Luka 5
5
E’bi okuzu kakau
1 #
Mat 13:1-2; Mar 3:9-10; 4:1 Eri nga eca ’dini, de ’ba ongulumuru yini eri omiria ci ci e’yo Munguni erizu, isu eri so pa miri Genesaretini ma tia. 2Eri ndre oguru irini pa soria yi kutia; te ’ba e’bi okupi ’diyi efu oguru nde ma aliarisi ’bo, yi ovu emba yini ojiria. 3Eri tu oguru ’diyi ma azi alu Simoni vileri ma alia, eri zi eri kini ma si yi alialeru, ma ku kuti were. Eri ri va, nga ’ba ’ba ongulumuru imba de eri ovu oguru alia. 4#Yoh 21:6Ka de e’yo oluzu ’bo, eri ’yo Simoni ma tia, Emi si yi aliru ma alialeru, emi su emba yia e’bi okuzu. 5#Yoh 21:3Simoni omvi e’yo kini, Ambo la, ama ecandi,te ama ini be rra ti, te ama isuni afa aluni ku! Te e’yo minirisi ma nga emba su yia. 6#Yoh 21:6Yi ka ’ye ’dini ’bo, yi oku e’bi ongulumuru kakau; emba yini ’ba yi ce ce; 7yi aku yi agyi yini azi ngazu yi be tualu ovupi oguru aziniri ma alia ’diyi, kini yi ma emu yi aza ko. Yi emu ra, yi ga oguru iri ’diyi ma alia tre tre, oguru nde ’diyi ’ye ’de yi alia ’de ’de ani. 8Te Simoni Petero ka ndre ra, eri eco i va Yesu ma kumutia, kini, Mi nga ma vurisi fo, mani ovule ’ba onzinirisi, Opi! 9Te eri osu tu, ’ba dria ovupi eri be ’diyi be, e’bi karakarau yini okulerisi; 10#Mat 13:47’dinile anzi Zebedayoni, Yakobo pi Yohana be, yi agyi azi ngapi Simoni be tualu ’diyi, yi osu osu indi. Yesu nga di ’yo Simoni ma tia kini, Mi ru ku; engazu curu’do mi nga ovu ’ba ’ba okupiriru. 11#Mat 19:27Yi ka oguru yini ji kutia ’bo, yi ku afa dria, yi bi eri vuti.
Yesuni ’ba ofu beri atizu
12 #
Mat 8:1-4; Mar 1:40-45 Eri nga eca ’dini, de eri ovu aku ’diyi ma azi alu ma alia, isu agupi alu indi, ofu nya eri rua kurubu; eri ka Yesuni ndre ra, eri nga i eco o’bukuru va, nga matu ’ba eri vu kini, Opi, mi ka le ra, eco mini ma rua ’bazaru alaru. 13Eri eju i dri, eri elo eri rua, kini, Ma le ra; mi ovu di alaru. Ofu ku di eri rua coti. 14#Lev 14:1-32; 13:49Eri azi e’yo eri tia, eri ma ’yo ’ba azini ria aluni ku; te kini, Mi mu leti minia, mi ece mi ngulupi kuhani dri, mi ofe edeta mi ruani ecazu ’alaruri ma e’yosi kile Musani azilerile, e’yo eti nzezu yi dri. 15Te di e’yo erini ku tu aga ra; ’ba ongulumuru kakau nga yi oku tualu ani e’yo erizu, azini dra yini ma ati ani beni. 16#Mar 1:35Te eri ma ngulupi enga yi eselia, mu roko dria Mungu zizu.
Yesuni ’ba acozari atizu
17 #
Mat 9:1-8; Mar 2:1-12 Eri nga eca ’dini, o’du ’dayi ma azinisi, de erini ’ba imbaria, ’ba Farisaini piyi ’ba azita imbapi ’diyi pie, engapi aku nyiri nyiri dria Galilia ’diyi ma alia, Yudiaa ’diyi pie, Yerusalemua be ’diyi ri eri ma ageia; te okpo Opini ovu eri be ’ba ma rua atizu. 18Te mi ndre, ’ba eji pari dria agu alu azo ’ba ruani yazu yari beri, yi nda geri eri ofizu ’bazu eri ma drilia; 19te ’ba ongulumuruni ovule trerisi, yi nda geri eri ofizu ti, yi nga tu ani jo dria uru, nga regula ma azi onze, nga eri osi va talanisi pari erini be ’ba ma eselia Yesu ma drilia. 20Erini a’ita yini ndreria, eri ’yo ra, Agu la, wu e’yo onzi mini ’bo. 21#Luk 7:49; Isa 43:25; Yoh 5:12Karani piyi ’ba Farisaini be ’ba e’yo ozi yi eselia kini, ’Ba Mungu o’dapi ’diri eri a’di’i ya? A’di eco e’yo onzi wuzaruni, pe Mungu’i a’dule ku ya? 22Te Yesuni erini e’yo yini ozile yi asiari varia, nga e’yo omvi ’yo yi tia, Emi e’yo ozi emi asia ngoni ya? 23Ewa kokoru turi ngori ya, ’yozu, Wu e’yo onzi mini ’bo; kani ’yozu, Mi enga uru, mi aci? 24Te emini nizu ani kini Mvi ’bani ovu okpo be nyakua e’yo onzi wuzu, (eri ’yo ’ba azo ruani yazu yari beri ma tia) Ma ’yo mi tia, mi enga uru, mi ’du pari mini, mi mu mi vile joa. 25Eri enga perepere yi milia uru, ’du pari ini te lazu driniari, eri ko dri mvi jo inia, ji mu Mungu ru inzi so. 26’Ba dria yi osu tu, nga Mungu ru inzi; uri ga yi asia, yi ’yo ra, Andru ama ndre afa osutaru tu turi’i.
Yesuni Levini omvezu
27 #
Mat 9:9-13; Mar 2:13-17 E’yo ’diyi ma vutia eri fu amve, nga ’ba musoro okupiri alu ndre, runi Levi’i, erini riria pari ’bani musoro ’bezuria; eri ’yo eri tia, Mi bi ma vuti. 28Eri ku afa dria, eri enga uru, bi vutini.
29 #
Luk 15:1
Levi a’di eri dri omu amboru jo ini ma alia; ’ba ongulumuru kakau musoro okupi ’diyi ’ba azini be indi, yi ori nyaka tia yi be. 30#Luk 15:1-2’Ba Farisaini piyi karani yini be nga no ’ba erini imbale ’diyi ma dria, ’yozu kini, Emi nya azini emi mvu ’ba musoro okupi ’diyi be tualu, ’ba e’yo onzi ’yepi ’diyi be, a’disi ya? 31Yesu nga e’yo omvi, ’yo yi tia, ’Ba rua be alaru ’diyi leni ojou ku, te ’ba azo be ’diyi leni; 32ma emuni ’ba kililiru ’diyi omvezu ku, te ’ba e’yo onzi ’yepi ’diyi omvezu asi ojazu.
Zi zita nyaka ’daza Ina e’yosi
33 #
Mat 9:14-17; Mar 2:18-22 Yi ’yo eri tia, ’Ba Yohanani imbale ’diyi adri nyaka ’da pale kakau, Mungu zizu indi, ’ba Farisaini imbale ’diyi ’ye ’dinile indi; te ’ba mini yi nya, yi mvu. 34Yesu ’yo yi tia ’dini, Eco emini nyaka ogazaru otala izio ma joa ’diyi dri, de nga izioni yi be indi ra ya? 35Te o’du yini ngazu izioni nzezu yi ma eseliari nga eca ra, yi nga nyaka ’da o’du ’darisi ndo. 36Eri nga e’yo eti o’be yi tia indi: ’Ba aluni asini bongo o’diru ecizu bongo okuri ma ruaa ku; ka ’ye ’dini, eri nga bongo o’diru asi ra, azini vini bongo eciza engapi o’diri ma aliari ngani i si okuri be ku. 37’Ba aluni toni patiefi ma su o’diru enyi okuri ma alia ku; ka ’ye ’dini, patiefi suni nga enyi asi ra, patiefi suni nga i ada va, enyini nga i eza ani indi. 38Te ’ba ma to patiefi su o’diru enyi o’diru ma alia. 39’Ba aluni patiefi su okuri mvupiri ngani o’dini le ku; te eri ’yo ra, Okuri onyiru.
Currently Selected:
Luka 5: LB66
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible in Lugbara © United Bible Societies, 1966.