Like 7
7
Jesu osalihi ojanji a nkʉmu aworo
1Jesu omana owobo mbari e nde eso na baari, oyeni Kaprenaume. 2Nca onguundu kya, eki na nkʉmu aworo ekuumi kuumi. Ojanji a nde aki na ngaa e nkala. Nkʉmu aki na njala nde kuna. 3Nde oyuhi ma wobo o Jesu. Nde otumi akuuru ma Ajife na apɨsa kolo kolo mo oya na avusuha ojanji a nde. 4Bo ato tuha na Jesu, bo aselihi opɨsa nde kolo kolo ndi: «Nkʉmu aworo jwa mvuuru ove, yamaha nde. 5Nde na njala baari a saabe, nde mvuuru acwi njo mavwonoho.» 6Jesu oyeni bɨla bo, bo aki aya la na njo kali. E nkʉmu aworo me ekuumi kuumi atumi andihi a nde, na aduha Jesu ndi: «Me na okiimbi o we Nkʉmu, me kaa dya mbɨri we onyunuha nca njo e me ni. 7Kya obila o me eka aya me ankulu na amono we ni. Duha jaa lemo, ŋa ojanji a me owuuma. 8Me anku se na nkʉmu a me enyiimaha. Me na aworo o ngula me. Me oduha na omo, mbɨri: “Jyehe”, nde oyeni. Me oduha na okɨma mbɨri: “Jyaha”, nde oyi. Me oduha na ojanji a me mbɨri: “Sa bu”, nde osi.» 9Jesu oyuha mbari e nkʉmu aworo, ojuusi nde. Nde okalihi, na lemvuuru lelwonihi nde ndi: «Me kini mono oyalihi mva ki se o Isayele ni?» 10Antuma a nkʉmu aworo avurihi njo e bo, amoni ojanji omiwuuma.
Jesu onyuusi mwana okuuli
11Emana Jesu oyeni onguundu o Nayine. Alwoni a nde bɨla lemvuuru aki bɨla nde. 12Ntini e nde ato ncwo e mpuhu, baari ma aje na obiimi ancwo. Okwi aki mwana a balaha, nde se aki mwana a kya. Nguhu okwi aki okuuli. Lemvuuru le mo onguundu kya lekihi bɨla okuuli. 13Nkʉmu omono nde nkerihi esi nde, na nde ndi: «nyila olila!» 14Nde ociini, otiili okuba, abiri mo obiimi asuri. Nde na obiimi ndi: «Ojambu a balaha, me eduha na we mbɨri temehe!» 15Obiimi oya o nci, owobi. Jesu oyahi mwana, ovuuri na nguhu a nde. 16Baari aso amoni vwoho, aya makuusa lekʉma le Njyami ndi: «Owobi a mbari e Njyami onini omi ya o mpaniŋi e saabe. Njyami omi ya na avusuha baari a nde.» 17Ancya a Jesu ayeni nca osi o Jide oso, na ma apaani.
Antuma a Jan Batise ayi mpili e Jesu
18Alwoni a Jan Batise aduhi maami maa aso na Jan a nkʉmu a bo. Ŋa nde ocwoli vwele o mpaniŋi e bo. 19Nde otumi bo mpili e Nkʉmu na apɨsa ndi: «We Krisi aje oya? Si kali bisi ledɨla okɨma?» 20Bo ato mpili e Jesu, bo na nde ndi: «Jan Batise atumi bisi mo opɨsa yuhu we Krisi aje oya si kali bisi ledɨla okɨma?» 21O ntini jijya Jesu osalihi a nga angaa kuna, na eleme. Nde ocuuri na edidima me ebi, nde onaani baari kuna miisi. 22Emana nde okaali na antuma a Jan ndi: «Levuruha na aduha Jan a be lemoni, na a be leyuhi: baari ma aki i mono ni, aya mamono. Eleme eya me ejye, anga ebila amiwuuma, ma ali acwi kali aya mayuha, akwi aminyusuha. Amitooso anga owuha Ncya e Mve. 23Oswere oka na mvuuru ali i suba oyalihi kalihi obila o me ni.» 24Alwoni a Jan Batise amavuruha, Jesu okaali na lemvuuru leki ŋa ndi: «O be leyeni na amono o nca kayi oma, le njiba lefubi o pyebi, kali? 25Be oma leyeni na amono? Mvuuru amalaasa amfa amvunu? Baari malaasa amfa amvunu na ma ali na ontaambu, okaha ma anjo ma ankani. 26Be na leyeni na mono? Owobi a mbari e Njyami? Ee me eduha be, nde ovuli na Owobi a mbari e Njyami. 27Obila Jan mvuuru ma amateende nca osaangumu o Njyami ndi: “Me elehe Ntuma levusu mo oselehe njila e we”.» 28Jesu oluusi ndi: «Me eduha be o yula ncye akini okʉla mvuuru avʉli Jan onini ni. Mo oma mvuuru okyehe nca Onkani o Njyami ovuli Jan Batise onini. 29Baari aso ma ayuhi nde, na atoniŋi ma lepo aduhi ndi Njyami oli tele. Bo ayalihi ndi Jan ompa bo ateeme. 30Ŋa Afarisi bɨla ayisihi me ekele e Njyami abɨsi ediiŋi e Njyami o bo, bo se abɨsi ateeme a Jan Batise.» 31Jesu ovurihi ndi: «Be baari a lobi me oyelehe be bɨla na? Bo se owwana na? 32Bo owwana enkere me eli o nci, me etaama ma lebuhu, bo macwolo abuha ndi: “Bisi leberehe be ngomo, be i kina ni, bisi lemi yima be luumu le ndoho, be leka lila ni.” 33Mo oma, Jan Batise ayi nde i ja biila ni nde i nywa mali a ba ni, be mbɨri: “Nde na lari.” 34Mwana mvuuru oya nde aja, anywa, ŋa be mbɨri: “Nde na njala oja bɨla lenywa le mali, nde andihi atoniŋi ma lepo bɨla anga ambiini!” 35Ncimi e Njyami eli tele mo baari ma amayalaha nde aso.»
Jesu nca njo e Simo Ofarisi
36Ofarisi omo ocwoli Jesu na aja bɨla nde. Jesu onyunihi nca njo Ofarisi oya o tanda. 37Nca onguundu kya, eki na okaasi obɨla. Nde oyuhi ndi Jesu oli njo Ofarisi, nde oyi na mbiina albatre emaluula mo oyombo e mvunu to. 38Nde oya o ngula Jesu, alila ancya ma va Jesu o yula nyiili. Nde okwomi ancya o mfu e nde, ompi nde amfemfe o nyiili, ojirihi nde oyombo o nyiili. 39Ofarisi acwoli Jesu omono vwa, ocimihi ndi: «Mvuuru yu aki mo oka owobi a mbari e Njyami, kaa nde ajyabi ndi okaasi yu na obɨla.» 40Jesu na Ofarisi ndi: «Me na jaa mo oduha we Simo.» Ofarisi ndi: «Wobo Nkʉmu.» 41Jesu ndi: «Mvuuru omo obihi baari vwele adoro. A ncomi ekuumi me enkama etaani, ojwele ekuumi etaani. 42Ŋa bo aka buuna okasa obiimi kya ni. Obihi na bo ndi i ma kasa ni. Ŋa nca bo vwele avʉli odya nga adoro na?» 43Simo okaali ndi: «Me ecimiŋa mbɨri a nde asi mpolo mo obiimi enini.» Jesu okaali ndi: «We na mpyeme.» 44Nde okalihi mpili okaasi, na Simo ndi: «We amono okaasi yu, me nyunihi nca njo e we, we aka jiriha me anja o nyiili ni. Ŋa nde ama vwoso me nyiili ma ancya, omakwomo o mfu e nde. 45We aka ampa me amfemfe ni, ŋa lebihi le esi nyuniha nde, nde okini onyila ompa me amfemfe o nyiili ni. 46We aka jiriha me maari o yula ocwi ni, nde omijiriha me oyombo o yula nyiili. 47Kya obila o me eduha we mbɨri ambiini a nde kuna amiboloho. Mo osuumbu a nde alahi dya e nde enini. Mvuuru maboloho nceeri, olaha se dya e nkyehe.» 48Jesu oduhi na okaasi ndi: «Ambiini a we amiboloho.» 49Baari ma aki mo oja bɨla nde, aya macimiha ndi: «Yu mvuuru abuuna oboloho ambiini na?» 50Jesu na okaasi ndi: «Oyalihi o we omivusuha we. Jyehe nca oduusu.»
Currently Selected:
Like 7: MDT
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES