MATIUS 4
4
Yesus auk mbalkige wene
(Mrk. 1:12-13; Luk. 4:1-13)
1 #
Ibr. 2:18, 4:15 Ar Roh Allah nen, Ar Yesus o ye dekma nde dekma telekma etoma, ar Iblis nen auk mbaluak nen yiluk wolok lagage o. 2Etoma bi lagagemo dogolir, o ki agik, o keyak bigik eka nggodek, inggi 40 hari erom ninggikdek mondok welagage. Eti pagama, Ar erom abu nonaik pakalok mondok birige. 3Ma ar Iblis waga lagagerek wene yoga dogolir, “Kar Allah Akbur ebebar a? Ebebar kalok, nggir yoma erom aruwak nen kane yorin nda, yiluk yorige.”
4 #
Ul. 8:3
Ar Yesus nen onggo yoga dogolir, “Alkitab paga nen yegerogon yir taga o: Akuni erom nunggwi paga mban iniluk dogi tagwi dek o, ogwe Ar Allah Ane yirige etoma paga iniluk dogu, ndak ar o.”
5Yorigemo, ar Iblis nen Ar Yesus o Yerusalem, o kota ake pulikmo, Tuhan Ai Palekma iringgen paga wolok dagarige. 6#Mzm. 91:11-12Bi dagaluk ar Iblis nen, men yorige, “Kar Allah Akbur ebebar a? Ebebar kalok, kogona yoma mbok wuran nda; nenaluk Alkitab paga yegerogon werek,
‘Allah nen, Ar mendek malaikat nen Kar nggar wukanem karuwam lakba warumo,
ir Kar karuwam iningi enari warugun paga, Kar kiyok nggir paga tenggelarigin dek o.’ ”
7 #
Ul. 6:16
Yorigemo, Ar Yesus nen wene onggo yega dogolir, “Alkitab akla diru mbalek werek ar o, ‘Kar kombae Ar Allah eti auk mbalurak mondok maga o yiluk yorige o.’ ”
8Etegerogon yorigemo, yabonggane ar Iblis nen, Ar Yesus kur nggok idu ambi paga wolok dagarigerek yoga dogolir, kerajaan agar paga yoma obogar inom, nen ye mendek nde mendek pakalok agar paga agarik yoma inom, kil wukan. 9Tuguluk ar Iblis nen Ar Yesus yoga dogolir, “Kar kendop yunggu togo an nuwagam watuk wogokbanigin kalok, Kar kil lakegen mendek etoma obogar, Kar wokirigin o,” yiluk yorige.
10 #
Ul. 6:13
Ar Yesus nen yoga dogolir, “Nugurinakwa yi, kebe lan a! Alkitab akla nen yegerogon yir taga o: Ar Allah eti kar mendek ar ma, Ar Tuhan eti mban kar nen wogokdega dogolir, eyabu erin o!”
11Etegerogon yorigi nanggige, Iblis enogo Yesus togok diluk arar lagagemo, ir malaikat nen, Ar Yesus yamaka wagugwa.
Ar Yesus yabu ibibir mondok o Galilea paga ndak ekige wene
(Mrk. 1:14-15; Luk. 4:14-15)
12 #
Mat. 14:3; Mrk. 6:17; Luk. 3:19-20 Ar Yohanes enogo kede warogo batagama etoma bega o, yiluk aruk kolalka lagagerek, Ar Yesus o Galilea etoma arar lagage. 13Ma, Ar o Nazaret dambe kalok, o Kapernaum i Danau Galilea, o kuri Zebulon o, Naftali o, etoma ari lalok welagage. #Yoh. 2:12 14Nenaluk, Ar Yesus eta ekige eti, Ar Nabi Yesaya nen yirige mende ndak-ndak yegerogon o:
15 #
Yes. 9:1-2
“O Zebulon agar paga inom, Naftali agar paga inom,
tuan danau nggwe lektagama, i Yordan aik alibagan nggwe,
Galilea agar paga etoma, ap tekmangge mendek inagar paga o!
16Akuni O kuri ambimo, o amum werekma,
akbinak pakalok mendek inil kugun o!
Ir ambetak, o amum maduk kambir tagama inake nen,
akbinak pakalok mendek enogo dagi waga o,” yiluk yirige ernaga ndak-ndak arar etagage o.
17 #
Mat. 3:2
Ar Yesus o eta paga, wene yoraga dogolir, “Ar Allah Raja ndak-ndak wene mbalka dogogin ma, kinomaduk bagalogo mbo biluk, kiniliti dik batalok dogoni o.”
Ar Yesus awurumi empat inayonggo birige wene
(Mrk. 1:16-20; Luk. 5:1-11)
18Ar Yesus i Galilea yenggelek aik paga nggwe etoma laga dogolir, ap ikan waganggwa inebe mbere il darige, eti ar Simon o (endaga ambi Petrus) nen awor Andreas o, imbirak ikan wogonakwi il darige. 19Il dalok Ar Yesus nen yoraga dogolir, “An kir akuni wogonaku dogu emerkirak nen, murnarek watni o,” yiluk yoragage. 20Yoragagemo, ir nen ebebar yoknirage o yiluk, o jala ikan wagani taga mendek eti mbo dambe kalok, Ar Yesus arar mutek lagugwa. 21Yoralok, Ar Yesus laga dogolir, ir akuni ninar inebe mbere ogarak imbirak, inendaga Yakobus o, Yohanes o, ap Zebedeus akburi il lakdarige. Ir inombae inom perahu akla dogolir, jala ikan wagani taga mendek enogo morokunem, Ar Yesus nen ir wai yorarige. 22Wai yorarigemo, perahu enogo inom, inombae Zebedeus enogo inom, etanogo ar togokdalok, ir Ar Yesus mutek arar lagugwa.
Ar Yesus nen wene yoraurak inom, u dek ekbaurak inom, emerirarige wene
(Luk. 6:17-19)
23 #
Mat. 9:35; Mrk. 1:39 Ar Yesus o negeri Galilea etoma wene emerirar nega dogolir, uma tamban erir tagama nggwe etoma wene emerirar nega lagage. Ar Yesus nen, Ar Allah nen yabongga apma binanurak Pano Wene eti yoraga, nen ir akuni u warek mendek inom, inoba u maduk kunik mendek inom, dek erogo bar nega lagage o. 24Etegerogon pano erinabir laga kalok, Ar Yesus abok, o Siria etoma mondok wigak yirigemo, ir akuni Ar oba pakalok wagu lagugwa. Ir akuni ye u, nde u, inoba kunik mendek inom, inoba anggin panggin mendek inom wogorek wagwi kalok dek erogo baga. Nen u kugi tekman mendek inoba kunik inom, watagik iniluk agik erir taga mendek inom, ininggi iniyok nggidik nggedok warek mendek inom, Ar Yesus nen pano erinaka lagage o. 25Etegerogon eka inil kugu lagugwarik, akuni pakalok Ar Yesus mutek lagu dogolir. Ir ambetak o Galilea nen, ir ambetak o Sepuluh Kota etoma nen, ambetak Yerusalem nen, ambetak o Yudea nen, ambetak i Yordan aik penaknggwe nen, inom obogar Ar Yesus oba wagu lagugwa.
Currently Selected:
MATIUS 4: WLW
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo