Matayo 4
4
USetano akumugemya uYesu
(Maluko 1:12-13; Luka 4:1-13)
1Neke uMubepo uMwimike amusogodzage uYesu kuhelela ku lungʼalangʼala, ukuta akagemywe nu Setano. 2UYesu akwiviikilaga ngʼaani#4:2 Akwiviikilaga ngʼaani Lole Ukwiviikila ngʼaani ku Figanulo. figono makyumi gatayi (40), ikilo nu muunyi. Pa wusililo akwipulikaga indzala. 3Neke uSetano aadzage, amugemyage atigilage, “Ngana uveeve uli Muswamuve va Nguluvi, ugalongele amaganga aga gahambuke mikaate.” 4UYesu akumuhigaga iitigilaga, “Mu Wusimbe uWiimike lúsimbiilwe ukutigila, ‘Ikyakuliya kyene kisikumuhulila umuunu avedze muumi, nda haamu, uwuumi wa muunu wuli mu lidzwi lilivedzaga lye iilonga uNguluvi.’#Lwiwuko 8:3 ”
5Neke uSetano amusindikage uYesu ku wudzenge uwiimike wa Yelusalemu, amuviikage pa kinengʼenengʼe kya lukandzi lwa tembeli,#4:5 Tembeli Lole Itembeli ku Figanulo. ulwaloleengʼanaga ni likwava litaali, 6amulongelage atigilage, “Ngana uveeve uli Muswamuve va Nguluvi, wiitoodze paanyi. Mu Wusimbe uWiimike lúsimbiilwe ukutigila,
‘UNguluvi akuvatuma avanyamwandza vaakwe,
navo vahadza vakukunyagidza na mawoko gaawo
ukuta utane ukubumidza iligulu lyako pa liganga.’#Ndzimbililo 91:11-12 ”
7UYesu akumuhigaga iitigilaga, “Mu Wusimbe uWiimike lúsimbiilwe ukutigila, ‘Utane ukumugemya uMutwa Nguluvi vaako.’#Lwiwuko 6:16 ”
8Kangi uSetano akumusindikaga uYesu ku kidunda ikitaali hiilo, akumuwoneesaga uwutwa wonda wa mwe naanyi, pamwinga ni ndolo dzaakwe, 9akumulongelaga iitigilaga, “Ngana ukuungondamila, ndikukupeela fyonda ifi.” 10Neke kangi uYesu amuhigage atigilage, “Uhege apa Setano! Lúsimbiilwe mu Wusimbe uWiimike ukutigila, ‘Umugondamilage uMutwa Nguluvi vaako, kangi umutovelage iligendwa yuuyo mwene swe.’#Lwiwuko 6:13 ”
11Neke uSetano amulekage uYesu, umusika guugo avanyamwandza va Nguluvi vaadzage, vamulimilage.
UYesu iivanga amalimo gaakwe ku Galilaya
(Maluko 1:14-15; Luka 4:14-15)
12Pambele padebe uYesu aapuliike ukutigila uYohana uMudzabisi ádindiilwe mu ndinde, neke apilukage ku mugoola gwa Galilaya. 13Apo iihaamaga ukuhuma mu wudzenge wa Nasaleti, iihelelaga kwikala ku wudzenge wa Kapelenahumu, uwaali mu ngʼumbungʼumbu ya nyandza ya Galilaya, mu nyi ya Sabuloni ni ya Nafutali. 14Dzonda idzo dzaahumiye ukuta likwile ilidzwi lya Nguluvi, lye aalongile wugendela wa muvidzi uIsaya ukutigila,
15“Mu nyi ya Sabuloni ni ya Nafutali,
ku ngʼaasi iyiihelela ku nyandza, imwambu ya mukoga Yolodani,
mu Galilaya mwe vakwikala avaanu avasili Vaisilaheli,
16avaanu avakwikala mu kiisi,#4:16 Avaanu avakwikala mu kiisi Vaali koovali avasili Vayahudi voloofu ku Galilaya uko, avasamudzeeliye uNguluvi, lwe lwene lwilongwa ukutigila, vakwikala mu kiisi.
váluweene ulumuli lukomi.
Avaanu avakwikala mu nyi iya kiisi nu mwigisila gwa kufuwa,
ulumuli lúvamulikiye.”#Isaya 9:1-2
17Ukuvangila umusika ugo, uYesu iivangaga ukudalika iitigilaga, “Mupelage indzanangifu dzeenyo, pakuva uwutwa wa kukyanya wúhegeliye.”
UYesu akuvahaagula avanyigendwa va kutala
(Maluko 1:16-20; Luka 5:1-11)
18UYesu pe aali mu kugenda mu ngʼumbungʼumbu ya nyandza ya Galilaya, akuvawonaga uSimoni ilitaawa ilingi Petulo, nu Andeleya umunyalukolo vaakwe, viitega indzafu dzaawo mu nyandza, pakuva vaali valovi. 19Akuvalongelaga iitigilaga, “Mwadze muuniniilage! Naane ndihadza ndikuvahambusa valovi va vaanu.”#4:19 Valovi va vaanu Kwe kutigila, uYesu ahadza akuvahambusa vavaleetage avaanu kumuniniila uYesu. 20Umusika guugo, vakudzilekaga indzafu dzaawo, vakumuniniilaga uYesu.
21UYesu iihelelaga pawutalo padebe, akuvawonaga uYakobo nu Yohana, avaswamuve va Sebedayo. Avo vaali mu waato pamwinga nu dadaawo uSebedayo, vaawuyapaga indzafu dzaawo. UYesu akuvakemeelaga, 22umusika guugo vakuwulekaga uwaato uwo nu dadaawo, vakumuniniilaga uYesu.
UYesu iiwulanidza avaanu nu kuvananiya avatamwa
(Luka 6:17-19)
23UYesu aahelanidzaga mu mugoola gonda gwa Galilaya, iiwulanidza avaanu mu nyolanilo#4:23 Nyolanilo Lole Uluholanilo ku Figanulo. dzaawo, nu kudalika iMola iNofu dza wutwa wa kukyanya. Kangi avananiyaga vonda avaali nu wulemwa ni fitamwa fyawo fyonda. 24Imola dzaakwe dziitagalilaga hiilo mu mugoola gonda gwa Silya. Neke vamuleetelage avatamwa vonda, avaali ni fitamwa ifili poloofu, avaapumukaga hiilo nu wuvafi, aviibiitwe ni mibepo imiviifu, avanya lidzilisi na vanya mateela. UYesu akuvananiyaga vonda avo. 25Neke ililugu likomi lya vaanu limuniniilage ukuhuma ku Galilaya, ku Ndzenge Dzinyikyumi (10),#4:25 Ndzenge Dzinyikyumi Mu ndongele ya Kigiliki yiitigila Dekapoli. Avaanu voloofu aviikalaga umo vasaali Vayahudi. ku Yelusalemu, ku Yudeya ni mwambu ya mukoga Yolodani.
Currently Selected:
Matayo 4: BEZ
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022 Wycliffe Bible Translators, Inc. All rights reserved.