Mapookyony 18
18
Abrahamu Avikywa Kyaasa kya Iwona Mwana
1Nndumi Iruva kasheya Abrahamu alya kufii na Ngorosho ya Mamre, kyeeri ekee rembo yoo mwangony wa yeemeny lyakwe nsanyiny mwi wivaa. 2Kaipoo miso kalla, kalollya vandu vararu vasalalyi mbee yakwe. Nawe ekivalollya karisha indevaambya, auka alya mwaangony wa yeema, kakwiinyika kafika si. 3Kaamba, “Nndumi Iruva wakwa, kwakooya shimusennyi misony any mulashiire ulaalu yeny ishinga lyany-fo. 4Reny weendwa mura munnnywa musangye marende#18:4 Musangye marende:Yekee ngaa ya Vaisraeli iwarya veny. any, mwimuye yaa kwasi ya nri yeu. 5Neeny sheende shoonga shaangu muviirye nrima muu, numa mweendeny, kwakooya mmbo mwasheya ishinga lyany” Vakaamba, “Nkisha, tana shaasa kwaamba.”
6Naasa Abrahamu kaangusya uviny kaanga na efo yemeny kwa Sara, kaamba, “Itika! Ipoo kilo isaru ta nswa mmamiri kusongosie mikate.” 7Abrahamu karisha kafika usirony, keendefo ngashe shimamiri ya ng'umbe shisha kainiingya nndundi, kavavasya ideesywa. 8Kaipoo malela, na nyama ya ngashe ilya aleideesya, kavika mbee yaawo. Kasalala mbee yaawo yoo si ya nri ulya ivafurukannya nawo vakalya.
9Vakammbia, “Nka wafo Sara nkwi akai?” Kaamba, “Akee kulya yeemeny.” 10Kammbia, “Nkya dede nshekuwuiyaa kyeeri sheekyi kyeni mwaaka ushaa, na lola, nka wafo Sara asheonisaa mwana wa womi.” Sara kakiita eekee mwangony wa yeema yoo numa yakwe, 11Naasa Abrahamu na Sara vemmikwa, irika lyawo lyikava iniini, na Sara emmaa imanda na ngata ya kyika. 12Naasa Sara kaseka nriminy wakwe, kaamba, “Shammeva nkyeku na mmi wakwa ammikkwa, nkyuumu kweeru iira mwana.” 13Nndumi kavia Abrahamu, “Nkikyi elyi Sara aseka kaamba vai, ‘yeny dede shiwonaa mwana,’ neeny shamma ikkwa?” 14Ni irero lyingalyi lyiifo lyikee yuumu lyilemi Nndumi Iruva? Elyi kyeeri kya vayo nshekuwuiyaa kyeeri kya nnsaka sheekyi kyeni mwaaka ushaa na Sara asheiraa mwana wa womi. 15Sara kalema fushu, kaamba, nshaleseka-fo, kimmba aleiryaa. Nawe kammbia, “Mmbongo, kwanseka.”
Abrahamu Aterevya Sodomu
16Naasa vandu yewo vakauka-fo veshorisaa fisangu fyawo Sodomu. Abrahamu keenda eriani nawo eveemyaa. 17Nndumi Iruva kaongwa, “A shasuruma Abrahamu kindo nkeekitana? 18Kwakooya Abrahamu ashevaa ufyari uniini, lutiri finya na yoo kwakwe ngyufyari toose ta ulana tishevikyoo mbora. 19Mashika shillolye we mmbwe yeto ashesalallyaa vana vakwe, na va mmba yakwe vasore shia ya Ndumi, vasore dede na usumanu, naambo Nndumi Iruva nawe nainutye Abrahamu fyaasa fyakwe.” 20Nndumi Iruva kaamba, “Kimmba kiiyo kya Sodomu na Gomora kyannanga, na ngyulyamari tawo tamfumbuka nnu. 21Naasany, kuti shooloke ulaalu shilole kwakooya efyo vakeetana fiinani na kiiyo ekyo kileshifikya; kwakooya nshi indo, shimanyaa.”
22Kyasia vandu valya vakauka-fo vevinngyaa Sodomu, kyeendi Abrahamu kakaa usumanu na Iruva. 23Abrahamu kasembea kufii kammbia, “A mmbo kusherumataa yeto wa usumanu kunsande na yeto nravi? 24Kungyi veefo makumi araanu va usumanu efo muriny, kulyamare, nta kure kulasarya muri yeto kyeendo ni yewo makumi araanu va usumanu veefo? 25Oode kulatani indo-fo, kuwaa yeto wa usumanu na yeto nravi! Yeto wa usumanu nave sha yeto nravi! Oode mwisalallya ulana nare nalatana usumanu?” 26Ndumi kaamba, “Shankooya efo Sodomu va usumanu makumi araanu muriny, mmbo nsheraa koose kimaruma kyawo.”
27Abrahamu karouwa, kaamba, “Naasa shanfura irera na Nndumi Iruva, llyo shikee kiluulyi na ifu tupu. 28Kulakooye vasheangwa-u varaanu alya makuminy araanu vatiri usumanu, a mmbo kushelyamaraa muri moose elyi vamaangwa-u varaanu?” 29Keengera irera nawe lyingyi eshambaa, “Kweenda vashekooyofo makumi aana?” Kaamba, “Nshitanaa kindo kimaruma kya yewo makumi aana-fo.”
30Kaamba, “Nndumi Iruva nalasheiswa neeny, kya indi shireraa da, shaambe, kungyi vashelollywa-fo makumi araru.” 31Kaamba, “Lola, shilangye irera na Nndumi Iruva, kungyi vashekooya-fo makumi avii?” Kaamba, “Kimaruma kya yewo makumi avii nshishelyamaraa-fo.” 32Kaamba, “Nndumi Iruva nalasheiswa neeny mmbo shireraa lyimwi nsi ulaalu, Kungyi vashelollywa-fo ikumi.” Kaamba, “Kimaruma kya yewo ikumi nshishelyamaraafo.” 33Naasa elyi Nndumi Iruva alemaa irera na Abrahamu, keenda; na Abrahamu kawuya kyeny kwakwe.
Currently Selected:
Mapookyony 18: MAS2
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The Holy Bible in Kimashami © Bible Society of Tanzania, 2016.