लूका 23
23
पिलातुस रा यीशुये ते स्वाल पुछणा
1फेरी तिन्हारी सारी पंचायत उट्ठीने खढ़ी हुई कने सै तिस्सो पिलातुस राजपाल्ला रे सामणे लेईगे। 2सै यीशुये पर इल्जाम लगाणे लगे, “ये माहणु अहांरे लोकां जो बहकाणे लगीरा, ये तिन्हारे राजे कैसरा जो कर देणे ते मना कराँ! कने ये येढ़ा दावा कराँ भई हऊँ मसीह आ, कने अप्पूँजो इक राजा बोलदे हुये सुणया।” 3इस पर पिलातुसे यीशुये ते पुच्छया, “क्या तू यहूदियां रा राजा?” यीशुये जबाब दित्या, “हाँ, तूंई त बोलीराँ हऊँ सैई हाया।” 4फेरी पिलातुस मुखियायाजकां कने लोकां खा मुड़ीने गलाया, “मिन्जो इस माहणुये च कोई बी दोष नीं दिखदा।” 5पर सै इकदम बोलणे लगे, भई “इने सारे यहूदिया प्रदेशा च लोकां जो अपणे उपदेशां ने भड़काया। ये इने गलील प्रदेशा च शुरु कित्या था कने हुण येत्थी आईग्या।” 6येढ़ा सुणीने पिलातुसे पुच्छया, “क्या ये माहणु गलील प्रदेशा रा?” 7ताहली जे तिन्हे तिस्सो हाँ करदे हुये सुणया, फेरी पिलातुसे तिन्हाजो हेरोदेस अन्तिपास ले भेज्या। काँह्भई गलील प्रदेशा रा राजा हेरोदेसा रे अधिकारा च था, कने तिन्हे दिनें सै बी यरूशलेम ची था।
यीशुये रा हेरोदेस ले भेज्या जाणा
8हेरोदेस राजे ताहली जे यीशुये जो देख्या तां सै बड़ा खुश हुया, काँह्भई कईयां साल्लां ते सै तिस्सो देखणा चाहन्दा था। तिने यीशुये रे बारे च सुणीरा था; कने मतयां दिनां ते सै इसा आशा च था भई यीशुये जो कोई चमत्कार करदे हुये देक्खूं। 9तिने यीशुये ते कई तरह रे स्वाल पुछे, पर यीशुये तिसरे किसी स्वाला रा बी जबाब नीं दित्या। 10इस पर मुखियायाजक कने धर्म शास्त्री ऊथी खड़े हुईने जोरा-जोरा ने हल्ला पाईने यीशुये पर दोष लगाणे लगे। 11हेरोदेस बी अपणे सपाईयां समेत तिसने बुरा बरताव कित्या कने तिसरा मजाक चक्कया। फेरी तिन्हे तिस्सो इक शाही बस्त्र पैहनाईने वापस पिलातुस ले भेजित्या। 12राजा हेरोदेस कने पिलातुस राजपाल सै जे पैहले इक दुज्जे रे दुश्मण थे, तिस दिन सै दोन्नों मित्र बणिगे।
पिलातुस रा यीशुये जो मृत्यु दण्ड
13पिलातुस राजपाले मुखियायाजकां, यहूदी नेतयां कने लोकां जो बी सद्दीने कट्ठा कित्या कने तिन्हांने गलाया, 14“तुहें इस माहणुये जो मेरले ल्याये भई ये लोकां जो बहकाया राँ, कने देक्खा, मैं तुहांरे सामणे तिसरी जाँच कित्ती, पर तिन्हां गल्लां रा जे तुहें तिस पर इल्जाम लाया रायें, तिन्हां गल्लां रे बारे च मैं तिसच कोई बी दोष नीं पाया; 15कने राजा हेरोदेस बी, काँह्भई तिने इस माहणुये जो वापस अहांले भेजीत्या: इने माहणुये येढ़ा किछ बी नीं कित्तिरा, तिसा वजह ने जे इस्सो मौता री सजा दित्ति जाई सक्को। 16इस खातर माह सिर्फ इसजो कोड़े लगवाणे, कने ये छडी देणा।” 17पिलातुसा जो फसह रे इस त्योहारा रे मौके पर हर साल इक्की कैदिये जो लोकां रे खातर छडणे पौआं था। 18फेरी लोकें बड़ा हल्ला मचाया, सारे इक्की अवाज़ा च चिल्लाणे लगे, “इस्सो मारी देआ, कने बरअब्बा जो अहांरे खातर छडी देआ!” 19बरअब्बा जो नगरा च मार कुट करने कने खून करने रे जुरमा च जेल्ला च बन्द कीतिरा था। 20पर पिलातुस यीशुये जो छडी देणा चाँह था, इस खातर तिने लोकां जो फेरी भीं समझाया। 21पर सै येई नारा लान्दे रैये, “इस्सो क्रूसा पर चढ़ाओ, इस्सो क्रूसा पर चढ़ावा।” 22पिलातुसे तिज्जी दफा तिन्हाते पुच्छया, कांह? “इने माहणुये क्या जुरम कीतिरा? इस्सो मौता री सजा देणे लायक मिन्जो इसच येढ़ि कोई गल्ल नीं मिली। इस खातर माह इसजो सिर्फ कोड़े लवाई ने छडी देणा।” 23पर लोक ऊच्चिया अवाज़ा च नारे लगाई-लगाईने मांग करी रां थे भई इस्सो क्रूसा पर चढ़ाई दित्या जाओ। पर तिन्हारे नारेयां रा शोर इतणा बधीग्या भई 24पिलातुसे लोकां री मांगा रे मुतावक फैसला देईत्या भई इन्हांरी मंग मन्नी ली जाओ। 25पिलातुसे तिस माहणुये जो छडित्या सै जे मार कुट करने कने खून्ना रे जुरमा च जेल्ला च बन्द कीतिरा था, कने यीशुये जो तिन्हारे हवाले करित्या भई सै तेढ़ा जे चांयें, करा।
यीशुये रा क्रूसा पर चढ़ाया जाणा
26ताहली जे यीशुये जो ले जाईराँ थे, ताहली इक माहणु तिसरा नौं जे शमौन था, सै कुरेनी रा रैहणे औल़ा था, तिस बगत गाँवां ते आईराँ था। सपाहियें सै पकड़या कने तिस पर क्रूस लद्दीत्या, कने यीशुये रे पिच्छे चलने पर मजबूर करित्या। 27लोकां री इक बड्डी भीड़ तिसरे पिच्छे चलीरी थी, तिन्हां च मतियां जनानां बी रोन्दी कने बलाप करदियां चली रियां थी। 28पर यीशुये मुड़ीने तिन्हाने गलाया, “यरूशलेम री औरतो, मेरिया दशा पर मता रोन्दियां; पर तुहांजो कने तुहांरयां बच्चयां ने सै जे हुणे औल़ा तिस पर रोआ। 29काँह्भई सै पीड़ा रे दिन आई रायें ताहली जे लोकां बोलणा, कितणा भला हूणा तिन्हां जनानां रे खातर सै जे बांझ इयां, कने सै गर्भ तिन्हें जे बच्चे नीं जणे, कने तिन्हें जे दुध नीं प्याया। 30तिस बगत तिन्हां लोकां पर्वतां जो बोलणा भई अहां पर पईजो, कने पहाड़ियां ने बोलणा भई अहांजो दब्बी देआ। 31काँह्भई जे धर्मी माहणुये ने येढ़ा हुआं, तां कल्पना करा भई सजा पाणे रे लायक माहणुये सौगी क्या हूणा।” 32यीशुये सौगी दो होर माहणुआं जो सै जे अपराधी थे लेई जाया राँ थे, काँह्भई तिन्हाजो बी मौता री सजा दित्ति जाणी थी। 33ताहली जे सै तिसा जगह पुज्जे तिसाजो जे खोपड़ी बोलां थे। तित्थी जे सपाईयें तिन्हां तिन्नां जो क्रूसां पर लटकाया, यीशु बिच्चले क्रूसा पर था, कने तिसरे आजु बाजू रे क्रूसा पर सै दोन्नों अपराधी थे। 34यीशुये गलाया, “पिता जी, इन्हांजो माफ कर, काँह्भई ये नीं जाणदे भई ये क्या करी रायें।” फेरी सपाईयें पर्चियां पाईने अप्पूँ चियें तिसरे कपड़यां रा बन्डवारा कित्या। 35तित्थी लोक खढ़ी ने ये सरा किछ देखदे रैये। मुखिये यीशुये रा मजाक चक्की ने बोलीराँ थे, “इने होरीं जो त बचाया। जे ये परमेशरा रा मसीह आ कने तिसरा चुणीरा, तां अप्पूँजो बचाओ।” 36सपाईयें बी यीशुये रा मजाक बणाया कने तिस्सो पीणे खातर पाणिये रिया जगह सिरका दित्या। 37तिन्हे यीशुये जो हाक पाईने गलाया, “जे तू यहूदियां रा राजा, तां अप्पूँजो बचा।” 38यीशुये रे क्रूसा पर इक पट्टी लगाई तिस पर जे येढ़ा लिखिरा था, “येआ यहूदियां रा राजा।”
क्रूसा पर पश्चाताप करने औल़ा कुकर्मी
39सै अपराधी जे तिसरे अखा बखा रे क्रूसां पर लटकाई रे थे, तिन्हां चा ते इक्की यीशुये री निंध्या करदे हुये गलाया, “तां तूई मसीह आ, हाया नां? तां अप्पूँजो बी बचा कने सौगी अहांजो बी बचा!” 40पर दुज्जे, पैहले अपराधिये रा बरोध करदे हुये गलाया, “क्या तू परमेशरा ते नीं डरदा? तिज्जो बी सैई सजा मिली राईं। 41मिन्जो कने तिज्जो त अहांरे कित्तिरे जुरमां री सजा मिली राईं, पर इने माहणुये त कोई बी जुरम नीं कित्तिरा।” 42फेरी तिने गलाया, “यीशु, ताहली जे तू राजा बणीने राज करने आओ, ताहली मिन्जो याद रखयों।” 43यीशुये तिसने गलाया, “हऊँ चाँह भई तू जाणी लो, आज्ज तू मेरे सौगी स्वर्ग लोका च हूणा।”
यीशुये रा प्राण त्यागणा
44दुपैहरा रा बगत था, बारा बजे ते लेईने तिन्न बजे तक सारे देशा च अन्धेरा छाईरा रैया। 45सूरजा री रोशनी जान्दी रैई, कने मन्दरा रा पड़दा बिच्चा ते फटिग्या। 46फेरी यीशुये जोरा ने गलाया, “हे पिता, हऊँ अपणिया आत्मा जो तेरे हत्था च देआं!” इतणा बोलीने तिन्हे अपणे प्राण छड्डीते। 47सुबेदारे, सै जे तिस कम्मां री निगरानी करी रां था, तिने ये सब किछ हुन्दे हुये देख्या, तां तिने परमेशरा री बडयाई करदे हुये गलाया, “सच्चमुच ये माहणु बेकसूर था।” 48लोकां री भीड़ सै जे क्रूसा रिया सजा जो देखणे खातर कट्ठा हुईरी थी, सै तिसा सारिया घटना जो देखीने बौहत दुखी हुये कने घरा जो वापस चलिये। 49कने तिसरे सारे जाणने औल़े, कने सै जनानां जे गलील प्रदेशा ते तिस सौगी आईयां थिआं, थोड़ा दूर जे खढ़ी ने इन्हां सारियां गल्लां जो देखीरां थिआं।
अरिमतियाह रा यूसुफ रे जरिये यीशुये जो दफनाणा
50ऊथी यूसुफ नौआं रा इक भला कने धर्मी माहणु था, सै जे यहूदी पंचैती रा इक सदस्य था। 51सै तिन्हारे फैसले कने कार्यवाईया ते सहमत नीं था, सै यहूदियां रे इक नगर अरिमतियाह रा निवासी था कने परमेशरा रे राज्जा रे औणे रा इन्तजार करीराँ था। 52सै माहणु पिलातुस ले गया कने तिसते यीशुये री लाश मंगी। 53कने तिसरे शवा जो क्रूसा ते त्वारीने सणा रे बधिया कपड़े ने लपेटया कने इक नौंईयां कब्रा च रखया, सै जे सपड़ा जो खुणीने बणाईरी थी। 54ये शुक्रवारा रे दिन दपैहरा रे बादा रा बगत था, कने विस्राम रे खातर त्यारिया रा दिन था। 55कने तिन्हें जनानें सै जे तिसने गलील ते आईयां थिआं, पिच्छे-पिच्छे, जाईने तिसा कब्रा जो देख्या कने ये बी भई तिसरा शव किसा रितिया ने रखया गया। 56सै अपणे घरौ गईयां कने यीशुये रे शरीरा पर मल़णे खातर खुशबुदार चिज़ां त्यार कित्या। पर तिस समाना जो त्यार करदे-करदे विस्राम रा दिन आईग्या, कने मूसा रिया व्यवस्था रे मुतावक तिन्हे सारा दिन विस्राम कित्या।
Currently Selected:
लूका 23: KFSNT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This work is licensed under Creative Commons Attribution-ShareAlike 4.0 License.