Mapookyony 16
16
Mbony ta Hajiri na Ishmaeli
1Naasany Sarai nka wa Abramu nalamwirye mwana. Kyeendi etiri kishinga kya Misri, evangwaa Hajiri, 2Sarai kavia, Abramu, “Naasany Iruva anshifinga shilaoni mwana, warya kishinga ekyi kyakwa, kukee nawe kulakooye nsheonisaa-fo ufyari Abramu keerikya.” 3Sarai nka wa Abramu keepoo Hajiri Mmisri kishinga ekyo kyakwe, kanrammbikya Abramu nawe nka wakwe. (Kyeeri Abramu enkaa urukeny lwa kanaani myaaka ikumi.)
4Naasa kawarya Hajiri nawe kakufinga. We muni llya alelollya ekufingye, kamina Sarai. 5Sarai kavia, Abramu, “Ukasha elu luleshikooya lukukaye yewe; mmbo shilekurambikkya kishinga ekyi kyakwa kipooteny kyafo, nawe ekilollya, ankufinga, yeny nshilekiva kindo mbee yakwe-fo. Nndumi Iruva narummbwe kindo ekyi nnang'ani yakwa na yewe!”
6Nawe Abramu kavia Sarai, “Lola, kishinga kyafo mmakony afo kikai ntanyi kisumani shaasa kulollye.” Sarai kallyisa ukiva kutani nawe arisha.
7Nsu wa Nndumi Iruva kallollya kulya usokeny yefo kasa, usoka lukee mbai ya shia ya yeenda Suri. 8Kammbia, “Yewe Hajiri kishinga kya Sarai, nkwi kwauka, na nkwi kukeenda?” Kammbia, “mmbo shikeerisha shuuke kisanguny kya nkyeku wakwa Sarai.” 9Nsu wa Nndumi Iruva kammbia, “Wuya kwa nkyeku wafo, kwiikunyiisye.” 10Nsu wa Nndumi Iruva kammbia, “Nkya dede nshefumbutaa ufyari lwafo, nta lluvaa yeekyena shaasa luvaa wiingyi-fo.” 11Nsu wa Nndumi Iruva kammbia, “Lola, yewe mmbo kukufingye ulaalu, mmbo kusheiraa mwana wa kyuumi, nawe kushembangaa irina lyakwe ni Ishmaeli, mashika Nndumi Iruva ammiita kiyyo kya ukiva lwafo. 12Nawe mmbo ashevakaa itiko mbee ya vandu veengyi, nawe ashekaa ngapanuny na vandu vengyi, nawe ashekaa mbee ya vana va maye woose.”
13Kasenda irina lya Nndumi Iruva yeto alerera nawe, “Yewe kukee Iruva alollye, mashika aleamba, fika yaa mmbo shilelollya yeto ashilollye yeny!” 14Naasa Kirori ekyo kya mura kikavaangwa Beer lahai-roi. Nakyo mmbo kyikee nnang'ani ya Kadeshi na Beredi. 15Hajiri kairya Abramu mwana wa womi; Abramu kamfishya irina lyakwe ni Ishmaeli, mwana yeto wa kyuumi Hajiri alemwiirya. 16Nawe Abramu etiri myaaka makumi nyanya na irindaru kyeeri Hajiri alemwirya Ishmaeli.
Currently Selected:
Mapookyony 16: MAS2
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The Holy Bible in Kimashami © Bible Society of Tanzania, 2016.