Iohane 15
15
Iesu ia miꞌi tóáꞌ anggoroꞌ to toꞌu
1Tangaꞌraꞌ molumao, Iesu mopaliliu wopiꞌi laluitaNa, Nauliꞌ, “Kódóꞌ miꞌi deꞌe tóáꞌ anggoroꞌ to toꞌu, hai UmáNgkuꞌ topokádipurá anggoroꞌ. 2Upu-upu dáꞌáNgkuꞌ to tiꞌara mowuaꞌ, Nawehángi, hai upu-upu dáꞌáNgkuꞌ to mowuaꞌ, Nakadiri hai Nakádipurá bona tetámbái powuaꞌna. 3Kómu, magasaꞌmokou ánti pohádimi laluita to Kuhángáꞌáꞌámokou.
4Hangaa-ngaa mohintuwuꞌkou oaꞌ hai Kódóꞌ. Ane nibábehi noꞌonoꞌ, Kódóꞌ woꞌo ina mohintuwuꞌ hai kómu. Dáꞌá to tiꞌara mentakaꞌ i tóáꞌ anggoroꞌ, tiꞌara mowuaꞌ. Bateꞌna peá dáꞌá to mentakaꞌ i tóáꞌna to ina mowuaꞌ. Noꞌonoꞌ woꞌo kómu: tiꞌarakou peisá mowuaꞌ ane tiꞌarakou mohintuwuꞌ hai Kódóꞌ.
5Kódóꞌ miꞌi deꞌe tóáꞌ anggoroꞌ, hai kómu miꞌi dáꞌána. Heáná tauna to mohintuwuꞌ oaꞌ hai Kódóꞌ, hai Kódóꞌ woꞌo mohintuwuꞌ oaꞌ hai hira, ina handaꞌ powuaꞌraꞌ.#15:5 ina handaꞌ powuaꞌraꞌ: Lempóna, handaꞌ bábehiáraꞌ to ina hiolaꞌ hai peundeꞌána Pueꞌ Ala. Agáiáná ane megáákikou hangko i Kódóꞌ, tiꞌarakou peisá mobábehi apa-apa. 6Heáná to tiꞌara mohintuwuꞌ hai Kódóꞌ, bateꞌraꞌ ratibe nodo karatibena dáꞌá to rawehángi duuꞌna mewaliꞌ bangi. Dáꞌána iti rarámpu haneꞌi ratibe i lalu api.#15:6 Básá woꞌo Ieheskie 15:1-8. 7Ane mohintuwuꞌkou oaꞌ hai Kódóꞌ, hai laluitaNgkuꞌ nipailalu, peisá nipembiáꞌ i Pueꞌ Ala apa peundeꞌámi, hai bateꞌna ina Nabukeki. 8Ane handaꞌ powuaꞌmi, UmáNgkuꞌ rapomahile hai tongawaꞌ kómu topeguruNgkuꞌ mpuꞌukou. 9Kódóꞌ mampokaꞌahiꞌkou hibali hai kamaꞌahiꞌna UmáNgkuꞌ i Kódóꞌ. Hai hangaa-ngaa tueꞌkou oaꞌ i lalu kamaꞌahiꞌKuꞌ. 10Kupeuláꞌi hawaꞌna UmáNgkuꞌ hai tueꞌAꞌ i lalu kamaꞌahiꞌNa. Noꞌonoꞌ woꞌo, ane nipeuláꞌi hawaꞌKuꞌ, ina tueꞌkou woꞌo i lalu kamaꞌahiꞌKuꞌ.
11Upu-upu deꞌe Kuhángáꞌáꞌákou, bona kagóeꞌKuꞌ ara i lalumi, hai ina bukeꞌ kagóeꞌmi.
12Deꞌe miꞌe hawaꞌKuꞌ: mombepokaꞌahiꞌmokou, nodo woꞌo Kódóꞌ mampokaꞌahiꞌkou. 13Tiꞌara ara ahiꞌ to melumbuꞌ kamahilena hangko i ahiꞌna hadua tauna to mohuhuꞌ tueꞌna bona mohómpóki rángána. 14RángáNgkuꞌ mpuꞌukou ane nibábehi apa to Kuhawaꞌákou. 15Tiꞌarapokou Kuꞌuliꞌ topobágóꞌKuꞌ, láwiꞌ hadua topobágóꞌ tiꞌara moisá apa to i lalu pekirina pueꞌna. Deꞌe-deꞌe, rángáNgkuꞌ mpuꞌumokou, láwiꞌ upu-upu to nahángáꞌáꞌáꞌAꞌ UmáNgkuꞌ Kupahaweꞌámokou. 16Tiꞌara kómu to mopileꞌiAꞌ, agáiáná Kódóꞌ riꞌi to mopileꞌikou, hai Kupakanótó miꞌi bona laokou mampopolumao bágóꞌKuꞌ; hai wuaꞌ pobágóꞌmi iti tiꞌara ina matántá, agáiáná ina mobunduꞌ duuꞌna i rue-ruena. Mewaliꞌ, apa to nipembiáꞌ i UmáNgkuꞌ i lalu hangaꞌKuꞌ, bateꞌna mpuꞌu ina Naweꞌikou. 17Hangkani mani Kuhángáꞌáꞌákou: hangaa-ngaa mombepokaꞌahiꞌkou!”
Topeguruna Iesu ina rakáhihiꞌ
18Iesu mopaliliu wopiꞌi laluitaNa, Nauliꞌ, “Ane rakáhihiꞌkou tauna to tiꞌara mepoinálái i Kódóꞌ, hangaa-ngaa nibuhinao: Kódóꞌ miꞌi to ioru-oru rakáhihiꞌ. 19Ane rápáꞌna mamporángákou tauna to tiꞌara mepoinálái, bateꞌna rapokaꞌahiꞌkou, láwiꞌ rángáraꞌkou. Agáiáná Kupileꞌimokou hai Kupataniꞌmokou hangko i oloꞌraꞌ, bona tiꞌarapokou raporángá, onoꞌ miꞌi haneꞌi rakáhihiꞌkou. 20Nibuhinao apa to Kuhángáꞌáꞌákou ininá: hadua topobágóꞌ tiꞌara melumbuꞌ karabiláꞌna hangko i pueꞌna. Kódóꞌ pueꞌmi rapopeahiahiꞌ, pelumbuꞌna mani kómu. Ane araheꞌ tauna to mampeuláꞌi laluitaNgkuꞌ, bateꞌraꞌ mampeuláꞌi woꞌo laluitami. 21Upu-upu iti ina rabábehi i kómu ánti peuláꞌmi i Kódóꞌ láwiꞌ tiꞌaraheꞌ moisá Pueꞌ Ala to mohuoꞌAꞌ mai. 22Ane ketiꞌaraꞌAꞌ mai hai mopaturoꞌheꞌ, ketiꞌaraheꞌ woꞌo masalaꞌ ánti karasápuákaNgkuꞌ. Agáiáná, láwiꞌ mai mpuꞌuMoꞌ hai mopaturoꞌheꞌ, onoꞌ miꞌi haneꞌi tiꞌara piꞌi ara rárá manguliꞌ katiꞌáráraꞌ masalaꞌ. 23Tauna to mokáhihiꞌAꞌ, hibali peá mokáhihiꞌheꞌ woꞌo UmáNgkuꞌ.
24I oloꞌraꞌ tauna to handaꞌ, Kubábehi tandaꞌ kuasaꞌ to tiꞌara mani rabábehi tauna ntániꞌna. Ane ketiꞌara Kubábehi noꞌonoꞌ, ketiꞌaraheꞌ masalaꞌ ánti karasápuákaNgkuꞌ. Agáiáná i karaitána apa to Kubábehi, rakáhihiꞌAꞌ oaꞌ, lempóna, UmáNgkuꞌ woꞌo rakáhihiꞌ. 25Agáiáná bateꞌna noꞌonoꞌ, bona tebukeki apa to teukiꞌ i lalu Sura Áturáraꞌ to manguliꞌ: ‘Kehapiꞌ tiꞌara ara salaꞌKuꞌ, bateꞌna rakáhihiꞌAꞌ.’#15:25 Básá Sura Petóiá 35:19.
26Inao to Magasaꞌ ina mai, lempóna: Inao to hangko i Pueꞌ Ala ina moteteꞌkou bona niꞌisá paturoꞌ to toꞌu. Ia miꞌi Topetulungi to ina Kuhuoꞌ mai i kómu to hangko i UmáNgkuꞌ. Ane haweꞌ mai, Ia miꞌi to ina mopakanótó kaheánáNgkuꞌ. 27Hai kómu woꞌo hangaa-ngaa mopakanótó kaheánáNgkuꞌ, láwiꞌ kómu miꞌi to hingkakani hai Kódóꞌ hangko i rungu-runguna pobágóꞌKuꞌ i duniáꞌ deꞌe.”
Currently Selected:
Iohane 15: NTBEP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bahasa Behoa Shorter Bible © Indonesian Bible Society, 2015.