Ima̍aki 11
11
Iji̍sɔ̄ɔsi chɛ̄ ga ipwo̍gra yī Ijɛru̍sālɛm bāa ɔchwɔ̄lɛ̍ ma̍
(Ima̍tiyu 21:1-11; Ilu̍uku 19:28-40; Ijɔ̍ɔn 12:12-19)
1E̍ wā ge̍ tu̍ bla̍a Ijɛru̍sālɛm bɛ̍ɛ̄nɛ̄, abɔ̍ɔ la Ibɛ̍fāaji ba̍la Ibɛ̍tāni la ɛbɛ nīi re̍ka Yɛwu yī O̍līifu ma̍ bɛ̍ɛ̄nɛ̄. Iji̍sɔ̄ɔsi de a̍chi̍kpo̍ yī nū āchɛ ɛpa tɛ̄rɔ̄ bū abɔ̍ɔ ga iyɔ̄bū. 2O̍ ka de wa̍ hīka, “Ala̍ ā pīya gāa ga wɔlɛ̍ɛchɛ ɔha̍ nīi hɔ̄ aa̍ la iyɔ̄bū ma̍. Ala̍ ge̍ē gbajɛ ē gāa ɔpɔ̄ɔpɛ̄ ma̍, ala̍ ge̍ē ma̍ ɔ̍drɔ̄ yī ɛbɛ̍ obīho̍ ɔha̍ nīi hla̍tū abɔ̍ɔ. Ɔ̄chɔ̄chɛ i̍ che la anu̍ je̍ ni̍. Ala̍ ā wī orī hī ɔ̄ nīi ala̍ ge̍ bī wā. 3Ɔ̄chɛ ɔha̍ ge̍ che ala̍ ikpo̍ hīka, Oji̍ - ohu̍ nīi ala̍ ɔ̍lɔ yɛ ē wī orī hī ɔ̍lɔ ma̍? Ala̍ ka de ɔlɔjā hīka, ‘Ādā chikpo̍ yī nū a̍nɛ. O̍ ge̍ē de ē tɛ̄rɔ̄ wā ɔpɔ̄ɔpɛ̄.’ ”
4A̍chi̍kpo̍ yī nū ɛla̍ā wā ge̍ pīya gānyɔ̄. E̍ ma̍ ɛbɛ̍ obīho̍ ɔ̍lɔma̍ abɔ̍ɔ yɛchɛ; orī tū ɔ̄ hla̍tū abɔ̍ɔ la ɔpu yī oko̍no̍grīgba yī wɔlɛ̍ ɔha̍. E̍ de orī wī hī ɔ̄. 5Āchɛ ɛha̍ nīi gblāa abɔ̍ɔ ma̍ ka ɛ̍lɛ wī orī hī ɛbɛ̍ ɔla̍ā ge̍ē ya̍ oji̍?
6E̍ de koko̍o de wa̍ lɔkɔ nīi Iji̍sɔ̄ɔsi ka ma̍. Bū la ɛbɛ ɔla̍ā, e̍ pi̍ye̍mā hī wā nīi e̍ bī pīya bɛ̍ɛ̄nɛ̄. 7E̍ bī ɔ̍drɔ̄ ɛbɛ̍ obīho̍ ɔla̍ā ge̍ de Iji̍sɔ̄ɔsi. Āchɛ de ɔ̄pa̍ yī wā ta̍kla̍ ɛbɛ̍ ɔla̍ā de Iji̍sɔ̄ɔsi. O̍ pīya hyāhɔ̄ la ichō yī nū. 8Āchɛ yɛ̄mɛ̄mɛ̄ de ɔ̄pa̍ yī wā ta̍ pɛ̍pɛ̍ la ɔpɔ̄pū. Āchɛ ɛha̍ hɛ̍ īpū bū la a̍chi̍ ge̍ ta̍ pɛ̍pɛ̍ la ɔpɔ̄pū.
9Āchɛ nīi yɛ la iyɔ̄bū ma̍, ba̍la āchɛ nīi yɛ la okwi̍ihi yī nū ma̍ chūukwa bɛ̍ɛ̄nɛ̄ hīka, “U̍chuwi̍i! Ɔpiyɛ ge̍ - iyī ɔ̄chɛ nīi yɛ ma̍ yewā riyī yī Ādādā ma̍ oo! 10Ɔpiyɛ ge̍ - iyī ɔchwɔ̄lɛ̍ nīi yɛ ma̍ yewā ma̍! Ɔchwɔ̄lɛ̍ Oro̍ōre̍ yī a̍dā yī alɔ Ide̍bīidi nɛ! O̍gbo̍ ge̍ - iyī Ɔwɔ abɔ̍ɔ la ichō oo!”
11Iji̍sɔ̄ɔsi chɛ̄ ga ipwɔ̍ɔ̄lɛ̍ yī Ijɛru̍sālɛm bɛ̍ɛ̄nɛ̄, ga ga u̍nu̍ yī Ɔwɔ ɔpɔ̄ɔpɛ̄ ge̍ jiyeyī kaka ma̍ ɔjāha̍-ɔjāha̍ wa̍a̍. Yɛ̄grāa de hɛ̍ga mɛ̍ ma̍, o̍ pīya ga Ibɛ̍tāni ba̍la a̍chi̍kpo̍ yī nū āchɛ igwo̍lɛpa.
Iji̍sɔ̄ɔsi gbo ejū ɔha̍ yɛka
(Ima̍tiyu 21:18-19)
12La ɔ̄chī ɔ̍mɛpa nīi e̍ cha bū la Ibɛ̍tāni yɛ ē wā ma̍, lɛmiyɛ ya̍ Iji̍sɔ̄ɔsi. 13O̍ ma̍ ejū ɔha̍ nīi īpū yī nū dobū tutu rɛ abɔ̍ɔ hwɛɛ ma̍, o̍ nyā gāa ge̍ē ma̍; ɔha̍ni̍ ejū ɔha̍ ɔ̍lɔ ka̍a ē ku abɔ̍ɔ oo. O̍ gbajɛ gāa ma̍, o̍ i̍ ma̍ ɔjɔ̄jā ni̍; īpīpū ke̍e̍ nɛ. Wu̍chē oji̍ nɛ, i̍ yɛ̄grāa yī ejū ni̍. 14Iji̍sɔ̄ɔsi da ejū ɔla̍ā bɛ̍ɛ̄nɛ̄ hīka, “Awɔ ejū nūma̍! Ɔ̄chɔ̄chɛ i̍ ge̍ē de oko̍o tū īkpō yī wɔ ge̍ē gbo̍ ē gɛ ni̍.”
A̍chi̍kpo̍ yī nū plɛ̍ɛ̄lā ɔla̍ā nīi o̍ ka ma̍.
Iji̍sɔ̄ɔsi chɛ̄ ga U̍nu̍ yī Ɔwɔ
(Ima̍tiyu 21:12-17; Ilu̍uku 19:45-48; Ijɔ̍ɔn 2:13-22)
15E̍ wā ge̍ gbajɛ ga Ijɛru̍sālɛm bɛ̍ɛ̄nɛ̄ ma̍, Iji̍sɔ̄ɔsi pīya ga u̍nu̍ yī Ɔwɔ. O̍ kpo̍ āchɛ nīi ē ri̍īhī abɔ̍ɔ la u̍nu̍ yī Ɔwɔ ma̍ nū cha̍cha̍. O̍ kpo̍ okpōkōlō yī āchɛ nīi ē hīya okpo abɔ̍ɔ ma̍ chīyenū ba̍la igblɛ̍chi̍ yī āchɛ nīi ē bī odugbɔnyɛ ē ra̍ ma̍. 16O̍ i̍ chɛ̄ nīi ɔ̄chɔ̄chɛ bī ɔjɔ̄jā ga la iyɛ̍ɛchɛ yī u̍nu̍ yī Ɔwɔ ni̍ 17O̍ ngū āchɛ lɛlā bɛ̍ɛ̄nɛ̄, koko̍o de wa̍ hīka, “Je̍ka e̍ ta̍ tū la Īpū yī Ɔwɔ hīka, ‘U̍nu̍ yī u - ɛbɛ ɔjɔhā yī ɛchamɛcha wa̍a̍ nɛ?’ Ala̍ chōo̍chē ge̍ē de ɔ̍ ē pīya ɛbɛ ɔtrɛ̍ba yī ebu̍ūwī?”
18Alɛhu̍ aligbe ba̍la āchɛ ongū Lihɔ yī Iju̍u plɛ̍ɛ̄lā nūma̍ ma̍, e̍ gāla̍ ɔpɔ̄pū ode Iji̍sɔ̄ɔsi ngmo̍. O̍ chī de ya̍ wā uhuhwi, wu̍chē yī yɛ̄mɛ̄ yī āchɛ ɛla̍ā nīi hɛ̍ɛgbɛgba gblāa abɔ̍ɔ ē plɛ̍ɛ̄lā nīi Iji̍sɔ̄ɔsi ē ngū wā ma̍.
19Ɔ̄nɛ̄ de gbo ma̍, anu̍ ba̍la a̍chi̍kpo̍ yī nū pīya hī ipwɔ̍ɔ̄lɛ̍ yī Ijɛru̍sālɛm.
Lɛlā ongōngū bū la ejū nīi Iji̍sɔ̄ɔsi gbo ɔ̍ yɛka ma̍
(Ima̍tiyu 21:20-22)
20Ɔ̄chī ɔ̍mɛpa la ɔ̄chɔ̄chī nīi e̍ yɛ ē ga ma̍, e̍ ma̍ ejū ɔla̍ā nīi Iji̍sɔ̄ɔsi gbo ɔ̍ yɛka ma̍. O̍ pīyaku̍ wa̍a̍ pɛtɛɛ ge̍ chɛ̄ la ɛgba. 21Ipi̍ta bla lɛlā yī ejū ɔla̍ā a̍nɛ. O̍ ka de Iji̍sɔ̄ɔsi bɛ̍ɛ̄nɛ̄ hīka, “Ɔngūlɛ̄lā, ma̍ gɛ! Ɔchi̍ ɔla̍ā nīi a gbo ɔ̍ yɛka ma̍ pīyaku̍ mɛ̍ ko̍ō!”
22Iji̍sɔ̄ɔsi koko̍o de wa̍ du̍mɔ̍ hīka, “Ala̍ ā de ɔtū che Ɔwɔ brii gɛ! 23Lēchi̍-lēchi̍, n ā koko̍o de ala̍! Ɔ̄chɛ nīi ge̍ jo̍ōkū hīka ɔjā nīi anɔ̍lɔ ka ma̍ ɔ̍lɔ ge̍ē ya̍ i̍ngɔ̍ɔ, nīi ɔlɔjā i̍ ge̍ ta̍ahu̍ la ūkpɔ̄tū ni̍, o̍ ge̍ koko̍o de yɛwu nūma̍ hīka, ‘Nāa iyī wɔ ge̍ ta̍tū li̍hu’, o̍ ge̍ē ya̍ i̍ngɔ̍ɔ ke̍e̍ ɔpɔ̄ɔpɛ̄. 24Wu̍chē yī ɔla̍ā nīi n koko̍o de ala̍ a̍nɛ! Ɔjāha̍-ɔjāha̍ nīi ala̍ ge̍ē che Ɔwɔ ikpo̍ la ɔhā ma̍, ala̍ ā de ɔtū che brii hīka ala̍ ge̍ē nāa. Bū la ɛbɛ ɔla̍ā, Ɔwɔ ge̍ē de ɔjā ɔ̍lɔma̍ ē de ala̍. 25Yɛ̄grāa ɔha̍lɔha̍ nīi ala̍ ge̍ rɛ yɛ ē jɔhā de Ɔwɔ, ala̍ ā de lɛlā abi̍ nīi āchɛ ya̍ ku̍ ala̍ ma̍ kɔ̄ de wa̍ o̍bū, hɛ̄ɛbɛ nīi Ɔwɔ nīi - A̍dā yī ala̍ hɔ̄ la ichō ma̍ ge̍ de lɛlā ɔdwɔ̄bi̍ yī ala̍ kɔ̄ de ala̍ i̍ngi̍ngɔ̍ɔ. 26[Ala̍ i̍ ge̍ de lɛlā abi̍ nīi āchɛ ya̍ ku̍ ala̍ ma̍ kɔ̄ de wa̍ ni̍, i̍ngi̍ngɔ̍ɔ nīi Ɔwɔ nīi - A̍dā yī ala̍ hɔ̄ la ichō ma̍ i̍ ge̍ē de iyī ala̍ ē kɔ̄ de ala̍ ni̍ a̍nɛ.]”
Ikpo̍ yī lɛlā yī wɔhu̍ yī Iji̍sɔ̄ɔsi
(Ima̍tiyu 21:23-27; Ilu̍uku 20:1-8)
27E̍ cha gbajɛ wā la Ijɛru̍sālɛm bɛ̍ɛ̄nɛ̄, Iji̍sɔ̄ɔsi yɛ ē ga la u̍nu̍ yī Ɔwɔ ma̍, alɛhu̍ aligbe ba̍la āchɛ ongū lihɔ yī Iju̍u ba̍la ɛgabɔ̄ wā dikpo̍ba̍ ɔ̄. 28E̍ che ɔ̍ ikpo̍ hīka, “Wɔhu̍ yī ɔ̄nyɛ nīi a bī ma̍ ē yɛ̍ɛ̄lā nūma̍ ma̍/? Ɔ̄nyɛ u̍tu de wɔhu̍ ɔ̍lɔma̍ de wɔ ka aɔ̍lɔ ge̍ ya̍ i̍ngɔ̍ɔ ma̍?”
29Iji̍sɔ̄ɔsi hīya aa̍ ɔkɔ hīka, “Ami titi ge̍ē che ala̍ ikpo̍ yī lɛlā ūkpo̍he. Ala̍ ge̍ hīya ami ɔkɔ mɛ̍, ami titi ge̍ē kɛlā yī wɔhu̍ nīi n bī ma̍ ē yɛ̍ɛ̄lā nūma̍ ma̍ de ala̍: 30Wɔhu̍ nīi Ijɔ̍ɔn bī hu āchɛ yenyi ma̍ bū aba̍? O̍ bū la abɔ̄ yī Ɔwɔ, kɛ̄ɛ o̍ bū la abɔ̄ yī āchɛ̄ɛchɛ? Ala̍ hīya ami ɔkɔ!”
31Āchɛ ɛla̍ā gblāa abɔ̍ɔ ē miya ba̍la iyī wā bɛ̍ɛ̄nɛ̄ hīka, “Alɔ ge̍ ka hīka, ‘O̍ bū la abɔ̄ yī Ɔwɔ’, o̍ chī ge̍ē ka hīka, ‘aa̍ nīi aɛ̍lɛ i̍ chɛ̄ku Ijɔ̍ɔn ni̍ a̍nɛ?’ 32Alɔ ge̍ chī ka hīka, ‘O̍ bū la abɔ̄ yī āchɛ̄ɛchɛ bɛ̍ɛ?’ ” E̍ yɛ ē tūuhwi yī āchɛ wa̍a̍. Wu̍chē oji̍ nɛ, āchɛ wa̍a̍ jo̍ōkū hīka Ijɔ̍ɔn ɔ̍lɔ - ɔ̄chɛ ɔkɛrɔ̄ yī Ɔwɔ lēchi̍ lēchi̍ nɛ. 33Wu̍chē yī ɔla̍ā, e̍ hīya Iji̍sɔ̄ɔsi ɔkɔ hīka, aɛ̍lɛ i̍ jo̍ōkū ni̍.
Iji̍sɔ̄ɔsi titi koko̍o de wa̍ bɛ̍ɛ̄nɛ̄ hīka, “I̍ngi̍ngɔ̍ɔ nīi ami titi i̍ ge̍ē kɛlā yī wɔhu̍ nīi n ē bī yɛ̍ɛ̄lā nūma̍ ma̍ ē de ala̍ ni̍ a̍nɛ.”
Currently Selected:
Ima̍aki 11: YBASR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2020 Bible Society of Nigeria (second edition)