Genesi 4
4
Kayimi ni Abheli
1Adhamu a di tshangana ni mwangadzi waye Evha. Oyu a di khura mimba a gu velega Kayimi. Avbo a nga hefemulago Kayimi, Evha a di ganela, khuye: “Nyi hakhide gyanana nya gikhwathana khu giphaso gya Pfhumu Nungungulu.” 2Khu hwane, Evha a di velega gimbe gyanana nya gikhwathana, khu Abheli ndruye wa Kayimi.
Abheli a di khala muhavisi, gasi Kayimi a diri mulimi. 3Na gu vbindride matshigu, Kayimi a di ningela phaso ga Pfhumu Nungungulu, khu mihandro nya mafu. 4#Wona gambe: Hebh 11:4. Abheli nuye a di gira phaselo, khu matiwula nya gifuyo nya gunone gya tshambini gwaye. Pfhumu Nungungulu a di hakha gwadi Abheli a gu salalegiswa ngudzu khu ningelo waye. 5Aholu kha tsaka khu ningelo wa Kayimi. Khu guralo, Kayimi a di goroga ngudzu a sivbala khovbeni khu lidiwo.
6 Pfhumu Nungungulu a di mu wudzisa, khuye: “Khu ginani u goroga kharato, u sivbala khovbeni? 7Wa gu gira nya sadi, khu lisine u na zundzega, aholu wa gu gira guvivba, u na modwa khu gighoho kholu gyomo nyangwani gwago gi vbweta gu gu thesa. Aholu uwe guvbweta u gi pala.”
Wughevenga nya guhegule
8 # Wona gambe: Mat 23:35; Luk 11:51; 1 Joh 3:12. Kayimi a di embela ndriyaye Abheli, khuye: “Hongole thembweni hi ya pepa.” “Na va vbohide thembweni, Kayimi a di wugela ndriyaye Abheli a mu songa.”
9 Pfhumu Nungungulu a di wudzisa Kayimi, khuye: “Womo evbini ndriyago Abheli?”
Kayimi a di hakha, khuye: “Ahati! Gasi eni nyi ghadhi ya ndriyangu, gani?”
10 Pfhumu Nungungulu a di engedza, khuye: “Ginani u giridego? Wona gukhuwe novba wa ndriyago u wu vbaladzidego, wu ngu womba huwa, yi pwala gukhugela mafuni kala eno gwangu. 11Khu guralo, u na vadwa khu mafu ma hamidego ma sela khu mandzani gwago novba wa ndriyago u mu songidego. 12Ambari u lima kharini, mafu kha ma na gu ninga gambe gufuma mihandro khu tshivba yaye. U na penga u legalega ni litigo.”
13Khavbo avbo, Kayimi a di hakha Pfhumu Nungungulu, khuye: “Nandru wangu khongolo ngudzu nyi si wu kodzigo ni gu wu rwala. 14Wona, muhuno u ngu nyi tutumisa mafuni momu, nyi ya manega hwindzo Nago; nyi na penga nyi legalega ni litigo; ni wevbini a nyi manago a na nyi songa.”
15Aholu, Pfhumu Nungungulu a di mu embela, khuye: “Ahihi! Kha si kodzegi isoso! Ni wevbini a na mu songago, Kayimi a na phodzedwa khu guwuyelela livbandre na guvili.” Pfhumu Nungungulu a di vega gifungo ga Kayimi gasi avo va mu manago va si mu songi. 16Khavbo avbo, Kayimi a di khuga a gu ndreya hwindzo ni Pfhumu Nungungulu. A diya vbanyela tigoni ga Nodhi, phuvbo ga Khugadambo gwa Edheni.
Livelego la Kayimi
17Kayimi a di tshangana ni mwangadzi waye, a khura mimba a mu velegela Enoki. Kayimi a di vbaha lidhoropa a gu li rana khu lina la mwanaye Enoki. 18Enoki a di velega Iradi, Iradi a velega Muhuyayeli; Muhuyayeli a velega Metusayeli; Metusayeli a velega Lameki.
19Lameki a di dzega vanyamayi vavili: Moyo nya gupwani khu Adha mumbe nya gupwani khu Zila. 20Adha a di velega Jabali, nyapandre nya lihundzu nya vathu va fuyago mitshambi na va gu vbanya mitshatshani. 21Ndriyaye a di ranwa gupwani khuye Jubali, nyapandre wa vatshavbo va wombago sitendre ni sitoliyo. 22Zila a di velega Tubhalikayimi, mupfhuli nya sombo satshavbo nya sugu ni sikete. Ndruye wa Tubhalikayimi nya nyamayi a di ranwa gupwani Nahama.
23Lameki a di embela vagadzi vaye Adha ni Zila khuye:
“Adha ni Zila, nyi yingiseni gwadi,
enu vagadzi va Lameki,
upwani gwadi esi nyi mi embelago:
Nyi songide muthu kholu a nga nyi bayisa,
nyi songa lidzaha kholu li nga nyi gandra.
24Kayimi a gu phodzedwa khu livbandre na dzimbili dzinyondro,
Lameki a na phodzedwa khu livbandre na mavili magumi dzinyondro,
dzi bweledzedwago livbandre na guvili.”
Guvelegwa ga Seta, gyanana nya wuraru gya Adhamu
25Adhamu a di engedza a tshangana ni mwangadzi waye, a gu velega gyanana a nga gi riyago lina nya gupwani khu Seta, kholu Evha a di khuye: “Nungungulu a nyi ningide gimbe gyanana gasi gu tshikedza wulanga wa Abheli a nga songwago khu Kayimi.” 26Seta nuye a di velega gyanana nya gikhwathana a nga gi riyago lina nya gupwani khu Enosi. Khu gikhati gyogyo, vathu va di phela gu khozela Pfhumu Nungungulu, va mu rana khu lina laye.
Currently Selected:
Genesi 4: BGG2014
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Gitonga DC Bible © Bible Society in Mozambique, 2014.