मत्ती 11
11
यीशु त चुसुणे बाड़ा यूहन्ना
लूका 7:18-35
1जपल यीशु अपु बारोही चेली जे सोब बोके बोल छेई, से बि तठिआ घेई गा। से इधौरी-उधौरी ग्रां त शेहरे मेह्णु जे शिचालुण लगा त प्रचार बि किआ। 2त चुसुणे बाड़ा यूहन्ना जेहेल अन्तर मसीहे कमे बारे शुणु त अपु चेले तेस केआं ई पुछुण जे लंघाए। 3तसे चेली यीशु जे बोलु, “कि परमेश्वरे बोलो से एणे बाड़ा तु भो ना, कि असी कोउं होरा भाड़ण?” 4यीशु जवाब दिता, “जे कुछ तुस शुणते या हेरते, घेई कइ सोब यूहन्ना जे बोलीण दिए। 5अन्हे से हेरते, लटे से हंटते, कोढ़ी ठीक भोई घेन्ते, टौणे से शुणते त मरो से जीएईंते, होर जे कंगाल असे तेन्हि खुश खबरी शुणान्ते।#यशायाह 35:5-6; 61:1 6होर धन्य असे से मेह्णु, जे मोउं पुठ विश्वास कते, त कदी शक ना कते।”
7जपल से तठिआ घेई गे त यीशु यूहन्ने बारे मेह्णु जे बोलुण लगा, “तुस अरुणि धार कि हेरण जे गो थिए? ब्यारी बेलिए हिलतु घास हेरण जे गो थिए ना? ना! 8फिर तुस की हेरण जे गो थिए? खरे झिणे डबो मेह्णु हेरण जे ना? ना ना! हेरे! जे खरे झिणे डबते से राजमहल अन्तर बिश्ते। 9फिर किस गो थिए? केसे भविष्य वक्ता हेरण जे ना? आं, अउं तुसी जे बोता कि भविष्य वक्ती केआं बि बोडे हेरण जे गो थिए। 10ए सेईंए भो जेसे बारे धरमे कताब अन्तर लिखो असु: परमेश्वरे बोलु,
‘हेर, अउं अपु दूत तोउ केईआं अगर लंघान्ता,
जे तोउ जे बथ सुसुर जुढ़ेरता।’#मलाखी 3:1
11अउं तुसी जे बोता कि जे जिल्हाणु जमो असे, तेन्हि अन्तरा चुसुणे बाड़ा यूहन्ना केआं ज्यादा खास कोई न भो। पर स्वर्गे राज्य अन्तर सोबी केआं मठुड़ बि यूहन्ना केआं खास असा। 12चुसुणे बाड़ा यूहन्ना प्रचार करण केआं खड़ आज तकर स्वर्गे राज्ये खिलाफ सुआ कोशिश भुण लगो असी त ताकतवर मेह्णु तस अपु वश अन्तर करणे कोशिश कते।#लूका 16:16 13चुसुणे बाड़ा यूहन्ने एण तकर सोब भविष्य वक्ता त नियम परमेश्वरे राज्ये बारे भविष्य वाणि कते रिहे। 14अगर तुस मनुण चहन्ते त यूहन्ना ईं से एलिय्याह भविष्य वक्ता भो, जे एणे बाड़ा थिआ।#मत्ती 17:10-13; मरकुस 9:11-13; मलाखी 4:5 15अगर तुस में बोक ध्यान जोई शुणियेल त तुस समझ घेन्ते।”
16“मोउं इस टेमे मेह्णु के बराबरी केस जोई करीण? से तेन्हि गभुरु के ईं असे, जे बाजार बिश कइ यक होरी जे हक दी कइ बोते: 17‘असी तुसी जे ढोंस बेईंछ बजाई, पर तु ना नचे; असी रोलो-गाश की, पर तुसी अपु डडोर न बजाउ।’ 18किस कि यूहन्ना खाणे पीणे बाड़ा न थिआ, त तुसी बोलु कि ‘एस अन्तर दुष्ट आत्मा असी।’ 19अउं, मनखे कुआ खाणे पीणे बाड़ा असा त तुस बोते ‘हेरे! बोडपेटि त प्याकड़, मामला नेणे बाड़े त पापी मेह्णु के मितर भो’! तोउं बि कमी के फले बइ मेह्णु पता लगता कि परमेश्वरे ज्ञान सच्चा असा।”
अविश्वासी पुठ तौबा
लूका 10:13-15
20तोउं यीशु तेन्हि शेहरी मेह्णु पुठ झई किढ़ण लगा, जेन्के बुछ तेन सुआ चमत्कारे कम किओ थिए, किस कि तेन्हि अपु मन ना बदले। 21तेन बोलु, “ए खुराजीने शेहरे मेह्णुओ! ए बैतसैदा ग्रांए मेह्णुओ! तुं खेया खाट भोई घेण असु किस कि जे चमत्कारे कम मेईं तुं बुछ किए, अगर से सूर त सैदा शेहर अन्तर किओ भुन्तेथ, त से मेह्णु जाई कपले केईआं बुरुड़ लपेट कइ त पटास थशि कइ पछतान्तेथ त अपु मन बदलान्तेथ। 22पर अउं तुसी जे बोता कि परमेश्वरे न्याय करणे रोज तुं हाल सूर त सैदा शेहर केआं बि ज्यादा बुरा भुन्ता।”
23“त ए कफरनहुम शेहरे मेह्णुओ, तुस सोचते भोल कि तुसी स्वर्ग अन्तर सुआ इज्जत मेती। पर ना! तुं हाल त नर्क घेणे भुन्ता! जे चमत्कारे कम तोउ अन्तर किओ असे, अगर सदोम शेहर अन्तर किओ भुन्तेथ, त से आज तकर बि भुन्ताथ। 24आं, तेस रोज तुं हाल सदोम शेहरे मेह्णु केआं बि ज्यादा बुरा भुन्ता।”#मत्ती 10:15; लूका 10:12
थको त भुंजो मेह्णु जे अराम
लूका 10:21-22
25तेस टेम यीशु प्रार्थना कर कइ बोलु, “में बोउआ, स्वर्गे त धरती प्रभु, अउं तें धन्यवाद कता कि तेईं ए बोके ज्ञानी त अक्लदार मेह्णु केआं नियोक कइ रखी त बेअक्ल कें धे दिती। 26आं, ए बोउआ, किस कि तोउ इहांणि ठीक लगु।” 27तोउं तेन तेन्हि जे बोलु, “में बोउए मेन्धे सोब किछ दुतो असु; बोउ छड़ कइ कोई कुआ न जाणते; त कुआ छड़ कइ होर कोई बोउ न जाणते; होर सिर्फ से मेह्णु जाणते जेस पुठ कुआ अपु बोउ प्रगट करण चहन्ता।#यूहन्ना 3:35 28मोउं केईं एईए तुस सोब, जे मेहनत कर कइ थको असे त परेशानी बेलिए दबीए असे, अउं तुसी अराम देन्ता। 29में बोके जूंण अपु मन अन्तर करे त मोउं केआं शिचे; किस कि में गुण हर किछ सेहण करणे बाड़ा त मन अन्तर दया रखणे बाड़ा भो। त तुसी अपु मन अन्तर अराम मेता। 30किस कि में बोके जूंण सुख्तु त में भारा पोला असा।”
Currently Selected:
मत्ती 11: pgg
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023 (Active) Wycliffe Bible Translators, Inc. All rights reserved.
