Ima̍aki 1
1
Ɛrɔ̄ yī Ijɔ̍ɔn Ohuyenyi
(Ima̍tiyu 3:1-12; Ilu̍uku 3:1-18; Ijɔ̍ɔn 1:19-28)
1Owu̍tu yī Wɔ̄kā Ɔlwɔnyɛ yī Iji̍sɔ̄ɔsi Ikra̍yisi, Ɔyi̍ yī Ɔwɔ hɔ̄ ma̍ a̍nɛ. 2O̍ lɛ lɔkɔ nīi Ayisa̍ya ɔ̄chɛ ɔkɛrɔ̄ yī Ɔwɔ mwɔ̍ɔmu tū la īpū yī nū ma̍:
“Ɔwɔ ka hīka, ‘Ma̍ ko̍ō!
N ge̍ē de ɔlɛrɔ̄ yī u ē tɛ̄rɔ̄ yɔbū de wɔ.
O̍ ge̍ē gāa ge̍ē gblāa ɔpɔ̄pū lɔ̄lā de wɔ.’
3Ɔ̄chɛ ɔha̍ yɛ ē tɔ̍ɔna lipu̍ a̍chi̍ chukuru hīka,
‘Ala̍ ā gbla̍a ɔpɔ̄pū yī Ādā lɔ̄lā de ɔ̍!
Ala̍ ā gbla̍a ɔgu yī nū kpakpakpa de ɔ̍!’ ”
4I̍ngɔ̍ɔ nīi o̍ lɛ nīi Ijɔ̍ɔn Ohuyenyi bīyɛchɛ abɔ̍ɔ lipu̍ a̍chi̍ chukuru yɛ ē hu āchɛ yenyi, yɛ ē ka ɛrɔ̄ yī nū de wa̍ a̍nɛ. Ɛ̍lɛ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ nīi ɛ̍lɛ ge̍ hu yenyi. Ma̍a Ɔwɔ ɔ̍lɔ ge̍ē de lɛlā ɔdwɔ̄bi̍ yī ɛ̍lɛ ē kɔ̄ de ɛ̍lɛ ke̍e̍. 5Yɛ̄grāa ɔla̍ā, Alijudi̍ya wa̍a̍, tūla Alijɛru̍sālɛm ē pɔ̍ɔ̄pɛ̍ ē wā dikpo̍ba̍ Ijɔ̍ɔn. E̍ ge̍ de lɛlā ɔdwɔ̄bi̍ yī wā ka hi̍yɛchɛ mɛ̍, Ijɔ̍ɔn ē hu wa̍ yenyi abɔ̍ɔ la Ɔkpa̍ yī Ijɔ̍dan.
6Ɔjā otūlibi̍īyē yī Ijɔ̍ɔn, urū yī ɛbɛ̍ obīho̍ ogbigū nīi e̍ ya̍ la anu̍ a̍nɛ. O̍ ē de wɔkpa̍ ē ku̍ la owu. Ojōre̍ yī nū re̍ka ikūba ba̍la yenyi yī ɛngu̍. 7O̍ ē koko̍o ē de āchɛ hīka, “Ala̍ ma̍ ko̍ō! Ɔ̄chɛ ɔha̍ nīi yɛ amu yewā la okwi̍ihi yī u ma̍ ga um ɔgɔ̄ga pɛtɛpɛtɛ. N i̍ ngma̍ la opu̍ kpɛ̍ɛ̍ wī orī hī wɔkpa̍ ochelikpo̍ yī nū ɔbɔbɔ ni̍. 8Ami ē hu ala̍ yenyi la yenyi ɔlamu. Anu̍ ma̍ ge̍ē hu ala̍ yenyi la Uhu Ɔnɛ̄ɛhɛhi yī Ɔwɔ.”
Yenyi ohōhu ba̍la otu̍tū yī Iji̍sɔ̄ɔsi
(Ima̍tiyu 3:13—4:11; Ilu̍uku 3:21-22; 4:1-13)
9Yɛ̄grāa ɔla̍ā, Iji̍sɔ̄ɔsi bū la Ina̍jārɛ̄ɛti yī ajɛ yī Iga̍līli wā nīi Ijɔ̍ɔn hu ɔ̍ yenyi abɔ̍ɔ la Ɔkpa̍ yī Ijɔ̍dan ɔla̍ā. 10Iji̍sɔ̄ɔsi bīyɛchɛ hī yenyi ɔpɔ̄ɔpɛ̄ ma̍, o̍ ma̍ nīi akpɔ̍ɔwɔ lwāa hwōō tɔ̍ɔ̄ta̍; Uhu yī Ɔwɔ lɛ bāa libɔkpa̍ ma̍ yɛ ē wā ge̍ē che ɔ̍ lɛhu̍. 11Ɔkɔlɛ̄lā ɔha̍ bū abɔ̍ɔ la ichō ka hīka, “Awɔ - Ɔyi̍ otōtū yī u lēchi̍ lēchi̍ nɛ. N lɛ ɔwɔ̄wīyā gba̍a̍ ba̍la awɔ.”
12Ɔpɔ̄ɔpɛ̄, Uhu yī Ɔwɔ bī Iji̍sɔ̄ɔsi pīya ga lipu̍ a̍chi̍ chukuru. 13O̍ hɔ̄ abɔ̍ɔ la otu̍ ohu ɛpa, yɛnɔ ohu ɛpa. Yɛ̄grāa ɔla̍ā wa̍a̍, Isa̍tan ē tu̍ ɔ̄ tū. O̍ hɔ̄ abɔ̍ɔ ba̍la ɛbɛ̍la̍chi̍ ji. Ayɛ̍ɛ̄chɛ̄rɔ̄ yī Ɔwɔ gāa ge̍ tū ɔ̄ wɔbɔ̄ abɔ̍ɔ.
Iji̍sɔ̄ɔsi hī ala̍bagalā āchɛ ɛnɛ ɛra̍
(Ima̍tiyu 4:12-22; Ilu̍uku 4:14-15; 5:1-11)
14E̍ de Ijɔ̍ɔn ku̍ tū la igbakɔbɔ wa̍a̍ o̍bū ma̍, Iji̍sɔ̄ɔsi ga Iga̍līli ge̍ kā Wɔ̄kā Ɔlwɔnyɛ yī Ɔchwɔ̄lɛ̍ Oro̍ōre̍ yī Ɔwɔ de āchɛ abɔ̍ɔ. 15O̍ ka de āchɛ hīka, “Yɛ̄grāa kpakpa de gbajɛ mɛ̍ ko̍ō! Ɔchwɔ̄lɛ̍ Oro̍ōre̍ yī Ɔwɔ de lɛ kurɛkurɛ mɛ̍. Ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ gɛ, nīi ala̍ ge̍ chɛ̄ku Wɔ̄kā Ɔlwɔnyɛ nūma̍!”
16Iji̍sɔ̄ɔsi yɛ ē ga la oko̍o yī Li̍hu yī Iga̍līli ma̍, o̍ ma̍ alwɔtɛ̍ yī ɛbɛ̍yēenyi āchɛ ɛpa ɛha̍. Isa̍yi̍mɔ̄ɔn ba̍la A̍ndru ɔɔ̍nɛ̍ yī nū nɛ. E̍ gblāa abɔ̍ɔ ē ta̍ a̍bagalā tū gāa yenyi. 17Iji̍sɔ̄ɔsi da wa̍ bɛ̍ɛ̄nɛ̄ hīka, “Ala̍ ā ku u la u̍tu! Ma̍a n ge̍ē ya̍ nīi ala̍ ē de ē pīya āchɛ ɔtwɔ̍tɛ̍ yī āchɛ̄ɛchɛ.” 18Isa̍yi̍mɔ̄ɔn ba̍la A̍ndru tu̍labɔ̄ hī a̍bagalā yī wā ɔpɔ̄ɔpɛ̄, pīya ku Iji̍sɔ̄ɔsi.
19Iji̍sɔ̄ɔsi gba̍a yɛ ga iyɔ̄bū pi̍nyɛ̍ ge̍ ma̍ aɛ̍nɛ̍ āchɛ ɛpa ɛha̍. Ije̍mēehi ba̍la Ijɔ̍ɔn nīi - ayi̍ yī Ijɛ̍bɛ̄di ma̍ nɛ. E̍ tū abɔ̍ɔ lipu̍ yī wɔwu̍ ē gbla̍a a̍bagalā yī wā. 20Iji̍sɔ̄ɔsi hī wā ɛra̍ ɔpɔ̄ɔpɛ̄, e̍ pīya ku ɔ̍ la u̍tu. E̍ pīya hī Ijɛ̍bɛ̄di a̍dā yī wā ba̍la a̍chɛ̍ yī nū tū abɔ̍ɔ la wɔwu̍.
Ɔngrɔ̄ɔ oku̍ yapri̍ija ɔdwɔ̄bi̍ ɔha̍
(Ilu̍uku 4:31-37)
21Iji̍sɔ̄ɔsi ba̍la aa̍ pīya ga ipwo̍gra yī Ikapa̍num bɛ̍ɛ̄nɛ̄. Ɔ̄chī Ɔmyɛ̍nyɛ̍ wā ge̍ hwa ma̍, Iji̍sɔ̄ɔsi ga u̍nu̍ ogrēeyī yī ɛbɛ ɔla̍ā ge̍ kū abɔ̍ɔ ē ngū āchɛ lɛlā. 22Āchɛ nīi plɛ̍ɛ̄lā yī nū ma̍ de kpo̍ hɛ̍ɛgbɛgba gblāa abɔ̍ɔ, wu̍chē yī lɛlā nīi o̍ ē ngū āchɛ ma̍. Wu̍chē oji̍ nɛ, anu̍ ma̍ i̍ lɛ bāa āchɛ ongū Lihɔ yī Iju̍u ma̍ ni̍. Anu̍ ē ngū āchɛ lɛlā bāa ɔ̄chɛ nīi nāa wɔhu̍ yī lɛlā ongōngū ma̍.
23Ɔngrɔ̄ɔ ɔha̍ nīi ku̍ yapri̍ija ɔdwɔ̄bi̍ ma̍ chɛ̄ wā abɔ̍ɔ bɛ̍ɛ̄nɛ̄. O̍ ti̍ira̍gba̍ ku̍ya̍a̍ ka hīka, 24“Iji̍sɔ̄ɔsi yī Ina̍jārɛ̄ɛti! Oji̍ nīi a chikpo̍ ge̍ē ya̍ la alɔ ma̍/? Re̍ka a wā ge̍ē de alɔ ē chāajɛ? Lēchi̍, n je̍ ɔ̄chɛ nīi a wɛ ma̍! Awɔ - ɔlɛrɔ̄ ɔnɛ̄ɛhɛhi yī Ɔwɔ nɛ.”
25Iji̍sɔ̄ɔsi ka tāa yapri̍ija ɔdwɔ̄bi̍ ɔla̍ā hīka, “Chi̍i! Cho̍cho̍ la ojiya, nīi a ā bīyɛchɛ hī ɔngrɔ̄ɔ ɔla̍ā!”
26Yapri̍ija ɔdwɔ̄bi̍ gwō ɔngrɔ̄ɔ ɔla̍ā chikichiki gba̍a̍, ti̍ira̍gba̍ ku̍ya̍a̍, o̍bū ngmɛ̍ɛchɛ hī ɔ̄ ibi̍īyē ke̍e̍. 27Āchɛ wa̍a̍ de kpo̍ hɛ̍ɛgbɛgba gblāa abɔ̍ɔ. E̍ che iyī wā ikpo̍ bɛ̍ɛ̄nɛ̄ hīka, “Ɔkana̍ u̍tu hɔ̄ ma̍ ma̍/? Onūma̍ - lɛlā ongōngū onīpīpɛ̄ kɛ̄ɛ? Ɔngrɔ̄ɔ nūma̍ lwɔhu̍ ē ka ē tāa yapri̍ija ɔdwɔ̄bi̍, e̍ ē chī tū ɔ̄ la ichō i̍ngɔ̍ɔ ke̍e̍? Fi̍yɛ!”
28Ohu yī Iji̍sɔ̄ɔsi mīyanya ga ɛbɛha̍-ɛbɛha̍ wa̍a̍ abɔ̍ɔ la ajɛ yī Iga̍līli ɔpɔ̄ɔpɛ̄.
Iji̍sɔ̄ɔsi nyiya aliyē oko̍ōku̍ yɛ̄mɛ̄mɛ̄
(Ima̍tiyu 8:14-17; Ilu̍uku 4:38-41)
29E̍ ngmɛ̍ɛchɛ hī u̍nu̍ ogrēeyī ɔla̍ā ɔpɔ̄ɔpɛ̄ ma̍, e̍ pīya tri̍di̍di̍ ga wɔlɛ̍ yī Isa̍yi̍mɔ̄ɔn ba̍la A̍ndru. Ije̍mēehi ba̍la Ijɔ̍ɔn yɛ titi. 30Ɛ̍nɛ̍ ɔlwɔlɛ̍ yī Isa̍yi̍mɔ̄ɔn ku̍ ibi̍īyē ɔla̍ gbo abɔ̍ɔ. Iji̍sɔ̄ɔsi gbajɛ gāa ɔpɔ̄ɔpɛ̄ ma̍, e̍ de koko̍o de ɔ̍. 31Iji̍sɔ̄ɔsi chɛ̄ gāa dikpo̍ba̍ ɔ̄ ge̍ de abɔ̄ ku̍ ɔ̄, tū ɔ̄ wɔbɔ̄ nīi o̍ nīichō. Ibi̍īyē ɔkwɔ̍la̍ ɔla̍ā de hīya anu̍ ɔpɔ̄ɔpɛ̄ nīi o̍ kū abɔ̍ɔ ē chrāa aa̍ ɛrɔ̄.
32Ɔ̄nɛ̄ de gbo nīi yɛnɔ yɛ ē bi̍ ma̍, āchɛ bī aliyē oko̍ōku̍ ba̍la alyapri̍ija ɔdwɔ̄bi̍ yɛ̄mɛ̄mɛ̄ ge̍ de Iji̍sɔ̄ɔsi. 33Alipwo̍gra ɔla̍ā wa̍a̍ grēeyī la oko̍prīinu. 34Āchɛ nīi kwi̍īyē ita yī ɔha̍lɔha̍ wa̍a̍ ma̍, Iji̍sɔ̄ɔsi de wa̍ nyiya cha̍cha̍. O̍ kpo̍ yapri̍ija ɔdwɔ̄bi̍ nū hī āchɛ. O̍ i̍ ē chɛ̄ nīi e̍ ē kɛlɛ̄lā o̍bū ni̍; wu̍chē oji̍ nɛ, e̍ je̍ ɔ̄chɛ nīi o̍ wɛ ma̍.
Iji̍sɔ̄ɔsi ka ɛrɔ̄ yī Ɔwɔ la Iga̍līli
(Ilu̍uku 4:42-44)
35La ɔ̄chī ɔ̍mɛpa, Iji̍sɔ̄ɔsi bōbū la obūrɔ̍ɔ̄chī, bīyɛchɛ pīya ga ikō lōri̍īnū gāa ge̍ē jɔhā abɔ̍ɔ. 36Isa̍yi̍mɔ̄ɔn ba̍la alikpɛ̍ɛ yī nū pīya gāa ge̍ gāla̍ ɔ̄. 37E̍ ma̍ ɔ̄ ma̍, e̍ koko̍o de ɔ̍ hīka, “Ādā be̍e! Āchɛ wa̍a̍ yɛ amu ē deyīrɛ yī wɔ ko̍ō!”
38Iji̍sɔ̄ɔsi ka bɛ̍ɛ̄nɛ̄ hīka, “Alɔ ge̍ē gāa wɔlɛ̍ɛchɛ ɔta̍kakatū yī ɛbɛ nūma̍ bɛ̍ɛ̄nɛ̄. Ma̍a n ge̍ē ka ɛrɔ̄ yī Ɔwɔ abɔ̍ɔ i̍ngi̍ngɔ̍ɔ. Wu̍chē oji̍ nɛ, ɔla̍ā - ohu̍ nīi n wā amu a̍nɛ.”
39Bɛ̍ɛ̄nɛ̄, Iji̍sɔ̄ɔsi ta̍ ipwo̍gra-ipwo̍gra ta̍ abɔ̍ɔ la ajɛ yī Iga̍līli, ka ɛrɔ̄ yī Ɔwɔ de āchɛ abɔ̍ɔ la u̍nu̍ ogrēeyī yī wā, nū yapri̍ija ɔdwɔ̄bi̍ hī āchɛ.
Iji̍sɔ̄ɔsi nyiya olimada ɔha̍
(Ima̍tiyu 8:1-4; Ilu̍uku 5:12-16)
40Ɔngrɔ̄ɔ olimada ɔha̍ wā dikpo̍ba̍ Iji̍sɔ̄ɔsi ge̍ de ūnōowu tū ajɛ, ra̍ābɔ̄ de ɔ̍ hīka, “Ādā, o̍ ge̍ rīya awɔ, a chī ge̍ ya̍ nīi n ē de ē lɛ cha̍cha̍ mɛ.”
41Iji̍sɔ̄ɔsi mlɛ̍ha̍ de ɔngrɔ̄ɔ ɔla̍ā kpɛ̍ɛji. O̍ nā abɔ̄ kpaa de gwō ɔngrɔ̄ɔ ɔla̍ā la ibi̍īyē, da ɔ̍ hīka, “O̍ rīya ami! De lɛ cha̍cha̍ gɛ!” 42Imada de kwɛ̍ɛjī hī ɔngrɔ̄ɔ ɔla̍ā ibi̍īyē ɔpɔ̄ɔpɛ̄; o̍ de lɛ cha̍cha̍ ke̍e̍. 43Iji̍sɔ̄ɔsi kɛlā tāa anu̍ pɛtɛpɛtɛ o̍bū ka nīi o̍ pīya. 44O̍ ta̍ ɔngrɔ̄ɔ ɔla̍ā ɔna hīka, “Ma̍ um ma̍ ko̍ō! A ā koko̍o lɛlā nūma̍ de ɔ̄chɔ̄chɛ ni̍. Yɛ i̍ngɔ̍ɔ tri̍di̍di̍ ga ɛbɛ yī oligbe yī Ɔwɔ nīi o̍ ge̍ jiya awɔ ma̍; nīi a ā ya̍ ɔpɔ̄pā lɔkɔ nīi Imo̍sīisi chabɔ̄ ma̍, oge̍ ya̍ ochi̍chi̍ de āchɛ wa̍a̍ hīka a de lɛ cha̍cha̍ mɛ̍.”
45Ɔngrɔ̄ɔ ɔla̍ā pīya ge̍ yɛ abɔ̍ɔ ē koko̍o yī lɛlā nūma̍ ē de āchɛ bɛ̍bɛ̍bɛ̍. O̍ de wɔ̄kā ɔla̍ā mīyanya kpɛ̍ɛ nīi Iji̍sɔ̄ɔsi i̍ bīyɛchɛ ga la ipwo̍gra ɔha̍lɔha̍ nyanya mɛ gɛ ni̍. Ɔkɔkɔ ɔla̍ā, o̍ pīya ge̍ hɔ̄ la ikō, āchɛ ē bōbū la ɛbɛha̍-ɛbɛha̍ ē wā dikpo̍ba̍ ɔ̄ abɔ̍ɔ.
Currently Selected:
Ima̍aki 1: YBASR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2020 Bible Society of Nigeria (second edition)