Joel 2
2
1Lewkoell trompeten raw ya' gan lli Sión'na,
lewsill dan llazoa xniden raw ya' xhirall ke Xanllon.
Le lleb yoyte re' sjalla gan nzi Judán,
le baze gawchochze lla ke Xanllon:
2Llan gak xchul, gasjwi,
llan kwe bej xchulen.
Kan jalleyi bich'soa ka'
Txhonj xhen waka ya war ake',
bllin akba guzlas akba raw ya' ka'.
Ke to ga ba byeni.
Chras gatga na re akre ka', na bi re' aksre ka',
nigaze da nak ke walle kelen.
3Nak aken ke yi', na kon da sjade llzeyen.
Nike ne tezen ba llzeyteren,
leskakse ket ba bayull bden'na.
Yell-li'on naken to latj da nak nbaraz kwis kan bine' te yin',
na ket ba bayull bde akban, yeganen' ke to latj dach.
Bitbi yekoan aksba.
4Yichj raw akban naken ke kabay ka', na llxhonj akba kan llun be'nn ka' sjallia kullban,
5na llachjen llakia ket xhiten raw ya' ka'
llachjen llakia kellon karret ka' zajze raw wdil,
kan llun la'y yech ka' llachj aken keten llalninen.
Nak akba ke to kwen be'nn waka ya, be'nn war ake'
ket baze ake' chnez gan gak wdilen.
6Be'nn ka' to xhiz ake' keten llre akre ba ki,
na llwarao aken to llaken llichtat.
7Ke to be'nn war llaj raw wdil,
llxhonjdo ake', llep ake' raw ze ka'
na lliaraw ake' zajze ake',
ni tich ake' bi llra' nez.
8Bit llchid loellj akba,
toaj, toaj akba zajze xnez akba,
na llde aktezba gan llexj xhis waxit ka'.
Na bi llnit akba xnez akban gan zejzedo akban.
9Llazdo akba, na llo akba raw yell xhen'na,
na zajzedo akba raw ze ka',
llepdo akba raw yo' ka'
llun akba kaꞌ llun be'nn wan ake', llo ake' lloa reij be ka'.
10Yellri'on to xhizen ke nake zajzedo akban,
na rente yeban xhistiten,
willen na be'on bachul aken,
na berj ka' bnit aken yel llaktitken.
11Xanllon lliarawe raw waka ya ka',
llune ke yen akre chie'e zilljen.
Be'nn zan kwis nak waka ya ke'e kaꞌ,
nike nbabze be'nn ka' llun kan llenlen'.
Daxhen kwis, na nxhullraz nak lla ke Xanllon.
Nutno gak suere len.
Yel llayachrall ke Xanllon
12Axha na' Xanllon ne,
le wayechj doyichj dorallre gan zian.
Legun was, le gusia, na le koell.
13Le wayechj yoyte re' raw Xanllo Diozen,
le gunyiach konen raxhdaoren
kerke wxhoxjre xharanle.
Le Xanllon llayachralle,
na nake nexjrall, na yel nllie xhen yoe'e,
na zekse xnid wayachralle'e.
14Narachk chetkarize bi wsakzia re',
na wsela yel nak lay ke re':
nbas, na zu ke uva
nench'na chejraw Xanllo Diozen.
15Lewkoell trompet raw ya' Sión'na.
Le chixjoe be'nn yell, na legun was,
16Le watup be'nn yell ke Diozen, na lewayun ake' xhirall,
le watup be'nn gur ka', na bidao ka'
na lekse ka' bidao ka' ne llall.
Xte rente be'nn ka' ze bchoynate
llach ake' lo yo' gan zajzu aken.
17Le koell yoyte re' bxus ake', na be'nn llun xchin Xanllon,
na ne're kwit bkuyen,
Bxhixhen ke be'nn yell ko'on Xanto,
bi weo latj wtitj akre be'nn ko'o ka',
bi weo latj ke be'nn ka' sjalla latj yell-liw ka yela wnebia ake' le ake',
na be'nn ka' bi nombiere rwen ne' ake':
¿Ganxha Dios ko'on cha?
18Natell Xanllon broere yel nllie ke'en latj yell-liw ke'en, na bayachralle'e yell ke'en. 19Na bne:
Wsela trigo, na zu ke uva, na seit ke re',
xte to yerjtere,
na bill wa latj
ke be'nn ka' bi nxenlallen wtitj akre re'.
20Wakoasa kale bich'soa kaꞌ kwitren, ba ka' zak rale,
na walljazal akaba latj yu dachen.
Na wchicha lo nista'on nzi yelguten baka lliaraon,
na lekse ka' wchicha lo nista'on nzi Mediterráneon, ba ka' ne' zak zit gan llagach willen,
gana' kweyi aken, na la aken ziw.
Da yelwan xhen guna.
21Bawere kwis yell-liw, na bi llebo,
le Xanllon daxhen sjade da ze gune.
22Bi llebre bayix ake', ba sjalla lixe,
le yix ka' ze waga aken,
na yay ka' za kwia aken daxhixh,
na ze gat yajlaw higos, na uvas.
23Le yewe re' sjallare yell Sión,
le yewe kan llun Xanllo Diozen.
Le'en ba bene'e re' nis yejw keten llialljen'na,
yejw ka' llak keten llbe da zay, na keten suraw yejw nell ka',
kan ba benkse batna.
24Yajlaw trigo yerapre
na yajlaw zu ke uva, na seit.
25Nada' wayuna' rawraz
iz ka' ba bnitren
xtol bich'soa ka',
ba ka' llun ke waka ya ka',
ba ka' bsela nench'na bxhakzire.
26Re' yaj gawre, xte yerjtere kwasru,
na weraore Xanllo Diozen,
le dazan da ba bena konen re' da babanere.
Chras bill si be'nn yell kian yelsdo,
27na re' be'nn sjalla Israel, llayal wazakere
ke nadan naka Xanle, na zerena re',
na nadan naka Dios kere, na nullno llra' yeto.
Chras bill si be'nn yell kian yelsdo.
Diozen ba bchebe'e wsele'e Espíritu ke'en
28 28 (3.1) Natell ket ba bde dani,
wasja espíritu kian raw yoyte be'nn nach:
Xhi'nnre bi biew ka', na bi nor ke re' ka'
wayixjwe akbe xtillan,
na be'nn gur ka' wne' akre yere,
na bi weo ka' redaw akrebe.
29 29 (3.2) Na lekse ka' rente be'nn wenllin kia ka', be'nn biew na rente nore,
wazja Espíritu kian le ake' ke lla'na,
30 30 (3.3) wruera re' le yeban yelwak kian,
lleen, na yi', na rente llen raw yell-li'on.
31 31 (3.4) Willen wayaken xchul,
na be'on wayaken xna, ke lleen,
dani aken keten bazo nez za Xanllon,
aken to lla xhen da wabanello.
32 32 (3.5) Axha yoyte be'nn ka' walwill Xanllon.
Wara ake' raw yelguten,
le raw ya' gan nzi Sión'na, dan lli Jerusalén'na,
gana' de yelwasran,
doxhenkse kan ba bne Xanllon gak,
Be'nn ka' ba brejen, gat' yelnban ke ake'.
Currently Selected:
Joel 2: ZPUPAT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo