Iohane 4
4
Iesu molaluita hai hadua towawine toSamaria
1ToParisi mohádimoheꞌ bámbári to manguliꞌ kahandaꞌ-handaꞌá miꞌi tauna to lao mampoperiu i Iesu, álána melumbuꞌ kahandaꞌraꞌ tauna to meuláꞌ i Iesu haneꞌi tauna to meuláꞌ i Iohane. 2Katoꞌuána, tiꞌara Iesu to meriu, agáiáná topeguruNa riꞌi to meriu. 3Kanaisána Iesu apa to rahádi toParisi iti, Ia pohuꞌ miꞌi hangko i tampoꞌ Iudá mesuleꞌ lao i tampoꞌ Galilea.#4:3 Naisá miꞌi Iesu toParisi ina kóiꞌ inaoraꞌ, agáiáná tiꞌara mani haweꞌ tempóna ina mosisalaꞌ Iesu hai tadulakoraꞌ toIahudiꞌ.
4I polumaoNa iti, Ia hangaa-ngaa moliu i tampoꞌraꞌ toSamaria. 5-6Kalialo, haweꞌ miꞌi i wánuáraꞌ toSamaria to rahangaꞌ Sika, tiꞌara karaoꞌ hangko i tampoꞌ to napeweꞌi Iako hangkoia i Iusupu ánáꞌna.#4:5-6 Básá Pewaliꞌána 48:22. I rawa wánuá iti, ara hambuaꞌ tibubuꞌ to rahangaꞌ tibubuꞌna Iako. Mehoda miꞌi Iesu i wiwi tibubuꞌ iti, láwiꞌ mawonggoꞌ molumao. 7-8Topegurunaheꞌ liliu lao i wánuá mohóló pandeꞌraꞌ.
Tiꞌara marue, haweꞌ miꞌi hadua towawine toSamaria mai mantámbuꞌ. Nauliꞌ Iesu, “Inaꞌ, nuweꞌiaꞌ wongkódóꞌá uwai Kuinu.”
9Tingkáráꞌ laluna towawine iti, láwiꞌ biásána tiꞌara raundeꞌ toIahudiꞌ mopakeꞌ taboꞌ ba mangkuraꞌ toSamaria.#4:9 toSamaria: Básá to teukiꞌ i Kahirámpuá Laluita. Onoꞌ miꞌi haneꞌi nauliꞌ, “Io toIahudiꞌKoꞌ, kódóꞌ towawine toSamariaꞌaꞌ. Mewaliꞌ, moapa riꞌi haneꞌi membiáꞌKoꞌ uwai i kódóꞌ?”
10Nauliꞌ Iesu, “Ane nuisá kamahilena pewátiꞌ to hangko i Pueꞌ Ala, hai ane nuisá woꞌo kaheánáNgkuꞌ to membiáꞌ uwai, hangaa-ngaa membiáꞌkoꞌ woꞌo uwai i Kódóꞌ, hai ina Kuweꞌikoꞌ uwai ngkatueꞌ.”
11Nauliꞌ towawine iti, “Tuá, hangko iumbá uwai ngkatueꞌ to Nuꞌuliꞌ iti? Tiꞌara ara popetámbuꞌMu, hai tibubuꞌ deꞌe kaladu. 12Tibubuꞌ deꞌe sosorangkiꞌ hangko i Iako, toiorungkiꞌ hangkoia. Ia mainu uwai hangko ieneꞌ, noꞌonoꞌheꞌ woꞌo ánáꞌna hai binataꞌna. Ba Nuꞌuliꞌ riꞌi melumbuꞌ tueꞌMu hangko i tueꞌna Iako haneꞌi peisáKoꞌ mampoweꞌi uwai to melumbuꞌ kamaroꞌana hangko i uwai tibubuꞌ deꞌe?”
13Nauliꞌ Iesu, “Upu-upu tauna to mainu uwai hangko i tibubuꞌ deꞌe, ina mangkadoꞌuheꞌ huleꞌ. 14Agáiáná heáná to mainu uwai to Kuweꞌi, tiꞌarapoheꞌ ina mangkadoꞌu duuꞌna i rue-ruena, láwiꞌ uwai to Kuweꞌiheꞌ iti ina mewaliꞌ uwai ngkatueꞌ to moili oaꞌ i laluraꞌ; lempóna, ina molámbiꞌheꞌ katueꞌ to maroꞌa to tiꞌara mokahópóꞌá.”
15Nauliꞌ towawine iti, “Ane noꞌonoꞌi tuá, Nuweꞌimoꞌ uwai iti, bona tiꞌarapoꞌ mangkakadoꞌu, hai tiꞌarapoꞌ paraluu mai mantámbuꞌ alo-alona ieneꞌ.”
16Nauliꞌ Iesu, “Laomokoꞌ sieruꞌ mokióꞌ toámámu, haneꞌi mesuleꞌkoꞌ mai.”#4:16 Naisá Iesu, katiꞌárána naisá towawine iti tunggáiáNa, agáiáná Naundeꞌ Iesu mopatongawaꞌ kaheánáNa i towawine iti, bona naisá towawine iti kaꞌIana Datu Topehómpóꞌ, hai Ia to peisá mampoweꞌi katueꞌ to maroꞌa to tiꞌara mokahópóꞌá.
17Nauliꞌ towawine iti, “Tiꞌara ara toámángkuꞌ.”
Nauliꞌ Iesu, “Toꞌu laluitamu. Tiꞌara ara toámámu. 18Lima miꞌi kánimu motoama, hai tobaleilo to nuporángá deꞌe-deꞌe, tiꞌaranto toámámu. Mewaliꞌ toꞌu mpuꞌu laluitamu ininá.”
19Nauliꞌ towawine iti, “Kuisá miꞌi Io hadua nabiꞌ!#4:19 Io hadua nabiꞌ: Mouláꞌ toSamaria, tiꞌara ara nabiꞌ meusungi hangko i nabiꞌ Musa. Tiꞌaraheꞌ woꞌo mehárungá ina ara hadua nabiꞌ to nodo nabiꞌ Musa (básá Pohuleki 18:18) to ina mewaliꞌ Datu Topehómpóꞌ. Naisá towawine deꞌe Iesu moisá apa to Pueꞌ Ala peá moisá mokana katueꞌna. 20Kaiꞌ toSamaria menómbá i buluꞌ Korasi deꞌe, i buluꞌ penómbáꞌáraꞌ toiorungkiꞌ. Agáiáná panguliꞌmi toIahudiꞌ, i Ierusale peá penómbáꞌá to toꞌu.”
21Nauliꞌ Iesu, “Inaꞌ, mampoináláimokoꞌ laluitaNgkuꞌ deꞌe: ina haweꞌ tempóna, tauna ina menómbá i Pueꞌ Ala iumbá-umbá peá, tiꞌara peá i Ierusale, hai tiꞌara peá woꞌo i buluꞌ deꞌe. 22Kómu toSamaria, tiꞌara niꞌisá kaheánáNa to nipenómbái. Kaiꞌ toIahudiꞌ, kiꞌisá kaheánáNa to kipenómbái, láwiꞌ ara dándina Pueꞌ Ala to manguliꞌ ina haweꞌ hadua hangko i oloꞌraꞌ toIahudiꞌ to ina moánti katueꞌ to maroꞌa i tauna. 23Agáiáná ina haweꞌ tempóna, hai katoꞌuána deꞌe-deꞌe haweꞌ miꞌi tempóna, tauna ina menómbá i Pueꞌ Ala Umántaꞌ, hangaa-ngaa menómbáheꞌ i Hia mouláꞌ paturoꞌ to toꞌu hai moliu peteteꞌna Inao to Magasaꞌ.#4:23 Peisá woꞌo ralempónga: hangko i laluraꞌ ntepuꞌu. Tauna to menómbá noꞌonoꞌ, itimoheꞌ to naundeꞌ Pueꞌ Ala Umántaꞌ. 24Pueꞌ Ala ia miꞌi Inao. Onoꞌ miꞌi haneꞌi tauna to menómbá i Hia, hangaa-ngaa menómbá hangko i laluraꞌ ntepuꞌu hai i katoꞌu-toꞌuána.”
25Nauliꞌ towawine iti, “To kuisá, ina haweꞌ Datu Topehómpóꞌ, to rauliꞌ woꞌo Kerisitu.#4:25 Kerisitu: básá Iunani. I lalu básá Iberani: toMásehi. I lalu básá Behóá, “Datu Topehómpóꞌ”. Ane haweꞌi, Ia miꞌi to ina mopakanótó i kitaꞌ upu-upuna to ara.”
26Nauliꞌ Iesu, “Kódóꞌ miꞌi deꞌe#4:26 Kódóꞌ miꞌi deꞌe: Hai laluitaNa deꞌe, Iesu mopakeꞌ hangaꞌna Pueꞌ Ala to napahaweꞌ Pueꞌ Ala i Musa. Básá Pesuwuꞌá 3:14. Básá woꞌo Iesaia 41:4; 43:10-13; 43:25; 46:4; 48:12 kana i hangaꞌna Pueꞌ Ala. Básá apa to pewaliꞌ ane Iesu molaluita noꞌonoꞌ i toIahudiꞌ (Iohane 6:20; 8:24; 8:58; 13:19; 18:5). Básá woꞌo to teukiꞌ i wóiꞌ Iohane 6:35. Datu Topehómpóꞌ, to tangaꞌKuꞌ molaluita hai io.”
27Tangaꞌraꞌ mani molaluita, haweꞌmoheꞌ topeguruNa hangko i wánuá. Tingkáráꞌheꞌ moita Iesu molaluita hai hadua towawine,#4:27 Mouláꞌ ádáraꞌ toIahudiꞌ, tobaleilo tiꞌara peisá molaluita hai towawine i rawa, apa mani ane roduduáraꞌ. agáiáná tiꞌara haweꞌ hadua to pebáiꞌ mekuneꞌ i towawine iti ba apa paraluuna. Tiꞌaraheꞌ woꞌo pebáiꞌ mekuneꞌ i Iesu ba apa tunggáiáNa molaluita hai towawine iti.
28Hangko ionoꞌ, towawine iti mopálehi gumbaꞌna, lao miꞌi i wánuá mopahaweꞌ i tauna to ionoꞌ, 29“Maikou! Laokeꞌ mampohidupaꞌá hadua tauna to mopatongawaꞌáꞌaꞌ upu-upu bábehiángkuꞌ. Ba Ia mpuꞌu miꞌi Datu Topehómpóꞌ?” 30Onoꞌ haneꞌi laomoheꞌ i rawa wánuá bona mampohidupaꞌáheꞌ Iesu.
31Tangaꞌna towawine iti lao i wánuá, topeguruna Iesu manguliꞌ, “Guru, mandeꞌmokeꞌ.”
32Agáiáná nauliꞌ Iesu, “Ara pandeꞌKuꞌ to tiꞌara niꞌisá.”
33Mombekuneꞌ-kuneꞌheꞌ topeguruNa, rauliꞌ, “Heáná riꞌi to mampoántiá pandeꞌNa?”
34Onoꞌ miꞌi haneꞌi nahángáꞌáheꞌ Iesu, “PandeꞌKuꞌ, ia miꞌi mampeuláꞌi peundeꞌána Pueꞌ Ala to mohuoꞌAꞌ mai, hai moparoo bágóꞌ to NaweꞌiAꞌ. 35Paka niuliꞌ node: iba mani wulána, hangko meparerakeꞌ. Agáiáná Kuhángáꞌáꞌákou: nipeita reiꞌ mantoleli. Handaꞌ tauna to timamamoheꞌ mampoinálái laluitaNgkuꞌ. Hira nodo pare to mabádáꞌ, to timama miꞌi ina rapepare. 36Kódóꞌ to mopahaweꞌ ngkóráꞌna Pueꞌ, peisáꞌAꞌ rapándiriꞌ nodo to mantudaꞌ. Kómu to modureiheꞌ tauna bona mampoináláiheꞌ ngkóráꞌna Pueꞌ, peisákou rapándiriꞌ nodo tauna to mepare. Ánti pobágóꞌmi, ina molámbiꞌkou háwángina, hai handaꞌ tauna ina molámbiꞌ katueꞌ to maroꞌa to tiꞌara mokahópóꞌá. Ane mewaliꞌ iti, ina góeꞌkeꞌ hingkakani. 37Mewaliꞌ toꞌu ntepuꞌu laluita to manguliꞌ: ‘Hadua to mantudaꞌ, to haduána to mampepare.’ 38Kuhuoꞌkou lao mepare i hinoe to tiꞌara nitudaꞌi. Tauna ntániꞌna#4:38 tauna ntániꞌna: tepasuaꞌ nabiꞌ-nabiꞌ hai Iohane Toperiu. riꞌi to motudaꞌi, agáiáná kómu miꞌi to mampepare wuaꞌna pobágóꞌraꞌ.”
39I wánuáraꞌ toSamaria, handaꞌ tauna to mepoinálái i Iesu, láwiꞌ mohádiheꞌ laluitana towawine iti ininá to manguliꞌ, “Nahángáꞌámoꞌ hinángkáꞌna bábehiángkuꞌ.” 40Mewaliꞌ, laomoheꞌ mampohidupaꞌá Iesu, hai rapembiáꞌ bona mehupeꞌ i wánuáraꞌ. Onoꞌ miꞌi haneꞌi Iesu hai topeguruNa rombengiheꞌ ionoꞌ.
41Hangko ionoꞌ, kahandaꞌ-handaꞌáheꞌ pueꞌ wánuá to mepoinálái i Iesu, láwiꞌ mampehádingi mpuꞌumoheꞌ laluitaNa. 42Rauliꞌ pueꞌ wánuá i towawine iti, “Deꞌe-deꞌe kipoinálái ntepuꞌu kaꞌIana miꞌi Datu Topehómpóꞌ, tiꞌara ánti kaꞌiona to mohángáꞌáꞌangkaiꞌ, agáiáná láwiꞌ kakihádina miꞌi haduduángkiꞌ laluitaNa, hai kiꞌisá kaꞌIana mpuꞌu miꞌi Topohómpóꞌ Salaꞌna upu-upu tauna i duniáꞌ.”
Iesu mesuleꞌ lao i tampoꞌ Galilea
43-44Bahangapa alona to liu, Iesu manguliꞌ, “Hadua nabiꞌ tiꞌara rabiláꞌ i tampoꞌ karapamahileána.” Mewaliꞌ liu miꞌi rongalo i tampoꞌ Samaria, Napaliliu wopiꞌi polumaoNa lao i tampoꞌ Galilea.#4:43-44 Naisá miꞌi Iesu, ane tiꞌara rabiláꞌ, tiꞌara ina ara posisalaꞌ hai tadulakoraꞌ toIahudiꞌ. 45KahaweꞌNa i Galilea, pueꞌ wánuá motarima Iesu hangko i laluraꞌ ntepuꞌu, láwiꞌ araheꞌ iaꞌo i Ierusale i tempóna Iesu mouláꞌ Alo Posusa Paska, hai moita mataheꞌ upu-upu tandaꞌ kuasaꞌ to Nabábehi i tempó iti.
Iesu mopakauriꞌ ánáꞌna hadua to mobágóꞌ i támbina datu
(Mat. 8:5-13; Luk. 7:1-10)
46I tampoꞌ Galilea, haweꞌ wopiꞌi Iesu i wánuá Kana, i wánuá pampopewaliꞌáNa uwai mewaliꞌ anggoroꞌ. Ionoꞌ ara hadua tauna to mobágóꞌ i támbina datu i wánuá Kapenau. Ánáꞌna tobaleilo rumihi kamaduꞌana. 47Kamohádina peá Iesu haweꞌ i tampoꞌ Galilea hangko i tampoꞌ Iudá, ia lao mampohidupaꞌá Iesu, hai nauliꞌ, “Tuá, laokeꞌ i Kapenau, Nupakauriꞌ wongkódóꞌá ánáꞌkuꞌ, láwiꞌ ina mate miꞌi.”
48Nauliꞌ Iesu, “Kómu to tueꞌ tempó deꞌe, tiꞌarakou ina mampoinálái kahangko i Pueꞌ AlaNgkuꞌ, ane tiꞌarakou moita tandaꞌ kuasaꞌ!”
49Nauliꞌ tauna iti, “Tuá, laokeꞌ, láwiꞌ ánáꞌkuꞌ hungkuꞌ miꞌi mate!”
50Nauliꞌ Iesu, “Mesuleꞌmokoꞌ. Ánáꞌmu ina nalalunto.” Tauna iti mampoinálái ntepuꞌu laluitana Iesu, haneꞌi mesuleꞌ miꞌi. 51Tangaꞌna mani i rárá, bahangapaheꞌ hawiꞌna lao mampohidupaꞌá, rahángáꞌá, “Maroꞌa-roꞌa miꞌi ánáꞌmu!”
52Nakuneꞌheꞌ, “Tintiꞌ hangapa mantepuꞌu nalalu?”
Rauliꞌ, “Iamáindi, tintiꞌ isáꞌ kalialo, mengkaroo miꞌi kamalengiꞌna.” 53Mewaliꞌ naisá miꞌi tauna iti, i tempóna Iesu manguliꞌ, “Ánáꞌmu ina nalalunto,” tempó iti woꞌo nalalu miꞌi. Hangko ionoꞌ, tauna iti mepoinálái miꞌi i Iesu hingkakani hai upu-upu hantámbiána.
54Iti miꞌi tandaꞌ kuasaꞌ to karongkánina to nabábehi Iesu i tampoꞌ Galilea i kahaweꞌNa hangko i tampoꞌ Iudá.
Currently Selected:
Iohane 4: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.