुणे बाड़ी लंघाए।”#9:38 इठि बग मतलब धरती भो, फसल से मेह्णु भिन्थ जे यीशु ना जाणते, बगे मालिक परमेश्वर भो त कमुणे बाड़े से भिन्थ जे यीशु बारे बतान्ते।#लूका 10:2
Currently Selected:
मत्ती 9: pgg
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023 (Active) Wycliffe Bible Translators, Inc. All rights reserved.
