Iohane 7
7
Iesu lao i Posusa Pobambaruꞌ i Ierusale
1Roo onoꞌ, Iesu lao mantoleli i tampoꞌ Galilea. Tiꞌara piꞌi Naundeꞌ lao i tampoꞌ Iudá, láwiꞌ araheꞌ tadulakoraꞌ toIahudiꞌ ionoꞌ to mampoinao ina mopapate.
2I tempó iti, ina haweꞌ miꞌi alo mahileraꞌ toIahudiꞌ to rauliꞌ Posusa Pobambaruꞌ.#7:2 Posusa Pobambaruꞌ: mantepuꞌu alo kahampuloꞌ hai lima wulá kapitu mouláꞌ tempóraꞌ toIahudiꞌ (ia miꞌi September-Oktober), mosusaheꞌ uwalu alona mambuhinao tempóraꞌ toIahudiꞌ mesuwuꞌ hangko i tampoꞌ Másiriꞌ hai molumao i pádá loriꞌ. Mewaliꞌ i posusa iti mobábehiheꞌ bambaruꞌ. Alo-alona tadulako-tadulako menómbá moánti uwai hangko i Wuhuꞌ Siloa, mobubuhi i paintuá popenómbá i Támbina Pueꞌ Ala. Básá woꞌo Pesuwuꞌá 23:16; Áturá Menómbá 23:33-36,39-43; Pohuleki 16:13-16. 3Onoꞌ miꞌi haneꞌi rauliꞌ ádina Iesu i Hia, “Ineeꞌ roo-roo peKoꞌ ieneꞌ! LaomoKoꞌ i tampoꞌ Iudá, bona topeuláꞌMu ionoꞌ peisáheꞌ woꞌo moita tandaꞌ kuasaꞌ to Nubábehi. 4Ane mebuni-buni peKoꞌ oaꞌ ieneꞌ, tiꞌaraKoꞌ ina mewaliꞌ tauna to mokahangaꞌiá. Ane mobábehiKoꞌ tandaꞌ kuasaꞌ, hangaa-ngaa Nupopaitaꞌáheꞌ upu-upu tauna!” 5Noꞌonoꞌ miꞌi laluitaraꞌ ádina Iesu, láwiꞌ tiꞌaraheꞌ woꞌo mampoinálái kaꞌIana Datu Topehómpóꞌ.
6Mewaliꞌ nahángáꞌáheꞌ Iesu, “Tiꞌara mani haweꞌ tempóna Kupatongawaꞌáheꞌ kaheánáNgkuꞌ. Ane kómu, tiꞌara moapa ba impirákou lao i Ierusale, 7láwiꞌ tiꞌara ara tauna to mokáhihiꞌkou. Agáiáná Kódóꞌ, rakáhihiꞌAꞌ tauna to kadake i duniáꞌ deꞌe, láwiꞌ Kupakanótóáheꞌ kakadakena bábehiáraꞌ. 8Moiorumokou lao i posusaꞌá iti. Kódóꞌ tiꞌara maniAꞌ lao, láwiꞌ tiꞌara mani haweꞌ tempóNgkuꞌ.” 9Noꞌonoꞌ miꞌi laluitana Iesu i ádiNaheꞌ, hai toroꞌ mani oaꞌ i Galilea.
10Lao mpuꞌumoheꞌ ádina Iesu i Ierusale bona mouláꞌheꞌ Posusa Pobambaruꞌ. Kapohuꞌraꞌ iti, Iesu lao woꞌo, agáiáná lao ngkániiꞌ-niiꞌ bona tiꞌara raisá tauna to handaꞌ. 11I posusaꞌá iti, tadulakoraꞌ toIahudiꞌ mampeliꞌ oaꞌ Iesu, rauliꞌ, “Iumbá ripaꞌi tauna iti?”
12Hai tauna to handaꞌ woꞌo, mombekuwi-kuwiheꞌ. Araheꞌ to manguliꞌ, “Ia tauna to maroꞌa.” Araheꞌ woꞌo to manguliꞌ, “Tiꞌara! Ia mopakanawoꞌ peá tauna to handaꞌ!”#7:12 Ia mopakanawoꞌ peá tauna to handaꞌ: Rumihi karasalaꞌiNa. Ane hadua tauna mopakanawoꞌ tauna ntániꞌna bona tiꞌara piꞌi menómbá i Pueꞌ Ala, ina rawatui haweꞌ mate. Básá Pohuleki gáláꞌna ka-13. 13Agáiáná tiꞌara haweꞌ hadua to pebáiꞌ molaluita i katongawaꞌána, láwiꞌ malááꞌheꞌ i tadulakoraꞌ toIahudiꞌ.
Iesu mepaturoꞌ i Támbina Pueꞌ Ala i tempó Posusa Pobambaruꞌ
14Tangaꞌna posusa iti, Iesu mesuaꞌ i lalu tangabaa Támbina Pueꞌ Ala hai mantepuꞌu miꞌi mepaturoꞌ. 15Tingkáráꞌheꞌ toIahudiꞌ mohádi paturoꞌNa, rauliꞌ, “Noumbá haneꞌi Naisá upu-upu to teukiꞌ i lalu Sura Magasaꞌ, mole Ia tiꞌara mapángkáꞌ sikolaꞌNa?”#7:15 mole Ia tiꞌara mapángkáꞌ sikolaꞌNa: Hungkuꞌ upu-upu ánángkóiꞌ tobaleilo toIahudiꞌ mosikolaꞌ, agáiáná makuraꞌ to meguru bona raisá ntepuꞌu óntóꞌna Sura Magasaꞌ hai mewaliꞌ guru agama.
16Nahángáꞌáheꞌ Iesu, “To Kupaturoꞌákou, paturoꞌ hangko i Pueꞌ Ala to mohuoꞌAꞌ mai, tiꞌara paturoꞌKuꞌ haduduáNgkuꞌ. 17Heáná to mampoinao mampeuláꞌi peundeꞌána Pueꞌ Ala ina raisá kahangko iumbáꞌána paturoꞌKuꞌ deꞌe, ba hangko i Pueꞌ Ala mpuꞌu, ba laluitaNgkuꞌ peá haduduáNgkuꞌ. 18Heáná peá to molaluita i lalu kuasaꞌna haduduána, ia mampeliꞌ peá bona ratóiá. Agáiáná Kódóꞌ, kupoinao bona Umángkuꞌ to mohuoꞌAꞌ mai rapomahile, láwiꞌ Kódóꞌ to manótó, tiꞌaraꞌAꞌ topodongkoꞌ. 19Nabiꞌ Musa hangkoia mampoweꞌikou Áturána Pueꞌ Ala, agáiáná tiꞌarakou ara hadua to mampeuláꞌi Áturá iti, mewaliꞌ moapa riꞌi haneꞌiAꞌ nipoinao nipapate?”
20Hadua hangko i tauna to handaꞌ mohángáꞌá Iesu, “NapesuaꞌiKoꞌ setáꞌ! Heáná paꞌi to mampoinao mopapateKoꞌ?”
21Nauliꞌ Iesu, “Hangko mopakauriꞌntoAꞌ tauna i alo penómbáꞌá,#7:21 To natunggái, Iesu mopakauriꞌ topaluꞌ. Básá Iohane 5:1-9. kóiꞌ miꞌi inaomi. 22Mogalo kómu woꞌo, mobábehikou ádá petileꞌ i alo penómbáꞌá ane arai ánáꞌmi to hangaa-ngaa ratileꞌ i alo iti. Nabiꞌ Musa hangkoia mohuoꞌkou motileꞌ ánáꞌmi. Agáiáná katoꞌuána ádá petileꞌ iti hangko i toioruntaꞌ to moioru hangko i Musa, tiꞌara hangko i Musa haduduána. 23Hai metileꞌ iti tepasuaꞌ woꞌo bágóꞌ. Ánti pampeuláꞌimi Paturoꞌna Musa, mogalo riꞌi alo penómbáꞌá, mobábehikou ádá petileꞌ. Mewaliꞌ, moapa riꞌi haneꞌi nikabukoꞌiAꞌ ane mopakauriꞌAꞌ tauna i alo penómbáꞌá? 24Ineeꞌkou mosalaꞌi rángámi mouláꞌ peá apa to niꞌita, agáiáná hangaa-ngaa nibutusi i katoꞌu-toꞌuána.”
Ba toꞌu mpuꞌu kaꞌIesuna Datu Topehómpóꞌ?
25Karahádina bahangapaheꞌ toIerusale laluitana Iesu iti, wuliheꞌ. Araheꞌ to manguliꞌ, “Ba Ia miꞌi to rapeliꞌ tadulakontaꞌ bona rapapate? 26Mole mepaturoꞌnto oaꞌ hai tiꞌara ara kamalááꞌNa, hai tiꞌara woꞌo ara to mokámbáróá. Ba tadulakontaꞌ moisá kaꞌIana mpuꞌu miꞌi Datu Topehómpóꞌ? 27Agáiáná tiꞌara hintotoꞌ kaꞌIana Datu Topehómpóꞌ, láwiꞌ taisá kahangko iumbáNa mai. Ane haweꞌ mpuꞌu Datu Topehómpóꞌ to radándi hangkoia, tiꞌara ara to ina moisá kahangko iumbáNa mai.”#7:27 Tauna manguliꞌ noꞌonoꞌ láwiꞌ rapekiri Iesu to hangko i wánuá Nasare peá.
28Mewaliꞌ, tangaꞌna Iesu mepaturoꞌ i tangabaa Támbina Pueꞌ Ala, Ia molaluita miꞌi Napasimbuku, Nauliꞌ, “Niuliꞌ niꞌisánto kaheánáNgkuꞌ hai kahangko iumbáꞌáNgkuꞌ mai. TiꞌaraꞌAꞌ mai mouláꞌ peundeꞌáNgkuꞌ haduduáNgkuꞌ, agáiáná maiAꞌ mouláꞌ peundeꞌána Pueꞌ Ala to mohuoꞌAꞌ mai. Ia miꞌi to hintotoꞌ rapoinálái. Agáiáná Ia tiꞌara niꞌisá. 29Kódóꞌ, Kuisá láwiꞌ hangko i Hia kamaiáNgkuꞌ, hai Ia to mohuoꞌAꞌ mai.”
30Mewaliꞌ, ánti polaluitaNa noꞌonoꞌ, onoꞌ miꞌi haneꞌi araheꞌ to mampoinao mohakaꞌ Iesu, agáiáná tiꞌara mani mewaliꞌ láwiꞌ tiꞌara mani haweꞌ tempóNa ina mate. 31Agáiáná araheꞌ handaꞌ tauna i oloꞌraꞌ to mepoinálái i Hia, rauliꞌ, “Ane haweꞌ mpuꞌu Datu Topehómpóꞌ, ba ina handaꞌ mani tandaꞌ kuasaꞌ to Nabábehi hangko i tauna deꞌe? Hangaa-ngaa Ia miꞌi deꞌe Datu Topehómpóꞌ.”
32Araheꞌ toParisi to mohádi pombekuwi-kuwiraꞌ tauna to handaꞌ kana i Iesu. Onoꞌ miꞌi haneꞌi toParisi hai kapalaꞌ-kapalaꞌ tadulako menómbá mohuoꞌheꞌ bahangapa topokámpái Támbina Pueꞌ Ala lao mohakaꞌ Iesu. 33I tempó iti, Iesu mopaturoꞌ tauna to handaꞌ, Nahángáꞌáheꞌ, “TiꞌaraPoꞌ marue hingkakani hai kómu. Ina mesuleꞌAꞌ lao i Hia to mohuoꞌAꞌ mai. 34I tempó iti, ina nipeliꞌAꞌ, agáiáná tiꞌaraPoꞌ ina nilámbiꞌ. Hai i kalaoáNgkuꞌ iti, tiꞌarakou peisá lao.”
35Wuliheꞌ tadulakoraꞌ toIahudiꞌ mohádi laluitaNa, hai mombekuneꞌ-kuneꞌheꞌ, rauliꞌ, “Iumbá ripaꞌi ina lao, haneꞌi Nauliꞌ tiꞌara piꞌi talámbiꞌ? Ba Ia ina lao i tampoꞌ ntániꞌna bona toroꞌ hingkakani hai toIahudiꞌ to mokatoroꞌi tampoꞌraꞌ toIunani bona Ia peisá mopaturoꞌheꞌ toIunani ionoꞌ? 36Hai apa lempóna laluitaNa to manguliꞌ ina tapeliꞌ, agáiáná tiꞌara talámbiꞌ, hai tiꞌarakeꞌ peisá lao i kalaoáNa?”
Inao to Magasaꞌ rapándiriꞌ nodo uwai ngkatueꞌ
37Alo kahópóꞌána Posusa Pobambaruꞌ iti, ia miꞌi alo to melumbuꞌ karapomahilena.#7:37 I alo kahópóꞌána, tadulako-tadulako menómbá moala uwai hangko i Wuhuꞌ Siloa hai upu-upu tauna meuláꞌ lao i Támbina Pueꞌ Ala. Ionoꞌ, Tadulako Menómbá Mahile mobubuha uwai i paintuá popenómbá. Rabuhinao tempóna Pueꞌ Ala moweꞌi toSáráeliꞌ uwai hangko i watu. Básá Pesuwuꞌá 17:6; Poimbaꞌ 20:7-11. I alo iti, meángkáꞌ miꞌi Iesu i lalu Támbina Pueꞌ Ala, Nahángáꞌáheꞌ Napasimbuku, “Heáná peá tauna to mangkadoꞌu, maimokou mainu i Kódóꞌ!#7:37 Básá Iesaia 58:11; Pesuwuꞌá 17:6; Poimbaꞌ 20:8-11; Iesaia 44:3; 55:1; Sura Paturoꞌ 4:23; Sakaria 14:8. Upu nawátiꞌkeꞌ Pueꞌ Ala mopakatu Inao to Magasaꞌ mokale i laluntaꞌ, kitaꞌ woꞌo ina mewaliꞌkeꞌ pentóáꞌána pewátiꞌ i tauna ntániꞌna. Básá woꞌo Iohane 15:26-27. 38Heáná peá to mepoinálái i Kódóꞌ, nodo to teukiꞌ i lalu Sura Magasaꞌ to manguliꞌ: Hangko i laluna ina moili oaꞌ uwai ngkatueꞌ.” 39To natunggái laluitana Iesu ia miꞌi Inao to Magasaꞌ to ina mokale oaꞌ i laluraꞌ tauna to mepoinálái i Hia. I tempóna Iesu molaluita noꞌonoꞌ, Inao to Magasaꞌ tiꞌara mani mendáulu i topeuláꞌNa, láwiꞌ Iesu tiꞌara mani mesuleꞌ lao i peawaꞌNa i surugáꞌ.#7:39 Pueꞌ Iesu rapopeawaꞌ i tempóna rapakuꞌ i kau mombehape, hai i tempóna woꞌo Ia raꞌángkáꞌ mesuleꞌ lao i UmáNa. Básá Iesaia 52:13; Iohane 2:22; 3:14; 12:23-28,32-33; 17:1-5.
40Handaꞌ tauna mohádi laluitana Iesu, hai araheꞌ hantángáꞌ to manguliꞌ, “Ia mpuꞌu miꞌi nabiꞌ to nodo Musa to nadándi Pueꞌ Ala hangkoia.”#7:40 Básá Pohuleki 18:15-18.
41Araheꞌ woꞌo to manguliꞌ, “Ia miꞌi deꞌe Datu Topehómpóꞌ!”
Agáiáná araheꞌ woꞌo to manguliꞌ, “Tiꞌara! Ia toGalilea! Tiꞌara hintotoꞌ Datu Topehómpóꞌ mesupaꞌ hangko i Galilea, 42láwiꞌ i lalu Sura Magasaꞌ teukiꞌ: Datu Topehómpóꞌ Ia miꞌi pemuleꞌána Datu Daudiꞌ, hai Ia woꞌo hangko i wánuá Beteleme, wánuá pesupaꞌána Daudiꞌ.”#7:42 Básá Mika 5:2; Ieremia 23:5; Sura Petóiá 89:4-5; 2 Semueli 7:12-13,16. 43Onoꞌ miꞌi haneꞌi mombehániꞌ-hániꞌmoheꞌ tauna to handaꞌ: hantángáꞌheꞌ mepoinálái i Iesu, hantángáꞌheꞌ tiꞌara. 44Araheꞌ to mampoinao mohakaꞌ Iesu, agáiáná tiꞌara haweꞌ hadua to mampokaꞌala mohakaꞌ.
Tadulakoraꞌ toIahudiꞌ tiꞌara mepoinálái i Iesu
45Topokámpái Támbina Pueꞌ Ala to rahuoꞌ lao mohakaꞌ Iesu mesuleꞌheꞌ lao i toParisi hai kapalaꞌ-kapalaꞌ tadulako menómbá. Tiꞌaraheꞌ mewaliꞌ mohakaꞌ Iesu. Mekuneꞌheꞌ tadulako iti, rauliꞌ, “Moapa riꞌi haneꞌi tiꞌara nihakaꞌ hai niánti mai?”
46Rahániki, “Láwiꞌ tiꞌara mani haweꞌ hangkani kihádi tauna molaluita nodo Ia!”
47Mehániꞌheꞌ toParisi iti, “Ba maꞌalamokou woꞌo Napakanawoꞌ? 48Tiꞌara ara haweꞌ hadua tadulako ba toParisi to mampoinálái kahangko i Pueꞌ AlaNa, 49bateꞌna peá tauna to handaꞌ to mepoinálái i Hia, láwiꞌ tiꞌaraheꞌ mangisá Paturoꞌna Musa. Hárárámoheꞌ!”
50Roo onoꞌ, molaluita miꞌi woꞌo hadua toParisi to rahangaꞌ Nikodemu. Nikodemu iti to hangkani miꞌi mampombelámbiꞌá Iesu.#7:50 Básá Iohane 3:1-2. Nauliꞌ Nikodemu i hángká rángána, 51“Mouláꞌ áturántaꞌ, tiꞌarakeꞌ peisá mohuku hadua tauna ane tiꞌara mani rahádi kárá-kárána hai rapáresáꞌ bábehiána.”#7:51 Básá Pohuleki 1:16-17; 17:4; Pesuwuꞌá 23:1-3; Áturá Menómbá 19:15-16.
52Rángánaheꞌ iti mopakóiꞌ Nikodemu, rahángáꞌá, “Ba io woꞌo hadua toGalilea? Nupeita hai nupáresáꞌ i lalu Sura Magasaꞌ. Tiꞌara ara nabiꞌ to ina mesupaꞌ hangko i Galilea.”
[ 53Roo onoꞌ, mesuleꞌheꞌ hadua-hadua lao i támbiraꞌ.
Currently Selected:
Iohane 7: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.