MARKUS 11
11
Jesus Jerusalim Makijo Wadoujo Kai
1Okei Jerusalim kapauto kijake Baitfagi ma, Baitani ma kodoopa, Zaitun Dimiidaapa make Jesus etope-tai wija ebadikumii,
2eteete mana, „Ikai doodouga maki okogoopa auwai; kouda wadoujo aakijake ko keledai joka egadimi-toupagi aadoupiga; me idaana ma edokai beu kidi; aekegajawijake aanaaoomei.
3Me ka ’Magijo aakei teete?’ kitipai ko, ikaija aetai ko, ’Tuhan gai peu kodaa. Egaa amo kaaoojawiipagi’ aetai,” etii.
4Auwijake keledai joka juwouda ita maida damoutoopa egadimi-toojogo aadomakai, tijake buda aekegai.
5Kouda kodaa jooni-tota bagee kedaa eteete mana, „Magijo ka keledai joka aekegajawai?” etii.
6Tijake okejai Jesusja etipi kidi danite wo aetai. Tijake auwe-tijake ejaikai.
7Keledai joka kidi Jesuspa aaoomei. Okeija ka kagaba keledai wado mukajake Jesus kou wado animakai.
8Me wedaba okeija ka kagaba ita maida mukajake-tai; daana me ino ko pija imo tuwa-mote tijake ita maida mukajake-tai.
9Okei tiga uweete bagee ma, nemouga eepeete bagee ma gaida-gaida teete mana, „Ajii kodo! Tuhan eka dubaiga meete me kidi muta neetuwawei!
10Muta neetuwawei, iniija aijame Daudja jakimakita maki kodo meete. Ajii kodo, kii waiko monika makijo!”
11Okai Jerusalim ka Ugatameja owaapa wadoujo kai. Kou watija utoma doumigijake uwaataa kouja Jesus Baitani uwii, etope-tai wija ma gaati ma enaimo.
Ara Uti Peu Awita
12Aweetaa naago, Baitani makijo make okei podomijake okai naidi gai.
13Poto dani ara uta uti ije tukuwo dojake uta topa, mee? tijake dou uwii. Okai kouda kodaa dakii tijake utaana ma dou beu, kodeja ije to, uta uwa ko beu kouja.
14Tijake Jesus wo eteete mana, „Akija uta me idaana ma wado te nai imo kidi to togoo.” Kii mana kidi etope-taido juwii.
Jesus Ugatameja Owaa Witogai
15Okei Jerusalim makijo dakii. Jesus Ugatameja owaa duba wadoujo kijake owaa duba ka akaada te-tai bagee ebakeete go-motii; mege akapaka te-tai bagee ka pejageido maija wadouga mijouga jatijake-tai. Daana wonou kaa te-tai bagee ka animake-titaida maija.
16Daana me idaana ma tumaana agijo dokijake owaa kodo ekagume-tijake ejaikai beu.
17Tijake okai etopai, eteete mana, „Beu, mee? kapogeije ebijamakita: Anija owaa kii ko e tuma te tuma sembahjang te-tai owaa ebataitai. Kodeja ikii ke oma bagee ka bijo jaikipa,” etii.
18Kii mana muto ki imam iboudo ma, kapogeije epi bagee ma juwijake wagiine dimi ubai; okei weda egai kouja; meido utoma okaija mana muto ego takuu-takuu kouja.
19Uwaataa gakita kou maki okogoopa make podomai.
Ara Uti Denadoke
20Okei abata jaweetigo uta uti kodo mani ma denadoke ti-toojogo dou.
21Peterus gajake eteete mana, „Kuduu, dododou, akija ewidogeetege ka uta uti kodo denapa,” etii.
22Tijake Jesus wo eteete mana, „Ugatame maakodo egai.
23Beu maa kou ani kitii, meija kii bago ki ’Maikai duba wajagidodou’ etijake, kegepa duba bego te ti-toojogo kodeja etipi danite kaipiga bida peu maakidi gamaki-toojogo, kei tidoke tija.
24Okai kouja ani kitii, tumaana agijo ikii sembahjang ediimipa, ikii moteega kodo maakodo ga-toojogo ikii go-motiita.
25Ikii joonijake sembahjang taine gaa, tumaana agijo maida make me idaana be ega-toojogo, ipa ejaikai tiga. Tijake epaawado ka Ikiitai ikiija ka peepu tijawitaido ipa kijaike-tita kodaa.
26Kodeja kou danite ikii ipa te ejaikipa, epaawado ka Ikiitai maija ipa ti kijaikai,” etii.
Jesusja Bida Agijo Egaado Tita
27Okei kigeena ma Jerusalim makijo wadoujo kai. Jesus Ugatameja owaa duba uwina uwina teetigo, imam iboudo ma, kapogeije epi bagee ma, me iboudo ma okaapa mei.
28Tijake okei eteete mana, „Má bida agijo ka kei agijoudo kei teige? Daana meija bida bokouto kaneemegi, kei manaido kei teige kou?” etii.
29Tijake Jesus eteete mana, „Ani na mana mutoona kigaado taipiga kojoka ikii joko enii. Tijake anija kei teiga bida agijo maija kitiipiga kojoka.
30Jahja baptis tei tita mana kodo epauto ko epaawado make, mee? meepa make. Enidodowei,” etii.
31Tijake okei akado wegene teete mana, „Kou danite ’Epaawado make’ etipe ko, ’Magijo ka maakodo egai beu?’ eniipagi kodaa.
32Kodeja inii ’Meepa make’ etipe ko . . .” okei meido kodo weda egai; meido utoma Jahja kidi maakidi gokobaki tijawiidaiga wegai tita me idaana egai kouja.
33Tijake okei Jesuspa wo eteete mana, „Inii ewo.” Etijake Jesus eteete mana, „Keetigo ko ani maija kei agijoudo kei teiga bida agijo ko ti kitiipiga,” etii.
Currently Selected:
MARKUS 11: EKG
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo