Iohane 5
5
Iesu mopakauriꞌ tauna i alo penómbáꞌá
1Roo onoꞌ, Iesu mesuleꞌ wopiꞌi lao i kótá Ierusale bona mouláꞌ alo mahileraꞌ toIahudiꞌ. 2I Ierusale, hungkuꞌ i babaꞌá to rahangaꞌ “Babaꞌá Dimbá”, ara hambuaꞌ wuhuꞌ; i lalu básá Iberani hangaꞌna Betesda.#5:2 Betesda: I lalu bahangapa sura to ioru-oru raukiꞌ, teukiꞌ “Bet-sata”. Ara lima wuaꞌna tambaleꞌ to motolelingi wuhuꞌ iti. 3Handaꞌheꞌ to tiꞌara ralalu hirámpu ionoꞌ. Araheꞌ to bilo, to kompiha bitiraꞌ, hai to paluꞌ,#5:3 Básá apa to teukiꞌ i Iesaia 35:4-6. upu-upuheꞌ maturu-turu oaꞌ i tambaleꞌ iti. [Mampegiáheꞌ pokalena uwai, 4láwiꞌ hangkani-hangkani ara malaꞌekana Pueꞌ to mendáulu mai i wuhuꞌ iti mampopokale uwai, hai heáná to ioru mendáulu i lalu wuhuꞌ iti i tempóna uwai mokale, mauriꞌ miꞌi hangko i pohakiꞌna.]#5:4 I surana Iohane básá Iunani to sae ntepuꞌu, wátiꞌ iti tiꞌara teukiꞌ, agáiáná teukiꞌ i handaꞌ sura to raukiꞌ huleꞌ i bókóꞌ.
5Ara ionoꞌ hadua tobaleilo, to tálu miꞌi puloꞌna hai uwalu parena tiꞌara peisá molumao láwiꞌ paluꞌ. 6Kanaitána Iesu tauna iti maturu-turu ionoꞌ, hai Naisá woꞌo kamaruena miꞌi paluꞌ, Ia mekuneꞌ, “Nuꞌundeꞌ paꞌi bona nubuku molumao?”
7Nauliꞌ topaluꞌ iti, “Kuꞌundeꞌ ntepuꞌu, Pueꞌ, agáiáná tiꞌara ara wongkódóꞌá to mampopendáuluaꞌ i lalu wuhuꞌ ane uwai mokale. Hangko ina mendáuluntoaꞌ, ara miꞌi to mampehindorungiaꞌ.”
8Nauliꞌ Iesu, “Meángkáꞌmokoꞌ, nulóló miꞌi aleꞌmu hai molumaomokoꞌ.” 9Tempó onoꞌ woꞌo, nalalu mpuꞌu miꞌi tauna iti, haneꞌi molóló aleꞌna hai molumao.
Pewaliꞌána iti i alo Satu, alo penómbáꞌáraꞌ toIahudiꞌ, 10onoꞌ miꞌi haneꞌi tadulakoraꞌ toIahudiꞌ mokámbáróá tauna to hangko rapakauriꞌ iti, rahángáꞌá, “Dehangaloá alo penómbáꞌá! Tiꞌarakeꞌ peisá mobágóꞌ, mewaliꞌ tiꞌarakoꞌ woꞌo peisá moánti aleꞌmu.”
11Nauliꞌ tauna iti, “Tauna to mopakauriꞌaꞌ ininá mohuoꞌaꞌ, ‘Nulóló miꞌi aleꞌmu hai molumaomokoꞌ.’ ”
12Rapekuneꞌ, “Heáná to mohuoꞌkoꞌ moánti aleꞌmu hai molumao?” 13Agáiáná tiꞌara naisá kaheánáNa to mopakauriꞌ, láwiꞌ pohuꞌ miꞌi Iesu hai tiꞌara piꞌi raita i oloꞌraꞌ tauna to handaꞌ.
14Tiꞌara marue hangko ionoꞌ, Iesu lao mampohidupaꞌá tauna iti i tangabaa Támbina Pueꞌ Ala, Nahángáꞌá, “Deꞌe-deꞌe nulalu miꞌi. Ineeꞌ wopakoꞌ mobábehi dósá, bona tiꞌarakoꞌ narampe apa-apa to melumbuꞌ kakadakena.” 15Hangko ionoꞌ, lao miꞌi tauna iti mampohidupaꞌáheꞌ tadulakoraꞌ toIahudiꞌ, nahángáꞌáheꞌ kaꞌIesuna to mopakauriꞌ. 16Onoꞌ miꞌi haneꞌi tadulakoraꞌ toIahudiꞌ mantepuꞌu mopakasusa Iesu, láwiꞌ Ia mepakauriꞌ i alo penómbáꞌá.
17Nahángáꞌáheꞌ Iesu, “UmáNgkuꞌ mobágóꞌ oaꞌ alo-alona, tepasuaꞌ alo penómbáꞌá, hai Kódóꞌ woꞌo mobágóꞌAꞌ oaꞌ.”#5:17 Mouláꞌ toIahudiꞌ, Pueꞌ Ala peá to tiꞌara mengkaroo mobágóꞌ i alo penómbáꞌá. Kanauliꞌna Iesu Ia woꞌo mobágóꞌ oaꞌ, rarekeꞌ toIahudiꞌ Ia mopakóiꞌ Pueꞌ Ala, hai tauna to mopakóiꞌ Pueꞌ Ala hangaa-ngaa rawatui haweꞌ mate. 18Hangko ionoꞌ, tadulakoraꞌ toIahudiꞌ mopári-páriheꞌ oaꞌ mampeliꞌ rárá bona Iesu rahuku mate. Rabábehi noꞌonoꞌ, tiꞌara peá ánti kamoliungiNa ádá i alo penómbáꞌá, agáiáná láwiꞌ Nauliꞌ woꞌo kaPueꞌ Alana UmáNa; lempóna, Ia mopahibali wátáNa hai Pueꞌ Ala.
Pobágóꞌna hai kuasaꞌna Iesu
19Hangko ionoꞌ, Iesu mopakanótó i tadulakoraꞌ toIahudiꞌ, Nauliꞌ, “Toꞌu ntepuꞌu laluitaNgkuꞌ deꞌe: katoꞌuána kehapiꞌAꞌ Ánáꞌna Pueꞌ Ala, tiꞌaraꞌAꞌ peisá mobágóꞌ mouláꞌ peundeꞌáNgkuꞌ haduduáNgkuꞌ ane tiꞌaraꞌAꞌ moita apa to Nabábehi UmáNgkuꞌ, láwiꞌ bateꞌna iti miꞌi to Kupobágóꞌ. Apa to napobágóꞌ UmáNgkuꞌ, iti miꞌi woꞌo bágóꞌKuꞌ, láwiꞌ Kódóꞌ ÁnáꞌNaꞌAꞌ. 20UmáNgkuꞌ mampokaꞌahiꞌAꞌ, hai NatudeꞌáꞌAꞌ upu-upu to Nabábehi. Hai ara wopiꞌi tandaꞌ kuasaꞌ to ina NatudeꞌáꞌAꞌ to melumbuꞌ kamahilena hangko i tandaꞌ kuasaꞌ to roo miꞌi Kubábehi. Ina Kubábehi tandaꞌ kuasaꞌ iti hai ina nipotingkáráꞌ ntepuꞌu. 21UmáNgkuꞌ mampopearó tomate hai mampoweꞌiheꞌ katueꞌ, onoꞌ miꞌi haneꞌi Kódóꞌ woꞌo mampoweꞌi katueꞌ i heáná peá to mampeuláꞌi peundeꞌáNgkuꞌ. 22Tiꞌara UmáNgkuꞌ to ina mobutusi, ngkáliꞌna riꞌi upu-upu kuasaꞌ pobutusi iti Napeweꞌi miꞌi i Kódóꞌ, ÁnáꞌNa. 23Nabábehi noꞌonoꞌ, bona upu-upu tauna mobiláꞌAꞌ nodo woꞌo pebiláꞌraꞌ i UmáNgkuꞌ. Heáná to tiꞌaraꞌAꞌ mobiláꞌ, hibali hai tiꞌaraheꞌ woꞌo mobiláꞌ UmáNgkuꞌ to mohuoꞌAꞌ mai.
24Toꞌu ntepuꞌu laluitaNgkuꞌ deꞌe: heáná peá to mampehádingi laluitaNgkuꞌ hai mepoinálái i Pueꞌ Ala to mohuoꞌAꞌ mai, molámbiꞌmoheꞌ katueꞌ to maroꞌa to tiꞌara mokahópóꞌá. Tiꞌarapoheꞌ molámbiꞌ pehuku láwiꞌ tiꞌarapoheꞌ nodo tauna to ina mampolumaoi kapate,#5:24 tiꞌarapoheꞌ nodo tauna to ina mampolumaoi kapate: Lempóna, tiꞌaraheꞌ tegááki hangko i Pueꞌ Ala. ngkáliꞌna riꞌi mantepuꞌumoheꞌ molámbiꞌ katueꞌ to maroꞌa to tiꞌara mokahópóꞌá. 25Toꞌu ntepuꞌu laluitaNgkuꞌ deꞌe: ina haweꞌ tempóna, hai haweꞌ miꞌi tempóna, to tiꞌara maniheꞌ mepoinálái ina mohádi wambaꞌna Ánáꞌna Pueꞌ Ala, haneꞌiheꞌ ina mepoinálái hai molámbiꞌheꞌ katueꞌ to woꞌu. 26UmáNgkuꞌ makuasaꞌ mampoweꞌi katueꞌ. Noꞌonoꞌ woꞌo, NaweꞌiMoꞌ kuasaꞌ mampoweꞌi katueꞌ to tiꞌara mokahópóꞌá. 27NaweꞌiMoꞌ woꞌo kuasaꞌ mobutusi kárá-káráraꞌ tauna, láwiꞌ Kódóꞌ Ánáꞌ Mánusiá.
28-29Ineeꞌ nipotingkáráꞌ laluitaNgkuꞌ deꞌe, láwiꞌ hangkani tempó upu-upu tauna to mate ina mohádi wambaꞌKuꞌ, hai ina mearóheꞌ hangko i popatawuáraꞌ. Tauna to mobábehi to maroꞌa ina rapopearóheꞌ bona molámbiꞌheꞌ katueꞌ to maroꞌa. Agáiáná tauna to mobábehi to kadake ina rapopearóheꞌ bona rahukuheꞌ.”
Iesu mopakanótó heáná katoꞌuána sabiꞌNa
30Iesu mopaliliu wopiꞌi laluitaNa, Nauliꞌ, “Kódóꞌ tiꞌaraꞌAꞌ peisá mobábehi apa-apa mouláꞌ peundeꞌáNgkuꞌ haduduáNgkuꞌ. Kubutusi upu-upuna mouláꞌ apa to nahawaꞌáꞌAꞌ UmáNgkuꞌ. PobutusiNgkuꞌ hintotoꞌ, láwiꞌ tiꞌaraꞌAꞌ mouláꞌ peundeꞌáNgkuꞌ haduduáNgkuꞌ, mouláꞌraꞌAꞌ peundeꞌána Pueꞌ Ala to mohuoꞌAꞌ.
31Ane Kódóꞌ peá haduduáNgkuꞌ to manguliꞌ kahangko i Pueꞌ AlaNgkuꞌ, {hai tiꞌara ara tauna ntániꞌna to mosabikiAꞌ,} ketiꞌara niꞌisá ba toꞌu laluitaNgkuꞌ ba tiꞌara.#5:31 Mouláꞌ áturáraꞌ toIahudiꞌ, hangaa-ngaa ara rodua to mesabiki. Básá Pohuleki 17:6; 19:5; Matiu 18:16. 32Agáiáná ara to ntániꞌna to mosabikiAꞌ, ia miꞌi UmáNgkuꞌ, hai Kuisá katoꞌuna posabikiNa.
33Hangkoia kómu mohuoꞌkou huoꞌámi lao i Iohane mampekuneꞌ kana i Kódóꞌ,#5:33 Básá Iohane 1:19. hai ia mohángáꞌáheꞌ posabikina. Apa to nauliꞌ mokana i Kódóꞌ, upu-upuna toꞌu.#5:33 Básá Iohane 1:29-34. 34Agáiáná katoꞌuána tiꞌara Kuparaluu sabiꞌ hangko i tauna. Kupopambuhinaoákou laluitana iti, bona molámbiꞌkou katueꞌ to maroꞌa. 35Tempóna mani Iohane moriu tauna, ia nodo huluꞌ to mewangkaꞌ hai moánti kamabaa i kómu, hai góeꞌkou mohádi laluitana. Agáiáná kagóeꞌmi iti hampaiꞌ peá.
36Agáiáná Kódóꞌ, ara sabiꞌKuꞌ to mopakanótó kaheánáNgkuꞌ, hai sabiꞌ iti melumbuꞌ mani hangko i posabiꞌna Iohane. Ane niꞌita pobágóꞌKuꞌ, iti miꞌi to mopakanótó kaheánáNgkuꞌ. Apa to Kubábehi deꞌe-deꞌe, iti miꞌi tandaꞌ kuasaꞌ to nahawaꞌiáꞌAꞌ UmáNgkuꞌ bona Kuparoo. Tandaꞌ kuasaꞌ to Kubábehi, iti to mopakanótó kaKódóꞌna to nahuoꞌ UmáNgkuꞌ mai i duniáꞌ deꞌe. 37Hai melumbuꞌ hangko i hinti, UmáNgkuꞌ to mohuoꞌAꞌ mai, Ia haduduáNa mewaliꞌ sabiꞌKuꞌ bona mopakanótó kaKódóꞌna HuoꞌáNa. Agáiáná kómu, tiꞌara mani haweꞌ hangkani nihádi wambaꞌNa, tiꞌara mani niꞌita lenggeꞌNa. 38LaluitaNa tiꞌara nipailalu, láwiꞌ tiꞌarakou mepoinálái i Kódóꞌ to Nahuoꞌ mai. 39Pakakou mampegurui Sura Magasaꞌ, láwiꞌ nipekiri ane mampeguruikou Sura Magasaꞌ iti, ina nilámbiꞌ katueꞌ to maroꞌa to tiꞌara mokahópóꞌá. Mole Sura Magasaꞌ iti mopakanótó kaheánáNgkuꞌ. 40Agáiáná kehapiꞌ noꞌonoꞌ, tiꞌara mani niundeꞌ mai i Kódóꞌ bona molámbiꞌkou katueꞌ to maroꞌa to tiꞌara mokahópóꞌá.
41TiꞌaraꞌAꞌ mampopetóiá i tauna, 42agáiáná Kuisá ntepuꞌu lalumi, katiꞌárána ara ahiꞌmi i Pueꞌ Ala. 43MaiAꞌ ieneꞌ hai kuasaꞌ to hangko i UmáNgkuꞌ, tiꞌaraꞌAꞌ nitarima. Agáiáná ane araheꞌ to mai i lalu kuasaꞌraꞌ haduduáraꞌ, nitarimaheꞌ. 44Noumbá miꞌi kaꞌina mepoináláimi i Kódóꞌ, láwiꞌ niundeꞌ mani ratóiákou hángká rángámi. Kómu, tiꞌara niundeꞌ mobáliki lalumi bona natóiákou Pueꞌ Ala haduduáNa. 45Ineeꞌ nipekiri kaKódóꞌna to ina mosalaꞌikou i UmáNgkuꞌ. Nipekiri ánti peuláꞌmi i Paturoꞌna Musa, ia to ina mampelaekou. Tiꞌara. Ngkáliꞌna riꞌi, nabiꞌ Musa to ina mosalaꞌikou. 46Agáiáná ane toꞌu-toꞌu kamepoináláimi i Musa, manótó nipoináláiAꞌ woꞌo, láwiꞌ Musa moukiꞌ mokana i Kódóꞌ.#5:46 Básá Pewaliꞌána 3:15; 49:10; Pesuwuꞌá 12:21,46; Poimbaꞌ 21:9; 24:17; Pohuleki 18:15-19. 47Láwiꞌ tiꞌara nipoinálái apa to naukiꞌ Musa, laluitaNgkuꞌ woꞌo tiꞌara ina nipoinálái.”
Currently Selected:
Iohane 5: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.