Luka 8
8
Oku azini ’diyi mu yi be
1 #
Luk 4:43
Eri nga eca ’dini o’du ’diyi ma vutia, eri nga ad aku amboru ’diyi vusi were ’diyi be, e’yo baru suru Mungunirini oluzu, ’ba erini mudri drini iri ’diyi mu eri be indi, 2#Mat 27:55-56; Mar 15:40-41; 16:9; Luk 23:49oku azini ndra orindi onzi be, kani azo ndu ndu be, erini atile ’diyi pie: Mariamu omvele Magadaleni orindi onzini efuzu eri alia aziriri pi, 3Yoana, Kuza ’ba afa Herodeni ma agei tepiri vile okuri pie, Susana pie, oku azini pie kakau, adripi eri ma aza kopi afa yinisi ’diyi.
E’yo o’bele ’ba ori ripirisiri
4 #
Mat 13:1-23; Mar 4:1-20 ’Ba ongulumuru kakau ka yi oku ra, ’ba engapi aku vusi aku vusi emupi eri vu ’diyi be dria, eri ’yo yi tia e’yo o’bezani: 5’Ba ori ripiri fu ori erini ri; erini riria, azini nga o’de geri tia, ’ba yi nga otu pasi, aria ’bua ’diyi nga o’du nya ra. 6Azini nga o’de kata dria; ori nde enga ra, nga onyu mbele mbele, nyakuni ovule anzuru kurisi. 7Azini o’de oci talaa; oci nga zo yi be, nga yi ondri. 8Azini nga o’de nyaku onyi beri ma alia, yi nga enga ra, nga efi ’ya turu alu. Erini e’yo ’diri ’yoria, eri oyu uru, ’Ba bile be e’vo erizuri ma eri ra.
9’Ba erini imbale ’diyi nga e’yo o’beza ’diri ma efi ngoni yari zi eri tia. 10#Isa 6:9-10Eri ’yo yi tia, Eri ovu fezaru emi dri suru Munguni ma e’yo zizaru ’diyi nizu; te ’ba acepi ’diyi dri yi e’yo ece e’yo o’bezasi, yini ndreria yi ma ndre ku, yini eriria indi yi ma va etini ku. 11#1 Pet 1:23E’yo o’beza ’diri eri ’dini: Ori nde eri e’yo Munguni. 12#1 Kor 1:21’Ba geri ria ’diyi yi ’ba e’yo eripi ’diyi, te vutinia ’ba asu supiri nga emu e’yo pa yi asia, yi kazu a’izu ovuzu pazaru ku. 13’Ba kata dria ’diyi yi ’di yi ’ba e’yo eripi a’ipi ayikosi ’diyi, te yi ovu ola kokoru, yi a’i o’du were, te o’du obetani ka eca ra yi ku ra. 14Ori o’depi oci talaa ’diyi, yi ’ba e’yo eripi ’diyi, te yi ka mu geri yinia, asi otiza pi, lonyi pie, ayiko idri ’dirini pie nga yi ondri ra, awini di efi ’ya de dria ku. 15#’Yeta 16:14; Ebra 10:36; Eceza 3:10Ori o’depi nyaku onyi beri ma alia ’diyi, yi ’ba e’yo eripi asi lokiri kokoru onyirurisi ’diyi, yi bi e’yo nde ci, azini yi efi ’ya asi tezasi.
Tala ti opizu afazusiri
16 #
Mar 4:21-25
#
Mat 5:15; Luk 11:33 ’Ba aluni tala ’ipi tini opipi afazusi cini yo, kani ’bapi gbolo etiani yo; te yi eri ’ba afa tala ’bazuri ma dria, ’ba efipi joa ’diyi nga dizani ndre beni. 17#Mat 10:26; Luk 12:2Afa zizaru aluni ngani ovu e’dakokoru ku, afa tani mbaleri aluni ngani ovu nikokoru, fuzu mgboru kuni ku. 18#Mat 25:29; Luk 19:26E’yo ’disi emi ma ndre geri emini e’yo erizuri; ’ba afa beri dri yi nga afa fe, te ’ba afa kokoruri ma dria, yi nga afa erini egale kini eri ovu yi be indiri pa ra.
Yesu andri pi adripi be
19 #
Mat 12:46-50; Mar 3:31-35 Andri erini pi adripi erini be yi mu eri vu, te econi yini ecazaru eri vu ’ba ongulumuru dri ku. 20’Ba olu eri tia, Mi andri pi mi adripi be yi so pa amve, yi le mi ndre. 21Te eri omvi e’yo, nga ’yo yi tia, Ma andri pi ma adripi be yi ’ba e’yo Munguni eripi ’yepi ’diyi.
Yesu fe olirikoni ovuzu ndi
22 #
Mat 8:18, 23-27; Mar 4:35-41 Te eri nga di eca ’dini o’du nde ’dayi ma azinisi, eri fi oguru alia, eri ma ngulupi pi ’ba erini imbale ’diyi be, eri ’yo yi tia, Ama ma zo miri tia ’aa’dasi. Yi nga mu ra, 23te oguruni aciria miri dria eri ’ba o’du ko. Te oli amboru nga enga li miri ma dria, yi ’ye ga oguru alia tre, yi ovu e’yo ewaru ma alia drileonziru. 24Yi eca eri vu, yi oru eri ra, kini, Ambo la! Ambo la! Ama dri ja ’do fo! Eri nga enga ra, nga ega oli pi ma dria yi ombupi omburi be; yi nga pa so ndi, angu nga ndri tili. 25Eri ’yo yi tia, A’ita emini ngoa ya? Te yi ovu urisi, yi osu tu, yi nga e’yo ’yo yi eselia kini, ’Ba ’diri eri ’ba ngoni ngori’i ya, erini e’yo azizu oli pi ma tia miri be, yini e’yo erini inzizu ’dini?
Yesuni Geraseou orindi onzi beri atizu
26 #
Mat 8:28-34; Mar 5:1-20 Yi eca angu ’ba Gerasenini, i otipi Galili beria. 27Eri ka efu oguruasi erini ecazu yi kuria ’boria, agu azini engapi akua ovupi orindi onzi be eri ma aliari nga dri fu eri be; o’du kakau eri suni bongo ku, ovuni joa ku te eri adri ovu nyadri eselia. 28Eri ka Yesuni ndre ra, eri oyu uru, eri eco i va eri ma drilia, nga ’yo o’duko urusi kini, E’yo mini ma be ngoni ya, Yesu mi Mvi Mungu Uru Turini? Ma matu ’ba mi vu, mi ecandi ma ku, 29A’disiku eri ovu orindi onzi alata kokoruri aziria, kini eri ma fu agu nde ma alia ra. (Te eri bi eri ewu kakau; yi adri eri ombe anziriku pisi emve be eri agei tezu, te eri nga afa eri ombezu ’diyi onyo ra, orindi onzi nga eri dro angu roko dria.) 30Yesu zi eri tia kini, Mi ru a’di’i ya? Eri ’yo ra, Kakau’i; lorindi onzi kakauni file eri ruaarisi. 31Orindi onzi nde nga matu ’ba eri vu eri ma azi yi fuzu muzu ’bilea ku. 32Isu ezo ongulumuru kakau yini iribi nyaria oni ombetia; yi nga matu ’ba eri vu eri ma fe geri yi dri fizu ezo nde ’diyi ma alia ani. Eri nga geri fe yi dri ra. 33Orindi onzi yi nga efu agu aliarisi ra, nga di fi ezo alia; ezo ongulumuru afi rri i nzuzu angu gulukuru ma aliarisi O’dezu miria, nga odra yisi.
34’Ba yi ocepi ’diyi ka afa i ’yepiri ndre ra, yi nga apa ra, e’yo ’di oluzu aku amboru pi ma alia angu ageinia ’diyi be. 35Yi efu afa i ’yepiri ndrezu, yi eca Yesuvu, yi isu agu re orindi onzini efuzu aleniari erini riria Yesu ma paaleru, bongo be ruaa, asisile be kililiru; yi ovu ani ovu. 36’Ba te e’yo ’di ndrepi yi milesi ’diyi nga e’yo ’ba orindi onzi berini i pazuri olu yi tia. 37’Ba ongulumuru dria angu ’ba Gerasenini ma ageia ’diyi nga zi eri tia, kini eri ma ku yi ra; te uri bi yi tu; eri nga fi oguru alia, mvi ra. 38Te agu te orindi onzini efuzu aleniari ’ba matu eri vu, kini i ma ovu eri be; te eri pe tini mvizu, kini, 39Mi mvi jo minia, mi ece e’yo amboru Munguni ’yele mi beri. Eri mu ra, eri nga di e’yo amboru Yesuni ’yele eri beri olu aku amboru ma alia dria.
Yairo zi pi oku Yesu ma bongo ti elopiri be
40 #
Mat 9:18-26; Mar 5:21-43 Yesu ka emvi ra, ’ba ongulumuru nga eri a’i ayikosi, yi driani ovule eri tele terisi. 41Mi ndre, agu nga emu ra, runi Yairo’i, eri ’ba amboro pari ’bani yi okuzuria; eri eco i va Yesu ma palaa, nga matu ’ba eri vu kini eri ma emu fi jo inia, 42#Luk 7:12a’disiku eri ovu zamva erini be alu ilipiliru, eli be dria mudri drini iri, te eri ’ye dra dra. Te erini muria, ’ba ongulumuru omi eri ci ci. 43Oku ovupi azo arini razu ruaniari be eli mudri drini iri, afa erini fepi depi dria ojou dri ti, ruanini ecozu atizu ani ojou aluani dri kuri, 44nga emu geri eri ngukuarisi, nga bongo erini ma ti elo; coti ari raza erini nga nzu ra. 45Yesu kini, A’di elo ma ruani ya? ’Ba dria ka ga si, Petero nga ’yo ra, Ambo la, ’ba ongulumuru ga mi ageia tre, yi mi rua omi omi! 46Te Yesu ’yo ra, ’Ba azini elo ma rua ra; mani nile kini okpo fu ma ruaa ’borisi. 47Oku ka ndre ra kini i econi i zizaru ku, eri emu rua yaza be, nga i eco va eri drilia, nga e’yo eti fepi ini eri rua elozuri olu ’ba ongulumuru ma milia dria, e’yo i ruani atizu cotiri be, 48#Luk 7:50Eri ’yo eri tia, Ma zi, a’ita mini pa mi ’bo; mi mu di asi anzuru be.
49De erini nga e’yo ’yoria, ’ba azini engapi ’ba amboru pari ’bani yi okuzuriari ma joari nga emu ra, nga ’yo kini, Mi zi dra ’bo; mil ecandi ’Ba ’ba Imbapiri dika ku. 50Te Yesuni e’yo nde eriria, omvi e’yo tinia kini, Mi ru ku; mi a’i lu kiri’i, eri nga ovu pazaru ra, 51Eril ka di eca akua ’bo, eri a’ini ’ba azinini fizu i be ku, pe lu Petero pi, Yohana pie, Yakobo pie, zamva mal ati pi andri be a’dule. 52#Luk 7:13’Ba driani awu wuria azini lulu garia erisi, eril ’yo fa, Emi wu ku; eri drani ku, te eri o’du ko. 53Yi ogu eri ogu ogu, yini nile kini eri dra te ’borisi. 54Te eri bi eri dri, nga eri omve kini, Zamva, mi enga uru. 55Orindi erini emvi ra, eri enga perepere uru; eri azi ’ba ma fe afa nyaza eri ’dri. 56#Luk 5:14; Mar 7:36’Ba eri tipi ’diyi osu tu; te eri azi yi tia kini yi ma olu e’yo ovupi ’yezaru ’diri ’ba aluni ma tia ku.
Currently Selected:
Luka 8: LB66
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible in Lugbara © United Bible Societies, 1966.