YOHANES 7
7
Yesus Ara MeklaĘľ Sangan Sum Amba Bilimok Yuba
1Ban nidyaʾ seleb unuwoka lebgogomok dara, Yahudi dub nang edya obnobaʾ aboka ulumekaʾ anasa, Yudea sokok yibinggunusinya senewoka, Galilea sokok sam uru yabalamok. 2#Im. 23:34; Ul. 16:13Ban salek enyek, Yahudi nang edya gal meklaʾ sangan sum perob sum oka dangamok. 3Dara, Yesus ak alja weisa badya lebekja, ”Anda yokaʾ-yokaʾ unulumen dara, anja yuba doboka diriga yalamak nang eillilinggenok bar aboka, anyagan Galilea sokok loboka, Yudea sokok binilam. 4Nimi ben hnon alja lok soʾ unulamlaʾ ara, laga senenggomaʾ nidyaʾ oboka lelewolulaʾ aboka dara, doknoboka gelelenga unuwanggunumso. Seleb unululamaʾ anasa, nimi nidyaʾ hogung ak amalesilom,” wenhyek. 5Alja weisab eneba, Yesus ak dib senewanggumekjok lemek.
6Dara, Yesus adya sikenek, ”Nasamba dara, unun salek anam bok, ugunsamba ununaʾ ara salyaʾ ulumla. 7Soko nim edya dara, ugunuk ara lek senenggulusak bok, nak dara, sikja unulumakaʾ anyek, malyaʾ aboka pyagaʾ geblamnaʾ anasa, sikda nak lek senelenyak. 8Yahudi nang adya senenggomaʾ perob sum meewanamakaʾ ak ara, or ugumbeyok bululum e. Nak ban salek era anam unggulumlaʾ anasa, binggunumna,” hyok. 9Ban wenyamookanya, alda Galilea sokok sam or ulwenelemok.
10Bok, alja weisab era seleb perob sum meewanobaʾ aboka Yerusalem heikek bilimek dara, onoʾ albabya eimik gelelinga aboka dobgiga nim eilinaʾ orokaʾ anyek bilimok. 11Dara, Yahudi nang era, senenggomaʾ memelemekaʾ ak sam Yesus yalamla gom aboka kemelemeekanya, alda hanyagar ulumla do? aboka heilisik. 12Dara, ban perob sum enyek, Yesus amba o lomok yuba nauba saro yabalameekanya, hnon nim edya dara, ”Alda perobnya,” alamek. Bok onoʾ hnon nim edya dara, ”Orok, alda nimi malya nenewoka sondaʾ amba bobnenewoka lelesilnya,” alamek. 13Bok, Yahudi dub nang enyek lok anasa, nimi ben hnonok adyaʾ anaba, laga lebnenggumek.
Yesus Al Nong Amba Laga Lebdok Yuba
14Yahudi nang perob sum anam mamagemekaʾ hnoumung bok, Yesus ara Imik Neyung ek wekoka anyagan yuba leb einiwousuk. 15Dara, Yesus adya lero neklesuk anyek eiyiboka, Yahudi nang ganya loka daboka lelemekja, ”Alda sekolah donaʾ ara orok bok anasa, hekaʾ adya ban anaso lero neklesil do?” alamek. 16Anasa, Yesus adya sikenek lebokja, ”Nadya neklesinya nenera, nadya gomaʾ. Alda Neyung be na bokol yeilinyoknya bedya lenyokaʾ ak neklesin. 17Imik Neyung senelamlaʾ anyek, dib unuwonun senelelanya bera, nadya neklesinaʾ anara, nadya ok ganya doboka salyaʾ neklesin gom, Imik Neyung ak abaʾ ak neklesin gom ara ella danamla. 18Nimi be hnon alja neklesilaʾ ara, alja ganya doboka sonda anasa, lelemla dara, alda yok nim edya nak gigilenenokaʾ aboka hogung bo amalamla bok, al bokol yeilinanya bek si imik dolulaʾ aboka lelelanya bera, alda hyak dib ok ulumlakanya, alak ara sondaʾ yuba unuruwaʾ ara alak mekaʾ unggulumla. 19Musa bedya nim onggom, yokaʾ salyaʾ ununggom aboka, Imik Neyung adya unuwanalum an yub era seleb ugunuk elegosuk. Bok, ugunuk dara, be hnon ban yub en keboka ununggulumla. Dara, hekasa nak obnenobaʾ aboka ulunulum do?” hyok.
20Dara ban nimi nauba longomek nim edya alak, ”Anda bisaʾ saleka lenggel de? Heknedya anak ara obgununaʾ ulunggelaʾ anasa lelelam do?” hyek. 21Dara, Yesus adya sikenek ara, ”Nadya dara, lok soʾ ara seleb hnonok unuwasa dara, ugunda seleb eiyiboka ganya loka dabsuk. 22#Kej. 17:10; Im. 12:3Bolaʾ garelelulum aboka, Musa bedya yuba weboka elegosukaʾ anasa, Sabat mem sum bok, merewoka bolaʾ garelelum. Dara, ban yub era Musa bedya gom, alda nunjaʾ neyung yabo Musa be anam salek men youmaʾ enyek orowek bolaʾ garelemek. 23#Yoh. 5:9Ugunja ban unululumnya nedya, Musa bedya unuwanalum an yuba blekibyek aboka unululumjok, nak dara, nimi nong ak Sabat mem sum bok hwesinya nenyek, hekasa walanulum do? 24Anasa, ugunda laga eillilumnya nenesa leboka, salyaʾ yana lelenaʾ ara loblulum. Alda domdigum pe yana lelelelulum,” hyok.
Yesus Ara Aldib Nimi BlebsinaĘľ Dubnya Gom Aboka Yuba
25Dara, Yesus adya nidyaʾ ban wenyaboka neklesuk sum enyek, Yerusalem heik yokaʾ nim edya, ”Yahudi dub nang edya obnobaʾ aboka elemaknya bera alan gom? 26Wera kendululum, alda laga sekoka neklesil bok, nim yok nim edya yuba alak sal eleknenggulumak. Anasa, nunja Yahudi dub nang adya dara, Imik Neyung adya Kristus nimi blebsinaʾ dubnya eleganesin amoknya bera alan, eiyimakaʾ anasa, lolomak gom? 27Bok, Imik Neyung adya sokok nimi blebnamla aboka yanalanya Kristus ara, al yalya pik era, nim adya dara, ella danggunuseng bok, ban benyek dara, alja mok nunda seleb orowek ella ulumab.” 28Dara, Yesus ara Yerusalem Imik Neyung ek sam anam lelesuukanya, yuba senenggomaʾ bii aboka lelemokja, ”Al dib, ugunja dara, nara ella ulunulum. Nara hekmok ebaʾ ak yasaʾ ara ella ulunulum bok, nara yasaʾ ara nabeyok salyaʾ ganya doboka yanggubsa. Bok, na bokol yanyoknya bera alda hyak dib nong ulumla. Ugunda alak elgom ululum bok, 29nara alak ab bokol yanyokaʾ anasa, nara alak ella ulumna,” hyok. 30Ban sum enyek Yesus ak Yahudi nang edya salawoka henga gobnobaʾ aboka ulumek bok, alja unun salek anam danggumokaʾ anasa, nimi soruk hnonok sirik anaba alak salawanggumek. 31Bok, nimi nauba longomek nim era Yesus ak dib senewoka lelemekja, ”Kristus adya nimi blebnesil aboka eimik eleganesilnya yalya dara, ban ben unulamla sok, yokaʾ-yokaʾ lok soʾ anyek beknaʾ dibaʾ unuwanamla de?” hyek.
32Parisi nang edya, nimi nauba Yesus ak migiboka yuba ngoroknaʾ dero balamekaʾ kemek dara, sikeneb, yuba wa gakaʾ dub nang eb dadya, Imik Neyung ek keeboka bo ulumek nang ek, salawoka henga goubol bululum aboka orugumek. 33Danyek, Yesus adya lebokja, ”Nara sokok an ugunublaboka ulumnamab salek era, hyak mek ok ublaʾ anasa, ban nen seleb dara, na bokol yeilinyoknya bek saaboka binimna. 34Nadya ulumnyaʾ ak ara, ugunuk dara, yamenggom anasa, ugunda nak elemnelum bok, eibnenggununulum,” hyok. 35Dara, Yahudi nim sik moumen heibdangoka lelemekja, ”Na binyaʾ ak ara ugunda eiyiboka yanggunusom alasil dara, hekaʾ huboka eibnenggunusibyaʾ anasa lelemla do? Gom, Yahudi nim enyek, Yunani nim eblaboka mok sam soboka ulumak nim ek biniboka, Yunani nim ek neklesununaʾ aboka lelemla gom? 36Ugunda nak elemnenulum bok, eibnenggununulum, ugunda na ulumnyaʾ ak ara, yanggununulum alamla dara, hek damok enesa lelemla do?” aboka lelemek.
Nimi EmbengaĘľ Nenelesil Yuba
37 #
Im. 23:36
Yahudi nang edya perob sum sidyaʾ longob dakamek sum enyek, Yesus ara sekoka bii aboka yuba nauba lelemokja, ”Heknedya mek ok ublya dara, or nak an del youlul. 38#Yeh. 47:1; Za. 14:8Imik Neyung yuba momnya dobokaʾ ara, heknedya nak dib senewanenel dara, alja ganya lomok ab sam nim embengaʾ unaʾ meka goblemnamla,” hyok. 39Yesus adya ban wenhyoknya nera, Imik Neyung adyaʾ Geisinya benesa lemok. Ban salek era, Yesus si anam imik nenewanggumekaʾ anasa, Geisinya bera anam eleganggusukjok, Yesus alak dib senewanamak nim era Geisinya dobnamak aboka lelemok.
40Ban wenyaboka Yesus adya yuba leboka neklesuk sum enyek, nimi darasam sik gangganek sam ab lelemekja, ”Senenggom ununumnaʾ lesinya eimik yanamla alameknya bera alan e,” alamek. 41Bok, onoʾ yok nim edya lelemekja, ”Soko nimi blebsinaʾ dubnya Kristus bera alan,” alamek. Bok hnon yok nim edya dara, lelemekja, ”Mab e, nimi blebsinaʾ dubnya bera Galilea sokok abaʾ ara ura yalamso gomaʾ. 42#2Sam. 7:12; Mi. 5:1Imik Neyung yuba momnya dobokaʾ ara, soko nimi blebsinaʾ dubnya Kristus bera, Daud nang yilaʾ ak bok anasa, Daud ulumok heik Betlehem heik ab ara yanamla hyok,” aboka lelemek. 43Anya wenyaboka, nimi nauba Yesus amba gangganaʾ lolobdangoka obdanobaʾ ulumek. 44Dara hnon nim edya, Yesus ak salawoka henga goubnobaʾ ulumekjok, onoʾ Yesus ak ara, soruka mekaʾ bebeganggumek.
45Ban sum enyek, nimi pika welesik nang edya, pik losaaboka yeilimek dara, Parisi dub nang eb, Yahudi yuba wa gakaʾ dub nang eb dadya, sikenek heibsikaʾ ara, ”Ugunda hekasa Yesus ak salawoka henga goubnenggulum do?” aboka heibsik. 46Pikek welesik nang edya lelemekja, ”Nimi soko nim era, ban benedya lelemla sok hyak lenggulumak,” alamek. 47Dara, Parisi nang edya pikek welemek nang ek ara, ”Dara, ugumbabya hnon aladya gliboka bo balasil de? 48Nimi hnon Yahudi dub nang ek ab hnon gom, Parisi dub nang ek ab hnon gom, Yesus ak dib senemek de? 49Bok, nimi nauba Musa bedya unuwanalum an yub ek elgom ulumak anasa, wera sikenek malya ullisinaʾ ak ulusil,” aboka wabsik.
50 #
Yoh. 3:1-2
Dara, Nikodemus bera, neikek hiboka yuba salameknya bok, al men Yesus ak bilimoknya bek adya sikenek lebokja, 51”Nunja unuwanalum an yub ek ulumlaʾ ara, ben hnonnya bek alja unulam soʾ anyek keboka eibnenggusibya bok dara, yana lelewanesibya de?” hyok. 52Sikda alak, ”Wei, ambabya Galilea mok ebnya de? Nidyaʾ Imik Neyung buku sam lelewoka einiwanalamakanya, ununumnaʾ lelelanya bera, Galilea mok ebaʾ ara, yanggunumlaʾ eibnelam,” hyek. 53Dara, sikda nidyaʾ sikja ek byik.
Currently Selected:
YOHANES 7: LAINLC
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo