Intaliko 10
10
Ikwata lyawana kwe Nowa
(1 Imilandu 1:5-23)
1Waa a wizikulu wakwe Nowa, wane Shem nu Ham nu Jafeti wapafile pano intalala yaputuka.
2Waa a wanakwe Jafeti: Gomer, Magogi, Madayi, Javani, Tubali, Mesheki, Tirasi. 3Na waa awanakwe Gomer: Ashi Kenazi, Rifati, Togarima. 4Na waa a wanakwe Javani: Elisha, Tarashishi, Kitimu, Dodanimu. 5Mwakwe wanyewaa amuno imyiko yino yapalamila mu mbali yakwe wasumbi yafumilizile. Waa a wanakwe Yafeti ni nsi zyawo, ni mivwango yawo, ni viwanza vyawo, ni myiko yawo.
6Awanakwe Ham a waa: e Kushi, Ijeputi, Puti, Kenani. 7Na wanakwe Kushi we: Seba, Havila, Sabuta, Rama, Sabuteka. Awanakwe Rama we: Sheba nu Dedani. 8Kushi walinji we yisi wakwe Nimurodi; awili walinji a muntu wakutalika munsi ku kukazawana. 9Imfumu e Leza walesile awa we chiwinda mukazawane, wamupile uwuchiwinda wukazawane; achaleka chavwangwa chati, Ndivino Nimurodi wino Imfumu e Leza wamupile uwuchiwinda uwakazawane. 10Pakutalika walinji a Mfumu ku Babel, Ereki nu Akadi, munsi ya Shinara. 11Ala wafuma munsi yoyonye aya mu Asiria, azenga nu Ninive, Rehoboti-Iri, Kala; 12nu Reseni pakasi-kasi nu Ninive nu Kala; wuno a musumba wukulu. 13Ijeputi apapa awina Lud, wina Ana, wina Lehab, wina Nafutu, 14wina Patrus, wina Kasila kuno kwafumile awa Filisiti na wina Kaftor.
15Kenani apapa Sidoni umwanakwe ekatote, nu Heti, 16na wina Jebusi, wina Amori, wina Girigasi, 17wina Hivi, wina Ariki, wina Sini, 18wina Arivadi, wina Zemari na wina Hamati, Pansizi iviwanza vya wina Kenani avisalangana. 19Nu mupaka wa nsi ya Kenani afumilila mu Sidoni, wulunga nu Gerara, ukufika ku Gaza nu wulunga nu Sodomu, Gomora, Adima, nu Zeboimu, ukufika ku Lasha. 20Waa a wanakwe Ham, ni viwanza vyawo, ni mivwango yawo, ni nsi zyawo, ni myiko yawo.
21Nu Shem-nye wapafile awana, walinji a mukulu wakwe Jafeti, nu yisi wa wana wakwe Ebar. 22Awanakwe Shem we: Elamu, Ashuri, Aripakashadi, Ludi, nu Aramu. 23Awanakwe Aramu we: Uzi, Huli, Geta, nu Masha. 24Aripakashadi apapa Shela; nawe Shela apapa Ebar. 25Nu Ebar apapa awana wonsi wawili: wumwi walinji we Pelegi amuno mu manda-nye yayo insi yankinwe, ni zina lya muwuye walinji we Jokotani. 26Jokotani apapa Alimodadi, Shelefu, Hazaramaveti, Jera, 27Hadoramu, Uzala, Dikla, 28Obala, Abimaeli, Sheba, 29Ofiri, Havila, nu Jobabu; wonsi-nye waa walinji a wanakwe Jokotani. 30Nu mumpaka wa nsi yino wikalanga mwenemo watalisile ku Mesha wulunga nu Sefara wafisile lwa kapela kansi ya myamba. 31Na waa awanakwe Shem, ni viwanza vyawo, ni mivwango yawo, ni nsi zyawo, ni myiko yawo.
32Vyoo avili viwanza vya wanakwe Nowa, ukulingana na mapongo yawo, ni myiko yawo; nu kufumilila kwakwe wanyewaa imyiko yanyamile munsi pano intalala yasila.
Currently Selected:
Intaliko 10: WWN82
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Chinamwanga Bible © United Bible Societies, 1981.