Marko̱ 4
4
Kúcha yeꞌé chu̱ba̱ Jesuu̱ nga̱tꞌaꞌe tu tje̱
(Mt 13.1-9; Lk 8.4-8)
1Kjaꞌi nitjínni, Jesuu̱ kjibakuyáre̱ xu̱ta̱ tsꞌua chincha tsé Ngalilea̱. Nga̱tꞌa tuxi kjín xu̱ta̱ kutku xi mejénre nga tꞌere, kui kju̱a̱ Jesuu̱ janda nga tsijín ngaya tsutsu je ku kisꞌejña tuxi manga kꞌi̱a̱ janda tsichja̱. Kixinchakixi xu̱ta̱ kꞌi̱a̱ tsꞌua nanda.
2Tuxi tsé najmi xi ikuyáre Jesuu̱, kjín tku̱ya tsangitsjai kúcha ikúre̱. Ku̱i̱cha yeꞌére̱ én nga kitsuyáre̱:
3«Ndá nuꞌyájnu kui én: Ngu xu̱ta̱ nga̱jnu itju niꞌyaꞌe nga kikeꞌe trigo̱. 4Nga kjibeꞌe tutje̱, tjin xi ngaya ndiya ixú. Ngutjútse jaꞌa ku jichú ni̱se xi skine.
5»Tjín tutje̱ xi ngajín ndia̱jo ixú jma nga chubatse ninde tjin. Nga̱tꞌa tu kjisún tjiabetse nangi, ngutjútse kisa xka̱ꞌe̱ trigo̱. 6Ta̱nga tseji kumáre xka̱ꞌe̱. Kichjanre nga itju tsuꞌbi, nga̱tꞌa ndáji jamatsꞌen xi kisꞌere̱.
7»Kjaꞌi tutje̱ xi ngajín yanaꞌya ixú. Nga kuyiꞌi yanaꞌya, kitsixindu xka̱ꞌe̱ trigo̱ ku kitsjuajire̱ kju̱a̱ nga kuyiꞌi. Kui kju̱a̱ nga tutkju̱a̱ndá kichaja tutje̱.
8»Ta̱nga tjin tutje̱ xi nangi ndá ixú, tuxi tsjua kixincha natinꞌen ku tuxi ndá kuma tuꞌe. Tjín natinꞌen xi tsajare̱ kate tu, kjaꞌi xi tsajare̱ ichate kju̱ te̱, ku kjaꞌi xi tsajare̱ uchan.»
9Ku jaskan ku̱i̱cha kitsú Jesuu̱: «¡Tsanga kjáin nga jmájnu nuꞌya, ndá nuꞌyájnu!»
Mí kju̱a̱ nga kjín chu̱ba̱ beꞌe Jesuu̱ nga baku
(Mt 13.10-17; Lk 8.9-10)
10Ku nga je tu mején ngieje xu̱ta̱ je kijí, xi tuku kisꞌenduju Jesuu̱ kju̱ ngiajó ja xi kjibakuyáre̱, tsinengiyare̱ mí xi mejénre tsu kui kju̱a̱kitakun xukúcha kitsuya nga̱tꞌaꞌe xta̱ nga̱jnu. 11Ku̱i̱cha skengire Jesuu̱:
«Xuku nga jún je kixiyájnu én xi tjiꞌmare jmá batexuma Namiña Diuu̱, ta̱nga xu̱ta̱ xi ngisa ku̱i̱cha tsikjinkakunꞌan nga bakuyana. 12Ku̱a̱cha kuma nga, nditsa inchabase ku bejí, ku nditsa tꞌe tekuini makjinjínre, tusá tsa tsibé yajo̱ꞌe nga tjin jee xi kitsiꞌin ku minengire kju̱a̱nichatꞌa Namiña Diuu̱.»
Nga kitsuya Jesuu̱ chu̱ba̱ xi yeꞌé nga ikú kju̱a̱kitakun xi chja̱ tutje̱
(Mt 13.18-23; Lk 8.11-15)
13Kitsúre Jesuu̱:
«Tsanga makjinjínre kju̱a̱kitakun xukúcha kixiyana nga̱tꞌaꞌe tutje, kúcha kukjínre kju̱a̱kitakun xi ngisa.
14»Xta̱ nga̱jnu xi tjitsuyasun en tjatse xi tjínre kju̱a̱ndá. 15Tu tutje̱ xi ixú ngaya ndiya kuixi tꞌe én tjatse xi tjínre kju̱a̱ndá, ta̱nga ndibáni Xindajin ku chayánire̱ ngieje én xi tsitꞌe.
16»Ku tutje̱ xi ixú ngajín ndia̱jo kui xi tꞌe en xi chja̱ jmá kjibatexuma Namiña Diuu̱ ku tsjuatjínre nga tjeꞌñu tsijaꞌo. 17Ta̱nga nga chanjín makjínre̱, ngutjútse mare̱ kju̱a̱tsjuaꞌe. Nga tjeꞌñu sakure kju̱a̱si, kútsa chꞌo mataꞌin nga̱tꞌa tꞌeꞌénre Namiña Diuu̱, tsichayáni én xi skabe ma.
18»Ku tjin xi xuku tutje̱ xi ixú ngajín yanaꞌya. Tꞌere én, 19ta̱nga tsjuají kju̱a̱ nga kui én basenkajó kúcha tsuꞌba. Tumá najmi xi machjéntsere inchatsikjo, kúcha tsikejen tón, ku kúcha tsitsjua kju̱a̱mijñachun.
20»Ku xi kjuetꞌa, kuí tutje̱ xi nangi ndá ixú ku kuí xu̱ta̱ kua xi tꞌe Enꞌen Namiña Diuu̱ ku tsijaꞌo. Kui xu̱ta̱ xi tsindaya kúcha tjima ku najmi xi ndá tsiꞌin. Xuku natinꞌen trigo̱ xi kucháre kate, xi kucháre ichate kjute ku janda uchan tu.»
Kúcha yeꞌé chu̱ba̱ Jesuu̱ nga kitsuya tse̱ꞌe ndiꞌi
(Lk 8.16-18)
21Nga je kuma, ku̱i̱cha kitsúre̱ Jesuu̱:
«Nga ꞌbetí ndiꞌi kandi a nginde kajo̱ a xu nginde nachan basen. ¡Kuajícha ñaꞌan! ꞌBetí ku ngu ngande jma nga kꞌa basen, tuxi ndá tsitsejen. 22Nga̱tꞌa ngieje najmi xi sinduꞌma ku bitjutsejen, ku najmi xi mejínña nga ya tekuini ya.
23»Tsanga májnu nuꞌya, ¡nuꞌyájnu!»
24Tekuácha kitsúre̱:
«¡Ndá nuꞌyájnu! Xukúcha tsé najmi baꞌíjnu xu̱ta̱ tekuácha tsé tjsuájnu Namiña Diuu̱, ku tuku tsingisúnjnu ngisa. 25Nga̱tꞌa xi tjínre ngu najmi, tusá tsé sakure; ta̱nga xi ngují najmi tjínre, tusá tjubaꞌáre̱ najmi xi nguxachi tjínre.»
Kúcha yeꞌé chu̱ba̱ Jesuu̱ nga̱tꞌaꞌe tutje̱ xi macha
26Jesuu̱ yeꞌé kjaꞌi kju̱a̱kitakun nga jó tku̱ya najmi chusúnre:
«Ngande jmá batexuma Namiña Diuu̱ tekuácha ma xukúcha ma nga beꞌe tutje̱ xu̱ta̱ ngajín nangi. 27Ngují najmi tjínre tsa kjife kútsa kjikun kui xu̱ta̱, tsa ni̱tjin kútsa ni̱tje̱n; tutsjai nga sa tutje̱ ku tekui xi macha nditsa makjinjínre ja nga̱jnu. 28Nangi, tjún ya tajaꞌe nandiu tsisa, kjia bakjan natin, ku janda nga kju̱etꞌa ꞌbére ni̱ji̱n. 29Ta̱nga fichu nitjinꞌen nga chjanga, ku ja xi tsixá nga̱jnu fayáni kju̱a̱ni̱ma̱ꞌe̱n.»
Tuꞌe nde̱ya̱ tujma
(Mt 13.31-32; Lk 13.18-19)
30Tekuácha kitsú Jesuu̱:
«Mí xi ma chꞌachubaju ngande jmá kjibatexuma Namiña Diuu̱. Mí najmi xi tekuácha tjin. 31Xuku tuꞌe nde̱ya̱ tujma xi beꞌe ngajín nangi ja nga̱jnu. Ndatsa kuixi chubachi xi ꞌñu xixi nga ngieje nga̱sunde, 32nga je macha kuixi ꞌñu je uya nga ngieje ya xi tjin ngandeꞌe yatje. ¡Tuxi ndá yiꞌi tjiaꞌe, ku janda ni̱se kꞌi̱a̱ tsindá nda̱ba̱!»
Nga kjín tku̱ya kju̱a̱kitakun kitsichjen Jesuu̱ nga ikú
(Mt 13.34-35)
33Kjín tku̱ya kju̱a̱kitakun kiskusúnre̱ Jesuu̱ nga ikuyáre xu̱ta̱ Enꞌen Namiña Diuu̱, janda jmá tjen makjinre xu̱ta̱. 34Tsikinchandsijín kju̱a̱kitakun ku beꞌechuba nga tsuyare̱ xu̱ta̱, ta̱nga nga sakúre ngande nga sindu subá kju̱ ja xi kjibakuyáre̱ ꞌñu chan tsuyáre̱ ngieje tku̱ya kju̱a̱kitakun.
Nga tsaꞌá tsitjo xi ꞌñu
(Mt 8.23-27; Lk 8.22-25)
35Tekuini ni̱tjin, nga je tsején ni̱tje̱n, ku̱i̱cha kitsúre̱ Jesuu̱ ja xi kjibakuyáre̱: «Tjáiña ngundatiu chincha.»
36Kui nga ꞌyendu xu̱ta̱ ku tsꞌatiu ngundá chincha ngaya ngu tsutsu je. Tjín xu̱ta̱ xi tekuácha kijí ta̱nga kjaꞌi tsutsu je kijiya.
37Tu yají jmá jíndiba ngu tsitjo ꞌñu. Tuxi ꞌñu kjibeꞌere tjao̱ ku janda ngaya tsutsu je kjibasꞌen ndijua, ku tsaꞌángire̱ nga tsasꞌen ndijua.
38Nga ku̱i̱cha kjima kisꞌefe Jesuu̱ nga̱tjen nduꞌyeꞌe̱ tsutsu je, ngu najñungitku kjitjiantꞌanajín. Kiskindiare̱ nga tsikjaꞌare̱ ja xi kjibakuyáre̱:
—Jí kua Chji̱ne, a ndusinjínri nga je tjimangiña nginda.
39Isitjen Jesuu̱ ku kitsiꞌínre manda tjao̱ kju̱ ndachakun nga ngatsikenda yajo̱ꞌe. Trátse kitsikenda yajo̱ꞌe tjao̱, ku ngieje nga xuchꞌan kisꞌe̱.
40Ku kjia ku̱i̱cha kitsúre̱ Jesuu̱ ja xi kjibakuyáre̱:
—Mí kju̱a̱ nga tuxi ndá tjitkúnjnu. A tuku kje sꞌejinjínjnu nga̱tꞌaꞌna.
41Ta̱nga ngieje nga se̱n inchamáre̱, ku ndsijín xikjin ku̱i̱cha inchatsure̱: «ꞌYáni kui xta̱, nga janda tjao̱ ku janda ndachakun tꞌeꞌénre.»
Currently Selected:
Marko̱ 4: MZI
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
México © Sociedad Bíblica de México, A.C. AÑO