Luka 9
9
1Hakutambika ikumi nayedi hamu, hakuyinka Ŋovu niwanta wakufumisha ademoni ejima nikuuka nyisoŋu. 2Hakuyitemesha nakushimuna wanta waNzambi, nikuuka akata. 3Hakuyila nindi. Bayi musenda yuma yakuya nachu munjila yenuku; hela mbwechi, hela ipakumuna, hela yakudya, hela mali; hela kwikala nayikovwelu yiyedi. 4Itala dimwakeŋa ila mwakashakama mwomwenomu, diku nawa kumwakanyamukila. 5Antu akabula kuyitambula, chimwakanyamuka mumukalowu, mwakadikumuna lunkuŋu ludi kunyendu yenu, kulonda lwinzi lwakayikonkololi. 6Hiyakunyamuka, hiyakuya nakushimuna nsaŋu yayiwahi mwahita nyikala yejima, nikuuka hamu.
7Mwanta Herodi chanatiyiyi yuma yeliluwu yejima, hakusweja kujinoka; muloŋa amakwawu elili nawu Yowanu nasaŋuki mudi afu; 8amakwawu nawu Elija diyi namwekani dehi; acheŋi nawu kaprofwetu wakunyaka diyi nasaŋuki. 9Kuchinka Herodi nindi, Yowanu yowu naketwili dehi namutu, indi iwu nidi nakutiya nsaŋu ŋi hinyi? Hakukeŋa nindi amumoni.
10Apostolu chanafuntuwu, hiyakumuleja yuma yeliluwu. Hakuyitwala kumbadi kwisaŋa dakwakwihi namukala weneni wumu, ijina dawu Beteseda.
11Mazaza awantu chanachimonuwu hiyakumulonda; hakuyishikŋi chachiwahi, hakuhosha nawu yawanta waNzambi, akeŋeli kuyuka hakuyuka.
12Chelili itaŋwa hidikuya nakuteŋuluka, ikumi nayedi hiyakwinza nakumwila nawu, Mwaraku izaza dawantu, ayi namutunyikala nimwisaŋa didi kwakwihi, akamuku, kulonda akadipawili yakudya yawu, muloŋa munu tudi mwisaŋa. 13Yena hakuyila nindi, Yinkenu yakudya enu aweni. Wena hiyakumwila nawu, Tudi namankendi atanu ninshi jiyedi hohu, kwiji tuyi nakulandila izaza dejima yakudya. 14Muloŋa amayala ejima adiŋi kafwampi neyi makombakaji atanu. Yena hakuyila atumbanji twindi nindi, Yilejenu ashakami aha makumi atanu, aha makumi atanu. 15Ela nimwenomu, ayishakamisha niwejima wawu. 16Hakutambula owu mankendi atanu, ninoju inshi jiyedi, hakutala mwiwulu, hakukiswilahu nkisu, hakuyihumuna; hakwinka atumbanji ayinki izaza dawantu. 17Adiili, ekutili wejima wawu. Yibalu yasheluku, hiyakuyinona mabaŋu ikumi nayedi.
18Chadiŋi nakulombayi kwakanka windi, atumbanji adiŋi chimu nayena; hakuyihula nindi, Mazaza elaŋa nawu yaminyi? 19Wena hiyakwakula nawu, Amakwawu elaŋa nawu yeyi Yowanu Mpapatishu; amakwawu nawu yeyi Elija; acheŋi nawu kaprofwetu wakunyaka wumu diyi nasaŋuki. 20Yena hakuyila nindi, Indi enu aweni mwelaŋa nenu yaminyi? Petulu hakwakula nindi, Yeyi Kristu waNzambi. 21Yena hakuhosha nawu naŋovu, hakuyilekesha nindi, Bayi muleja muntuku; 22muloŋa Mwana kamuntu chiŋa yokaba yuma yayivulu, chiŋa akamuleka kudi awakulumpi, nikudi awakulumpi jawatupristu, nikudi ansoneki, akamujaha, akamusaŋula hetaŋwa damu chisatu.
23Hakuyila wejima wawu nindi, Muntu wukukeŋa kunlondami, adibondi yomweni, anyamunaŋa kulusu yindi hefuku hefuku, anlondaŋa. 24Muloŋa muntu wukukeŋa kuhemba wumi windi, diyi wakawujimbesha; hakwila wukujimbeshela wumi windi hamujimba wamami, diyi wakawuhemba. 25Muloŋa muntu, hela naheti matuŋa ejima adijimbesha yomweni, hela wukúumba wumi windi, wukudiilaku chumanyi? 26muloŋa muntu wukutiya nsonyi jamami nŋamazu ami, ni mwana kamuntu wakamutiya nsonyi hakenzayi nalubanji lwakulema kwindi yomweni, nikwaTata yindi nikwawaŋelu ajila. 27Tiyenu niyileji mwalala nami, awa amakwawu anemani kunu, hiyakusambilaŋahu dehi kumona kufwaku, chiŋa anamoni wanta waNzambi.
28Chelili munahiti dehi mafuku atanu nasatu nanochu hahosheliyi yumiyi, hakutwala aPetulu naYowanu niYakoba, hakukanduka nawu hampidi kulonda alombi. 29Hadiŋi nakulombayi, kumesu indi hikukubalumuka mwacheŋi hohu, mahinindi hiyakusweja kutooka, kutwesha kutalaku nehi. 30Kutala hakuhanjika nawamayala ayedi, diwu aMosi naElija; 31hiyakumwekana nalubanji lwakulema, hiyakutena kufwa kwindi kwakuYerusalema kwakukeŋa kufumayi nachu. 32Petulu nawakwawu adiŋiyi nawu kwakunoŋoka tulu hohu. Chanatonuwu chikupu, hiyakumona lubanji lwakulema kwindi, niwenowu amayala ayedi emeniyi nawu. 33Cheliluwu hiyakwambuka nindi, Petulu hakumwila Yesu nindi, Mwanta chachiwahi chitudi kunu; tutuŋi yisolu yisatu; chimu cheyeyi, chimu chaMosi, chikwawu chaElija; helukili ninimu mwahoshelaŋayuku. 34Iku wuchidi kuhosha mazu awa, ivu hidikwinza nakuyizeŋamina, atiya niwoma ochu chaneŋiluwu mwivu. 35Mwivu himukufuma izu nawu, Diyi Mwanami nakeŋa, mutiyililenu yena. 36Izu chidinamweni, hiyakumona kwaYesu hohu kanka windi. Amwena nizo; wena mafuku owu hiyalejeli muntu yuma yamwenuwuku.
37Chikunachi chaneluwu anakunkumuki dehi mwishina dampidi, izaza deneni hidikwinza nakumukinkilila. 38Mwizaza himukubidika muntu wumu nindi, Eyi Nkuluŋaŋa, nalembi mwani wutali mwanami, muloŋa himwanami wumu hohu; 39amukwataŋa kudi demoni, kukasumuka hakukaloka; hakumukonyesha, hakwidisha nimafulolu kukanwa, hakumuchika nankashi, kumufuma swayi nehi. 40Nayilembelela atumbanji tweyi nami amufumishi; akaŋanya. 41Yesu hakwakula nindi, Enu antu akuchisakichi, mwabula kukuhwelela, mwaheŋa, nyaka yinukwikala nanenu nakukabakana nanenu yiŋahi? Muleti mwaneyi kunu. 42Iku wuchidi kwinza, demoni amunata nihamaseki, hakumukonyesha nankashi. Yesu hakuhoshola demoni wazonda, yomúuka ninowu mwana, amufuntisha nikudi tata yindi. 43Antu ejima hiyakuhayama Ŋovu yawanta waNzambi yinamwekani.
Iku achidi kuhayama yuma yeliliyi yejima, hakuyila atumbanji twindi, 44nindi, Toŋojokenu chachiwahi mazu inukukeŋa kuyileja, nami, Mwana kamuntu akamuhana kumakasa awantu. 45Wena kwiluka izu odu nehi, ayijindilidu kulonda abuli kushinshika mudaya; hiyakutiya woma wakumwihuladu.
46Mukachi kawu himukuvulumuka ntadi yakwila nawu nabadiki akwawu hinyi? 47Yesu chanamoniyi mudi nakutoŋojokawu munyichima yawu, hakunona mwana wanyanya, hakumwimika kwakwihi nachikasa chindi; 48hakuyila nindi, Muntu wukutambula mwana wanyanyiwu mwijina dami nantambulami; wukuntambulami natambuli niyena wantemesheli; muntu nakehi mukachi kenwenu ejima, diyi muneni.
49Yowanu hakwakula nindi, Mwanta, twamona muntu wudi nakufumisha ademoni mwijina deyi; twamulekesha muloŋa hitwalondelaŋa chimuninduku. 50Yesu hakumwila nindi, Bayi mumulekeshaku; muloŋa wabula kuyihela diyi mwinenu.
51Chelili mafuku akumutambula mwiwulu hiyakukeŋa kushika, asha nimesu indi naŋovu munjila yakuya kuYerusalema. 52Hakutemesha ŋahu dehi atuŋanda kwakuyayi; hiyakuya, eŋila nimumukala wawaSamariya wumu, nawu amuloŋesheli. 53Wena kumutambula nehi, nanochu chamwenuwu mesu indi anatali kuYerusalema. 54Chanachimonuwu, atumbanji twindi aYakoba naYowanu hiyakumwila Mwanta nawu, Wunakeŋi tutambiki kesi kaholoki mwiwulu kayijilishi neyi cheliliyi Elija, tahindi? 55Yena hakushetumuka, hakuyihoshola nindi, Himweluka chekala spiritu yenuku. 56Mwana kamuntu henjili nakujilisha antuku, wenjili nakuyihandisha. Hiyakuya kumukala wukwawu.
57Hayilaŋawu munjila, muntu wumu hakumwila nindi, Nukukulondaŋa kwejima kuwukuya. 58Yesu hakumwila nindi, Anyumbu akweti menawu, niatujila ahaluzwizu akweti yisakala yawu; hakwila Mwana kamuntu hakweti hakusachila namutu winduku. 59Hakumwila muntu mukwawu nindi, Nlondaŋa; ilaŋa yena nindi, Mwanta, nleki nisambili kuya nakajiiki tata yami. 60Yesu hakumwila nindi, Yileki afu ajiiki afu jawu awenawu; eyi yaloŋa nakushimojola wanta waNzambi. 61Mukwawu niyena nawa hakumwila nindi, Mwanta, nukukulonda; nleki niyi nakashaliki akwetala dami. 62Yesu hakumwila nindi, Muntu wukwila nakwati dehi kwitemwa hakutala munyima, hanateli wanta waNzambi uku.
Currently Selected:
Luka 9: MW62
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The Bible in Lunda: Ndembu (Lunda of Kalunda) © B. F. B. S. 1962.