NEHEI LEUSI 2
2
Musa ningwoi-ngwoi
1Mpe dima lene tungwagom di ntun keret Lewi him ug wak sop gom di ntun keret dima cem him. 2#Kis. 7:20; Ibr. 11:23 Leu api nitnem yai nipmot gom binoni. Tirigi nitnem ngat lo, ningwoi-ngwoi dima kei bibor kei lene ku noni nyahan kikau mem bed ningai.
3Tirigi bit bon ku nipmot bu kan bi lene noni yai bansi gom leu api ba aspal bikingkrai bei nisai hagom ser minyei. Lene noni kes ningwoi-ngwoi dima bibong nyahan eisi lene ug sut ug ei Minyei Nil leu api kes bansi bipiar nyahan tut ei lipig nghousi. 4Lene ningwoi-ngwoi dima nikwohop ku no nyahan ei mam bei bitou kep mun di mipek kep mem nikijam.
5Mpe dima lene Firaun nipmisop juk kwei ei Nil nyai ba, mikek minyeiti lo, nide awak nya igya-ya nyen ei nipimat bigya ser. Jei bi lene noni ngat bansi ei lipig nghousi pima leu api cuk nide awak sop gom mem gima yai kwei binoni. 6Lene noni kau nibeng leu bingat lo, munggwom pinai hi no bong eisi a. Lene ningwoi-ngwoi dima pim apino sop dima ngondut bipai “Gini ne ningwoi-ngwoi mben Ibrani pima ri.”
7Lene ningwoi-ngwoi dima nikwohop kwei hig ser noni “Gino ajoi sut lene duug nggok sop mben Ibrani hi di miyai do bak ningwoi-ngwoi dima e?”
8Lene Firaun nipmisop ce bipai “I, aug nggok hi hak ug.” Gima rino misop dima ug buwak nonti nipmem kwei. 9Lene Firaun nipmisop cuk ningwoi-ngwoi pima nipmem bipai “Ausap ningwoi-ngwoi dini ba, ayai do bak mem da leu api midiyai amuhup bina.” Gima rino noni usap ningwoi-ngwoi dima biyai do bak. 10#Kis. 7:21 Ei nidipti bu tirigi munggwom dima ndig su lene nipmem buwak noni hanyen bak Firaun nipmisop. Leu api Firaun nipmisop nyohou noni nok nipmot ningat-ngat. Leu api kan “Sijem ninyeng Musa lewo siteu noni biningwes ngun leu minyei.”
Musa ningwes ngun ug ei Midian
11 #
Ibr. 11:24
#Kis. 7:23-28 Tirigi Musa wer pinjoi ndig tu lene ug cem kep nide adig-ajoi nya bingat lo, timiei minu Mesir nya iba imbuk bico kep yok nindig bibor. Mpe dima lene noni tou kep timiei minu Mesir gom di bui-bui nyen mben Ibrani gom di nimbier kim Musa. 12Lene Musa put-put nyen bingat lo, hi ngat noni bi. Leu api yai nimai bak timiei minu Mesir dima bitig ei iggum jou. 13Njap di hyep bu lene noni ug ngat yok hanyen bittau kep mben Ibrani ibou can di ibui yam leu api hig ser no di bindei “Nggon rino abui asut mben Ibrani dima i?”
14Lene no dima buhup “Tou rindo nani nok nibou kin nikei dino abakei nyeti i? Mpaba ma ayai nimai bida nok gi po ayai nimai bak timiei minu Mesir gom pima e?” Apino Musa ningon digit tut bikan “Aye! Tungwatu nya ikan tut mun di siyai annani pima tu.” 15#Kis. 7:29; Ibr. 11:27 Tirigi Musa ninghapti tibim ei Firaun nitingou nsi tu lene noni bungwam mem gima kes hukum nimai ei Musa dip. Noro Musa nang kikau buug bong ei Midian.
Mpe di gom lene noni gwam kep ninghuisi simiak minyei bousi gom. 16Lene sop pilei di ikindig bat-ikinjoi bat yam ibou muhwindacan ikwei tau minyei ei srier nindig di icig de domba nya kin kambir nya idut minyei eisi. Icig ninyeng Yitro ba, noni nok imam mem mben Midian. 17Noro gembala nya ibou poi ijji Yitro nipmisop bat nya leu minyei bousi. Lene Musa kiju bimpu yok leu api tau minyei bak ide domba nya kin kambir nya bidut. 18Tirigi sop dima yok ingkwei hanyen ndam icig Yitro lene noni hig ser yok “Nggon rino njap di ammani jingkwei haninyai dini i?”
19Lene ibuhup “Mben Mesir gom mpu nye tirigi gembala pima yok ijji nye. Noni tau minyei mem nye bibihyen kep mindhe-ndhe nya cem.”
20Lene Yitro hig ser yok “No dima ritou ug i? Nggon rino jikes noni ei i? Juug ba, jicigit noni kui ig leu binhyepo yem njita bit nye.”
21Gima rino Musa ce tut gima bong ei minu dima. Apino Yitro ndo nipmisop Zipora bak noni nok nitnem. 22Lene Zipora gwam tut nipmot gom bak Musa. Ba, Musa jem ninyeng Gersom lewo noni kan “Sinok ngkiai ei minu dini.”
23Mimbrek-mimbrek bu lene Firaun pima niyaijo ngwig hon tu noro mben Israel sisip inso kwop nyen tut mun di buhun tak yok. Gima rino ingat nadi bak Allah ei gwamti. 24#Kej. 15:13-14 Lene Noni miap ighyet bikan tut bipia inso kwop nyen apino Noni yok ngon kep gi preu po Noni preu ei mem Abraham kin Ishak kin Yakub yoni pima. 25Noni ngat bou niyai him bipia mben Mesir iba imbuk co kep mben Israel. Gima rino kos tut bipia mimpu yok.
Currently Selected:
NEHEI LEUSI 2: HAD
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo