Matayɔ 7
7
Yeso unzo ʉpanʉ ekoo ʉ tɨna 'ʉkɔmbɔ
(Luk 6:37-38,41-42)
1« Nɔɔtɨnakɔmʉ 'ʉkɔmbɔ wʉ ɓombi nga ɓɔmɔ, ambʉ Asʉɓɨɨ ɔɔtɨnakɔmʉ 'ʉkɔmbɔ nga wʉndɛnʉ kʉ ɓwanɨ. 2Jʉ ngbanga kʉndʉ inu naanapɨa ɓangɛ nʉ 'ʉkɔmbɔ, Asʉɓɨɨ a꞊nɨnapɨa inu nʉ 'ʉkɔmbɔ ngbanga kʉ ɓwanɨ. Moni ngika inu nakʉkyɨa ɓangɛ, Asʉɓɨɨ a꞊nɨkyɨa inu kʉ ɓwanɨ. 3Jʉtanɨ ɔwɛ wakʉnɨna tʉkʉ ambɛmbɛsʉ wʉ usoi ngua wa amati ʉ iso ngia yɨ mananʉ, wambikinye kʉna igbiti yɨ 'ʉkakaʉ ngia ya amati ʉ iso ngiisɔɔ? 4Ɨkyɨkyɨɓʉmʉ tanɨ wakwanana kusigio ayoo asɔɔ ɓɔ: ‹ Ɨka muniso usoi ngua wa amati iso ngiisɔɔ ›, ati ngia ɔwɛ‑zʉ wanʉ igbiti yɨ 'ʉkakaʉ amati ʉ iso ngiisɔɔ? 5Ɔwɛ fili ngia! Isono‑zʉ igbiti yɨ 'ʉkakaʉ ngia ya amati ʉ iso ngiisɔɔ kingono, ambʉ na tiga iɗo kiso usoi ngua wa amati ʉ iso ngia yɨ gwa kɔmɔ.
6Nɔɔgisiokɔmʉ ɓɨmva ɨkyɛmɛ ngia ɓa꞉nzo akʉ Asʉɓɨɨ. Jʉ nʉkyɨeni ɓwanɨ, ɓɨmva ɓanʉnɨtanɨa, ɓambunikichoo. Ɓakpajɨ ɓʉ ɨjangɨa ngiɓʉndɛnʉ, nɔɔɓugisiokɔmʉ ɓanɛmbʉ. Jʉ nuɓugisieni, ɓaɓichoo ichoo. »
Yeso unzo ʉpanʉ ekoo nɨta
(Luk 11:9-13)
7« Teni ɨkyɛmɛ, ɓa꞊ninzo ɛyɔ nzoni. Hateni ɨkyɛmɛ, na꞊nyɨa nayɔ nyɨanɨ. Ɓendeni umongu, ɓa꞊nɨganɨa ganɨaa. 8Jʉ mombi ngia aata ɨkyɛmɛ, ɓamunzo ɛyɔ nzoni. Nʉ mombi ngia aahata ɨkyɛmɛ, aanyɨa nayɔ nyɨanɨ. Nʉ mombi ngia aɓɛnda umongu, ɓa꞊mʉganɨa ganɨaa.
9Ati ʉndɛnʉ aka, anɨ‑zʉ iya ɓɔ ndʉ mwana angɔ, a꞊mʉta mukati, amunzo tiga ikopi? 10Gʉ ɓɔ ndʉ amʉta 'usipe, amunzo tiga chulu? 11Ndʉ yaɓio‑zʉ ɓɔ inu ɓombi ɓɔɔ ɓɨɓɨ naambɨa kunzo ɓana ɓʉndɛnʉ kumbo ɔɔ manzanza, anɨ tiga ana iya Atɔ ʉndɛnʉ ngia a ekoo ʉ ɓisi a꞊nzo‑ɔɔ mombi kʉ 'uɓomu ngia anayɔ kʉta kumbo ɔɔ manzanza nadɨndɨ kʉɓaana! »
12« Moni kʉ muɓomu ngika naakʉnda ɓɔ ɓangɛ ɓʉnɨkyɨa, inu ɓʉkyɨeni ɛɓɔ kʉ ɓwanɨ. Moni kʉ muɓomu ngika ka amati ʉ mapanʉ ngika kʉ Mʉsa nʉ amati ʉ mubio ngika kʉ lɨgbɛ ɨkɔ ɨkʉnanɨ. »
Yeso unzo ʉpanʉ ekoo ʉ umongu wɔɔ kpɔkɔlɨ
(Luk 13:24)
13« Kumunieni akʉ umongu ngua wɔɔ kpɔkɔlɨ. Jʉ umongu ngua waatito ɓombi akʉ ingyo wa bamu, nʉ ɨngbaa ngia yɛɛ sɛ nanɨ ya gagaa. Ʉna tɔ, ɓombi ngiɓa ɓaaɨkpata ɓa ɓaja. 14Ɨkyɛmɨngana, umongu ngua waanziso ʉɓɨɨ wa kpɔkɔlɨ, nʉ ɨngbaa yɛɛ ɓʉyɛ nanɨ ya kʉ ɨndʉndanɨɛ. Nʉ ɓombi ngiɓa ɓaaɨkpata ɓa ɗɛkɛkɛ. »
Ɓaambɨa ɓʉtɨ akʉ lipumo lɔngɔ
(Luk 6:43-44)
15« Pɨmɨeni lɨgbɛ lʉ yakanaka pɨmɨaa. Jʉ ɓaaka anambamba ʉndɛnʉ tʉkʉ ndʉ ɓakɔndɔlɔ. Ɨkyɛmɨngana, amati ʉ mɨtʉma ngiindaɓʉ ɓa ɓakwei. 16Ɓombi ngiɓʉnanɨ, na꞊ɓʉmbɨa tʉkʉ akʉ ɨkyananakɨa ngiindaɓʉ. Jʉ ɓambakaɗʉka mijabibo ekoo ʉ 'ʉchɛkɛlɛ, kʉndʉ ɓambakaɗuka lipumo lɔɔ manzanza ekoo ʉ wamboku. 17Ɓʉtɨ ɓɔɔ ɓuɗo ɓaamɔ tʉkʉ lipumo lɔɔ manzanza, kʉndʉ ɓʉtɨ ɓɔɔ ɓɨɓɨ ɓaamɔ kʉ lipumo lɔɔ ɓɨɓɨ. 18Ɓʉtɨ ɓɔɔ ɓuɗo ɓambakamɔ lipumo lɔɔ ɓɨɓɨ, kʉndʉ ɓʉtɨ ɓɔɔ ɓɨɓɨ ɓambakamɔ lipumo lɔɔ manzanza.
19Ɓʉtɨ kʉ ɓuɓomu ngiɓa ɓambʉkʉmɔ lipumo lɔɔ manzanza, ɓaɓʉkwaka kwakaa, ɓambuɓugiso akʉ dyaa. 20Kʉ ɓwanɨ, nambɨa lɨgbɛ lʉ yakanaka tʉkʉ akʉ ɨkyananakɨa ngiindaɓʉ. »
Yeso ʉpanɨa ekoo ʉ ɓisi ɓʉ 'upipio
(Luk 13:25-27)
21« Chʉkɔmʉ ɓombi kʉ ɓuɓomu ngiɓa ɓanɛmɛ kusoko ɓɔ: ‹ Makʉʉɓɨɨ, Makʉʉɓɨɨ! › ɓa꞊kumunio sina amati Ɓʉngama ngiɓa ɓa ekoo ʉ ɓisi. Ɨkyɛmɨngana, mombi ngia a꞊kumunio‑ɛɛ tʉkʉ iya akʉkyɨa ɓʉkʉnda ngiɓʉ Tidoo ngiasɛmɛ a ekoo ʉ ɓisi. 22Ɓisi ongo akʉ ɓisi ɓʉ 'ʉkɔmbɔ, ɓombi ɓaja ɓa꞊nasigio sina ɓɔ: ‹ Makʉʉɓɨɨ chʉkɔmʉ‑zʉ isu iɓa ki꞉nye kwa ɨgbɛ kʉyaka moni akʉ ino ngiisɔɔ, kambisukuo mɨtʉma yɨ ɓabɨa, nʉ kambʉkyɨa moni kɔɔ mʉmbangɛ maja ɓɨɛ? ›
23Kija ɛmɛ ma꞊ɓʉtata sina akʉ ɓʉmba ɓɔ: ‹ Ɛmɛ mambakanɨmbɨa gʉkʉ ɗɛkɛkɛ! Ʉngweni anambamba asɛmɛ, inu ɓombi ɓɔɔ ɓɨɓɨ! › »
Yeso unzo isisinio ekoo tɨa lɨkáa
(Luk 6:47-49)
24« Kʉ ɓwanɨ, mombi kʉ uɓomu ngia akʉkɔ moni ngikakɛ nʉ nakɔ kʉkyananakɨa, a ngbanga ndʉ mombi ʉ mbɨmbanaka ngia a꞉tɨa ɨkáa ekoo ʉ ikopi. 25Ati ngia ʉgbaa wa꞉nyio‑ɔɔ, uzingio wɔɔ ʉja wambuzingo nʉ ɨbʉbʉ yambʉpɨka ekoo ʉ ɨkáa ngiinanɨ, chʉkɔmʉ yambʉkwa akɛsɨ, jʉ ɓa꞉ɨtɨa ekoo 'ʉkʉpa wʉ mukopi.
26Ɨkyɛmɨngana, mombi ngia akʉkɔ moni ngika makʉyaka engo, chʉkɔmʉ ambʉkʉkyananakɨa, a ngbanga ndʉ ijangi ngia ya꞉tɨa ɨkáa ngiangɔ ekoo ʉ masasaɨ.
27Ati ngia ʉgbaa wa꞉nyio‑ɔɔ, uzingio wɔɔ ʉja wambuzingo, ɨbʉbʉ ya꞉mbʉpɨka ekoo ʉ ɨkáa ngiinanɨ yambʉkwa akɛsɨ, kija ya꞉tio tʉkʉ ɓʉ gbatata. »
28Iya Yeso a꞉pipo ngakɨa ungbutu wʉ ɓombi moni ngikʉnanɨ, mapanʉ ngikangɔ kambʉɓʉmbangɨa nadɨndɨ. 29Jʉ i꞉nye kʉpanɨa nʉ ʉpanʉ, chʉkɔmʉ ngbanga ndʉ ɓapananakɨa ɓʉ mapanʉ ngiɓʉndaɓʉ.
Currently Selected:
Matayɔ 7: BudKoya
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2021, Wycliffe Bible Translators, Inc.