Lúʼkáasʉ 2
2
Pə́ jí Yěso
(Mat 1.18-25)
1Pə́ lə ghí jí Jâŋ, Ágúsʉ fou pəlóma ŋwáʼa ŋwaʼa, ə́ ntághʼ có ləpə̌ʉ ńgó pə kwâʼ pye pə́tsəm cər yé paghʼə-ngoŋ. 2Zêi ləpə̌ʉ lə ghí kwǎr yə́rə́, Kilinyúsʉ pə̂ ngə́mnaa njwǐ cər ngoŋ Silə̂i. 3Maa wǒwó pə̂ mbə̂ʉ lə̂ ləsǎʼ páp lə̂ ngʉ́ pə́ kwaʼ yé. 4Yosêp lə́wó fû túsoŋ Nǎzalêi cər ngoŋ Galilêi ńdə́r lə̂ paghʼə-ngoŋ Yudêi, ə́ túsoŋ Mbetelehêm: Ə́ yʉʼ yi pə lə jí fou Ndavîd wó, ə́ ngwo wó yə́rə́, ńté ńgó a kwar lə̂ ngər fou Ndavîd. 5Gháp ngwě ye Mǎyaa ghi lə̌r lə̂ ngwó ngʉ̌ pə kwâʼ gháp, a pə̂ məngyě shuŋú. 6Ə́ nkə́u wó, môu jî lə̂ ndə́u yé. 7A jî môu lətû ye, a pə̂ môu mbiŋə, a lâghʼ zə̂u-ndí ńzə́mtə́ yé, ə́ nuŋú yé cər ləpfuʼ məzʉ̂ mənye, ńté ńgó káa zâp ləlě lə kwâr yé cər ndə̂ pəghəʉ. 8Ə́ lə pə́ cər paghʼə-ngoŋ zêi, pəpápə́-mbî pə̂ mpfu wêi, ə́ mə́ ndê péi mbápə́ mənye máp, 9ə́ ngǐ jwó, tâʼ cwôʼ Nde kwâr mbi páp, nkeʼ Nde zə́mə gháp, yʉʼ naa fóghʼ, gháp pôghʼ gháʼate. 10Lə́ cwôʼ Nde wêi lâʼ lə́ páp ngô: «Koo pei pôghʼ, n ntô pə́ ndǎʼ pei no shʉʼʉ yi ə́ wo ŋə́ tə́koʼ lətsei lə́ ŋuu ntsəm. 11Pə́ lé túsoŋ fou Ndavîd leʼé wo, ə́ njí Nzaʼ-Nkʉ yi a wo ghʉ̌ pei cwór. Â Kəlísto yi Nde lə ghʉ̌ ndaʼá mə́u lə̂ ngʉ́ ŋə́. 12Zə̂u yi pei wo kə́u lǎghʼ jí yé pə́ ngô: Pei wo kə́u jwó môu-mbaŋə́, ghíʼ pə́ lǎghʼ zə̂u-ndí ńzə́mtə́ yé, ə́ nuŋú yé cər ləpfuʼ məzʉ̂ mənye.» 13Ə́ ndǎʼ tə ngí myǎghʼ, nou pəcwôʼ Sê* ghápə-ghapə́ ńkwár ńkʉ́ʼʉ́ lə́ zʉ́, gháp pə pǎp zap, ə́ ngúʼtə́ Sê, ə́ ndǎʼ ngô: 14«Ghûʼtə wə́ mbó Sê tʉ̌-lə́pû, mbwórə pə̂ mbó pye-mə́soŋ pi a kǒŋ gháp ndəu ndesé.» 15Cwôʼ Sê* lâʼ tə mbə̂ʉ yé lə̂ tʉ̌-lə́pû, pəpápə́-mbî laʼ təcər páp ngô: «Paghʼə lə́r tə nkə́u Mbetelehêm, ə́ njwó no yi ə́ kwǎr wó, ə́ no yi Nde ghʉ̌ paghʼə jî lo.» 16Gháp laʼ yə́rə́, ə́ ncʉ́ʼ nkə́ ndésê, ə́ fátə́ ndə́r tə nkə́u wó, ə́ njwó Mǎyaa gháp Yosêp, môu-mbaŋə́ nûŋ cər ləpfuʼ məzʉ̂ mənye, 17ə́ nděi tə njwó yé, ə́ njǐ lə̂ mbyétə́ məno mə́tsəm mi cwôʼ Sê yǎa ndǎʼ gháp ńté yé. 18Maa wǒwó zûʼ məno mêi ntsʉ pəpápə́-mbî, ə́ ndyár gháʼate. 19Lə́ ngwǒ lə́ Mǎyaa, a lóʼo məno mêi mə́tsəm ntə̂ʉ zʉ́, ə́ nyáŋ mpfu tsəm ə́ mə́ nkwâŋ no mə́u. 20Pəpápə́-mbî ghi pə̌ʉ nzəm, ə́ mə́ ŋə́i ńzǎp ńdághʼ ńgûʼtə Sê, ə́ sóghʼə yé ńté məno mi cwôʼ Sê kə lǎʼ, gháp pou njwó, zə̂u tsəm kwar, ə́ nkə́ mbə́ pə́ ghíʼ cwôʼ Sê kə lǎʼ gháp.
Ləjôghʼ môu
21Pə́ lə jí môu, ə́ lei leʼé ləfǎa, pə́ pûʼ yé, ə́ ncǐ ləjôghʼ yé ńgó Yěso, ə́ pə̂ ləjôghʼ yi cwôʼ Sê lə ŋə́, tə mə́ ye poŋə́ tə́ʉ lə́ zʉ́.
Pə́ nyarə́ Yěso ndə̂ Sê
22Leʼé ləsǒghʼ lǒʼ mə́pfu lə́ Mǎyaa lə pə́ nkûʼ ghíʼ ləpə̌ʉ Mə̌usə̂i lə pə́ ntúŋú, Yosêp gháp Mǎyaa khwor môu ńdaghʼ ńdə́r lə̂ Yelúsalêm lə̂ ngwó nyarə́ yé mbó Nde. 23Ə́ pə̂ ghíʼ pə́ lə ŋwaʼá cər zêi ləpə̌ʉ ngô: «Ŋuu lə̌i njí môu lətû yé, a pə́ môu mbiŋə, a ŋə̂ yé mbó Nde.» 24Mǎyaa gháp Yosêp lə ghwo lə̂ ŋə̂ záp məpuŋu mə́mbwô káa pəpə́ptə́ pə́pwô, lə̂ ndághʼ nuŋú záp poʼ Sê, ghíʼ ləpə̌ʉ lə pə́ ntúŋú.
Síməu sʉ̂ʉtə Sê tû Yěso
25Ə́ pə̂ mpfu wêi, cǒ ŋuu pə̂ Yelúsalêm ləjôghʼ yé pə̂ Síməu, a pə̂ ŋuu ŋə̂i ghíʼ *ləpə̌ʉ Sê pə́ ntúŋú, ə́ mbou mə́ nzûʼ ntsʉ yé. A lə nyâŋ ńzʉ̂ʼtə ŋuu yi a ghʉ̌ tó, pye Ísə́lahêl laghʼ yé ńtə́itə́, *Zəghʼə Ndêi-lěi pə̂ lə́ zʉ́. 26Ə́ lə yaa ngǐ pə́, mə́i *Zəghʼə Ndêi-lěi lə zâʼ mə́ nzʉ̂ ndǎʼ yé ńgó mboʼ a tâa nkwʉ́ yé tə́ ghó a sâp ləjôghʼ lə́ *Nzaʼ-Nkʉ yi Nde wo tə́u po. 27Zəghʼə Ndêi-lěi ghʉ, a lə̂r lə̂ *ndə̂ Sê, ə́ kə̂ ḿbə́ pə́ mpfu wêi, Yosêp gháp Mǎyaa laghʼ môu ńtó lə̂ ńgʉ́ zə̂u yi *ləpə̌ʉ lə pə́ ńtúŋú. 28Síməu mpfû yé ńgwǒ mbô zʉ́, ə́ mə́ ngúʼtə Sê ńdâʼ ngô: 29«Ə́ Nde, ə́ pə̂ mpfu wo gháʼá, mboʼ o nyêr ngaŋə-faʼ gho a pwórə nkwʉ̂ yé ghíʼ o lə lǎʼ. 30N ndaghʼ nyôghʼ mâa ńjwó ghíʼ o wo ghʉ̌ pye-mə́soŋ cwôr. 31Â ləcwôr yi o lə láʼ mə́ ńtsúŋú lə̂ nyárə́ ngoŋ ngoŋ. 32Â nkeʼ yi táa ghʉ̌ pə jí gho cər nzʉ̂ tsəm. Ə́ pə̂ yə́rə́, o lâghʼ ńŋə́ ləghûʼ* lə́ Ísə́lahêl: lâʼ zô.»
No yi Sê lə́ cóghʼ ntsʉ Síməu, a lâʼ ńté Yěso
33Yosêp gháp Mǎyaa zûʼ məno mi Síməu lǎʼ ńté môu, ə́ kəʼə gháp. 34Síməu sʉ̂ʉtə Sê tû páp, ə́ ncóghʼ gháp mbó Sê ə́ ndǎʼ lə́ Mǎyaa ngô: «Môu gho wo gháʼá ḿbə́ yi Sê ghʉ̌ lěi lə́ zʉ́ ghʉ̌ sə̂ʉ kó pye tə nzáa Ísə́lahêl yaʼa, ə́ pǒu ghʉ̌ pə ŋə́ məkuʼ lə́ pye tə nzáa, ńté ńgó â ŋuu yi Sê laghʼ yé ńnyarə́ zə̂u yi a pə̌ ngʉ̂ zěi, lə́ pye-mə́soŋ kə̂ ngwâghʼ yé wághʼə́. 35Ə̂ lêitə́ yə́rə́, məkwaŋtə mi ə́ pə́ məntə̂ʉ pye kwátə́ mbi lâʼ. Ə́ ngwǒ lə́ gho Mǎyaa, mə́i no táa ghʉ̌ gho tə o zûʼ, ə̂ pə́ pə́ ghíʼ pə́ laghʼ mə́puʼ ńsâp ntə̂ʉ gho lə̂.»
Ánə sʉ̂ʉtə Sê ńté Yěso
36Cǒ ntikáŋ məngyě lə kə́ mbə̂ yé Yelúsalêm mpfu wêi, ləjôghʼ yé pə̂ Ánə, a pə̂ môu Fanyuwêl lə̂ ngər Azêh. A lə pə́ ntsətə-nkəʉ-Sê, ə́ nzóʼ, ə́ ngʉ́ pə̂ ndaʼ nguʼ saambwô ndə̂u yé kwʉ̂. 37A lə kə́ ncʉ́ʼ mbə̂ pə̂ mpfǒghʼ tə ntáa ngwô nguʼ ntsap ləkwo lə̂ mə̂m-fǎa, ə́ nyáŋ nkôŋ koŋə́ ńnyâŋ nji sʉ̂ʉtə Sê, ə́ mə́ ngúʼtə́ yé ntə̌ʉ-nəu gháp lətwûʼ, 38ə́ ntó ndə̂ Sê mpfu wêi, mə́i pə́ lâghʼ mə́ môu ńtó, a jwô yé, ə́ sóghʼə́ Sê, ə́ ncʉ́ʼ nkə́ mə́ ndêʼtə yé pə̂ no môu wei lə́ pye pə́tsəm pi gháp lə pə́ mbâp leʼé yi Sê wo ŋə́ ləcwôr lə́ pye Yelúsalêm.
Mbə̂u yi Yěso lǎghʼ ghúʼ Nǎzalêi
39Yosêp gháp Mǎyaa lə lêi tə sʉ́ŋ məno mi gháp lə tô mə́u tə myâghʼ, ghíʼ ləpə̌ʉ Nde lə́ pə́ ńtúŋú, ə́ mbə̌ʉ nzəm lə̂ túsoŋ páp Nǎzalêi cər paghʼə-ngoŋ Galilêi. 40Môu pə̂ ngúʼ, ə́ mə́ ntə̂itə́, jîno yé pə̂ nkʉ́ʼʉ́ gháʼate; a pôu mə́ njî zə̂u yi Sê pə̌ nkôŋ ńgó pye-mə́soŋ ghʉ́ zěi, mbwórə Sê pôu mbə́ lə́ zʉ́.
Yěso ghwo nguʼ ntsap pwô lə̂ ləghə̂m
41Yosêp gháp Mǎyaa lə́ pə̂ nguʼ tsəm ngwô Yelúsalêm lə̂ nzʉ́ lətsei Pásʉ́ka. 42Yěso ghʉ̂ ngwô nguʼ ntsap pwô lə̂ ləghə̂m, gháp pə́ pǎp naa ndə́r lə̂ wó ghíʼ *ləpə̌ʉ Mə̌usə̂i lə pə́ ntúŋú, 43ə́ nkə́u wó nzʉ́ lətsei tə myâghʼ tə mə́ mbə̂ʉ nzəm, môu nyâŋ yé Yelúsalêm tə́ ghó gháp jî. 44Gháp lə pə́ nkwâŋ záp pə́ ńgó a wə́ nou páp, ə́ ŋə́i tâʼ leʼé mboŋə́ jǐ lə̂ ndôu yé cər ngər ndə̂ zap gháp pə pye pə́tsəm pi gháp pə́ njî gháp. 45Káa jwô gháp yé, ə́ mbə̌ʉ lə̂ Yelúsalêm ńŋə́i ńdou yé, 46ə́ ghi lóghʼə́ leʼé tárə́, gháp jwô yé *ndə̂ Sê, a nyâŋ təcər *pəkeʼtə́-lə́pə́ʉ Mə̌usə̂i, ə́ mə́ nzûʼ məno mi gháp pə́ ndǎʼ, ə́ mbóu mə́ ntúŋú gháp məcó. 47Ə́ kəʼə pye pi gháp lə pə́ nzûʼ tsâr yé, ə́ mbə̂u yi a lǎghʼ ńjí no tə mbaa pə̂ mbə̂u yi a laghʼ ḿbwôr tsâr záp. 48Yosêp gháp Mǎyaa lou yé tə njwó yé sê yʉʼ wó, ə́ kəʼə gháp gháʼate. Mə́ yé lâʼ lə́ zʉ́ ńgó: «Môu ghâa, o ghí ghʉ̌ yo mbə̂u no lə́ paghʼ gháʼa, ə́ pə̂ gháʼá? O ghʉ mənzoʼ mághʼ tə́ gho tsóʼo. Paghʼ ŋaa mə́ ndǒu gho tə ncʉ́ʼ mə́ mbôghʼ zághʼ pə́ ńgó có zə̂u ghʉ mə́ gho.» 49A pwôr lə́ páp ngô: «Pei yaa ŋáa ndôu ghâa ńté hó? Káa pei jí ńgó n ngwo lə̂ sʉ́ŋ məno Tə́ ghâa mo?» 50A lə pwor lə́ páp yə́rə́ lə́u gháp zûʼ gháp no yi a laghʼ ńdáʼ po. 51Gháp pə pǎp cʉ̂ʼ mbə̂ʉ nzəm lə̂ Nǎzalêi, a pə̂ nzûʼ ntsʉ gháp. Mə́ ye lóʼo məno mêi mə́tsəm ntə̂ʉ zʉ́. 52Yěso pə̂ ngúʼ, jîno yé pə̂ nkʉʼʉ́, Sê pə̂ lə́ zʉ́, pye-mə́soŋ kə̂ mə́ nkôŋ záp no yé lə́wó.
Currently Selected:
Lúʼkáasʉ 2: NLA
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo