Ima̍aki 13
13
Lɛlā nīi ge̍ē ya̍ U̍nu̍ yī Ɔwɔ yī Ijɛru̍sālɛm ma̍
(Ima̍tiyu 24:1-2; Ilu̍uku 21:5-6)
1Iji̍sɔ̄ɔsi yɛ ē ngmɛ̍ɛchɛ ē hī u̍nu̍ yī Ɔwɔ ma̍, a̍chi̍kpo̍ yī nū ɔha̍ da ɔ̍ hīka, “Ɔngūlɛ̄lā be̍e! Ma̍ achɔ̄ ɔnɔ̄kɔ̄kū ɛla̍ā ba̍la u̍nu̍ wa̍a̍ nīi lɛbɛ̍bi̍ gɛ!”
2Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ ma̍ u̍nu̍ ɔnɔ̄kɔ̄kū nūma̍ nīi hɔ̄ ma̍ wa̍a̍ ma̍? Lɛchɔ̄ ūkpo̍he i̍ ge̍ē hōhī che la ichō yī ɔ̍nyīnū ni̍. E̍ ge̍ē de wa̍ gbo cha̍cha̍ we̍.”
Akanya ba̍la ichi̍ ɔdwɔ̄bi̍ nīi ge̍ē hɔ̄ ma̍
(Ima̍tiyu 24:3-14; Ilu̍uku 21:7-19)
3Yɛ̄grāa nīi Iji̍sɔ̄ɔsi hyāhɔ̄ abɔ̍ɔ la Yɛwu yī O̍līifu la wāā nīi pīyeyīta̍ u̍nu̍ yī Ɔwɔ ma̍, Ipi̍ta ba̍la Ije̍mēehi ba̍la Ijɔ̍ɔn ba̍la A̍ndru che ɔ̍ ikpo̍ yī lɛlā ɔha̍ fi̍yɛ̍. 4E̍ de ɔ̍ hīka, “Ka de alɔ gɛ, Ādā! Yɛ̄grāa nīi lɛlā nūma̍ wa̍a̍ ge̍ē ya̍ ma̍? Oji̍ chī ge̍ē chabɔ̄ yɛ̄grāa nīi lɛlā nūma̍ wa̍a̍ ge̍ē gbajɛ ma̍?”
5Iji̍sɔ̄ɔsi kū la ɔka de wa̍ bɛ̍ɛ̄nɛ̄ hīka, “Ala̍ ā gbō iyī ala̍ nīi ɔ̄chɔ̄chɛ ge̍ e̍e gla̍ ala̍ ni̍. 6Āchɛ yɛ̄mɛ̄mɛ̄ ge̍ē wā la riyī yī u ge̍ē ka hīka aɛ̍lɛ - amɔ̍lɔ nɛ, ē gla̍ āchɛ yɛ̄mɛ̄mɛ̄. 7Yɛ̄grāa nīi ala̍ ge̍ē po̍ ohu yī lɛwu̍ ɔyɛ kurɛkurɛ ba̍la wɔ̄kā yī lɛwu̍ ɔyɛ hwɛɛ ma̍, ala̍ e̍e hi̍yɛ̄ngura ni̍. Lɛlā nūma̍ ma̍ chī ge̍ē ya̍ i̍ngɔ̍ɔ. Ɔkwɛ̍ɛjī yī ɔjā wa̍a̍ i̍ chī gbajɛ we̍ ni̍. 8Ɔcha ɔha̍ ge̍ē kplɛ̍wu̍ tāa ɔcha ɔha̍. Āchɛ yī ɔchwɔ̄lɛ̍ ɔha̍ ge̍ē kplɛ̍wu̍ tāa āchɛ yī ɔchwɔ̄lɛ̍ ɔha̍. Ajɛ ge̍ē he̍ejē wɔhu̍-wɔhu̍ la ɛbɛ yɛ̄mɛ̄mɛ̄. Lɛmiyɛ ɔdwɔ̄bi̍ ge̍ē ya̍. Lɛlā nūma̍ wa̍a̍ lɛ bāa wɔma yī ɔyi̍ ɔlɔ̄lā ma̍ we̍.
9“Ala̍ ā gbō iyī ala̍! Wu̍chē oji̍ nɛ, āchɛ ge̍ē ku̍ ala̍, ē bī ala̍ ē ga ɛbɛ yī alihiyo. E̍ ge̍ē gwō ala̍ lijē la u̍nu̍ ogrēeyī yī wā. Ala̍ ge̍ē rɛ la iyɔ̄bū yī ɛgabɔ̄ ba̍la ɛchwɔ̄lɛ̍ yɛ̄mɛ̄mɛ̄ wu̍chē yī u. Ala̍ ge̍ē ka ochi̍chi̍ yī lɛlā yī u ē de wa̍. 10E̍ chī ge̍ē de Wɔ̄kā Ɔlwɔnyɛ yī Ɔwɔ ē ka ē de āchɛ wa̍a̍ o̍bū. 11E̍ ge̍ē ku̍ ala̍ ē bī ala̍ gāa lɛpɔ̄ ma̍, ala̍ e̍e hi̍yɛ̄ngura yī ɔjā nīi ala̍ ge̍ē ka ma̍ yɔbɔ̄ɔbū ni̍. Ala̍ ā ka ɛlāha̍-ɛlāha̍ nīi wā la ūkpɔ̄tū yī ala̍ yɛ̄grāa ɔla̍ā pi̍i̍ ma̍. Wu̍chē oji̍ nɛ, i̍ ala̍ ge̍ē kɛlā ɔla̍ā a̍ni̍; Uhu Ɔnɛ̄ɛhɛhi yī Ɔwɔ nīi lɛlā ɔla̍ā wa̍a̍ ge̍ē bū la abɔ̄ yī nū a̍nɛ. 12Āchɛ ɛha̍ ge̍ē ku̍ aɛ̍nɛ̍ yī wā gāa nīi e̍ ē de ē ngmo̍. A̍dā yī āchɛ ɛha̍ ge̍ē ya̍ ayi̍ yī wā i̍ngi̍ngɔ̍ɔ. Ayi̍ ɛha̍ chī ge̍ē ya̍ ɔtū ngurangura ē tāa a̍dā yī wā ba̍la ɛ̍nɛ̍ yī wā, ya̍ nīi e̍ ē de wa̍ ē ngmo̍. 13Ala̍ ge̍ē de ē ta̍ āchɛ anyī wu̍chē yī riyī yī u. Ɔ̄chɛ nīi ge̍ chī tū ūkpɔ̄tū i̍ngɔ̍ɔ kpɛɛ gbo̍ yɛ̄grāa ɔkwɛ̍ɛjī, ɔlɔjā ge̍ē lɛ ɔhɛ̍ta̍.
Lɛbi̍ okwi̍bi̍īyē grigri
(Ima̍tiyu 24:15-28; Ilu̍uku 21:20-24)
14“Ala̍ ge̍ē ma̍ ‘Lɛbi̍ Okwi̍bi̍īyē Grigri’ ē rɛ abɔ̍ɔ la ɛbɛ nīi i̍ ngma̍ nīi o̍ ge̍ rɛ ni̍ ma̍.” Ɔ̄chɛ nīi yɛ ē ma̍ īpū nūma̍ ma̍ ge̍ po̍ ji bɛ̍ɛ̄nɛ̄. “Yɛ̄grāa ɔla̍ā, āchɛ nīi hɔ̄ la Ijudi̍ya ma̍ ge̍ gwɛ̍ɛnya ga yɛwu. 15Ɔ̄chɛ nīi hɔ̄ abɔ̍ɔ la ɔda ma̍ ge̍ e̍e chɛ̄ ga u̍nu̍ ge̍ nāa ɔjɔ̄jā ni̍. 16Ɔ̄chɛ nīi hɔ̄ la yɛrɔ̄ ma̍ ge̍ e̍e ku̍chē ga wɔlɛ̍ ge̍ nāa ɔjā otūlibi̍īyē yī nū ni̍. 17Ɔ̄chī ɛla̍ā ge̍ē dwɔ̄bi̍ de anyā ɛyɛlipu̍ ba̍la ɛbī ayi̍ la abɔ̄ kpa̍a! 18Ala̍ ā jɔhā de Ɔwɔ hɛ̄ɛbɛ nīi lɛlā nūma̍ ge̍ e̍e ya̍ yɛ̄grāa yī ohū ni̍. 19Wu̍chē oji̍ nɛ, ichi̍ ɔdwɔ̄bi̍ ɔdwɔnyɛ ge̍ē hɔ̄ la ɔ̄chī ɛla̍ā gba̍a̍. Ita yī ichi̍ ɔla̍ā i̍ hɔ̄ la abɔ̄ nīi Ɔwɔ ya̍ yɛchɛ ma̍ je̍ ni̍. O̍ i̍ chī ge̍ē hɔ̄ i̍ngɔ̍ɔ ge̍ē gbo̍ gɛ ni̍. 20Ādā ɔlɔjā i̍ ge̍ kɔ̄ ɔ̄chī ɔ̍lɔma̍ hwō ni̍ nɛ, ɔ̄chɔ̄chɛ ūkpo̍he i̍ ge̍ē lɛ ɔhɛ̍ta̍ ni̍. O̍ wu̍chē yī āchɛ yī nū nīi o̍ hōhu ma̍, o̍ kɔ̄ ɔ̄chī ɔ̍lɔma̍ hwō.
21“Yɛ̄grāa ɔla̍ā, ɔ̄chɛ ɔha̍ ge̍ ka de ala̍ hīka, ‘Ala̍ ā ma̍ Ɔhɔ̍ɔnyɛta̍ Nīi Ɔwɔ Hōhu Ma̍ nīi yɛ ma̍’ kɛ̄ɛ, ‘Mɔ̍ɔkɔ nīi o̍ yɛ aa̍nū’, ala̍ e̍e chɛ̄ku ɔlɔjā ni̍. 22Āchɛ ɛha̍ ge̍ē wā ge̍ē warīmɛ̄ ka aɛ̍lɛ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ a̍nɛ, aɛ̍lɛ - āchɛ ɔkɛrɔ̄ yī Ɔwɔ nɛ. E̍ ge̍ē yɛ̍ɛ̄lā ɔnɔ̄kɔ̄kū chabɔ̄ ba̍la i̍mamachi̍ yɛ̄mɛ̄mɛ̄, hɛ̄ɛbɛ ge̍ē gla̍ āchɛ. O̍ ge̍ yɛ ge̍ē ngmɛ̍rɛ̍ mɛ, e̍ ge̍ē gla̍ āchɛ nīi Ɔwɔ hōhu ma̍ titi. 23Ala̍ ā deyīrɛ kōkū grigri bɛ̍ɛ̄nɛ̄, ma̍a n de lɛlā wa̍a̍ ka de ala̍ ti̍hi̍yajɛ mɛ̍!
Ɔwɔ̄wā yī Ɔyi̍ yī Ɔngrɔ̄ɔ
(Ima̍tiyu 24:29-31; Ilu̍uku 21:25-28)
24“La ɔ̄chī ɔla̍ā, la okwi̍ihi yī akanya ɔdwɔ̄bi̍ ɛla̍ā, yɛnɔ ge̍ē de ē dobū; ɔwīyā i̍ ge̍ē fi̍yajɛ ē gɛ ni̍; 25i̍nyi̍nyɔ̍ɔwīyā ge̍ē ha̍ābɔ̄ kpɔ̍tɔ̍kpɔ̍tɔ̍ bū la ichō; wɔhu̍ yī akpɔ̍ɔwɔ wa̍a̍ ge̍ē he̍ejē mɔri̍mɔri̍. 26Bɛ̍ɛ̄nɛ̄ ma̍, Ɔyi̍ yī Ɔngrɔ̄ɔ ge̍ē bīyɛchɛ. Āchɛ ge̍ē ma̍ ɔ̄ bū la akpɔ̍ɔwɔ yɛ ē wā, la wɔhu̍ ɔnɔ̄kɔ̄kū ba̍la rīgā ɔnɔ̄kɔ̄kū yī nū. 27Bɛ̍ɛ̄nɛ̄ ma̍, o̍ ge̍ē de ayɛ̍ɛ̄chɛ̄rɔ̄ yī nū tɛ̄rɔ̄ gāa oe̍ ɔha̍lɔha̍ yī yɛchɛ wa̍a̍ gāa ge̍ tu̍ āchɛ nīi Ɔwɔ hōhu ma̍ grēeyī bū la oe̍ ɔha̍ yɛchɛ ge̍ē chɛ̄ la oe̍ ɔha̍lɔha̍ wa̍a̍.
Ngū lɛlā bū la lɛlā nīi ejū ya̍ ma̍
(Ima̍tiyu 24:32-35; Ilu̍uku 21:29-33)
28“Ala̍ ā ngū lɛlā bū la lɛlā nīi ejū ɔha̍ ē ya̍ ma̍ gɛ: O̍ ge̍ yɛ ē rū īpū chiya a̍bɔ̄ onīpīpɛ̄ mɛ̍, ala̍ ā jo̍ōkū bɛ̍ɛ̄nɛ̄ hīka ɔgwā gbo mɛ̍. 29I̍ngi̍ngɔ̍ɔ nīi lɛlā nūma̍ lɛ a̍nɛ. Ala̍ ge̍ ma̍ nīi lɛlā nūma̍ wa̍a̍ yɛ ē ya̍ mɛ̍, ala̍ ā jo̍ōkū ji hīka, yɛ̄grāa ɔ̍lɔma̍ yɛ kurɛkurɛ mɛ̍. O̍ gbajɛ wā la oko̍prīinu mɛ̍. 30Lēchi̍-lēchi̍, n ā koko̍o de ala̍! Āchɛ nīi hɔ̄leyī u̍ma̍ama ma̍ i̍ ge̍ pīyēku̍ wa̍a̍ o̍bū nīi lɛlā nūma̍ wa̍a̍ ē ya̍ ni̍. 31Akpɔ̍ɔwɔ ba̍la ajɛ ma̍ ge̍ē chāajɛ; lɛlā yī oko̍o yī u i̍ ge̍ē chāajɛ ge̍ē gbo̍ mɛ ni̍.
Ɔ̄chɔ̄chɛ i̍ je̍ ɔ̄chī ɔ̍lɔma̍ ni̍
(Ima̍tiyu 24:36-44)
32“Ɔ̄chɔ̄chɛ i̍ je̍ ɔ̄chī ɔla̍ā kɛ̄ɛ yɛ̄grāa ɔla̍ā pi̍i̍ ni̍. Ayɛ̍ɛ̄chɛ̄rɔ̄ yī Ɔwɔ nīi gblāa la ichō ma̍ i̍ jo̍ōkū ni̍. Ɔyi̍ yī Ɔwɔ i̍ jo̍ōkū ni̍. Ɔwɔ A̍dā lōri̍īnū jo̍ōkū a̍nɛ. 33Ala̍ ā de eyī kōkū! Ala̍ ā deyīrɛ grigri! Ma̍a ala̍ i̍ je̍ yɛ̄grāa ɔ̍lɔma̍ ni̍. 34O̍ lɛ bāa lɛlā yī ɔngrɔ̄ɔ ɔha̍ nīi pīya yɛ gāa ɛyɛ ma. O̍ yɛ ē pīya ma̍, o̍ de wɔlɛ̍ tū a̍chɛ̍ yī nū la abɔ̄, de u̍ku̍rɔ̍ yī ɔnyɔnyɛ-ɔnyɔnyɛ de wa̍. O̍ ka de ɔgbwɔ̄lɛ̍ ka ɔ̍lɔ ge̍ deyīrɛ grigri! 35O̍ lɛ i̍ngɔ̍ɔ ma̍, ala̍ ā deyīrɛ grigri gɛ, ma̍a ala̍ i̍ je̍ yɛ̄grāa nīi a̍dāwɔ̄lɛ̍ ge̍ē cha ma̍ ni̍! Ɔha̍ni̍ ɔ̄nɔ̄nɛ̄ nɛ oo, kɛ̄ɛ iyārōtu̍ nɛ oo, kɛ̄ɛ obūrɔ̍ɔ̄chī nɛ oo, kɛ̄ɛ ɔ̄chɔ̄chī nɛ oo! 36Nɛ̄ni̍, o̍ ge̍ē ku̍ ē ta̍ bū gbɛgbɛlɛ ē wā ge̍ē ma̍ ala̍ ē gbwɔlā abɔ̍ɔ. 37Lɛlā nīi n yɛ ma̍ ē ka ē de ala̍ ma̍, n ka de āchɛ wa̍a̍: Ala̍ ā deyīrɛ grigri!”
Currently Selected:
Ima̍aki 13: YBASR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2020 Bible Society of Nigeria (second edition)