NITRITI 48
48
Yakub ngat nadi kep Efraim kin Manasye
1Mpe hi bu lene hi pai nicig ninghapti tut ninggwenti bak Yusuf. Gima rino noni buwak nipmot bat cin di Manasye kin Efraim biyuug yok igyai kep noni. 2Tirigi Yakub miap tut bipia Yusuf kwei ngat noni tu lene noni bikiju bigwam pijum ei nibongti. 3#Kej. 28:13-14 Lene pai bak Yusuf “Allah Di Sindem Bibor tau kep da ei Lus ei minu Kanaan binjei mun di kei bak dani. 4Lene Noni preu ei mem da bipia Noni mibindei ba, ditde nintun him yamti di bram yam nya idigek kep mpia apino inok pung di keret nya imang bibor intun him. Lene Noni mipek minu dima hagom bida kin ditde nintun him yamti di bram yam nya bijo ninno.
5Yusuf e, midijem apmot bat cin Efraim kin Manasye di atnem yai bina ei minu dini nipou tirigi dikwei bigyo nok dipmot bat cin bu noyam kin Ruben Simeon nya. 6Gino atnem miyai apmot bat nya hi kin bu bina lene midijem yok dipmot bat nya bi. Lewo yoni miba yo kep ndiyok tug hon Efraim kin Manasye hak ug. 7#Kej. 35:16-19 Dipai dingon kanti dini bina drek dip apmem Rahel di mai kep da kak puig sinon ei minu Kanaan tirigi nyeni ikwei leu Mesopotamia bimbut ug ei dideu Efrata. Dingon ngguk tut noni nindig bibor biditig ei simpak di ug ei Efrata ninghas him.” (Nogindini ijem Efrata ninyeng Betlehem bu.)
8Tirigi Yakub ngat Yusuf nipmot bat cin lene hig ser noni “Munggwom dini inyeng tou i?”
9Lene Yusuf buhup “Dipmot bat cin di Allah yai bida ei minu dini ri.” Lene Yakub pai binoni “Ma ikwei ya kui da bidingat nadi tindei yok.” 10Yakub ninghim koi bibor ba, niyai cem mmui su. Gima rino ngat igbit yok bi. Leu api Yusuf son nipmot bat cin bigya kui nicig leu api Yakub nggriou yok bimei yok. 11Bipai bak Yusuf “Apo dikan bigya midingat angat bou diyai him bu bi sren. Noro Allah bon nituti mem gima dingat angat he bi noro dingat apmot bat cin ingat cem bou diyai him.” 12Lene Yusuf kon yok leu Yakub nimigsi bikuk no ei nicig noho bei lene ba ningwak bikik mpia.
13Leu api noni kes Efraim biya kui Yakub ninda prak ba, kes Manasye biya kui ninda com. 14Noro Yakub su ninda hagau yam lene ba ninda com bitak kep Efraim di nindrim nibou nggram him. Lene ba ninda prak bitak kep Manasye di mighumbou nibou nggram him bu. 15Lene noni ngat nadi tindei Yusuf bipai,
“Nna ba Na di Allah di dicig kin dignyon ikuk yok bak e, Na di anyohou da habiei kwei bipek ammani kep tu e,
16Nani ne malaikati di teu da bidingwes ngun leu mun di cut igkep da hagom e, ma anyohou munggwom cin dini yok bu! Nna ba ingon prion ser dinyeng kin Abraham Ishak nya cem inyeng bi sren. Nna ba igyai imunggwom bat nya imang bibor ba, ide nintun him yamti di bram yam nya idigek kep mpia.”
17Tirigi Yusuf ngat lo, nicig ba ninda com bitak kep Efraim nibou nggram him lene ningon kei bi. Gima rino kon nicig ninda com leu Efraim nibou nggram him bikes ei Manasye nibou nggram him bu. 18Bisrep tut nicig bipai “Andigpoi e, nok bi. No dini ne mighumbou rin ba, akes anda com bijo ei nonti nibou nggram him.”
19Noro nicig kou sut bipai “Dipmot na, dikan tu dikan tu. Dwai. Manasye miyai ninyeng di jei leu api nide nintun him yamti di bram yam nya midigek kep mpia. Noro nikinjoi miyai ninyeng di jei bibor bu leu api nide nintun him yamti di bram yam nya inok pung di keret nya imang bibor intun him.”
20 #
Ibr. 11:21
Lene noni pai nimbot kepti tut yok mem njap dima bipai “Mben Israel mindat kep jinyeng tirigi ingat nadi tindei tungwatu nya bipia nna ba Allah bindei ba, inok Efraim kin Manasye.” Gima rino Yakub kon Efraim ninyeng bijo bibie leu Manasye ninyeng a.
21Lene Yakub pai bak Yusuf “Jo nibreisi bipia son dideu diyaijo ningwig honti tu. Noro Allah minyohou jahagom leu api buwak jahagom hanyen ug ei jidigup bat-jidigai bat nya itimieisi. 22Nangkom aba nakep dihyei hanjop nsi di nnum kei ei Sikhem njiriek leu akindig bat nya kin akinjoi. Diba simeda kin tibor biyai hanjop nsi dima leu mben Amori.”
Currently Selected:
NITRITI 48: HAD
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo