NITRITI 46
46
Yakub kin nide bat nya yahagom yuug ei minu Mesir
1Lene Yakub nyohou dimig nide ndigban hagom buug sut ug ei Bersyeba leu api bui mindhe-ndhe nya bindig kep hum ei nimbar hum dokti bak Allah di nicig Ishak kuk no bak. 2Mmun mau rino noni ngat ningat-hi-ngat bingat lo, Allah mbrap bit noni bipai “Yakub e, Yakub e?”
Lene noni buhup “We? Da rini.”
3Lene Allah pai binoni “Dani ne Allah di acig kuk no bak ri. Ma attin tut gima ambut ug ei minu Mesir au. Lewo midibindei ba, ade nintun him yamti di bram yam nya idigek bibor binok mben nindig bibor bu. 4Midingat rin bit na bidinyohou na kikau ug ei minu Mesir. Ei nidipti bu ne midibuwak ade nintun him yamti di bram yam nya hanyen kwei ei itimieisi dini. Yusuf migwam bit na binam ninda bidwip ayai mpau tirigi annei kimbas a.”
5Lene Yakub nya ijo leu Bersyeba. Nipmot bat nya ikon noni kin itnem bat imunggwom bat nya yahagom bikes yok ei kroba di nibou ndig mben Mesir pinak kwei mem yok pima dip. 6#Kis. 7:15 Lene ijem ide mindhe-ndhe nya hagom bipwoi ide mun di inyeng tut nya ei minu Kanaan hagom pwoi bimbut tut ug ei minu Mesir. Yakub buwak yo di intun noni him yahagom. 7Nok nipmot bat nya kin nipmisop bat nya kin nignyon bat nya yahagom.
8Yo di intun Yakub him di ibit noni ug ei minu Mesir inyeng rino Ruben di mighumbou. 9Kin Ruben nipmot bat nya di inyeng rino Henokh kin Palu kin Hezron kin Karmi. 10Kin Simeon bitut nipmot bat di inyeng Yemuel kin Yamin kin Ohad kin Yakhin kin Zohar kin Saul di nitnem timiei minu Kanaan yai binoni. 11Kin Lewi bitut nipmot bat di inyeng rino Gerson kin Kehat kin Merari. 12Kin Yehuda bitut nipmot bat di inyeng rino Syela kin Peres kin Zerah. Nipmot bat cin Er kin Onan imai leu noni ei minu Kanaan nipou su. Kin Peres nipmot cin di inyeng rino Hezron kin Hamul. 13Kin Isakhar bitut nipmot bat nya di inyeng rino Tola kin Pua kin Ayub kin Simron. 14Kin Zebulon bitut nipmot bat di inyeng rino Sered kin Elon kin Yahleel. 15Yo dini yahagom ne Lea nipmot bat nya di noni yai bak Yakub ei Mesopotamia ri. Kin nipmisop Dina cem. Yo di intun Yakub him tug hon Lea yahagom imangti ibou ningot ningai ba, ningai.
16Kin Gad bitut nipmot bat nya di inyeng rino Zifyon kin Hagi kin Syuni kin Ezbon kin Eri kin Arodi kin Areli. 17Kin Asyer bitut nipmot bat nya di inyeng rino Yimna kin Yiswa kin Yiswi kin Beria kin ikwohop Serah. Lene Beria yai nipmot bat cin di Heber kin Malkiel. 18Yo dini yahagom ne Zilpa nipmot bat nya di noni yai bak Yakub rin ba, noni ne sop awak di Laban kes bak Lea pima ri. Yahagom imangti ibou simnaimuhwidip brimigtehigom.
19Kin Rahel nipmot bat cin Yusuf kin Benyamin di noni yai bak Yakub. 20#Kej. 41:50-52 Lene Yusuf nitnem Asnat di nicig ninyeng Potifera di nok imam ei Heliopolis yai nipmot bat cin di Manasye kin Efraim binoni ei minu Mesir. 21Kin Benyamin bitut nipmot bat di inyeng rino Bela kin Bekher kin Asybel kin Gera kin Naaman kin Ehi kin Ros kin Mupim kin Hupim kin Ared. 22Yo dini yahagom ne Rahel nipmot bat nya di noni yai bak Yakub rin ba, imangti ibou simnaibrimigtai.
23Kin Dan bitut nipmot Husim. 24Kin Naftali bitut nipmot bat nya di inyeng rino Yahzeel kin Guni kin Yezer kin Syilem. 25Yo dini yahagom ne Bilha nipmot bat nya di noni yai bak Yakub rin ba, noni ne sop awak di Laban kes bak Rahel pima ri. Yahagom imangti ibou muhwindacan.
26Yakub de nintun him yamti di bram yam nya di imbut ug ei minu Mesir yahagom imangti ibou ningot muhwindagom ba, muhwindagom. Noro ikwop Yakub nignyot bat nya imangti bi. 27#Kis. 7:14 Yusuf nipmot bat cin di nitnem yai binoni ei minu Mesir bikum Yakub nipmot bat nya di imbut ug ei minu Mesir ba, yahagom imangti ibou ningot muhwindacan.
Yakub nya yuug krau minu Mesir
28Lene Yakub cuk Yehuda bipia dor bibie leu noni bisok nihyet bak Yusuf ba, kwei um yok ei Gosyen. Tirigi yoni yuug krau lene, 29Yusuf bri nide kroba pran buug ei Gosyen lene um nicig ei sirima. Lene noni nggriou nicig bipim ba, niyai nggwei kibor bijo ninno. 30Lene Yakub pai bak Yusuf “Dem tu. Nna ba dimai hak ug lewo dingat angat bou diyai him bidikan tut bipia ayaisi jo yo.”
31Lene Yusuf pai bak nikindig bat nya kin nikinjoi kin nide bat nindigsi nya yahagom “Suar da duug ngat Firaun ba, midipai binoni bipia dide bat nya po ibong ei minu Kanaan pima yahagom ikwei ngat da tu. 32Leu api midipai brei binoni bipia jahagom jihyen kep mindhe-ndhe nya kan ba, jijem jide domba nya kin kambir nya kin sapi nya hagom ba, jipwoi mun di jinyeng tut nya hagom bijikwei sut. 33Gino Firaun sok nihyet mem gima juug ngat noni ba, hig ser je tut jide midyai di jiyai kepti nya lene, 34ma jibuhup bipia jihyen kep mindhe-ndhe nya habiei jimien kikau kwei bipek ammani kep bit leu nok jidigup bat-jidigai bat nya di igyai kep midyai nok gima nipou su. Gima rino noni misindui sut je bijibong ei Gosyen.” Yusuf pingok ingonti nok lewo timiei minu Mesir nya ikou sut gima ijem isut bit yo di ighyen kep domba nya kin kambir nya.
Currently Selected:
NITRITI 46: HAD
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo