Hechos 2
2
Uk'unik i Lo'laj Utewal i Dios
1Are xuriq i ij re i nima'ij chi Pentecostés#2.1 Iri ke'eloq nima'ij rumal i lajuj kawinaq ij (50) chrij i Pascua ub'i, konojel i winaq chi je kojonnaq che utzij i Jesús, kimolom kib' che jun k'ijib'al. 2Are uri xaqte'et xkita pacha jun nim laj tew ko' upam xpe chikaj, lik ko xjinin upam i ja ipa je o wi. 3Te'uri xwinaqir jub'an b'iroxik chi pacha taq urep a' xkicher b'i pkiwi. 4Are uri konojel lik xok i Lo'laj Utewal i Dios pkik'ux, te'uri xkijeq ch'awik che jub'an chik ch'ab'al chrij pacha i ch'ab'al chi xuya i Lo'laj Utewal i Dios chke.
5Che taq i ij le, je o aj Judío chila pa tinimit Jerusalén chi je petnaq naj naqaj che ronojel uwach i jyub' ta'aj chi lik kiya'om kik'ux chu'anik i kipatan chwach i Dios. 6I winaq are xkita chi xjinin upam i ja lik xe'e chrilik xaq lik xkimol la kib' chila. Xaq xch'ob'taj ti chik ub'e kumal b'uchak chi lik chkijujunal xkita wach kkib'ij i winaq chi je kojonnaq che i Dios are xech'aw pkich'ab'al. 7Lik xkib'isoj; rumali xkib'ij chkiwach:
—¿Xatab'a je aj Galilea ti konojel ike le chi ketijin che i lapanik? 8¿B'uchak uri chi kqata chi kkiriq ch'awik pqach'ab'al yoj? 9Waral je o i winaq aj Partia, aj Media, aj Elam, aj Mesopotamia, aj Judea, aj Capadocia, aj Ponto, aj Asia; 10aj Frigia, aj Panfilia, aj Egipto xaq je o i winaq chi je petnaq pa jalajuj taq tinimit Libia chi je o naqaj che i tinimit Cirene. Xaq je o jub'an chi je k'unnaq pa nim laj tinimit Roma; 11o jujun chke ike le je aj Judío chkalaxik xaq o jub'an chik ki'anom Judío che kib'. Xaq je o jub'an chik chi je petnaq pa tinimit Creta xaq Arabia. ¡Xwiri lik kqata chi kkiriq ch'awik pqach'ab'al yoj re i nim laj uchomal i Dios! Xecha.
12Konojel lik kkib'isoj ile xaq kch'ob'taj ti chik ub'e kumal rumali lik kkitz'onoj chkiwach:
—¿Wach taq usuk' ronojel ile?
13Xwiri je o jujun xa xe'ok che i yo'yanik, xkib'ij:
—¡Ike le xa je ab'arelab'! Xecha.
Ulapanik ma Pedro
14Are uri ma Pedro xtak'i anoq junam ku' i julajuj apostolab', are uri ko xub'ij: Yix chi ix aj Judío xaq ni'pa ix jeqel waral pa Jerusalén, chiwetamaj iri, xaq chita ub'e wach ni'pa i kinb'ij chiwe. 15Ike le je ab'arelab' taj pacha kich'ob' yix, man lik k'atene b'elejeb' or iri re usaqirb'al. 16Ronojel ni'pa ktijin uk'ulmaxik waral, are ile xutzijoj ma Joel chi profeta, are xub'ij:
17Pa taq k'isb'al ij, i Dios kub'ij kintaq b'i Intewal pkiwi konojel i winaq;
ni'pa iwak'al alab'om xaq i je altom
kkib'ij ni intzij chke i winaq,
ni'pa i alab'om, kkil ni pa wachij wach inch'ob'om kin-an na;
xaq ni'pa i rijab' kkachik'aj na wach taq kin-ano,
18che i ij le kintaq b'i Intewal pkiwi ni'pa i wajchak
ixoqib' xaq achiyab',
te'uri kkilap ni intzij chke i winaq.
19Kink'ut ni nimaq taq chomalil chiwe chwa taq kaj.
I chwach i jyub' ta'aj kiwil ni kik', a' xaq i sib' chi kb'uquqik pacha i sutz',
20i ij kok ni equm chwach,
i ik' k-on ni kaq pacha i kik'.
Ile kuk'ulmaj na chuxe'el i ij re uk'unb'al i Ajwal,
chi are ni jun ij chi lik nim xaq lik chom.
21Xwiri konojel ni'pa i kkikoj u'ij i Ajwal,
ketotaj ni chwach i kamik.
22Rumali yix chi ix aj Israel, chikojo retalil ni'pa kinb'ij chiwe: Man yix iweta'am chi i Jesús aj Nazaret lik are ch'iktal rij rumal i Dios chi ku'an i nimaq taq il, nimaq taq uchomalil, xaq nimaq taq k'utb'al re. 23I achi le chi xjach pi'ab' yix chrij pacha uch'ob'onik i Dios, yix xikamsaj are xkiripo xaq xkitz'aw chwach i krus, iwumal yix chi ix utz ti laj taq winaq. 24Xwiri i Dios xuwalijsaj che i kamik, keje ile xresaj puk'axk'ol i kamik, man i kamik lik ktiki ti chu'anik re che i Jesús. 25I ma David chi ajawinel, keje iri xub'ij kan chrij i Jesús:
Yin lik arewi kwil te'eq i Ajwal chi o chinwach;
Ire we inutzalem pinwiqab'im lik mijun uri kintzaqsawik.
26Rumali chi kkikot i wanima,
inchi' lik kb'ixan ni ru' jun nim laj kikotemal,
xaq ronojel inch'akul kul uk'ux che Ire.
27Man kinaya ti kan chupam i jul re i kamik
xaq kaya ti che inch'akul chi k-ayik
man yin in lo'laj awajchak.
28Xak'ut i utz laj b'e chwe re i k'aslemal;
xaq kinanojsaj ru' jun nim laj kikotemal man at o wu'.#2.28 Salmos 16.8-11 (gr.).
29Ix, wachalal chwach i Cristo, chiya ni chwe chi kinb'ij iri chiwe: Ru' i saq laj tzij chi qamam mam David, xkamik xaq xmuqik, i umuqb'al k'a o chqaxol yoj. 30Xwiri mam David chi profeta te'eq; reta'am chi i Dios lik usujum che chi kukanaj kan jun chke umuq uxikin pa ajawinel.#2.30 2 Samuel 7.12-13; Salmos 89.3-4; 132.11-12. 31I mam David lik chuxe'el pacha taq xril uwalijik i Cristo che i kamik, rumali xlapan chrij chi i Cristo le lik kkanaj ti chupam i jul re i kamik xaq i uch'akul xaq lik k-ay taj. 32Man i Dios lik xuwalijsaj i Jesús che i kamik, xaq yoj lik qeta'am chi ile lik qatzij man lik xqilo. 33Te'uri, ru' nim laj u'ij xwalijik xk'am b'i chikaj x-ekub'i puwiqab'im i Dios. Xaq xya' Lo'laj Utewal i Dios che rumal Uqajaw, chrij pacha usujum che, xaq ire xutaq chali Lo'laj Utewal i Dios le pqawi yoj; are ile xiwilo xaq xita. 34Man are ti mam David xel b'i chikaj; man are ire xub'ij:
I Ajwal Dios xub'ij che i Wajwal:
Chatkul pinwiqab'im,
35k'a kuriq ni i ij chi konojel ni'pa i je ajch'oj chawij keinya ni pawaqan.#2.35 Salmos 110.1.
36Lik chiwetamaj iwonojel yix ix aj Israel chi i Jesús, chi xirip yix xaq xitz'aw chwach i krus, i Dios xu'an che chi are ire Ajwal xaq i Cristo. Xcha.
37I winaq chi kimolom kib' chila are xkita iri, lik x-utut kik'ux. Rumali chi xkitz'onoj che ma Pedro xaq chke i jub'an chik apostolab':
—Qachalal chwach i Cristo, ¿Wach rajwaxik kqa'ano? Xecha.
38I ma Pedro xub'ij chke:
—Chijalwachij inojb'al chwach i Dios xaq chqajsax ya piwi chijujunal pub'i i Ajwal Jesucristo, man keje ile i Dios kukuy ni imak xaq kuya ni Lo'laj Utewal i Dios piwi. 39I sujunik le lik kya' ni chiwe yix xaq chke iwak'al, xwi ta la ile, xaq kya' ni chke ni'pa i je o naj, chi ke'eloq chke konojel ni'pa kesik'ix rumal i Ajwal Dios.
40Ru' i tziji xaq ru' i jub'an chik tzij le re pixb'anik, i ma Pedro xub'ij chke:
—¡Chijek'a iwib' chkixol i itzel laj taq winaq!
41Keje uri ile chi ni'pa i winaq chi xkikoj utzijonik i ma Pedro, xqajsax ya pkiwi. Che i ij le, kolo je lajujwinaq wuqmo' (3,000) winaq xkiya kiwach ku' i jutzob'aj chi je kojonnaq che i Ajwal. 42Konojel lik xkiya kib' chu'anik chrij pacha i kik'utunik apostolab'. Ronojel ni'pa i o ku' lik kkijacho, i junam kki'an kilapanik ru' i Dios, xaq lik kkimol kib' chutijawik i wa.
Kik'aslemal i nab'e taq winaq chi xekojon che i Cristo
43Konojel i winaq le lik kkib'isoj ni'pa i nimaq taq il xaq ni'pa i nimaq taq anik chi kki'an i apostolab' rumal i Dios. 44Konojel i winaq chi je kojonnaq che i Cristo lik xaqjun kiwach puwi ub'itaq ke. 45Kkik'ayij i kulew xaq ronojel ub'itaq ke, te'uri kkijach i pwaq chkiwach chrij pacha i rajwaxik chke. 46Lik ij ij kkimol kib' prachoch i Dios xaq kkimol kib' chi taq ja re kkijach i wa chkiwach i kkitij ru' jun nim laj kikotemal, xaq ru' nim laj rutzil kik'ux. 47Kkikoj u'ij i Dios xaq lik k'ax kena' kumal konojel i winaq; i Ajwal ij ij ktijin chuk'iyarsaxik i jutzob'aj chi ketotaj na.
Currently Selected:
Hechos 2: ACHICUB
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Biblia Achí de Cubulco, Derechos reservados de Sociedad Bíblica de Guatemala