Yoosuwa 4
4
KASSIS XEET
1Inkih tan ummat Ordonuk tabte saaku, YALLI Yoosuwak iyyeemihii, 2«Taban kee nammay takke kedok kulli kedok num-num door. 3Hununuh too seeka soolak elle sugte Ordon weeqaytuk gudek taban kee namma xaa ugusa keenik inxic. Too xeet baahay, a bar elle tanfiddigoonu waytan ikkel haa keenik inxic» iyye.
4Sarrak Yoosuwa taban kee namma numuy doorehiyyah seeceeh 5annah keenik iyye. «YALLAY sin Dagelta kinnihiyyah Qahdih-Sanduguk naharat Ordon fan gexa. Kulli num siinik Israayil kedoh migaaqal inki-inki xaa sunkul heeh baahay, a bar elle xintan ikkel haa. 6A xeet ummatah YALLI abeemih kassis akkele. Sarra-yan-barah sin abuusi ‹Ah macah hayten xeetiiy?› 'yaanam siinik iyyoonu waan waqdi, 7‹YALLIH-Qahdi-addat-akak-yan-Sandug Ordon weeqaytuk tabsen saaku, weeqayti lee solteeh; tonna leemiik a xeet kulli way Israayil marah akkel tekkeemih kassiisih heen xeeti› keenik inxica» iyye.
8Too taban kee namma num, YALLI Yoosuwa akah amriseeh Yoosuwa kaadu ummat elle amrise innal, Ordon weeqaytih gudek taban kee namma xaa sunkul hayya heenih woo elle yanfidigoonu waan arac fan beenih tokkel heen. A taban kee namma xaa taban kee nammay takke Israayil kedoh loowol been. 9Yoosuwa kaadu taban kee namma xaa Ordon gudel Qahdi-Sandug tabbixe seeka elle solta ikkel soolise. Woo xeet uxih a saaku fan tokkel yan. 10YALLI Yoosuwah elle amrise innal, ummatta too taamak gaba kalla haytam fanah seeka wokkel elle soolak sugte. Tonnal Yoosuwa Muusa elle iyye'nnal abe.
Raqqa iyye mari weeqaytuk sissikuk tabe. 11Sarrak ummatta inkih weeqaytuk woo qaxa tabte waqdi, YALLIH-Qahdih-Sandug tabbixe seeka woo marak foocat gexxe. 12Muusa keenik elle iyye innal, Ruuben kedo kee Gaad kedoh yooboke mara kee Manassê-kedoh yooboke marak garabay qeebih bical gaceh sugehiyya gersi marak naharat gexen. 13Morootom alfi yakke mari YALLIH foocal Yerikô-magaalah garil tan booxa fanah qeebi abaana'gidih gexen. 14YALLI too saaku abem Israayil marih garil Yoosuwa kaxxa num abte. Oson Muusa assakaxxayuk elle suggu 'yen innal, Yoosuwa assakaxxayuk raaqen.
15-16YALLI Yoosuwak, «Woo seekay yi Qahdih Sandug tabbixehiyyak, ‹Ordon weeqaytuk eweqa› 'yaanam inxic» iyye. 17Yoosuwa toh keenih warse. 18Seeka Ordon weeqaytuk akah tabte innaak, weeqayti kaxxa weeqah weeqe.
19Ummatta Ordon weeqaytuk sanatak naharsi alsak tabanhaytoh ayrol tewqeeh; Gilgal deqsita aracay Yerikô-magaalak ayrô-mawqa le kabut raaqahiyyal yinfiddigen. 20Too aracal Yoosuwa taban kee namma xaay Ordonuk baaheenihiyya soolise. 21Sarrak Israayil marak iyyeemih, «Sarra yan barah sin abuusi, ‹A xeet akah hayteenim macaay?› iyye kaa tekkek, 22Israayil mari Ordon weeqaytuk adda kafin baaxol elle taben inna keenih warisa. 23YALLAY ni Dagelta kinnihiyya neh Qasa-bad akah kafise innah, siinih kaadu tabtaanam fan Ordon weeqaytu elle kafise inna keenih warisa. 24Tahak gexxaamah baaxô-bagul enna 'ya mari YALLIH qandek leh gide aaxigeloonuuh; isin kaadu YALLAY sin Dagelta kinnihiyyak daayiman meysitak xiinetton» keenik iyye.
Currently Selected:
Yoosuwa 4: NKM
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo