MATEO 7
7
Töweichacoono emmencadö
1“Ajimmotoncomo mma manemmencatäi’che, Wanaadi wwä mma mätämmencajooto’node änwanno. 2Änwanno mätämmencajaato’de anemmenca’jocoomo nönge mmaja. Änwanno mätääcamma’jajaato’de anejjacoomo anemmenca’jocoomo nönge dea. 3¿Ane’cotoojo aweichacoono wämmamö’jödö’cä mencano’taanä? ¿Amäädä äwämmamö’jödö adai’jä’cä yeichaame anencano’tä’da manä? 4¿Aaquene yääje mä’dödö deaade’ aweichacoono wwä: “Äwämmamö’jödö’cä wu’ca’ñojo;” quee, adai’jä yeichaame amäädä äwämmamö’jödö? 5Yääjönö wa’coto wäänejoodö amäädä. Äwämmamö’jödö adai’joto u’cacä awa’de, aashichaane meneiye yaawä aweichacoono wämmamö’jödö’cä u’cadö wetä.
6“Sö’na wwäiñe manu’täi’che aashichaato, adheecato’no yaawä. Cuushi wwäiñe amaayuduichomo manu’täi’chede, aneeta’jätö’noto yaawä.
Ane’ca’täcä; anuujichääcä; a’dejjatääcä
7“Ane’ca’täcä, äwwäiñe Wanaadi äntuiye; anuujichääcä, maneedantätäiye; a’dejjatääcä, mönaatata äwwäiñe ata’ducaiye. 8Ñäädä e’ca’nei wwä töwä’tue töweiye nai, ujiiñei wwä töwäädantojo, a’dejjanei wwä mönaatata töwaata’duca.
9“ ¿Änääcö adhantawäiñe täju u’jai ñai tönnedö wwä, tudu e’catäädawä? 10Na’cwacaano jeiñe mma e’ca’a’jäcä chäwwä, ¿änääcö äcääyu äntuduude’ ? 11Änwanno cone’da aweichaameiñe odhoowanääcäiñe aashichaato utuudu ännacontoncomo wwä. Töwaacö’je Oomotoncomo caju ñano aashichaato u’jai ña töwwä e’ca’nei wwä.
12“Äjääcäiñe soto yei’sheiñe maatoodöje mmaja chääjäcäiñe eichäcääde. Mädääje dea nä’döa waanontänä imennajä, yää Moisé nimennä’jödö, Wanaadi wa’deuwödö ecammannamo nimenno’jocoomo mmaja.
Mönaatata she’coto’cä
13“Odhoomontäcä she’coto’cä mönaatata ai. Adai’jä mönaatata na, tucuude mmaja ääma, wännanö’tojo tacaano. Jooje yää ainchomo wötäädö naato. 14Caju ñano wötootojo nata’tadö mmaane she’caasa na, änwacö’me mmaja chäämadö. Wanna’da naato yää ejoodönnamo.
Chääjedöödö jäcä dee ene’jutuudu
15“Äädai’chätääcä ecammajä’nnamo chäänöngemjöncomo jäcäiñe, ñanno Wanaadi woija’como wätä’tädö. Tönwanno ne’aato’de adhencu’täiñe, oweeja nönge’jödö mma, tääde’cwademjöncomo wa’cä, madooje töweichaameiñe. 16Iiñödööcomo jäcä ene’ju’jai maato. Tameemö ejeedödööje eijai’cha na wesooca ejeedödö; waju’nä ejeedödööje eijai’cha na dea adhaawidi ejeedödö. 17Tameedä dee aashichaato, aashicha chääjedöödö; dee conemjönö mmaane cone’da chääjedöödö. 18Aashichaato dee, cone’da chääjedöödö ei’cha töweiye nai. Conemjönö dee ’quene aashicha chääjedöödö ei’cha daja. 19Tameedä dee conemjönö chääjedöödö tödaaca töweiye nai, wa’to nwaca yau’cwadö wetä yaawä. 20Yääje yeijäcä iiñödööcomo jäcä ene’ju’jai maato ñanno ecammajä’nnamo chäänöngemjöncomo.
Tameedä’da nomongaato’de
21“Tameedä’da nomongaato’de caju ña: “Cajiichaana, Cajiichaana;” que’como wä’dödö. Ñannoone, Jaaja caju ñano woije tödönnamoone nomongaato’de. 22Yää anooto awä jooje soto nä’döaato’de öwwä: “Cajiichaana, Cajiichaana, adha’deddu töneecammajä’e töweiye ñaa cönä’jaacä, adheetö joi odo’shancomo tömja’canö’jo ñaa cönä’ja’dea; adheetö joi chea jooje täneemö tönnöe ñaa cönä’ja’dea;” quee nä’döaato’de öwwä. 23Yaawä öwö wä’döa’de chäwwäiñe: “Yoowanääcä’da maato. Ojoncomo jonno, änwanno conemjönö dönnamo;” quee wä’döa’de.
Aacä maa amännamo wei’jocoomo
24“Yääje yeijäcä ñäädä ya’deddu töneeta’jödö tödöönei dhanwa tösejjecaato wei’jödö nönge na. Ñäädä dhanwa tömmai cönaamäi tooja de’wä. Täije cönnöi. 25Conoojo cöniiñai yaawä; jejeichä chääjäcä cönä’döi jooje. Yääje yeichaame ata’dojo’da cöneiyacä, tooja de’wä yo’wadö weijäcä. 26Ñäädä ya’deddu töneeta’jödö ännöjöönö mmaane dhanwa aneene’ju’jönö wei’jödö nönge na. Ñäädä dhanwa tömmai cönaamäi sa’dada de’wä mmädä. 27Conoojo cöniiñai yaawä; cuncumai yaawä; jejeichä chääjäcä cönä’döi jooje. Yää maa cönaata’dojoi yaawä, täta jooje; quee cönä’döaacä Jesuuquidiito tönoowanoomadö wwäiñe, soto wwäiñe mmaja.
28Yääje Jesuuquidiito wa’deuwa’jäcä ñanno soto cöneeta’jöjäätöicho, 29jäduuje owaanomaadö weijäcä chäwwä, judhío owaanomannamo nowaanomaadö nönge’da.
Currently Selected:
MATEO 7: MCH
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2014 Reservados todos los derechos