Matìyò 2
2
Bəd ne kyeri anug imbə̀ʼ titəm iməg
1Mbi ya gwi Yeso a Betèlèhem, inga aba aben Jùdeyà, inga nyùmə̀ we ne Erɔ̀d ya yaʼi ifɔn. Anyumə̀ ne mbi ya gwi aməd, agha ya to sà bəd mɔ̀ʼɔ ne ya kyeri anug imbə̀ʼ titəm iməg ya nɔ̀ʼ aba isəg ze ne nyùmə̀ we dùwə̀ angu ghò a Jèrusalèm. 2Mbɔb ya pè angu bìri gha, “Ŋwan we ne mbi gwi ne yaʼi ifɔn mə̀Ju àkə aya? Tì kə̀ bàd fitəm iməg məd aba ze ne nyùmə̀ we dùwə̀ angu. Ane, tì yèʼe ni ghumni aməd.”
3Anyumə̀ ne ifɔn Erɔ̀d ya zughi anug azo̰, ze ya taŋ nàʼ ngəʼ ibo bə̀ nàʼ ngəʼ abə bəd məjìm inga Jèrusalèm. 4Ane, wì ya kàrì itog bəd mbàn Ŋwiye fɔrɔ mə̀chwitì mə̀nɔ̀ʼɔ̀, bìri inɔb gha, “Mbi kə ghum gwi Wə̀d we ne Ŋwiye zɔ̀ʼi aya?”
5Mbɔb ya ywìtì ibo gha, “Mbi biri gwi aməd a Betèlèhem inga Jùdeyà icheg ne wə̀dkə̀n Ŋwiye ya fə ŋwàʼri gha,
6‹Àghò Betèlèhem ne yaʼi inga aba aben ze a Judà,
Àghò kayi asiŋi ne kə chè isiŋi ijìm mbe ne məfɔn mbe a Judà mbe tùmbə̀,
imbə̀ʼ icheg ne Wə̀d ne pùmnə bəd biri dù inga ine,
ne biri tùmbì ìmbum bəd mə̀Izre.› ”
7Anyumə̀ ne Erɔ̀d ya zughi anug azo̰, wì ya kàrì bəd mbe ne kyeri anug imbə̀ʼ titəm iməg anjìm anjìm ghà inɔb gha mbɔb mətə kwàʼ nyùmə̀ we ne mbɔb ya bàri fitəm iməg fe. 8Wì ya tɔm awɔb a Betèlèhem, ghà inɔb gha, “Mbə̀ gho kə̀b ŋwan we kwàʼ icheg chɔm. Mbə̰ mə̀ bàd aməd, mbə ywìrì yèʼe ghà inum ni gha mə̀ bə ghò ghùmni aməd.”
9Anyumə̀ ne mbɔb ya zughi anug ne ifɔn we ya gha inɔb, mbɔb ya nɔ̀ʼ dù ghò awɔb. Fitəm iməg fe ne mbɔb ya bàri aba isəg ze ne nyùmə̀ ya dùwə̀ angu yaya yḛ̀ ghò inɔb imbìghè. Fi yaya yḛ̀ ghò anene pè təm ikaŋ igun asiŋi ze ne ŋwan we ya yaʼi angu. 10Anyumə̀ ne mbɔb ya bàri fitəm iməg fe, mbɔb ya taŋ gyen.
11Anyumə̀ ne mbɔb ya pè inga nəb ze ne ŋwan we ya yaʼi inga, mbɔb ya bàd ŋwan we bə̀ bàd Mèri ngɔb məd. Mbɔb ya gundi aseg ghùmni ŋwan we, nɔ̀ʼ fìʼì ìmbɔb mbì tìkub chì ighi inga, fà ŋwan we. Mbɔb ya nàʼ gol tì frankinsèns fɔrɔ mər.#2:11 Frankinsèns tì mər ya aku məwud àka inun mɔ̀ʼɔ ne beri ifɔ chɔm chɔm. 12Ŋwiye ya pati bəd mbe anjə̀m gha imbə̀ʼ mbɔb ywiri bəndə awɔb inɔnjì achan Erɔ̀d. Ane, mbɔb ya si chè ane inɔnjì ndəŋ bə̀ndì ghò awɔb inɔb inga aben.
Jòseb tì Mèri niŋ Yeso nòrò ghò a Ijìb
13Anyumə̀ ne bəd mbe ne kyeri anug imbə̀ʼ titəm iməg ya fə ghò awɔb, angirə̀ Anɔŋisəg ya ghò abə Jòseb anjə̀m, pè ghà ibo gha, “Nɔ̀ʼɔ! Niŋ ŋwan bɔd we tì ngɔb məd mbə̀ noro ghò a Ijìb. Mbə̀ chughi angu anene mə ghà ine gha mbə̀ ywirì yèʼe aŋa. Aton ya gha, Erɔ̀d biri chà bəd gha mbe kəbə ŋwan we zwèti.” 14Jòseb ya zug anug ze ane bə̀ nɔ̀ʼ məyi kwàʼ izimi we, niŋ ŋwan we tì Mèri ngɔb ŋwan, mbi ghò a Ijìb. 15Mbɔb ya chughi angu anene ifɔn Erɔ̀d ku. Ane, ìngam we ne Anɔŋisəg ya che anjìm wə̀dkə̀n ghàm, wì ya dù ane tesiʼ. Ìngam we ya gha, “Mə ya kàrì ìmə ŋwan wì nɔʼ chè dù inga Ijìb.”
Mə̀sogyì zweti bɔn mbaŋà bɔd
16Anyumə̀ ne Erɔ̀d ya bàri gha bəd mbe ne kyeri anug imbə̀ʼ titəm iməg fə tambi aməd, wì ya taŋ gaŋ. Wì ya si nɔ̀ʼ chà ìmbi mə̀sogyì a Betèlèhem bə̀ fɔrɔ inga isiŋi mbe ne yaʼi iban iban gha mbe gho zwèti bɔn mbaŋà məjìm ne ya yaʼi tituʼ tibe bə̀ fɔrɔ ìmbe ne chəyi mbi ya kiri koʼi tituʼ tibe. Wì ya ghì ane nɔ̀pi ane nyùmə̀ we ne bəd mbe ne kyeri anug imbə̀ʼ titəm iməg ya gha ibo. 17Ane, anug ze ne Ŋwiye ya che anjìm ìwi wə̀dkə̀n Jèrìmayà ghà ya dù ane tesiʼ. Anug ze ya gha,
18“Gì wə̀d mɔ̀ʼɔ ze ghàmà a Ramà.
Tengàŋ we chwḛ məsi bə̀ dèghè kwàʼ ane gì ka ka.
À ya Ràse we dèghè ìmbi bɔn.
Chəyi wì kəbi gha wə̀d mɔ̀ʼɔ bɔngi aməd,
imbə̀ʼ icheg ne bɔn mbe fə ku.”
Jòseb tì Mèri niŋ Yeso mbi ghò a Nazarèd
19Anyumə̀ ne ifɔn Erɔ̀d ya fə ku, angirə̀ Anɔŋisəg ya ghò abə Jòseb anjə̀m ne wì kiri biri a Ijìb, pè ghà ibo gha, 20“Nɔ̀ʼɔ niŋ ŋwan we tì ngɔb məd mbə̀ bəndə ghò a Izre imbə̀ʼ icheg ne bəd mbe ne yaya kə̀bə̀ ni zweti aməd fə ku.” 21Ane, Jòseb ya nɔ̀ʼ niŋ ŋwan we tì ngɔb məd mbi bə̀ndì ghò a Izre. 22À ya məyi gha anyumə̀ ne Jòseb ya zughi gha Àchilùs fə jəg ìfɔ̀n mbaʼ məd, Erɔ̀d, se tùmbə̀ aba aben Jùdeyà, wì ya bɔ ni ghò angu. Angirə̀ Anɔŋisəg ya yeʼe pàti Jòseb anjə̀m ane, wì si ghò aba aben Galìli 23Wì ya pè chùghi asiŋi ze ne mbe kàrà ane Nazarèd. Àzo̰ ghì anug ne bədkə̀n Ŋwiye ya gha ze dù ane tesiʼ. Anug ze ya gha, “Mbi biri se kàrà aməd ane wə̀d a Nazarèd.”
Currently Selected:
Matìyò 2: MBTP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2019 CABTAL