Lukàrzɛ̀ 22
22
Ŋmanò mò lì Oŋwà Yerzù
(Mat 26.1-5; Mak 14.1-2; Yòw 11.45-53)
1Èŋgè hvònda yà è ndèma yà ehvòòtò ema e rzi hwɛnɛ ehwindi e mà kòmbɛ̀nɛ̀. Èŋge ndèma è mà hwɛ̀lɛ̀hwɛ̀ ndi lì Akà Ɔnɛ̀yi. 2È Pìlìrzì ndɛnɛ nà hwà-òkòlèlì hwa mbenda, hwà mà òka hwatò wɔ̀ŋgɔ̀. Ndi hwa mà hwɛ lì àrza ŋmanò mò lì òŋwà Yerzù ò jùtuta.
Jùdàrzì à mà emeyà lì àhwirzɛ̀ Yerzù
(Mat 26.14-16; Mak 14.10-11)
3Mòkarzɛ̀ à mà kpèeyà mòòkòwèlì mɔ̀kɔ wà ama Yerzù ema à ma hwɛ̀lɛ̀hwɛ̀ Jùdàrzì. Lìnɛ̀yi lìna la eni hvɛ lì mà hwɛ ndi Ìrzìkalìyɔ̀tɛ̀. Jùdàrzì à ma hwɛ ndi mɔ̀kɔ wà lìyòmɛ̀ la hwà-òkòwèlì nà hwàhwàkɛ̀ hwa ama Yerzù. 4Jùdàrzì rzii a ɛ̀ndɛ lì ùŋmanɛlɛ Ipìlìrzì ndɛ̀nɛ, nà hwàkànèlì hwa è Ndawò yà Lohwà rzi a hwa òhweyà, nɛ mɔ̀ à tànɛyì lì hwa àhwìrzɛ̀lɛ̀lɛ̀ Yerzù. 5Hwa mà òka mɔ̀nyɛ̀ŋgì hwa àrzɛ hwà mà imanɛlɛ. Rzìi hwa òhweyà Jùdàrzì ema hwa mò taŋgeyà. 6Jùdàrzì à mà emeyà. Rzìi à wòteya lì àrza ŋmanò mò lì hwa àhwirzɛ̀lɛ̀lɛ̀ Yerzù, e rzì hwɛ hwatò lì hwiyà.
Yerzù à mà wòŋgìrzɛ̀nɛ̀ è Ndèma yà lì Akà Ɔnɛ̀yi
(Mat 26.17-25; Mak 14.12-21; Yòw 13.21-30)
7Nàŋgɛ nà òmà wòŋgò wùnyà wò è Ndemà yà Èhvòòtò ema e rza hwɛ̀nɛ̀ èhwindi e mà ùke, ema iŋguma ja mɛ̀lɛ̀ŋgù ì mà hwɛnɛ lì òŋwàhwà ò hwèleèlì hwe lì Akà Ɔnɛ̀yi. 8Yerzù rzìi a òma Pètrò nà Yòwanìrzɛ̀, a hwa òhweyà nanù ema, “È ɛ̀ndɛ̀ e rzɛ̀ŋgɛ̀nɛ̀ hwèlèèlì hwe lì Akà Ɔnɛ̀yi.” 9Hwa mà mò ijòwa nanù ema, “One ò àrza nanù ema ì hwe rzɛ̀ŋgɛ̀nɛ̀ e?” 10Rzìi à hwa alàhwɛ̀ nanù ema, “È ɔŋgɔ̀ tɛ! Nà òmà e kpèeyà ò èŋge mbòwà, mòtò à è taneyà ema a hwànɛ ìtɛ̀ŋgɛ̀ ja malìhwa. È mò òŋgàme tɔ̀ ima ndawò ema a kpèeyà. 11È òhweyà è mòhwɛnɛ wà ndawò nanù ema, ‘È mòòkòlèlì hwà àrzu à ma jò ijòwe, òne è tùu ya hwàyɛ̀ni è hwèlì, ema à leeyà hwèlèèlì hwe lì Akà Ɔnɛ̀yi nà hwà-òkòwèlì hwa eni e?’ 12À è uŋmɛ̀lɛ̀ tùu ndɛnɛ̀ ema è ma màa lì rzeyàhwɛlɛ. Èŋge tùu è hwèlì ndi ò ŋmanyu yà è ndawò yà ndɛkì. È rzɛ̀ŋgɛ̀nɛ̀ hwèlèèlì hwe arzu aŋgà.” 13Pètrò nà Yòwanìrzɛ̀ hwa mà ɛ̀ndɛ rzì hwa ùŋmanɛlɛ hweyà hwe àrzɛ nà òmà Yerzù a mà hwa òhweyà, rzìi hwa rzɛ̀ŋgɛnɛ hwèŋge hwèlèèlì hwe è ndèma yà lì Akà Ɔnɛ̀yi aŋga.
Li làa la rzàŋgò
(Mat 26.26-30; Mak 14.22-26; 1Kɔ̀ 11.23-25)
14Èŋge hvònda yà è ndèma yà lì Akà Ɔnɛ̀yi e mà ùke, Yerzù nà lìyòmɛ̀ la eni la hwà-òkòwèlì nà hwàhwàkɛ̀ hwa mà lìya ò lì làa mòŋgò mòlelì. 15Yerzù rzìi a hwa òhweyà nanù ema, “Nà mà òhva nyìrzɛ̀ rzayì-rzayì, ò lì làa mònò mòlèlì mò lì Akà Ɔnɛ̀yi nà inyɔ ndèŋgàna nà e taka. 16Nà è jɔ̀kɛ̀ nà è òhweyà naŋgɛ ema nà rza mò làa hvɛ, natɛ̀ɛ na e hvònda ema hwe òndìrzɛ̀hwɛ̀ ò Lìkànèyà là ama Lohwɛ̀.”
17Yerzù rzìi a wòwa lìwòndè la hwènyɔ̀ɔ̀nì, a ŋgbà Lohwɛ̀ jekà rzìi a òhwa nanù ema, “È wòwè e nyɔ mɔ̀kɔ nà ɔ̀nɛ̀yi. 18Nà è òhweyà ema lì wòteya nàŋgɛ̀, nà rza nyɔ hwenè hwènyɔ̀ɔ̀nì hvɛ natɛ̀ɛ Lìkànèyà là ama Lohwɛ̀ lì jà.”
19Rzìi à wòwa èhvòòtò, a ŋgbà Lohwɛ̀ jekà, à è kàhwà. Rzìi à è ŋgba hwà-òkòwèlì hwa eni, a òhwa nanù ema, “È nyò ya amì ene ema, yè è ŋgbààhwì. È gbèyè nanù ò lì nò ɔ̀ŋgɛlɛ.” 20È hvònda ema hwa mà kulɛ̀ ò lì làa, nyayi hvɔ̀kɔ mɛnɛ, à hwà ŋgbà lìwònde rzìi à òhwa nanù ema, “lìni lìwònde là mimba, lì hwèlì ndi yòòmbò è hvènya lì hvòmɛ̀nɛ̀ Lohwɛ̀ nà inyɔ, è hweyi yà màyija mà ami, ema mà hwɛnì lì è rzòweyà ò nyòla ya ànyu. 21Ndi è ɔ̀ŋgɔ tɛ è mɔ̀ ema à ò nò ahwìrzɛ̀ à hwèlì anù, à làa nà ìmba. 22È Ŋmanà wà è Mòtò wà Hwènàmà à hwɛnì lì ŋwa nà òmà è mà tìlahwe, ndi èwòma nà òŋgò mòtò ema à mò àhwìrzɛ̀.” 23Aŋgà ndi hwà-òkòwèlì hwa mà wòteyà lì àyijòwànɛ̀ mɔ̀kɔ nà ɔ̀nɛ̀yi, njɛnɛ wà awu à tànɛyi lì gbeyà ène nyàyi yà eyà.
Èhvèyiŋgòwèlì yà hwà-òkòwèlì njɛnɛ a ò hwɛ è mòtimbèlì
24Hwà-òkòwèlì rzii hwa wòteya èhvèyìŋgòwèlì wɔ̀ nà wɔ̀, ò lì àrza lì hwiya njɛnɛ wà àwu a ò hwɛ̀ɛ è mòtimbelì. 25Yerzù a mà hwa òhweyà nanù ema, “Ì kiŋgɛ̀ ja ène rze, ì tumirzɛ̀ hwatò hwa awu mòkambiya. Hwàkànèlì hwa ahwɛlɛ wɔ̀ hwìti nanù ema, ‘Hwatò hwa gbamù.’ 26Ndi e rzà hwɛnì lì hwɛ nanù nà inyɔ. O ìtììtènì ja anyu, è mɔ̀ ema a tìmbà a hwɛ ndi nàa e mɔ̀ ema a utu. È mòtimbèlì hvɛ à hwɛnì ndi lì hwɛ nàa mògbèèlì. 27O hwèlì tɛ hwatò hwàhwàkɛ̀, mɔ̀kɔ ema à lìyayi ò tehwèlì, nà ɔ̀nɛ̀yi ema à hwèlì lì mò gbèeyà, njɛnɛ à akayi ɔ̀nɛ̀yi e? Rzekɛ è mɔ̀ ema à lìyayi ò tehwèlì e? Ndi ìmba nà hwèlì anù nà inyɔ nàa mògbèèlì wà ànyu. 28Inyɔ è nò àjùlɛ̀nɛ̀yi metàkà me ami me àrzɛ. 29Nà òmà Tatɛ̀ wà amì a nò ŋgbelì è wònjà yà lìkànèyà, nanù ndi ìmba hvɛ na è ŋgbà. 30Ène e gbeyà è hwɛnì lì làa nà lì nyɔ nà ìmba èki yɔ̀kɔ ò lìkànèyà la amì. È ò lìya hvɛ ò mbòkò ja màkànèyà ò lì kàyìrzɛ̀ lìyòmɛ̀ la matumba nà mahwàkɛ ma wònyà Irzàyɛ̀lì.
Yerzù à ma òhwa irzɔ̀rzi ja ama Pètrò
(Mat 26.31-35; Mak 14.27-31; Yòw 13.36-38)
31“Rzìmɔ̀nì e, ìi Rzìmɔ̀nì e, òkànèyà tɛ! Mòkarzɛ̀ à lu wònjà ò lì e kèkirzɛ nà ò lì e kakòwa. À ikà e hwa gbamù nà è hwa wòhwe. Nà òmà mòtò a rzɛ̀ŋgbɛ ì mbàrzi ò lì ulɛ hweyarza. 32Ndi nà ma ò Kanɛ̀lɛ̀lɛ̀ nanù ema lìlòkɛ̀ lì aŋgɔ̀ lì rzà kpa. È hvònda ema ò nò tìmbeyà hvɛ, ò ètirzɛ hvɛ wònyanyàŋgò hwa aŋgɔ̀.” 33Pètrò à mà mò alàhwɛ̀ nanù ema, “Rzàŋgò nà wòŋgìrzɛ̀nɛ̀ ò lì òŋgama, tɔ̀ hwa ò ɛ̀ndɛnɛ ndi ò hwèwòwà, tɔ̀ hwa àrza ndi lì ò òŋwa.” 34Yerzù rzìi à mò òhweyà nanù ema, “Pètrò nà ò òhweyà ema è mòme wà wuhwà à è tòŋgà wònò wùù, ò nò rzɔ̀rzɔ̀ ŋgèlì iyàwò.”
È hvònda yà hwàtàkèlì è ò jà
35Yerzù à ma ijòwa hwà-òkòwèlì hwa eni nanù ema, “Nà òmà na mà è òme, ema è rzì lɛ̀mbɛ tɔ̀ ekpà ya wòlì, tɔ̀ lìkpà, tɔ̀ hwetambi, è mà tàkeya yòmà e?” Hwa mà mò alàhwɛ̀ nanù ema, “Tɔ̀ yòmà.” 36Yerzù rzii a hwa òhweyà nanù ema, “Ndi nàŋgɛ nanù è mɔ̀ ema à òhvi ekpa ya eni ya wòlì, tɔ̀ lìkpa la eni, a lì òhve ò nyò. È mɔ̀ ema à rza òhvɛ̀ rzɔ̀lɔ̀, a àhwìrzɛ̀ mòŋgòmbè mò eni, a ànde rzɔ̀lɔ̀. 37Nà è òhweyà nanù ema, è kaàtì yà Lohwà è òhwa nanù ema, ‘À mà wòwahwa ndi nàa ŋmìhwɛ̀.’ Nànù ndi e hwɛnì lì nò gbèyɛnɛ. Ndèŋgàna e hwɛnì lì òndìrzɛ̀hwɛ̀.” 38Hwà-òkòwèlì hwa eni hwa mà mò alàhwɛ̀ nanù ema, “Rzàŋgò ɔ̀ŋgɔ tɛ, jò òhvì rzɔ̀lɔ̀ ihwàkɛ anù nà irzɔ.” Yerzù à mà hwa timbirzɛlɛlɛ nanù ema, “È hwɛ̀mɛ̀ nanù.”
Yerzù à mà kanɛ̀ ò mòòlì mò Njàhwɛ̀
(Mat 26.36-46; Mak 14.32-42)
39Yerzù a mà ànjiye ò èŋge tùu nà hwà-òkòwèlì hwa eni, rzìi hwa ànjiya èŋge mbòwà, hwa àgba ò mòòlì mò Njàhwɛ̀, nàa ɛ̀ɛ̀mɛ̀ ya eni. 40Nà òmà hwa mà ùke aŋga, rzìi a hwa òhweyà nanù ema, “È kanɛ̀ e rzì jà lì hwɛ ema è unda ò màkèkìrzɛ̀nɛ̀.”
41À mà hwa akakòwɛ eyà ya ŋgùrzù jà màtàŋgà, rzìi à rzùma màwɔ̀ŋgɔ̀ŋgɔ̀ mà eni ò rze, rzìi à wòteyà lì kanɛ̀ nanù ema, 42“Ìi Tatɛ̀, ò lìŋgànì tɛ, ò nò ulɛ̀lɛ̀ mònò mòtàkà mò ŋginyà. Ndi rzèkɛtɛ ò hwèlìŋgànèlì hwe amì, ndi ò hwèlìŋgànèlì hwe aŋgɔ̀.” 43Nà òmà Yerzù à mà hwɛ lì kanɛ̀, è aŋgèlì è mà uhweyà ò ŋmanyu yà Lohwà ò lì mò embɛ̀. 44À mà kànɛ ije-ije, nà òmà à mà òhve, è ndùtù ò ŋmèma, etòkò ema è mà hwɛ lì mò wurzà, è mà tɔ̀ ndi nàa màtɔ̀ mà màyija ò mɔ̀nyɛ̀. 45Nà òmà à mà kulɛ lì kànɛ̀, à mà tɛ̀mɛ̀ rzìi à tìmba ò lì ùŋma hwà-òkòwèlì hwa eni. À mà hwa ùŋma ndi ò ìjɔ, èhwanja, è ndùtù è mà hwa rzɔkɔ ò mèèmà. 46À mà hwa ijòwa nanù ema, “Mamɛ ndeŋgàtɛ è lìmelì ndi ò ìjɔ e? È tɛ̀mɛ̀ ò ŋmanyu, e kanɛ̀, è rzì jà lì unda ò màkèkìrzɛ̀nɛ̀.”
Hwà mà ŋgbaŋgɛ Yerzù
(Mat 26.47-56; Mak 14.43-50; Yòw 18.3-11)
47Nà òmà Yerzù à mà hwɛ lì òhwà, ŋgìndì ndɛnɛ̀ è mà jà. È mòtò ema à mà hwa tìmba à mà hwɛ ndi Jùdàrzì, mɔ̀kɔ hwà lìyòmɛ̀ la hwà-òkòwèlì wà eni nà hwàhwàkɛ̀. Jùdàrzì à mà ɛ̀ndeya Yerzù, rzìi à mò arzàŋgànɛ̀lɛ̀. 48Yerzù rzii à mò ijòwa nanù ema, “Jùdàrzì, nɛ ò wà ò tànɛyi lì àhwirzɛ̀ è Ŋmanà wà è Mòtò wà Hwènàmà nà lì arzàŋgànɛ̀lɛ̀ e?” 49Nà òmà hwanɛ̀yi hwà-òkòwèlì ema hwa mà hwɛ nà Yerzù, hwa mà ɛ̀nɛ mamɛ è mà àrza lì gbèyɛnɛ, rzìi hwa mò ijòwa nanù ema, “Ìi Rzàŋgò ì tànɛyi jà àna na ì rzɔ̀lɔ̀ ja arzu e?” 50Mòòkòwèlì mɔ̀kɔ rzìi à rzenjòwa lìtò là mòmɛ̀ là ama è mògbèèlì wà è Pìlìrzì è kàrzàmi. 51Yerzù à mà hwa òhweyà nanù ema, “È hwɛ̀mɛ̀ nanù!” Rzìi à tɔ̀tɔ̀ lìŋgi lìtò là ama òŋgò mòtò, à mò wɔ̀wìrzɛ̀. 52Yerzù rzii à ijòwa iŋgi Ipìlìrzì ndɛnɛ̀ nà hwatimbèlì hwa merzenja hwa è Ndawò yà Lohwà, nà hwatimbèlì hwa mbòwà ema hwa mà jà lì mò ŋgbàŋgɛ̀ nanù ema, “Nà hwèlì ndi ŋmìhwɛ̀, ema è nò jàneyà ìrzɔ̀lɔ̀ nà metɔ̀nì ò lì nò ŋgbàŋgɛ̀ e? 53Mamɛ ndeŋgàtɛ è rzi nò ŋgbàŋgɛ̀ ò Ndawò yà Lohwà e? Ì mà hwɛ ò Ndawò yà Lohwà wùnyà tɛ, ndi è rzi nò lɛ̀mbɛ̀, ndi lìrzàkò là anyu lì mà uka naŋgɛ. Jììtìtì ndi ì kànèyà naŋgɛ.”
Pètrò à rzɔ̀rzi Yerzù
(Mat 26.57-58,69-75; Mak 14.53-54,66-72; Yòw 18.12-18,25-27)
54Rzìi hwa mà ŋgbaŋgɛ Yerzù. Hwa mà mò tìmba rzìi hwa mò ɛ̀ndɛnɛ ò ndawò yà ama è Pìlìrzì è kàrzàmi. Pètrò hvɛ à mà hwɛ lì hwa òŋgama ò mburzà, eyà yà ehvòwa màtaŋga. 55Hwa mà kòta mùùnya ò ìtììtènì jà èwòka, rzìi hwatò hwa mò à a tòŋgɛ, Pètrò mɔ̀ hvɛ à mà lìya aŋga. 56Mògbèèlì mɔ̀kɔ wà ŋmanà ŋgɔ̀ndɔ̀, à mà ɛ̀nɛ Pètrò à lìyayi ò tòŋgòŋgò yà mòŋgò mùnya. À mà mò ɔ̀ŋgɔ kòò, rzìi a mò òhwàna nanù ema, “Ònò mòtò mɔ̀ hvɛ à mà hwɛ nà Yerzù.” 57Pètrò à mà hvèyìŋgòwa, rzìi à òhwa nanù ema, “Ìi mòlanà, nà rza mò hwi à hwiyà.”
58Ò rza ayikòlɛ̀nɛ̀, rzìi òhvɛhvɛ mòtò à ɛnɛ Pètrò. À mò òhwàna nanù ema, “Ò wà hvɛ ò hwèlì ndi mɔ̀kɔ wà awu.” Pètrò rzìi à alàhwɛ̀ nanù ema, “Jàyɛ̀ ŋmàyi rzeketɛ ìmba.”
59Ò mburzà awà hvɔ̀kɔ, ò hvɛhvɛ mòtò à mà tìnɛlɛ nà ŋginyà, rzìi a òhwa nanù ema, “Nà rza tanɛ̀yi lì hwamɛ̀ nanù ema, ònò mòtò à rzi hwɛ nà Yerzù èhwanja mɔ̀ hvɛ à hwèlì ndi mòtò wà Galìlì.” 60Pètrò à mà alàhwɛ̀ nanù ema, “Ŋmàyi kòkò nà rza hwi à hwiya mamɛ ema ò òhwa nanù.”
Lìwòkìmɛnɛ rzìi è mòmɛ̀ wà wùhwà è tòŋgà. 61Ò lìŋgi lìrzàkò mɛnɛ Rzàŋgò rzìi à ayeŋgòwɛ̀ɛ, à ɔ̀ŋgɔ Pètrò. Pètrò rzìi à ɔ̀ŋgɛlɛ mamɛ Rzàŋgò à mà mò òhweyà nanù ema, “Ndèŋgàna è mòmɛ̀ wà wùhwà à è tòŋgà yàwònò ò nò rzɔ̀rzɔ̀ ŋgèlì iyàwò.” 62Pètrò à mà ànjiya èŋge èwòkà rzìi a wumɛnɛ lùwa la ije-ije.
Yerzù à mà kùwàhwà nà lì gbìyɛ̀wɛ̀
(Mat 26.67-68; Mak 14.65)
63È wɔ̀ ema hwà mà hwɛ lì mò ɔ̀ŋgeyà hwa mà mò kikòwa nà lì mò ànana. 64Hwa mà mò kaka mìirzɔ̀, rzìi hwa mò ijòwa nanù ema, “O jò òhweyà njɛnɛ à ò hvahvi e?” 65Hwa mà mò rzɔ̀rzɛlɛ ì nyayi ja hweyòlì ja àrzɛ.
Hwa jàni Yerzù ò wòrzò wò hwàmbaki hwa mbòwà
(Mat 26.59-66; Mak 14.55-64; Yòw 18.19-24)
66Nà òmà wùùnya wò mà yahwe, hwàmbaki hwa hwatò hwa Irzàyɛ̀lì, Ipìlìrzì ndɛnɛ̀, nà hwà-òkòlèlì wa mbenda hwa mà hwɛnɛ hwèlìyelì, rzìi hwa jànà Yerzù ò hwèkàyìrzèlì hwe ndɛnɛ̀. 67Rzìi hwa ijòwa Yerzù nanù ema, “O jò òhweyà tɛ, ò wa ndi ò hwèlì è Mɔ̀ ema à Ɔ̀kirzɛ̀hwɛ̀yi e?” Yerzù rzìi a hwa alàhwɛ̀ nanù ema, “Nà è òhwèlì tɛ è rza nò lòkɛ̀. 68Nà è ijòwi tɛ eyà è rza nò alàhwɛ̀. 69Ndi è hvònda è mà ukà, ema è Ŋmanà wà è mòtò wà Hwènàma, à lìya ò lìya là mòmɛ̀ là ama Lohwɛ̀ là Ŋginyà.” 70Rzìi hwa àrzɛ hwa mò ijòwa nanù ema, “Ò wà ndi ò hwèlì è Ŋmanà wà ama Lohwɛ̀ e?” À mà hwa alàhwɛ̀ nanù ema, “Inyɔ mɛnɛ e ma òhwa nanù ema nanù ndi na hwèlì.” 71Rzìi hwà mà òhwa hvɛ nanù ema, “Ima lìtìŋgà hvɛ ja àrza e? Irzɔ hwa àrzɛ ì hweyi nà òmà mɔ̀ ŋmìti a òhwì nà è wàna yà èni.”
Currently Selected:
Lukàrzɛ̀ 22: bri
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo